संकटांना हरवून विश्वासाने पुढे जाऊया... शेतकऱ्यांच्या जीवनात आनंदाचा प्रकाश पसरवू या... शुभ #दीपावली

#Maharashtra #DevendraFadnavis #DiwaliWithFarmers

#Diwali #दुष्काळ #शेतकरी

Maharashtra DGIPR

 महात्मा ज्योतिबा फुले यांच्या २०० व्या जयंतीनिमित्त पुण्यातील फुलेवाडा परिसराच्या संपूर्ण विकासासाठी २३० कोटी रुपयांच्या विकास प्रस्तावाला मंजुरी देण्यात आली आहे.

#MahatmaPhule

#Phulewada

#SavitribaiPhule

#BhideWada

#ज्योतिरावफुले_द्विशताब्दीवर्ष

 वृत्त क्रमांक

नांदेड जिल्ह्यात शेतकऱ्यांसोबत उद्योगमंत्री डॉ. उदय सामंत यांनी साजरी केली दिवाळी

दुष्काळाच्या संकटावर मात करण्यासाठी शासन कटिबद्ध

शेतकऱ्यांच्या सुख-दुःखात सहभागी होत सायाळमध्ये रंगला मायेचा दीपोत्सव !

नांदेड, दि. ८ : राज्यातील शेतकऱ्यांनी सध्याच्या दुष्काळी परिस्थितीत खचून जाऊ नये, कोणतेही टोकाचे पाऊल उचलू नये. शासन शेतकऱ्यांच्या पाठीशी खंबीरपणे उभे असून त्यांच्या अडचणी सोडविण्यासाठी सर्वतोपरी प्रयत्न केले जातील. पुढील दहा महिन्यांतील संभाव्य पाणीटंचाई लक्षात घेऊन पिण्याचे पाणी, टँकर, आनंदाचा शिधा यांसह आवश्यक उपाययोजनांचे नियोजन करण्यात येत आहे, अशी ग्वाही राज्याचे उद्योग, गुंतवणूक, सेवा व मराठी भाषा विभागाचे मंत्री डॉ. उदय सामंत यांनी आज दिली.

नांदेड तालुक्यातील सायाळ येथे शेतकरी, महिला, ज्येष्ठ नागरिक आणि ग्रामस्थांसोबत दिवाळी साजरी करताना ते बोलत होते. यावेळी हळद संशोधन केंद्राचे अध्यक्ष तथा आमदार हेमंत पाटील, आमदार बालाजी कल्याणकर, आमदार आनंद तिडके-बोंढारकर, आमदार बाबूराव कदम-कोहळीकर, मुख्य कार्यकारी अधिकारी महेश पाटील, अपर जिल्हाधिकारी डॉ. रत्नदीप गायकवाड, उपविभागीय अधिकारी डॉ. सचिन खल्लाळ, जिल्हा अधीक्षक कृषी अधिकारी दत्तकुमार कळसाईत, तहसीलदार संजय वारकड यांच्यासह विविध पदाधिकारी, अधिकारी, कर्मचारी, शेतकरी, महिला व ग्रामस्थ उपस्थित होते.

डॉ. सामंत म्हणाले की, आतापर्यंत 50 दिवाळी साजऱ्या केल्या; मात्र 51 वी दिवाळी सायाळ येथील शेतकरी आणि ग्रामस्थांसोबत साजरी करताना विशेष समाधान मिळत आहे. ज्येष्ठ नागरिकांसोबत बसून संवाद साधण्याचा आनंद वेगळाच आहे. अशा संवादातून नवी ऊर्जा मिळते. यावर्षी शासनातील सर्व मंत्री शेतकऱ्यांसोबत दिवाळी साजरी करीत आहेत. पुढील वर्षापासूनही गावागावांत जाऊन नागरिकांसोबत दिवाळी साजरी करण्याचा मानस आहे.

शेतकऱ्यांसोबत केवळ दिवाळी साजरी करून थांबणार नसून त्यांच्या बांधावर जाऊन समस्या जाणून घेऊन त्या सोडविण्यासाठी शासन प्रयत्नशील आहे. दुष्काळी परिस्थितीवर मात करण्यासाठी कृती आराखडा तयार करण्यात येत आहे. शेतकरी, महिला, ज्येष्ठ नागरिक यांच्या अडचणी सोडविण्यासाठी प्रशासनाच्या माध्यमातून समन्वयाने काम केले जाईल. मुख्यमंत्री माझी लाडकी बहीण योजना कायम सुरू राहील. तसेच मुलींना उच्च शिक्षण घेता यावे, यासाठी त्यांच्या शिक्षणाचे शुल्क माफ करण्याचा निर्णय शासनाने घेतला आहे, असेही त्यांनी सांगितले.

