पैनगंगा प्रकल्पातील पाणी उपशावर प्रशासनाचे कडक नियंत्रण

अवैध मोटार पंप व विद्युत जोडण्या जप्त करण्याचे नांदेड-यवतमाळ जिल्हाधिकाऱ्यांचे निर्देश

नांदेड, दि. ४ : दुष्काळी परिस्थितीच्या पार्श्वभूमीवर पैनगंगा प्रकल्पातील उपलब्ध पाणीसाठ्याचा काटेकोर वापर करून पिण्याच्या पाण्याला प्राधान्य द्यावे. नदीपात्रातून होणारा अनधिकृत पाणी उपसा तातडीने रोखून संबंधितांवर कठोर कारवाई करावी, असे निर्देश जिल्हाधिकारी राहुल कर्डिले यांनी दिले. यासंदर्भात नांदेड व यवतमाळ जिल्ह्यांतील संबंधित अधिकाऱ्यांची संयुक्त बैठक जिल्हाधिकारी राहुल कर्डिले व यवतमाळचे जिल्हाधिकारी विकास मीना यांच्या उपस्थितीत व्हिडिओ कॉन्फरन्सद्वारे घेण्यात आली.

पाटबंधारे व महावितरण विभागाने नदीपात्रातील पाणी उपशाची दररोज पाहणी करून अनधिकृत मोटार पंप व विद्युत जोडण्या जप्त कराव्यात. गरजेनुसार संबंधित भागातील विद्युत डी.पी. बंद करण्याची कार्यवाही करावी. तसेच नदीकाठच्या गावांतील पोलीस पाटील, तलाठी व ग्रामसेवक यांनी नियमित पाहणी करून अनधिकृत पाणी उपशाची माहिती संबंधित विभागांना द्यावी, असे निर्देश देण्यात आले.

यंदा नदीकाठच्या शेतकऱ्यांना सिंचनासाठी पाणी उपलब्ध होणार नसल्याने त्यांनी कमी पाण्यात येणाऱ्या पिकांची लागवड करावी आणि ऊसासारखी अधिक पाणी लागणारी पिके टाळावीत, यासाठी जनजागृती करण्याच्या सूचना देण्यात आल्या. पिण्याच्या पाण्यासाठी पाणी आरक्षण व चार पाणीपाळ्यांना परवानगी असली तरी पाण्याचा अनधिकृत उपसा अथवा गैरवापर करणाऱ्यांवर कठोर कारवाई करण्याचेही स्पष्ट करण्यात आले.

या बैठकीस दोन्ही जिल्ह्यांचे पाटबंधारे व महावितरण विभागाचे अधीक्षक अभियंता, निवासी उपजिल्हाधिकारी, उपविभागीय अधिकारी, तहसीलदार तसेच ऊर्ध्व पैनगंगा प्रकल्पाचे कार्यकारी अभियंता उपस्थित होते. उपलब्ध पाणीसाठ्याचे प्रभावी नियोजन व काटेकोर अंमलबजावणीसाठी सर्व विभागांनी समन्वयाने कार्यवाही करावी, असे निर्देश यावेळी देण्यात आले.

********

वृत्त क्रमांक

पालकमंत्री अतुल सावे यांचा दुष्काळग्रस्त शेतकऱ्यांसाठी एक कोटींचा मदतनिधी

• चिरंजीवाच्या विवाहावरील खर्च टाळून मुख्यमंत्री सहाय्यता निधीस देणगी

• मुख्यमंत्री देवेंद्र फडणवीस यांच्याकडे धनादेश सुपूर्द

नांदेड, दि. 04 : राज्यातील दुष्काळी परिस्थितीची जाणीव ठेवून नांदेड जिल्ह्याचे पालकमंत्री तथा इतर मागास बहुजन कल्याण, दुग्धविकास, अपारंपरिक ऊर्जा व दिव्यांग कल्याण मंत्री अतुल सावे यांनी आपल्या चिरंजीवाच्या विवाहावरील खर्च टाळून दुष्काळग्रस्त शेतकऱ्यांच्या मदतीसाठी मुख्यमंत्री सहाय्यता निधीत एक कोटी रुपयांची देणगी दिली आहे. या रकमेचा धनादेश त्यांनी मुंबई येथे मुख्यमंत्री देवेंद्र फडणवीस यांच्याकडे सुपूर्द केला. यावेळी मुख्यमंत्र्यांनी मंत्री सावे यांचे आभार मानले.

