विशेष वृत्त क्रमांक

दुष्काळामुळे खचून जावू नका ; संकट काळात शासन बळीराजाच्या पाठीशी पूर्ण ताकदीने उभे - उपमुख्यमंत्री एकनाथ शिंदे 

• नांदेड जिल्ह्यातील वाडी बु. येथील शंभर खाटांच्या उपजिल्हा रुग्णालयाचे लोकार्पण
• दुष्काळग्रस्त शेतकऱ्यांच्या जनावरांसाठी चारा वाटप, टँकरद्वारे पाणी पुरवठ्याला प्रारंभ,
• आत्महत्याग्रस्त शेतकऱ्यांच्या वारसांना  मदतीचे धनादेश वितरीत
• एकल महिलांना शिलाई मशीन, विद्यार्थिनींना सायकलचे वितरण 

नांदेड, दि. १ (जिमाका) :-- दुष्काळाच्या संकटामध्ये राज्य शासन बळीराजाला वाऱ्यावर सोडणार नाही. शेतकऱ्यांना पूर्ण ताकदीने मदत करण्याचा निर्णय मंत्रिमंडळाने घेतला आहे. दिवाळीपूर्वी तातडीने पाच हजार रुपयांची मदत केली जात असून ही मदत अंतिम नाही. यानंतरही शेतकऱ्यांना मदत केली जाणार आहे. त्यामुळे धीर सोडू नका, काळजी करू नका. कोणत्याही परिस्थितीत टोकाचा विचार मनात आणू नका, आम्ही सरकार म्हणून तुमच्या सोबत आहोत, अशी ग्वाही उपमुख्यमंत्री एकनाथ शिंदे यांनी शेतकऱ्यांना दिली. तसेच या संकटकाळात शेतकऱ्यांना कर्ज वसुलीसाठी त्रास देणाऱ्यांची गय केली जाणार नाही, असा इशाराही त्यांनी यावेळी दिला.

नांदेड जिल्ह्यातील वाडी बु. येथील उपजिल्हा रुग्णालयाच्या लोकार्पण कार्यक्रमात ते बोलत होते. 

यावेळी राज्याचे सार्वजनिक आरोग्य व कुटुंब कल्याण मंत्री प्रकाश आबिटकर, माजी मुख्यमंत्री तथा खासदार अशोकराव चव्हाण, हळद संशोधन केंद्राचे अध्यक्ष तथा आमदार हेमंत पाटील, आमदार अमरनाथ राजूरकर, आमदार बालाजी कल्याणकर, आमदार बाबुराव कदम-कोहळीकर, आमदार प्रताप पाटील चिखलीकर, आमदार आनंद तिडके-बोंढारकर, आमदार भिमराव केराम, आमदार जितेश अंतापूरकर, महापौर कविता मुळे, विशेष पोलीस उपमहानिरीक्षक शहाजी उमाप, जिल्हाधिकारी राहुल कर्डिले, जिल्हा परिषदेचे मुख्य कार्यकारी अधिकारी महेश पाटील, पोलीस अधीक्षक डॉ. नीलाभ रोहन, मनपा आयुक्त डॉ.महेशकुमार डोईफोडे, आयुक्त तथा राष्ट्रीय आरोग्य अभियानाचे संचालक संजय काटकर आदींसह नागरिक उपस्थित होते. 

दुष्काळामुळे आज शेतकऱ्यांवर संकट ओढावले आहे, या संकट काळात संपूर्ण राज्य शासन बळीराजाच्या पाठीशी खंबीरपणे उभे आहे. या संकटाची दाहकता ओळखून राज्य शासनाने तातडीने दुष्काळ जाहीर करून शेतकऱ्यांना विविध सवलती लागू केल्या. यापुढेही शासन खंबीरपणे शेतकऱ्यांच्या पाठीशी उभे राहणार आहे, शेतकऱ्यांनी धीर सोडू नये, असे उपमुख्यमंत्री श्री. शिंदे म्हणाले. 