शेतकऱ्यांच्या जीवनात कायमस्वरूपी आनंद निर्माण व्हावा आणि त्यासाठी निसर्गाचीही साथ मिळावी, अशी प्रार्थना करून त्यांनी सर्वांना दिवाळीच्या शुभेच्छा दिल्या.

यावेळी हळद संशोधन केंद्राचे अध्यक्ष तथा आमदार हेमंत पाटील यांनी धरणातील पाण्याचे शेतकऱ्यांना समान वाटप करणे, पाणी साठवणुकीसाठी प्रत्येक नाल्यावर छोटे बंधारे उभारणे, पीकविमा आणि शेतकऱ्यांच्या विविध अडचणी सोडविणे याकडे लक्ष वेधले. गावागावांतील समस्या जाणून घेऊन विविध योजनांची प्रभावी अंमलबजावणी करण्यासाठी शासनाने पाठपुरावा करावा, अशी मागणी त्यांनी केली.

आमदार बालाजी कल्याणकर यांनी दुष्काळी परिस्थितीत शेतकऱ्यांनी घाबरून न जाता कोणतेही टोकाचे पाऊल उचलू नये, असे आवाहन केले. आमदार आनंद तिडके-बोंढारकर यांनी शेतकऱ्यांना दिवाळी अग्रीम म्हणून पाच हजार रुपयांची मदत देण्यात आल्याचा उल्लेख करून उर्वरित मदतही तातडीने शेतकऱ्यांच्या खात्यावर जमा करण्यासाठी पाठपुरावा करण्याची विनंती केली.

विधवा महिलेच्या कुटुंबीयांसोबत फराळ

या कार्यक्रमात उद्योगमंत्री डॉ. सामंत यांनी ग्रामस्थ व शेतकऱ्यांसोबत दिवाळी फराळाचा आस्वाद घेतला. तसेच सायाळ येथील पाच मुलींसह राहणाऱ्या विधवा महिला मुक्ताबाई केशव धुमाळे यांच्या घरी भेट देऊन त्यांच्या कुटुंबीयांसोबत फराळ केला. कुटुंबाचा आधार नसलेल्या या महिलेला शासनाच्या विविध योजनांचा लाभ मिळवून देण्यासाठी प्रयत्न करण्यात येतील, अशी ग्वाही त्यांनी दिली.

यानंतर ग्रामस्थांशी संवाद साधताना त्यांनी पिण्याचे पाणी, वीज, मुख्यमंत्री माझी लाडकी बहीण योजना, निराधार योजना आदींबाबतच्या अडचणी जाणून घेतल्या. नागरिकांना विविध शासकीय योजनांचा लाभ मिळवून देण्यासाठी प्रशासन तत्पर असल्याचे सांगत त्यांनी चिंता न करण्याचे आवाहन केले. यावेळी त्यांच्या हस्ते गावातील पिण्याच्या पाण्याच्या टँकरचा शुभारंभ करण्यात आला.

वाडी बु. उपजिल्हा रुग्णालयाची डॉ. उदय सामंत यांनी केली पाहणी

सायाळ येथील कार्यक्रमानंतर परतीच्या प्रवासात उद्योगमंत्री डॉ. उदय सामंत यांनी वाडी बु. येथील उपजिल्हा रुग्णालयास भेट देऊन तेथील आरोग्यविषयक सोयी-सुविधांची पाहणी केली व माहिती घेतली. तसेच सुसज्ज व अत्याधुनिक सुविधाचे रुग्णालय उभारल्यामुळे समाधान व्यक्त केले. 

******** 

​ निमंत्रण

मा. संपादक / प्रतिनिधी / स्ट्रिंजर, दैनिक वृत्तपत्र / 

दूरचित्रवाणी / केबल टीव्ही, नांदेड जिल्हा.

सस्नेह नमस्कार,

​मा. उद्योग, गुंतवणूक, सेवा व मराठी भाषा मंत्री ​मा.ना.​ डॉ. उदय सामंत  हे ​रविवार, दि. ०८ नोव्हेंबर २०२६ रोजी सकाळी ११.४५ वाजता सायाळ (ता. जि. नांदेड) येथे​ शेतकऱ्यांसोबत दिवाळी साजरी करणार आहेत.

तरी आपण यावेळी उपस्थित राहावे, ही विनंती.

-- प्र. जिल्हा माहिती अधिकारी, नांदेड

****

वृत्त क्रमांक

उद्योगमंत्री उदय सामंत उद्या नांदेड जिल्हा दौऱ्यावर

सायाळ येथे शेतकऱ्यांसोबत साजरी करणार दिवाळी

नांदेड, दि. ७ : राज्याचे उद्योग, गुंतवणूक, सेवा व मराठी भाषा विभागाचे मंत्री डॉ. उदय सामंत हे रविवार, दि. ८ नोव्हेंबर, २०२६ रोजी नांदेड जिल्ह्याच्या दौऱ्यावर येत आहेत.

