वृत्त क्र. 678

शिवाजी महाराज पुतळा ते मुथा चौक रस्ता वाहतुकीस प्रतिबंध  

नांदेड, दि. 30 जून :- नांदेड शहरात रस्त्याच्या कामामुळे शिवाजी महाराज पुतळा ते मुथा चौक या मार्गावरील सर्व प्रकारच्या वाहतुकीस येत्या 1 ते 15 जुलै पर्यंत प्रतिबंध करण्यात आले आहे. या मार्गावरील वाहतुकीसाठी पर्यायी मार्ग म्हणून शिवाजी महाराज पुतळा-महावीर चौक ते मुथा चौक असा राहील. 

मोटार वाहन  कायदा 1988  चे कलम 115 मधील  तरतुदीनुसार जिल्‍हादंडाधिकारी राहुल कर्डिले यांनी संबंधित विभागाने पुढीलप्रमाणे उपाययोजना करुन 1 ते 15 जुलै 2025 कालावधीत नमुद  केलेल्‍या पर्यायी मार्गाने  सर्व प्रकारची वाहने  वळविण्‍यास  मान्‍यता दिली आहे. मुथा चौक ते महावीर चौक हा रस्‍ता एकेरी मार्ग असून रस्‍त्‍याचे काम होईपर्यंत सदर मार्ग दुहेरी वाहतुकीसाठी वापरण्‍यासाठी सुद्धा परवानगी देण्‍यात आली आहे.  

नांदेड पोलीस अधिक्षक यांनी कायदा व सुव्‍यवस्‍थेच्‍या अनुषंगाने आवश्‍यक ती उपाययोजना करावी. नांदेड सार्वजनिक बांधकाम विभागाचे कार्यकारी अभियंता यांनी रस्‍ता वाहतूक प्रतिबंध व पर्यायी रस्‍त्‍यासाठी आवश्‍यक असलेले बोर्ड, चिन्‍ह लावणे इत्‍यादी बाबतची कार्यवाही करावी, असेही अधिसूचनेत नमूद केले आहे.

00000

वृत्त क्र. 677

वादळी वाऱ्यासह पावसाची शक्यता  

३० जून १ व ४ जुलै या तीन दिवसासाठी यॅलो अलर्ट जारी  

नांदेड, दि. ३० जून:- प्रादेशिक हवामानशास्त्र केंद्र मुंबई यांनी 30 जून 2025 रोजी दुपारी दिलेल्या सूचनेनुसार नांदेड जिल्ह्यासाठी 30 जून, 01 जुलै, 04 जुलै 2025 या तीन दिवसासाठी यलो (Yellow) अलर्ट जारी केलेला आहे. 30 जून 2025 ह्या दिवशी जिल्ह्यात तुरळक ठिकाणी विजेच्या कडकडाटासह व ढगांच्या गडगडाटासह मुसळधार पाऊस व 01 जुलै व 04 जुलै 2025 हे दोन दिवस जिल्ह्यात तुरळक ठिकाणी ताशी 30 ते 40 किमी वेगाने वादळी वारे वाहण्याची, विजेच्या कडकडाटासह व ढगांच्या गडगडाटासह हलका ते मध्यम स्वरूपाचा पाऊस पडण्याची अधिक शक्यता वर्तविली आहे. या नैसर्गिक आपत्ती संदर्भात सर्व संबंधित यंत्रणा आणि जनतेने खबरदारी घ्यावी. नागरिकांनी खबरदारीची उपाययोजना म्हणून पुढील प्रमाणे काळजी घ्यावी, असे आवाहन जिल्हा प्रशासनाकडून करण्यात आले आहे. 