मंत्री अतुल सावे यांचे धाकटे चिरंजीव तथा उद्योजक अनुराग सावे यांचा विवाह छत्रपती संभाजीनगर येथील उद्योजक अजित मुळे यांची कन्या ईशा यांच्याशी दि. 25 नोव्हेंबर रोजी नियोजित आहे. मात्र, सध्या महाराष्ट्रावर दुष्काळाचे सावट असून विशेषतः मराठवाड्यातील शेतकरी शेतीच्या नुकसानीमुळे कठीण परिस्थितीचा सामना करीत आहेत. अशा परिस्थितीत मोठ्या प्रमाणावर विवाह सोहळा साजरा करणे उचित नसल्याची भूमिका दोन्ही परिवारांनी घेतली. विवाह सोहळ्यासाठी नियोजित असलेला खर्च टाळून ही रक्कम शेतकऱ्यांच्या मदतीसाठी देण्याचा संवेदनशील निर्णय त्यांनी घेतला.

मुख्यमंत्री देवेंद्र फडणवीस यांच्या नेतृत्वाखाली राज्य शासन शेतकऱ्यांना दिलासा देण्यासाठी विविध उपाययोजना राबवत आहे. या प्रयत्नांना हातभार लावण्याच्या भावनेतून मुख्यमंत्री सहाय्यता निधीस ही एक कोटी रुपयांची देणगी समर्पित करण्यात आली आहे. यावेळी मंत्री चंद्रशेखर बावनकुळे यांच्यासह अन्य मान्यवर उपस्थित होते.

***

स्त्रीशिक्षणाचा पाया रचत फुले दांपत्याने दिला समतेचा विचार..!

#MahatmaPhule200 #महात्माफुले200 #MahatmaJyotiraoPhule_BicentenaryBirthYear #महात्माजोतीरावफुले_द्विशताब्दीजन्मवर्ष

 

वृत्त क्रमांक

नांदेडमध्ये उद्या ‘विकसित भारत युवा संवाद 2026’चे आयोजन

• ‘आपला मताधिकार जाणून घ्या’ उपक्रमातून युवकांमध्ये लोकशाहीविषयक जागृती

• विद्यार्थी-लोकप्रतिनिधींमध्ये होणार थेट संवाद

नांदेड, दि. 04 : युवकांमध्ये लोकशाहीविषयक जागरूकता निर्माण करणे आणि मतदान प्रक्रियेत त्यांचा सजग सहभाग वाढविण्याच्या उद्देशाने मेरा युवा भारत (MY Bharat), नांदेड यांच्या वतीने ‘विकसित भारत युवा संवाद 2026-आपला मताधिकार जाणून घ्या’ या कार्यक्रमाचे आयोजन गुरुवार, दि. 5 नोव्हेंबर 2026 रोजी सायंकाळी 4 वाजता श्री गुरू गोबिंद सिंहजी अभियांत्रिकी व तंत्रज्ञान संस्था (SGGSIET), नांदेड येथे करण्यात आले आहे.

युवा कार्यक्रम आणि क्रीडा मंत्रालय, भारत सरकार यांच्या अंतर्गत राबविण्यात येणाऱ्या या राष्ट्रव्यापी उपक्रमांतर्गत दि. 26 ऑक्टोबर ते 5 नोव्हेंबर 2026 या कालावधीत देशभरातील 500 विद्यापीठे, महाविद्यालये आणि शैक्षणिक संस्थांमध्ये युवा संवाद कार्यक्रम आयोजित करण्यात येत आहेत. लोकशाही व्यवस्थेची माहिती युवकांपर्यंत पोहोचविणे, मतदानाचे महत्त्व अधोरेखित करणे तसेच राष्ट्रनिर्मितीतील युवकांचा सहभाग वाढविणे हा या उपक्रमाचा प्रमुख उद्देश आहे.

या कार्यक्रमाला लोकसभा व राज्यसभेतील लोकप्रतिनिधींसह खासदार आणि आमदार प्रमुख पाहुणे म्हणून उपस्थित राहण्याची अपेक्षा आहे. एसजीजीएसआयईटीच्या प्राध्यापक प्रा. देवयानी देशमुख या युवा आयकॉन म्हणून सहभागी होणार आहेत.

