अखेर कामाजीवाडी गावातील भूकंपाची भीती झाली दूर

 

नांदेड (जिमाका) दि. 16 :- देगलूर तालुक्‍यातील मौ. कामाजीवाडी आणि सभोवतालच्‍या परिसरात मागील काही दिवसांपासून भूगर्भातुन आवाज आणि कंपने येत होते.  वारंवार घडणाऱ्या या घटनांमुळे गावकऱ्यांच्या मनात भीती निर्माण झाली होती. जिल्हाधिकारी अभिजीत राऊत यांच्या सूचनेनुसार  सहाय्यक जिल्‍हाधिकारी तथा उपविभागीय अधिकारी देगलूर सौम्‍या शर्मा यांनी विशेष उपक्रम राबविला. त्यांनी जिल्हा आपत्ती व्यवस्थापन विभागामार्फत आपातकालीन परिस्थितीतून सुरक्षिततेचे प्रशिक्षण आणि क्षमतावर्धन कार्यक्रमाचे नुकतेच कामाजीवाडी येथे आयोजन केले.

 

याचबरोबर शास्‍त्रीय संशोधन करण्‍यासाठी जिल्‍हा वरिष्‍ठ भुवैज्ञानिक डॉ. बी.एन. संगेवार यांनी 17 ऑक्टोंबर रोजी गावाची प्रत्‍यक्ष पाहणी केली. 28ऑक्टोंबर रोजी सहाय्यक जिल्‍हाधिकारी सौम्‍या शर्मा, स्‍वामी रामानंद तिर्थ मराठवाडा विदयापिठाचे वरीष्‍ठ सहयोगी प्राध्‍यापक डॉ. टि. विजय कुमार  व जिल्‍हा आपत्‍ती अधिकारी किशोर कुऱ्हे पाटील यांनी आपत्‍ती व्‍यवस्‍थापन ग्रामसभेच्‍या विशेष बैठकीत कामाजीवाडी येथील नागरीकांना विशेष मार्गदर्शन केले.

 

या प्रशिक्षणात भूकंप आणि त्‍यापासुन बचाव, सुरक्षित व भूकंपविरोधी बांधकाम, घरगुती अपघाताने लागणाऱ्या अग्‍नीपासुन बचाव, सर्पदंश व त्‍याचे उपचार, वैदयकीय प्राथमिक उपचार, अवकाळी पावसात कोसळणाऱ्या विजा आणि त्‍यापासुन स्‍वत:चा बचाव, रस्‍त्‍यांचे अपघात इत्‍यादी अनेक नैसर्गिक आणि मानवनिर्मित आपत्‍तीवर  जिल्‍हा आपत्‍ती व्‍यवस्‍थापन अधिकारी किशोर कुऱ्हे, डॉ. संदेश जाधव, जिल्‍हा परिषद वैदयकीय अधिकारी, नांदेड वाघाळा महानगरपालिकाचे अग्‍नीशमन अधिकारी शेख रईस पाशा हमिदोदिन यांनी उपस्थितांना मार्गदर्शन केले व त्‍यांच्‍या विविध शंकांचे निरसन केले. 

 

या प्रशिक्षणासाठी तहसीलदार राजाभाऊ कदम, स्‍थानिक स्‍वराज्‍य संस्‍थेचे पदाधिकारी व सदस्‍य, ग्राम आपत्‍ती व्‍यवस्‍थापन समितीचे पदाधिकारी व सदस्‍य, कामाजीवाडी सभोवतालच्‍या परिसरातील विदयार्थी, नागरीक, औषधी विक्रेते, स्‍थानिक डॉक्‍टर, जेसीबी, पोकलेनधारकधारक, जिल्‍हा परिषद आरोग्‍य विभागाचे कर्मचारी आणि अधिकारी, विदयार्थी यांनी मोठया संख्‍येने या प्रशिक्षणाचा लाभ घेतला. कार्यक्रमाला यशस्वीतेसाठी नायब तहसीलदार मीठेवाड, तलाठी माधुरी गोविंदराव शिरसाठ, तलाठी केतेश्‍वर माधव कोंडलवार, कामाजीवाडीचे सरपंच, उपसरपंच, ग्रामपंचायत सदस्‍य हनमंत दिगंबरराव बिरादार, नागरीक यांनी प्रशासनाला योगदान दिले.