या गोष्टी करा 

विजेच्या गडगडाटासह पावसाची पूर्वकल्पना असल्यास बाहेर जाणे टाळा. जर मोकळ्या जागेत असाल आणि जवळपास कुठल्याही सुरक्षित इमारतीचा आसरा नसेल तर सखल जागेत जाऊन गुडघ्यात डोके घालून बसा. आकाशात विजा चमकत असल्यास घरात किंवा सुरक्षित इमारतीत आश्रय घ्या. घराच्या बाल्कनी, छत अथवा घराबाहेरील ओट्यावर थांबू नका. आपण घरात असाल आणि घरातील विद्युत उपकरणे चालू असतील तर त्या वस्तू त्वरित बंद करा. तारांचे कुंपण, विजेचे खांब व इतर लोखंडी वस्तूंपासून दूर रहा. पाण्यात उभे असाल तर तात्काळ पाण्यातून बाहेर पडा. तुमच्या स्मार्ट मोबाईल फोन मध्ये 'दामिनी', 'सचेत' हे दोन ॲप डाउनलोड करा 'दामिनी' ॲप तुमच्या आजूबाजूला वीज विषयक संभाव्य धोके दर्शविते तर 'सचेत' ॲप मुळे तुम्हाला तुमच्या आजूबाजूच्या हवामानाविषयी अचूक इशारे व माहिती मिळते.

या गोष्टी करु नका

आकाशात विजा चमकत असल्यास घरातील लँडलाईन फोनचा वापर करू नका. शॉवरखाली अंघोळ करू नका. घरातील बेसिनचे नळ, पाण्याची पाईपलाइन यांना स्पर्श करू नका तसेच कुठल्याही विद्युत उपकरणांचा वापर करू नका. विजेच्या गडगडाटासह वादळी वारे चालू असताना लोखंडी धातूच्या सहाय्याने उभारलेल्या तंबूमध्ये किंवा शेडमध्ये आसरा घेऊ नका. उंच झाडाच्या खाली आसरा घेऊ नका. धातूंच्या उंच मनोऱ्याजवळ उभे टाकू नका. जर आपण घरात असाल तर उघड्या दारातून अथवा खिडकीतून वीज पडताना पाहू नका. हे बाहेर थांबण्याइतकेच धोकादायक आहे. असे आवाहन जिल्हा प्रशासनाकडून करण्यात आले आहे.

०००००

वृत्त क्र. 676

 30 पेक्षा जास्त व 10 खाटांच्या रुग्णालयाचा आयुष्यमान भारत

व महात्मा जोतिराव फुले जन आरोग्य योजनेच्या पॅनलवर समावेश 

नांदेड, दि. 30 जून :- नांदेड जिल्ह्यातील 30 पेक्षा जास्त खाटांच्या रुग्णालयांचा आणि विशिष्ट 10 खाटांच्या एकल विशेषता रुग्णालयांचा एकत्रित आयुष्यमान भारत आणि महात्मा जोतिराव फुले जन आरोग्य योजनेत पॅनलवर समावेश करण्याची प्रक्रीया सुरु करण्यात आली आहे. 30 खाटांचे मल्टी स्पेशालिटी रुग्णालय  आणि 10 खाटांचे एकल विशेषता रुग्णालयांनी आयुष्यमान भारत प्रधानमंत्री जन आरोग्य योजना आणि महात्मा जोतिराव फुले जन आरोग्य योजनांमध्ये पात्र रुग्णालयांनी सहभागी व्हावे, असे आवाहन जिल्हा प्रशासन आणि आरोग्य विभाग यांनी केले आहे. 

यामुळे जिल्ह्यातील ग्रामीण आणि शहरी भागातील नागरिकांना मोफत वैद्यकीय सुविधा मिळतील. नागरिकांना जवळील पॅनलवरील रुग्णालयांची माहिती https://www.jeevandayee.gov.in या संकेत स्तळावर उपलब्ध केली आहे. 