कार्यक्रमात विद्यार्थी आणि लोकप्रतिनिधी यांच्यात थेट संवादाचे आयोजन करण्यात आले आहे. या माध्यमातून विद्यार्थ्यांना लोकशाही व्यवस्था, मतदानाचे महत्त्व, नागरिकांची कर्तव्ये आणि लोकशाही प्रक्रियेतील युवकांचा सहभाग याबाबत प्रश्न विचारण्याची तसेच आपली मते मांडण्याची संधी मिळणार आहे. यावेळी लोकशाही मूल्यांप्रती बांधिलकी व्यक्त करण्यासाठी लोकशाही प्रतिज्ञाही घेण्यात येणार आहे.

‘विकसित भारत 2047’ हे उद्दिष्ट साध्य करण्यासाठी युवकांचा सक्रिय सहभाग महत्त्वाचा आहे. युवकांना लोकशाही संस्थांशी जोडणे आणि देशाच्या विकासप्रक्रियेत त्यांचे योगदान वाढविणे, हा या कार्यक्रमामागील मुख्य हेतू आहे.

**

 वृत्त क्रमांक

महिला बचत गटांच्या उत्पादनांना हक्काची बाजारपेठ

• दिवाळी प्रदर्शनाला नागरिकांचा उत्स्फूर्त प्रतिसाद

• जिल्हा परिषदेच्या परिसरात उमेद अभियानांतर्गत भव्य विक्री प्रदर्शनाचे उद्घाटन; आज आणि उद्याही प्रदर्शन खुले

• पारंपरिक फराळ, हस्तकला व ग्रामीण उत्पादनांचे स्टॉल; नागरिकांनी खरेदी करून महिला उद्योजिकांना प्रोत्साहन द्यावे-मुख्य कार्यकारी अधिकारी महेश पाटील

नांदेड, दि. 4 : ग्रामीण भागातील महिला बचत गटांनी मेहनतीने तयार केलेल्या उत्पादनांना हक्काची बाजारपेठ उपलब्ध करून देण्यासाठी उमेद- महाराष्ट्र राज्य ग्रामीण जीवनोन्नती अभियानांतर्गत नांदेड जिल्हा परिषदेच्या परिसरात आयोजित तीन दिवसीय दिवाळी विक्री प्रदर्शनाचे आज उद्घाटन करण्यात आले. महिला बचत गटांच्या उत्पादनांना शहरी बाजारपेठ मिळण्यासोबतच त्यांच्या आर्थिक सक्षमीकरणाला चालना देणारा हा उपक्रम महत्त्वपूर्ण आहे. नागरिकांनी प्रदर्शनाला भेट देऊन महिला बचत गटांकडून खरेदी करावी, असे आवाहन मुख्य कार्यकारी अधिकारी महेश पाटील यांनी केले.

जिल्हा परिषदेचे मुख्य कार्यकारी अधिकारी महेश पाटील, पोलीस अधीक्षक डॉ. नीलभ रोहन आणि नांदेड-वाघाळा शहर महानगरपालिकेचे आयुक्त डॉ. महेशकुमार डोईफोडे यांच्या प्रमुख उपस्थितीत प्रदर्शनाचे उद्घाटन झाले. अतिरिक्त मुख्य कार्यकारी अधिकारी तथा प्रकल्प संचालक परीक्षित यादव यांचीही यावेळी उपस्थिती होती.

जिल्हा पोलीस अधीक्षक डॉ. नीलभ रोहन यांनी जिल्हा परिषदेच्या या उपक्रमाचे कौतुक केले. महिला बचत गटांना स्टॉलच्या माध्यमातून त्यांच्या उत्पादनांची विक्री करण्याची संधी उपलब्ध करून देणे हा ग्रामीण महिलांच्या आर्थिक सक्षमीकरणाच्या दृष्टीने महत्त्वपूर्ण उपक्रम असल्याचे त्यांनी नमूद केले. 