नांदेडची भूमी ही शेतकरी, कष्टकऱ्यांची भूमी आहे. आज वाडी बु. येथील शंभर खाटाच्या उपजिल्हा रुग्णालयासह विविध विकास कामांचे लोकार्पण झाले आहे. आजपासूनच हे उपजिल्हा रुग्णालय नागरिकांच्या सेवेत कार्यरत होत आहे. तसेच या सुसज्ज इमारतीतीत  सिटी स्कॅन आणि डायलिसिस सुविधा तातडीने उपलब्ध करून देण्याच्या सूचना आरोग्य मंत्र्यांना दिल्या आहेत. त्यामुळे ग्रामीण भागातील शेतकरी, कष्टकरी आणि गोरगरीब नागरिकांना दर्जेदार आरोग्य सुविधा स्वस्त दरात उपलब्ध होतील. यासोबतच आशियाई विकास बँकेच्या सहकार्याने नांदेड जिल्हा सामान्य रुग्णालयासाठी 500 खाटांची सुसज्ज इमारत उभारली जाणार असून त्याचे भूमिपूजनही लवकरच केले जाईल, असे सांगून लोकांना चांगल्या आरोग्य सेवा देण्यासाठी राज्य शासन प्रयत्न करीत असल्याचे उपमुख्यमंत्री श्री. शिंदे यांनी नमूद केले. तसेच नांदेडच्या विकासाला निधी कमी पडू देणार नाही. जनतेला चांगल्या सुविधा उपलब्ध करून देण्यासाठी केंद्र आणि राज्य शासन प्रयत्नशील असल्याचे त्यांनी सांगितले.  

सार्वजनिक आरोग्य व कुटुंब कल्याण मंत्री प्रकाश आबिटकर म्हणाले की, वाडी बु. येथील उपजिल्हा रुग्णालयाच्या सिटी स्कॅन, डायलिसिस सुविधा आणि वाढीव खाटांची मागणी तातडीने मंजूर करण्यात येईल. तसेच याठिकाणी मेंदूविकार, हृदयरोग यासारख्या विशेष तज्ज्ञ वैद्यकीय सुविधा उपलब्ध करून देण्यात येतील. तसेच टाटा मेमोरियल ट्रस्टच्या सहाय्याने ‘महा केअर’च्या माध्यमातून नांदेड येथे कर्करोगावरील उपचार सुविधा उपलब्ध करून देण्यात येणार आहे. रुग्णांना दर्जेदार आरोग्य सुविधा मोफत अथवा स्वस्त दरात उपलब्ध करून देण्यासाठी राज्य शासन प्रयत्नशील आहे. आजपासून सुरू झालेल्या आरोग्य संवाद यात्रेच्या माध्यमातून थेट लोकांपर्यत पोहचून आरोग्य सेवांबाबत माहिती देण्यात येत असून त्यांच्या प्रतिक्रिया जाणून घेण्यात येत आहेत, असे सांगून दुष्काळामुळे उद्भवलेल्या गंभीर परिस्थितीला खंबीरपणे सामोरे जावूया परिस्थितीवर मात करू या, असे आवाहन त्यांनी शेतकऱ्यांना केले.  

माजी मुख्यमंत्री तथा खासदार अशोकराव चव्हाण म्हणाले की, आशियाई विकास बँकेच्या सहकार्यातून 500 खाटांची श्री गुरुगोविंदसिंघजी जिल्हा रुग्णालयाची सुसज्ज इमारत होणार आहे. यासोबतच वाडी बु. उपजिल्हा रुग्णालयामुळे वाढीव आरोग्य सुविधा उपलब्ध होणार आहे. नांदेड शहराचे वाढते नागरीकरण लक्षात घेता हे उपजिल्हा रुग्णालय उपयुक्त ठरणार आहे. शंकरराव चव्हाण शासकीय वैद्यकीय महाविद्यालयाच्या माध्यमातूनही विविध आरोग्य सेवा उपलब्ध आहेत. आता नांदेडमध्ये कर्करोग उपचारांची सुविधाही लवकरच सुरु होणार आहे, याबाबतचा निर्णय मंत्रिमंडळाने घेतला आहे. त्यामुळे नांदेडसह आजूबाजूच्या जिल्ह्यातील रुग्णांना या आरोग्य सेवेचा लाभ मिळेल,असा विश्वास त्यांनी व्यक्त केला. तसेच नांदेड येथे सुपर स्पेशालिटी हॉस्पिटलसाठी केंद्र शासनाकडे निधी मागणी करण्यात आल्याचेही त्यांनी सांगितले. 

बाळासाहेब ठाकरे हळद संशोधन केंद्राचे अध्यक्ष आमदार हेमंत पाटील यांनी नांदेड उत्तर मतदारसंघासह पूर्णा, वसमत तालुक्यातील रुग्णांना वाडी बु. उपजिल्हा रुग्णालयामुळे चांगल्या आरोग्य सेवा उपलब्ध होतील असे सांगितले. तसेच या रुग्णालयात पुरेसे मनुष्यबळ, ऑक्सिजन प्लांट मंजूर करण्याची विनंती यावेळी केली. 