नांदेड जिल्ह्यातील नागरिकांना दर्जेदार आणि परवडणाऱ्या वैद्यकीय सुविधा उपलब्ध करून देण्यासाठी जिल्ह्यातील 30 पेक्षा जास्त खाटा असलेल्या रुग्णालयांचा तसेच खालील विशिष्ट एकल विशेषता (सिंगल स्पेशालिटी) असलेल्या 10 खाटांच्या रुग्णालयांचा एकत्रित आयुष्मान भारत प्रधानमंत्री जन आरोग्य योजना आणि महात्मा जोतिराव फुले जन आरोग्य योजना यांच्या पॅनलवर समावेश करण्याची प्रक्रिया सुरू करण्यात आली आहे. या उपक्रमामुळे आर्थिकदृष्ट्या दुर्बल घटकांना मोठ्या प्रमाणात लाभ मिळेल आणि जिल्ह्यातील आरोग्य सुविधा अधिक सक्षम होतील. 

पात्र एकल विशेषता रुग्णालये (10 खाटांचे):

1. ईएनटी (नाक, कान, घसा)

2. नेत्ररोग शास्त्र (नेत्रविकार)

3. ऑर्थोपेडिक आणि पॉलीट्रॉमा (अस्थिव्यंग आणि पॉलिट्रॉमा)

4. बर्न (भाजणे)

5. बालरोग शस्त्रक्रिया

6. कर्करोग उपचार युनिट्स

7. नवजात आणि बालरोग वैद्यकीय व्यवस्थापन युनिट्स

8. हिमोडायलिसिस - मूत्रपिंड शास्त्र युनिट्स 

योजनांचा उद्देश

आयुष्यमान भारत प्रधानमंत्री जन आरोग्य योजना (AB PM-JAY) : केंद्र सरकारची ही योजना देशभरातील आर्थिकदृष्ट्या कमकुवत कुटुंबांना दरवर्षी 5 लाख रुपयांपर्यंत मोफत वैद्यकीय उपचार प्रदान करते. यामध्ये 1 हजार 356 प्रकारच्या गंभीर आजार, शस्त्रक्रिया आणि रुग्णालयात दाखल होण्याच्या खर्चाचा समावेश आहे.

महात्मा जोतिराव फुले जन आरोग्य : महाराष्ट्र सरकारची ही योजना राज्यातील पात्र लाभार्थ्यांना 5 लाख रुपयांपर्यंत मोफत वैद्यकीय उपचार देते. यामध्ये 1 हजार 356 प्रकारच्या शस्त्रक्रिया आणि विशेष उपचारांचा समावेश आहे.

 पॅनलवर समावेश प्रक्रिया:

पात्रता निकष

 30 पेक्षा जास्त खाटा असलेली रुग्णालये आणि वर नमूद केलेल्या विशेषता असलेली 10 खाटांची एकल विशेषता रुग्णालये जी राष्ट्रीय आरोग्य प्राधिकरण (एनएचए) आणि महाराष्ट्र राज्य आरोग्य हमी सोसायटी  निकषांची पूर्तता करतील. ती आयुष्यमान भारत प्रधानमंत्री जन आरोग्य योजना आणि महात्मा ज्योतिराव फुले जन आरोग्य योजनांच्या पॅनलवर समावेशासाठी पात्र ठरतील.

यामध्ये आधुनिक वैद्यकीय उपकरणे, प्रशिक्षित वैद्यकीय कर्मचारी आणि उच्च दर्जाची रुग्णसेवा यांचा समावेश आहे.

लाभ : पॅनलवरील रुग्णालयांमध्ये या दोन्ही योजनांतर्गत लाभार्थ्यांना मोफत उपचार मिळतील. यामुळे गंभीर आजारांवरील उपचार परवडणारे होतील आणि रुग्णांचे आर्थिक भार कमी होईल.

अर्ज प्रक्रिया: रुग्णालयांनी पॅनलवर समावेशासाठी https://www.jeevandayee.gov.in (MJPJAY) या संकेतस्थळांवर ऑनलाइन अर्ज करावा. अधिक माहितीसाठी नांदेड जिल्हा रुग्णालय येथे जिल्हा समन्वयक किंवा जिल्हा शल्य चिकित्सक यांच्याशी संपर्क साधावा.