महानगरपालिका आयुक्त डॉ. महेशकुमार डोईफोडे यांनीही या उपक्रमाचे स्वागत केले. ग्रामीण महिलांनी तयार केलेल्या हस्तकला वस्तू आणि विविध उत्पादनांना शहरात बाजारपेठ उपलब्ध होत असल्याने त्यांच्या उत्पन्नवाढीस मदत होईल, असे त्यांनी सांगितले.

पारंपरिक दिवाळी फराळाची मेजवानी

या प्रदर्शनात महिला बचत गटांनी घरगुती पद्धतीने तयार केलेले पारंपरिक दिवाळी फराळाचे विविध पदार्थ विक्रीसाठी उपलब्ध आहेत. यामध्ये चिवडा, चकल्या, बेसन लाडू, नाचणी लाडू, शेंगदाणा लाडू, शेव, शेवपापडी, भाकरवडी, पेढे आणि चिप्स यांचा समावेश आहे. भेसळमुक्त आणि दर्जेदार खाद्यपदार्थांना प्राधान्य देणाऱ्या नागरिकांसाठी हे प्रदर्शन विशेष आकर्षण ठरत आहे.

ग्रामीण उत्पादनांसह हस्तकलेच्या वस्तूंचे स्टॉल

खाद्यपदार्थांसोबतच गावरान डाळी, ज्वारी, तीळ, लोणची, हळद, मिरची पावडर, सोयाबीन पनीर, तूप, शेवया आणि विविध मसाल्यांचे स्टॉल उभारण्यात आले आहेत. तसेच आकाशकंदील, पणत्या, हस्तकला साहित्य, सौंदर्यप्रसाधने, पूजेचे साहित्य, धूप-अगरबत्ती आणि घोंगडी अशा विविध वस्तूही विक्रीसाठी उपलब्ध आहेत. विशेष आकर्षण म्हणून मोरिंगा पावडर आणि मोरिंगापासून तयार केलेले विविध पदार्थ प्रदर्शनात ठेवण्यात आले आहेत.

प्रदर्शनाच्या पहिल्याच दिवशी नागरिकांनी मोठ्या संख्येने भेट देत खरेदीला उत्स्फूर्त प्रतिसाद दिला. ग्रामीण महिलांनी तयार केलेल्या उत्पादनांना शहरी बाजारपेठ उपलब्ध व्हावी, त्यांच्या उत्पन्नात वाढ होऊन आर्थिक स्वावलंबनाला चालना मिळावी, या उद्देशाने जिल्हा परिषदेच्या वतीने या प्रदर्शनाचे आयोजन करण्यात आले आहे.

यावेळी मुख्य लेखा व वित्त अधिकारी महेश देशमुख, पशुसंवर्धन विभागाचे सहाय्यक आयुक्त डॉ. प्रवीणकुमार घुले, उपमुख्य कार्यकारी अधिकारी प्रशांत थोरात, जलजीवन मिशनचे प्रकल्प संचालक मयूरकुमार आंदेलवाड, मनरेगाचे अमित राठोड, जिल्हा आरोग्य अधिकारी डॉ. संतोष नवले, शिक्षणाधिकारी वंदना फुटाणे, उमेद अभियानाचे जिल्हा अभियान व्यवस्थापक बालाप्रसाद जंगीलवाड आदी अधिकारी उपस्थित होते.

जिल्हा परिषदेच्या परिसरात आयोजित हे प्रदर्शन आज आणि उद्याही नागरिकांसाठी खुले राहणार आहे. नांदेड जिल्ह्यासह परिसरातील नागरिकांनी प्रदर्शनाला आवर्जून भेट देऊन महिला बचत गटांनी तयार केलेल्या वस्तू आणि खाद्यपदार्थांची खरेदी करावी. महिला उद्योजिकांच्या उत्पादनांना प्रोत्साहन देऊन ग्रामीण महिलांच्या आर्थिक सक्षमीकरणाच्या प्रयत्नांना हातभार लावावा, असे आवाहन मुख्य कार्यकारी अधिकारी महेश पाटील यांनी केले आहे. 

**

 मतदार यादीच्या विशेष सखोल पुनरीक्षणाला मुदतवाढ !

#मतदारयादी

#मुदतवाढ

#SIR

#mahadgiprbjp

दुष्काळी भागांमध्ये जलसंधारणाला बळ

#दुष्काळ

#जलसंधारण

#MahaDGIPR