नांदेड उत्तर विधानसभा मतदारसंघाचे आमदार बालाजी कल्याणकर यांनी उपजिल्हा रुग्णालयासाठी निधी उपलब्ध करून दिल्याबद्दल उपमुख्यमंत्री एकनाथ शिंदे यांचे आभार मानले. तसेच मतदारसंघात रस्ते, पायाभूत सुविधांची विविध कामे सुरू आहेत. या कामांचेही लवकरच लोकार्पण होणार असल्याचे त्यांनी सांगितले. 

दुष्काळग्रस्त शेतकऱ्यांच्या जनावरांना चारा वाटप, टँकरद्वारे पाणी पुरवठा उपक्रमाचे यावेळी उद्घाटन करण्यात आले. तसेच आत्महत्याग्रस्त शेतकऱ्यांच्या वारसांना शासनामार्फत देण्यात येणाऱ्या मदतीचे धनादेश, एकल महिलांना शिलाई मशीन, विद्यार्थिनींना सायकलचे वितरणही यावेळी उपमुख्यमंत्री एकनाथ शिंदे यांच्या हस्ते झाले. दुष्काळी परिस्थितीमुळे सत्कार, स्वागत समारंभ टाळून थेट कार्यक्रमाला सुरुवात झाली. प्रास्ताविकात आरोग्य सेवा आयुक्त संजय काटकर यांनी सार्वजनिक आरोग्य विभागामार्फत राबविण्यात येत असलेल्या उपक्रमांची माहिती दिली. तसेच या उपक्रमांचा गरजू रुग्णांनी लाभ घेण्याचे आवाहन त्यांनी केले.

0000 

विशेष वृत्त क्रमांक

आरोग्यमंत्री प्रकाश आबिटकर यांचे हिमायतनगर तालुक्यात आरोग्य सुविधांच्या सक्षमीकरणासाठी निर्देश

• ‘आरोग्य संवाद यात्रा 2026’ अंतर्गत दरेगाव, वाळकेवाडी, दुधड, सरसम व हिमायतनगर येथील आरोग्य संस्थांची पाहणी
• वाळकेवाडी येथील आत्महत्याग्रस्त कुटुंबीयांचे केले सांत्वन

नांदेड, दि. 1 नोव्हेंबर : ग्रामीण भागातील प्रत्येक नागरिकाला सुलभ, तत्पर आणि गुणवत्तापूर्ण आरोग्य सेवा उपलब्ध करून देण्यास शासनाचे प्राधान्य असून, आरोग्य यंत्रणेने गावातील शेवटच्या घटकापर्यंत पोहोचून सेवा द्याव्यात, असे निर्देश राज्याचे सार्वजनिक आरोग्य व कुटुंब कल्याण मंत्री प्रकाश आबिटकर यांनी आज हिमायतनगर तालुक्यातील पाहणी दौऱ्यादरम्यान दिले.

‘आरोग्य संवाद यात्रा 2026’ अंतर्गत आरोग्यमंत्री श्री. आबिटकर यांनी हिमायतनगर तालुक्यातील दरेगाव तांडा, वाळकेवाडी, दुधड, सरसम आणि हिमायतनगर येथील विविध आरोग्य संस्थांना भेटी देऊन आरोग्य सुविधांची पाहणी केली. यावेळी त्यांनी ग्रामस्थ, रुग्ण, आरोग्य कर्मचारी आणि संबंधित अधिकाऱ्यांशी थेट संवाद साधून आरोग्यविषयक समस्या जाणून घेतल्या.

दरेगाव तांड्यात नागरिकांशी संवाद ; घरोघरी आरोग्य सेवा देण्याच्या सूचना

हिमायतनगर तालुक्यातील दरेगाव तांडा येथे आरोग्यमंत्री श्री. आबिटकर यांनी दरेगाव तांडा येथील शेती पिकांची पाहणी करुन शेतकऱ्यांशी संवाद साधला. त्यांनतर त्यांनी गावात जाऊन ग्रामस्थांशी संवाद साधून दुष्काळी परिस्थिती, स्थानिक अडचणी आणि आरोग्यविषयक समस्यांची माहिती घेतली. गावातील प्रत्येक घरापर्यंत आरोग्य सेविका व आरोग्य सेवकांनी पोहोचून आवश्यक आरोग्य तपासणी, औषधोपचार आणि आरोग्यविषयक मार्गदर्शन द्यावे. कोणताही नागरिक शासकीय आरोग्य सेवा व योजनांच्या लाभापासून वंचित राहणार नाही याची दक्षता घ्यावी, अशा सूचना त्यांनी संबंधित यंत्रणेला दिल्या.