सहाय्यकारी माहिती:

रुग्णालयांना अर्ज प्रक्रियेबाबत मार्गदर्शन मिळावे यासाठी ग्लोबल हेल्थ गुरु Global Health Guru या युट्युब चॅनेलवर "Hospital Empanelment Application Form भरण्याचे प्रशिक्षण व्हिडिओ" उपलब्ध आहे. रुग्णालय प्रतिनिधींनी YouTube वर Global Health Guru हे चॅनेल भेट देऊन व्हिडिओ पाहावा.

जिल्ह्यातील प्रमुख रुग्णालये:

नांदेड जिल्ह्यातील अनेक रुग्णालये ज्यात प्रामुख्याने ३० खाटांची रुग्णालये व नमूद केलेल्या विशेषता असलेली 10 खाटांची रुग्णालये देखील या योजनेत सहभागी होण्यासाठी पात्र ठरू शकतात.

संपर्क: अधिक माहितीसाठी किंवा पॅनलवर समावेशासाठी, कृपया डॉ. दिपेशकुमार शर्मा, जिल्हा रुग्णालय, दूरध्वनी: ८२७५०९५८१८  येथे संपर्क साधावा किंवा https://www.jeevandayee.gov.in वर भेट द्यावी.

टीप: रुग्णालयांनी पॅनलवर समावेशासाठी स्वतः पात्रता तपासावी आणि संबंधित अधिकाऱ्यांशी संपर्क साधावा व https://www.jeevandayee.gov.in सदरील संकेत स्तळावर अर्ज करावा.

00000

वृत्त क्र. 675

डॉ. शंकरराव चव्हाण शासकीय वैद्यकीय महाविद्यालयात

व्यसनमुक्ती मार्गदर्शन केंद्राची स्थापना 

नांदेड, दि. 30 जून :- केंद्र व राज्य शासनाच्या ड्रग मुक्त मोहिम, नशामुक्त भारत अभियान अंतर्गत वैद्यकीय शिक्षण व संशोधन संचालनालय अंतर्गत राबविण्यात येणाऱ्या उपक्रमाबाबत माहिती मिळावी व हे अभियान अधिक प्रभावीपणे राबविण्यासाठी नशाबंदी मंडळ, महाराष्ट्र राज्य यांचेकडून जिल्हा समन्वयक, नशाबंदी मंडळ हे सहकार्य करणार आहे. 

नशाबंदीबाबत जनजागृती व प्रशिक्षण आयोजित करणार आहे. याच अभियानाचा एक भाग म्हणून डॉ. शंकरराव चव्हाण शासकीय वैद्यकीय महाविद्यालय व रुग्णालय, विष्णुपूरी नांदेड येथील बाह्यरुग्ण विभागात दंतशल्यचिकित्सा विभागामधील तंबाखू प्रतिबंध केंद्रामध्ये व्यसनमुक्ती मार्गदर्शन केंद्राची स्थापना 28 जून रोजी करण्यात आली. या केंद्राचे उदघाटन अधिष्ठाता डॉ. सुधीर देशमुख यांच्या हस्ते करण्यात आले. 

यावेळी उप अधिष्ठाता डॉ. वाय.एच.चव्हाण, वैद्यकीय अधीक्षक डॉ. विजयकुमार कापसे, दंत शल्य चिकित्सा शास्त्र विभाग प्रमुख डॉ. भावना भगत, तंबाखू प्रतिबंध केंद्र प्रमुख यांचेसह डॉ. सुशील येमले, तंबाखू प्रतिबंध केंद्र प्रमुख यांच्यासह निवासी डॉक्टर्स, परिचर्या संवर्गातील कर्मचारी, रुग्ण व रुग्ण नातेवाईक हे उपस्थित होते. 

डॉ. शंकरराव चव्हाण शासकीय वैद्यकीय महाविद्यालय व रुग्णालय, विष्णुपूरी नांदेड येथील बाह्यरुग्ण विभागात व्यसनमुक्ती मार्गदर्शन केंद्राची स्थापना झाल्यामुळे व्यनाधीन व्यक्तीना, शारिरीक, मानसिक आणि सामाजिक आधार मिळण्यास मदत होईल आणि केंद्राच्या माध्यमातून त्या व्यक्तींना व्यसनातून बाहेर पडण्यासाठी समुपदेशन, उपचार व प्रेरणा मिळेल. या केंद्रामुळे व्यसनाबाबत समाजामध्ये जनजागृती होवून व्यसनमुक्त व सक्षम समाज निर्माण होईल अशी भावना अधिष्ठाता डॉ. सुधीर देशमुख यांनी व्यक्त केली.   