 

000000

19 व 20 नोव्हेंबर रोजी नांदेड येथे ग्रंथोत्सवाचे आयोजन

ग्रंथ प्रदर्शन-विक्री, परिसंवाद, चर्चासत्र, वत्कृत्व स्पर्धा, कविता व कथेचे अभिवाचन

नांदेड (जिमाका) दि. 16 :-  उच्च व तंत्र शिक्षण विभाग, ग्रंथालय संचालनालय म.रा.मुंबई व जिल्हा ग्रंथालय अधिकारी कार्यालय नांदेड यांच्या विद्यमाने ‘नांदेड ग्रंथोत्सव 2022’ चे आयोजन करण्यात आले आहे. जिल्हा ग्रंथालय अधिकारी कार्यालय, बहुउद्देशिय सांस्कृतिक संकुल, श्री गुरु गोबिंदसिंगजी स्टेडीयम परिसरातील डॉ. शंकरराव चव्हाण प्रेक्षागृह शेजारी शनिवार 19 व रविवार 20 नोव्हेंबर 2022 रोजी विविध कार्यक्रमाचे आयोजन करण्यात आले आहे.

ग्रंथप्रसार, ग्रंथप्रदर्शन व ग्रंथविक्री असा या ग्रंथोत्सवाचा उददेश असून प्रकाशक, ग्रंथविक्रेते आणि ग्रंथप्रेमी वाचकांना एकत्र आणण्याचा हा उपक्रम आहे. नांदेडसह महाराष्ट्रातील इतर ठिकाणच्या प्रकाशकाची दालने याठिकाणी असणार आहेत. औरंगाबाद येथील शासकीय ग्रंथागाराचे व बालभारतीचे विशेष दालन या ग्रंथप्रदर्शनात राहणार आहे. या दालनात शासकीय प्रकाशने व दुर्मिळ ग्रंथ विक्रीसाठी उपलब्ध होणार आहेत.

शनिवार 19 नोव्हेंबर रोजी सकाळी 8 वाजता महात्मा ज्योतिबा फुले पुतळा आय.टी.आय चौक येथून कार्यक्रम स्थळापर्यंत ग्रंथदिंडीचे आयोजन करण्यात आले आहे. या  दिंडीमध्ये विविध लोककला सादरीकरण लेझीम पथक, भजनीमंडळ यासह विदयार्थ्यांचा सहभाग असणार आहे. या ग्रंथदिंडीस सौ.श्यामल पत्की, संजीव कुलकर्णी, रविचंद्र हडसनकर  प्रा.लक्ष्मण कोतापल्ले,  डॉ.अनंत राऊत, आनंद कल्याणकर, विजय बेंबडे यांची उपस्थिती राहणार आहे.  पालकमंत्री गिरीश महाजन यांच्या हस्ते सकाळी 11 वाजता ग्रंथोत्सवाचे उदघाटन होणार आहे. कार्यक्रमाचे अध्यक्ष अखिल भारतीय मराठी नाटय साहित्य संमेलनाचे माजी अध्यक्ष दत्ता भगत हे असतील.