वाळकेवाडी येथे आत्महत्याग्रस्त कुटुंबीयांचे सांत्वन

वाळकेवाडी येथील दुष्काळग्रस्त भागाच्या पाहणीदरम्यान आरोग्यमंत्री आबिटकर यांनी दिवंगत राजू ढाले यांच्या कुटुंबीयांची भेट घेऊन त्यांचे सांत्वन केले. यावेळी त्यांनी कुटुंबीयांशी संवाद साधून त्यांच्या अडचणी जाणून घेतल्या. गरजू नागरिकांपर्यंत शासनाच्या विविध योजना व सेवा पोहोचविण्यासाठी प्रशासन कटिबद्ध असल्याचे त्यांनी सांगितले. तसेच नागरिकांनी प्रतिकूल परिस्थितीतही खचून न जाता स्वतःच्या आरोग्याची काळजी घ्यावी, असे आवाहन केले. 

दुधड उपकेंद्र व सरसम प्राथमिक आरोग्य केंद्राची पाहणी

आरोग्यमंत्री श्री. आबिटकर यांनी दुधड येथील आरोग्य उपकेंद्राला भेट देऊन तेथील उपलब्ध सुविधा, आरोग्य कर्मचाऱ्यांचे कामकाज आणि नागरिकांना दिल्या जाणाऱ्या सेवांची माहिती घेतली. त्यानंतर सरसम येथील प्राथमिक आरोग्य केंद्राला भेट देऊन रुग्णांशी संवाद साधला. केंद्रात उपलब्ध असलेल्या ईसीजी तपासणी सुविधेबाबत वैद्यकीय अधिकाऱ्यांकडून माहिती घेत आरोग्य सेवांचा आढावा घेतला.

हिमायतनगर उपजिल्हा रुग्णालयात रुग्णसेवेला प्राधान्य देण्याचे निर्देश

हिमायतनगर येथील उपजिल्हा रुग्णालयातील विविध विभागांची पाहणी करून आरोग्यमंत्री श्री. आबिटकर यांनी रुग्ण, नागरिक, अधिकारी व कर्मचाऱ्यांशी संवाद साधला. रुग्णालयात उपचारासाठी येणाऱ्या प्रत्येक रुग्णाला वेळेत उपचार, आवश्यक औषधे आणि दर्जेदार आरोग्य सुविधा उपलब्ध करून द्याव्यात. रुग्णसेवेत कोणतीही दिरंगाई होणार नाही, याची दक्षता घ्यावी, असे निर्देश त्यांनी दिले.

‘आरोग्य संवाद यात्रा 2026’च्या माध्यमातून ग्रामीण भागातील आरोग्य सुविधांची प्रत्यक्ष पाहणी, नागरिकांशी थेट संवाद आणि आरोग्य यंत्रणेचे सक्षमीकरण यावर भर देण्यात येत आहे. आरोग्य सेवा अधिक लोकाभिमुख करून प्रत्येक नागरिकापर्यंत दर्जेदार उपचार आणि आरोग्यविषयक सुविधा पोहोचविण्याच्या शासनाच्या भूमिकेला या दौऱ्यामुळे बळ मिळाले आहे. या दौऱ्यात दरेगाव तांडा व वाळकेवाडी येथील नागरिकांना दिवाळीनिमित्त शिधा वाटपही करण्यात आले.

या पाहणी दौऱ्याप्रसंगी खासदार नागेश पाटील-आष्टीकर, आमदार बाबुराव कदम-कोहळीकर, आयुक्त तथा राष्ट्रीय आरोग्य अभियानाचे संचालक संजय काटकर, आरोग्य सेवेचे संचालक (शहरी) डॉ. गोविंद चौधरी, संचालक (प्राथमिक) डॉ. विजय कंदेवाड, उपविभागीय अधिकारी अविनाश कांबळे, जिल्हा शल्यचिकित्सक डॉ. संजय पेरके आणि जिल्हा आरोग्य अधिकारी डॉ. संजय नवले यांच्यासह स्थानिक आरोग्य विभागाचे अधिकारी, वैद्यकीय अधिकारी, आरोग्य कर्मचारी आणि ग्रामस्थ उपस्थित होते.

****