 00000

 वृत्त क्र. 674

इंडियन इन्स्टिटयुट ऑफ पब्लिक ऍडमिनिस्ट्रेशन

स्थानिक शाखा नांदेड संस्थेचा निवडणूक कार्यक्रम जाहीर 

नांदेड, दि. 30 जून :- इंडियन इन्स्टिटयुट ऑफ पब्लिक ऍडमिनिस्ट्रेशन स्थानिक शाखा नांदेड या संस्थेचा निवडणूक कार्यक्रम जाहीर करण्यात आला आहे. इंडियन इन्स्टिटयुट ऑफ पब्लिक ऍडमिनिस्ट्रेशन नांदेड स्थानिक शाखेच्या सर्व सभासदांनी यांची नोंद घ्यावी, असे आवाहन निवडणूक निर्णय अधिकारी तथा सहाय्यक निबंधक (प्रशासन) संलग्न जिल्हा उपनिबंधक सहकारी संस्थेचे योगेशकुमार बाकरे यांनी केले आहे. 

जिल्हाधिकारी तथा पदसिद्ध अध्यक्ष इंडियन इन्स्टिटयुट ऑफ पब्लिक ऍडमिनिस्ट्रेशन नांदेड शाखा यांच्या 23 जून 2025 च्या पत्रानुसार संस्थेच्या संचालक मंडळाची निवडणूक घेण्यासाठी निवडणूक निर्णय अधिकारी म्हणून सहाय्यक निबंधक (प्रशासन) संलग्न जिल्हा उपनिबंधक सहकारी संस्था नांदेड योगेशकुमार बाकरे यांची नियुक्ती केली आहे. 

या संस्थेच्या निवडणूक कार्यक्रमानुसार एकूण 6 संचालक आहेत. चेअरमन 1 पद हे पदसिध्द आहे. दिनांक 14 एप्रिल 2025 रोजी झालेल्या बैठकीतील ठराव क्रमांक 2 नुसार नांदेडचे जिल्हाधिकारी हे आयआयपीए इंडियन इन्स्टिटयुट ऑफ पब्लिक ऍडमिनिस्ट्रेशन नांदेड स्थानिक शाखेचे पदसिध्द अध्यक्ष आहेत. जिल्हाधिकारी राहुल कर्डिले हे आयएएस आहेत. उर्वरित पद व्हाईस चेअरमन 1, सेक्रेटरी 1, ट्रेझर 1, आणि एक्झीकेटयुव्ह मेंबर 2 असे एकूण 5 जागांची निवड करावयाची आहे. या संस्थेच्या निवडणूक कार्यक्रमासह 1 जुलै 2025 संस्थेच्या पात्र मतदारांची प्रारुप मतदार यादी प्रसिध्द करण्यात येत आहे. 1 जुलै ते 15 जुलै 2025 या कालावधीत प्रारुप मतदार यादीवर आक्षेप नोंदविणे, प्राप्त झालेल्या आक्षेपाची छाननी 16 जुलै ते 17 जुलै 2025 या कालावधीत करण्यात येऊन 18 जुलै 2025 रोजी संस्थेच्या सभासदाची अंतिम मतदार यादी दुपारी 3 वा. प्रसिध्द करण्यात येणार आहे. 25 जुलै 2025 रोजी सकाळी 11 ते 12 या वेळेत नामनिर्देशन पत्राचे वाटप व स्विकृती करण्यात येणार असून प्राप्त नामनिर्देशन पत्राची प्रसिध्दी दुपारी 12.15 वा. करण्यात येणार आहे. प्राप्त नामनिर्देशन पत्राची छाननी दु. 12.15 ते 13 या कालावधीमध्ये करण्यात येणार असून वैध नामनिर्देशन पत्राची यादी 13.15 वा. प्रसिध्द करण्यात येणार आहे. तसेच नामनिर्देशनपत्र 13.30 पर्यत माघारी घेता येणार आहे आणि निवडणूक लढविणाऱ्या उमेदवारांची अंतिम यादी दु.14 वा. प्रसिध्द करण्यात येणार असून आवश्यकता असल्यास दु. 14.30 ते 15.30 या वेळेत मतदान घेण्यात येणार आहे. झालेल्या मतदानाची मतमोजणी मतदान संपल्यानंतर लगेच करण्यात येणार असून मतमोजणी संपल्यानंतर लगेच निकाल घोषित करण्यात येणार आहे.   