 

यावेळी माजी मुख्यमंत्री तथा विधानसभा सदस्य अशोक चव्हाण, खासदार प्रताप पाटील चिखलीकर, खासदार हेमंत पाटील, खासदार सुधाकर श्रृंगारे, विधान परिषद सदस्य सतीश चव्हाण , विधान परिषद सदस्य विक्रम काळे, विधान परिषद सदस्य अमर राजूरकर, विधान परिषद सदस्य राम पाटील रातोळीकर, आमदार बालाजी कल्याणकर, आमदार भिमराव केराम, आमदार माधवराव पाटील जवळगावकर, आमदार डॉ. तुषार राठोड, आमदार श्यामसुंदर शिंदे, आमदार मोहन हंबर्डे, आमदार राजेश पवार, आमदार जितेश अंतापूरकर, जिल्हाधिकारी अभिजीत राऊत, मुख्य कार्यकारी अधिकारी श्रीमती वर्षा घुगे-ठाकूर, मनपा आयुक्त डॉ.सुनिल लहाने, जिल्हा ग्रंथालय संघाचे अध्यक्ष ॲड. गंगाधर पटने, दत्तात्रय क्षीरसागर, सहाय्यक ग्रंथालय संचालक सुनील हुसे यांची उपस्थिती असणार आहे.

 

शनिवार 19 नोव्हेंबर रोजी दुपारी 2 ते 4  यावेळेत "वाचन संस्कृती संवर्धनार्थ उपाययोजना"या विषयावर ॲड. गंगाधर पटने यांच्या अध्यक्षेतखाली परिसंवादाचे आयोजन करण्यात आले आहे. यामध्ये डॉ.जगदीश कुलकर्णी, रणजीत धर्मापुरीकर,डॉ. कैलास वडजे, सौ. दीपा बियाणी, डॉ.शारदा कदम यांचा सहभाग असणार आहे. सायं 4 ते 6 कविता आणि कथा अभिवाचनामध्ये शांता शेळके, वसंत बापट व कवी शंकर रमाणी यांच्या कविता व अण्णाभाऊ साठे जी.ए.कुलकर्णी यांच्या कथेचे अभिवाचनाचा कार्यक्रम केशव सखाराम देशमुख यांच्या अध्यक्षेतखाली होणार आहे. यामध्ये डॉ.जगदीश कदम, सौ. आशा पैठणे, शिवा कांबळे, प्रा.महेश मोरे, प्रा.स्वाती कान्हेगावकर हे सहभागी असणार आहेत.

 

रविवार 20 नोव्हेंबर रोजी सकाळी 11 ते 1 या कालावधीत "मराठवाडा मुक्ती संग्रामातील संवेदनांचे काठ"या विषयावर जिल्हा माहिती अधिकारी विनोद रापतवार यांच्या अध्यक्षतेखाली चर्चासत्र आयोजित करण्यात आलेले आहे. या परिसंवाद मध्ये प्रमुख वक्ते म्हणुन प्रा.डॉ.पृथ्वीराज तौर व प्रा.डॉ. महेश जोशी, प्रतीक्षा तालंगकर सहभाग नोंदवणार आहेत. दुपारी 2 ते 4 वाजता "आजची समाज माध्यमे व वाचन संस्कृती" या विषयावर माध्यमिक विद्यार्थ्यांसाठी वत्कृत्व स्पर्धेचे नीलकंठ पाचंगे यांच्या अध्यक्षतेखाली संपन्न होणार आहे. सायं 4 ते 6 यावेळेत नांदेड ग्रंथोत्सवाचा समारोप व बक्षिस वितरणाचा कार्यक्रम धर्मादाय उपायुक्त किशोर मसने यांच्या अध्यतेखाली संपन्न होणार आहे. या कार्याक्रमास प्रमुख अतिथी म्हणुन प्राचार्य डॉ.रावसाहेब शेंदारकर, साहित्यिक देवीदास फुलारी, बी.जी.देशमुख, एम.जी.एम कॉलेजचे ग्रंथपाल डॉ.गोंविद हंबर्डे उपस्थित राहणार आहेत. या दोन दिवसीय ग्रंथोत्सवास नागरिकांनी उपस्थित राहावे, असे आवाहन ग्रंथोत्सव समन्वय समितीने  केले आहे.

00000