संस्थेच्या संचालक मंडळ निवडणुकीचा कार्यक्रम जिल्हाधिकारी नांदेड मिटींग हॉल येथील नोटीस बोर्डावर प्रसिध्द करण्यात येणार असून अधिक माहिती निवडणूक निर्णय अधिकारी, संलग्न जिल्हा उपनिबंधक सहकारी संस्था, नांदेड येथील कार्यालयात पाहावयास मिळतील, असेही निवडणूक निर्णय अधिकारी यांनी प्रसिद्धीपत्रकाद्वारे कळविले आहे.

00000

 वृत्त क्र. 673

जिल्हा कौशल्य विकास रोजगार व उद्योजकता

मार्गदर्शन केंद्रामार्फत रोजगार मेळाव्याचे आयोजन 

रोजगार मेळाव्यात 275 उमेदवारांची प्राथमिक निवड

रोजगार मेळाव्यात 16 कंपन्यांचा 1 हजार 513  रिक्तपदांसाठी  सहभाग

नांदेड, दि. 30 जून:- युवक- युवतींना रोजगाराची संधी उपलब्ध व्हावी, यासाठी जिल्हा कौशल्य विकास, रोजगार व उद्योजकता, मार्गदर्शन केंद्र व  शासकीय औद्योगिक प्रशिक्षण संस्था यांच्या संयुक्त विद्यमानाने शुक्रवार 27 जून रोजी श्री गुरूगोविंदसिंघजी शासकीय औद्योगिक प्रशिक्षण संस्था, नांदेड येथे पंडित दिनदयाल उपाध्याय रोजगार मेळाव्याचे आयोजन करण्यात आले होते. या रोजगार मेळाव्यात 275 उमेदवारांची प्राथमिक निवड करण्यात आली आहे.

या कार्यक्रमास प्रमुख पाहुणे म्हणून प्रसिध्द उद्योजक अभिजीत रेणापूरकर तर अध्यक्ष आदित्य मोटर्सचे उद्योजक अरूणजी फाजगे हे होते.  जिवन हे एक शर्यत आहे. या शर्यतीमधुन अनेक गोष्टी बदल होतात. इथं जी संधी उपलब्ध करून दिली त्या संधीचा फायदा सर्वानी घ्यावा, असे मार्गदर्शन उद्योजक अभिजीत रेणापूरकर यांनी विद्यार्थ्यांना केले. तसेच शिक्षण घेत असताना गुरूजनांचा विचार करा, समाजात वागताना आईवडीलांकडे बघा, संधीच सोन करा असा संदेश आदित्य मोटर्सचे उद्योजक अरूणजी फाजगे  यांनी  दिला.

विद्यार्थ्यांनी आपले कौशल्य विकसित करावे. सध्या या जगात कौशल्यालाच मागणी आहे. या आधुनिक जगात कौशल्य नसल्यास जीवन जगणे कठीण आहे असे आवाहन  कौशल्य विकास रोजगार व उद्योजकता विभागाचे सहायक आयुक्त डॉ. रा.म.कोल्हे यांनी केले.

या रोजगार मेळाव्यामध्ये  एकूण 16 कंपन्यांनी 1 हजार 513  रिक्तपदांसाठी  सहभाग नोंदविला होता. तर एकूण 560 उमेदवार उपस्थीत होते यामधून 275 उमेदवारांची प्राथमिक निवड करण्यात आली आहे अशी माहिती प्रसिध्दीपत्रकाद्वारे जिल्हा कौशल्य विकास रोजगार व उद्योजकता मार्गदर्शन केंद्राच्यावतीने दिली आहे.

00000

२८ जून 2025

 वृत्त क्र. 672

गोदाम बांधकाम अनुदानासाठी इच्छुक व पात्र अर्जदारांनी अर्ज करावेत- जिल्हा अधीक्षक कृषी अधिकारी 

नांदेड, दि. २८ जून:- कृषि विभागाच्या वतीने नांदेड जिल्ह्यासाठी राष्ट्रीय खादयतेल अभियान सन 2025-26 मध्ये स्थानिक पुढाकाराच्या बाबी अंतर्गत फ्लेक्झी फंडामध्ये शेतकरी उत्पादक संघ , कंपनी (FPO/FPC) करिता जिल्हास्तरावर गोदाम बांधकामाचा 1 लक्षांक प्राप्त आहे. प्राप्त लाक्षांकाच्या अधीन राहून सरकारी/खाजगी उद्योग, शेतकरी उत्पादक संस्था / कंपनी (FPOS) आणि सहकारी संस्था यांच्याकडून विहित नमुन्यातील प्रस्ताव मागवण्यात येत आहेत.

या योजने अंतर्गत ज्या ठिकाणी गोदामाची व्यवस्था नाही व ज्या गावात सदर कार्यक्रम राबवण्यात येतो अशा परिसरात राष्ट्रीय खादयतेल अभियानांतर्गत गोदाम बांधकाम कार्यक्रम देण्यात येतो. या योजने अंतर्गत कमाल 250 मे.टन क्षमतेचे गोदाम बांधकाम करण्यासाठी प्रत्यक्ष खर्चाच्या 50 टक्के किंवा 12.50 लक्ष रुपये या पैकी जे कमी असेल ते अनुदान देय आहे.

 अटी व शर्तीच्या अधीन राहून इच्छुक शेतकरी उत्पादक संघ /कंपनी (FPO/FPC) सदर बाब बँक कर्जाशी निगडीत असून इच्छुक अर्जदार संस्थेने केंद्र शासनाच्या स्मार्ट / वखार महामंडळ यांचे मार्गदर्शक सूचनांनुसार बँकेकडे प्रकल्प सादर करावा. बँकेने कर्ज मंजूर केल्यानंतर संबंधित अर्जदार कंपनी सदर बाबीच्या लाभास पात्र राहील.

लक्षांकाच्या तुलनेत जास्त अर्ज प्राप्त झाल्यास सोडत पध्दतीने निवड करण्यात येईल. महाराष्ट्र वखार महामंडळाच्या तांत्रिक निकषाप्रमाणे लाभार्थ्यानी जागेची निवड करावी व त्याची खात्री जिल्हा अधिक्षक कृषि अधिकारी किंवा त्यांचे प्रतिनिधी करतील. या योजनेचा एकदाच लाभ देण्यात येईल. बांधकाम डिसेंबर 2025 पुर्वी करणे बंधनकारक आहे. अपूर्ण बांधकाम डीझाईन, स्पेसिफिकेशन मध्ये बदल केल्यास अनुदान देय राहणार नाही. गोदामाचा वापर शेतकऱ्यांनी  उत्पादीत केलेल्या कृषि माल साठवणुकीसाठी शेतकऱ्यांना योग्य व माफक दरात करण्यात यावा.

तरी ईच्छुक व पात्र लाभार्थींनी महाराष्ट्र वखार महामंडळाचे प्राधिकृत अधिकार्याकडून अथवा सार्वजनिक बांधकाम विभागाच्या मान्यता प्राप्त डीझाईन/ स्पेसिफिकेशन व खर्चाच्या अंदाज पत्रकासह तालुका कृषि अधिकारी, कार्यालयाकडे अर्ज 31 जुलै 2025 अखेर पर्यंत अर्ज सादर करावेत,असे आवाहन जिल्हा अधीक्षक कृषी अधिकारी दत्तकुमार कळसाईत यांनी केले आहे. 

॰॰॰॰

२७ जून 2025

वृत्त क्र. 671

वादळी वाऱ्यासह पावसाची शक्यता  

हवामानशास्त्र केंद्राने दिल्या सूचना  

नांदेड, दि. २७ जून:- प्रादेशिक हवामानशास्त्र केंद्र मुंबई यांनी 27 जून 2025 रोजी दुपारी 13:57 वाजता दिलेल्या सूचनेनुसार नांदेड जिल्ह्यासाठी 01 जुलै 2025 या एक दिवसासाठी यलो (Yellow) अलर्ट जारी केलेला आहे. दि. 01 जुलै 2025  ह्या दिवशी जिल्ह्यात तुरळक ठिकाणी ताशी 30 ते 40 किमी वेगाने वादळी वारे वाहण्याची, विजेच्या कडकडाटासह व ढगांच्या गडगडाटासह हलका ते मध्यम स्वरूपाचा पाऊस पडण्याची अधिक शक्यता वर्तविली आहे. या नैसर्गिक आपत्ती संदर्भात सर्व संबंधित यंत्रणा आणि जनतेने खबरदारी घ्यावी. नागरिकांनी खबरदारीची उपाययोजना म्हणून पुढील प्रमाणे काळजी घ्यावी. असे आवाहन जिल्हा प्रशासनाकडून करण्यात आले आहे.

 या गोष्टी करा 

विजेच्या गडगडाटासह पावसाची पूर्वकल्पना असल्यास बाहेर जाणे टाळा. जर मोकळ्या जागेत असाल आणि जवळपास कुठल्याही सुरक्षित इमारतीचा आसरा नसेल तर सखल जागेत जाऊन गुडघ्यात डोके घालून बसा. आकाशात विजा चमकत असल्यास घरात किंवा सुरक्षित इमारतीत आश्रय घ्या. घराच्या बाल्कनी, छत अथवा घराबाहेरील ओट्यावर थांबू नका. आपण घरात असाल आणि घरातील विद्युत उपकरणे चालू असतील तर त्या वस्तू त्वरित बंद करा. तारांचे कुंपण, विजेचे खांब व इतर लोखंडी वस्तूंपासून दूर रहा. पाण्यात उभे असाल तर तात्काळ पाण्यातून बाहेर पडा. तुमच्या स्मार्ट मोबाईल फोन मध्ये 'दामिनी', 'सचेत' हे दोन ॲप डाउनलोड करा 'दामिनी' ॲप तुमच्या आजूबाजूला वीज विषयक संभाव्य धोके दर्शविते तर 'सचेत' ॲप मुळे तुम्हाला तुमच्या आजूबाजूच्या हवामानाविषयी अचूक इशारे व माहिती मिळते.

 या गोष्टी करु नका

आकाशात विजा चमकत असल्यास घरातील लँडलाईन फोनचा वापर करू नका. शॉवरखाली अंघोळ करू नका. घरातील बेसिनचे नळ, पाण्याची पाईपलाइन यांना स्पर्श करू नका तसेच कुठल्याही विद्युत उपकरणांचा वापर करू नका. विजेच्या गडगडाटासह वादळी वारे चालू असताना लोखंडी धातूच्या सहाय्याने उभारलेल्या तंबूमध्ये किंवा शेडमध्ये आसरा घेऊ नका. उंच झाडाच्या खाली आसरा घेऊ नका. धातूंच्या उंच मनोऱ्याजवळ उभे टाकू नका. जर आपण घरात असाल तर उघड्या दारातून अथवा खिडकीतून वीज पडताना पाहू नका. हे बाहेर थांबण्याइतकेच धोकादायक आहे. असे आवाहन जिल्हा प्रशासनाकडून करण्यात आले आहे.

००००