रविवार,दि.८ नोव्हेंबर रोजी सकाळी ११.१५ वाजता ते नांदेड येथून मोटारीने सायाळ (ता. जि. नांदेड) येथे जाण्यासाठी प्रयाण करतील. सकाळी ११.४५ वाजता सायाळ येथे शेतकऱ्यांसोबत दिवाळी साजरी करणार आहेत.

दुपारी १ वाजता #सायाळ येथून मोटारीने नांदेडकडे प्रयाण करतील. दुपारी १.३० वाजता नांदेड येथे आगमन होईल. त्यानंतरचा वेळ राखीव राहील.

***

#दुष्काळ #शेतकरी #FarmerWelfare

#DiwaliWithFarmers #Diwali

वृत्त क्रमांक

अवैध सावकारी व जबरी कर्जवसुलीविरुद्ध नांदेड जिल्ह्यात विशेष मोहीम

नागरिकांनी निर्भयपणे तक्रारी कराव्यात

नांदेड, दि. ७ : जिल्ह्यातील अवैध सावकारी, शासनाने निर्धारित केलेल्या मर्यादेपेक्षा अधिक व्याज आकारणी आणि जबरीने कर्जवसुलीच्या प्रकारांना आळा घालण्यासाठी सहकार विभागामार्फत विशेष तपासणी मोहीम राबविण्यात येत आहे. अशा प्रकारांना बळी पडलेल्या नागरिकांनी कोणत्याही दबावाला न घाबरता निर्भयपणे तक्रारी नोंदवाव्यात, असे आवाहन जिल्हा उपनिबंधक, सहकारी संस्था, नांदेड यांनी केले आहे.

जिल्हाधिकारी यांच्या अध्यक्षतेखाली २४ ऑक्टोबर २०२६ रोजी झालेल्या जिल्हास्तरीय सावकारी समितीच्या बैठकीत प्राप्त तक्रारींचा प्रकरणनिहाय आढावा घेण्यात आला. अवैध सावकारी करणाऱ्यांविरुद्ध महाराष्ट्र सावकारी (नियमन) अधिनियम, २०१४ मधील तरतुदींनुसार कठोर कारवाई करण्याचे निर्देश देण्यात आले. त्यानुसार जिल्ह्यातील परवानाधारक सावकारांची विशेष तपासणी सुरू असून, कर्जवाटप व वसुलीची पद्धत, परवान्यातील अटींचे पालन, व्याजदरांची आकारणी तसेच वसुली अधिकारी व कर्मचाऱ्यांची पार्श्वभूमी तपासण्यात येत आहे.

शासनाच्या १६ सप्टेंबर २०१४ रोजीच्या अधिसूचनेनुसार शेतकऱ्यांना दिलेल्या तारण कर्जासाठी वार्षिक ९ टक्के, तर विनातारण कर्जासाठी १२ टक्के व्याजदर निर्धारित करण्यात आला आहे. शेतकऱ्यांव्यतिरिक्त इतर व्यक्तींना दिलेल्या तारण कर्जासाठी १५ टक्के, तर विनातारण कर्जासाठी १८ टक्के वार्षिक व्याजदराची मर्यादा आहे. या मर्यादेपेक्षा अधिक व्याज आकारणे तसेच चक्रवाढ किंवा दंडव्याज आकारणे अनुज्ञेय नाही.

सद्यस्थितीत जिल्ह्यात १८८ वैध परवानाधारक सावकार असून, त्यापैकी ११४ सावकार नांदेड तालुक्यात आहेत. विशेष तपासणी मोहिमेंतर्गत आतापर्यंत ६२ सावकारांच्या दप्तरांची तपासणी पूर्ण करण्यात आली आहे. जिल्हाधिकारी राहुल कर्डिले यांच्या आवाहनानंतरच्या दहा दिवसांत अवैध सावकारीसंदर्भात २३ तक्रारी प्राप्त झाल्या असून, त्यापैकी १५ तक्रारींची पडताळणी पूर्ण झाली आहे. उर्वरित तक्रारींवर कार्यवाही सुरू आहे.

सावकारांकडून जबरदस्तीने किंवा दबाव टाकून कर्जवसुली केली जात असल्यास अथवा निर्धारित मर्यादेपेक्षा अधिक व्याज आकारले जात असल्यास नागरिकांनी जिल्हा उपनिबंधक, सहकारी संस्था, नांदेड किंवा संबंधित तालुक्याच्या उपनिबंधक अथवा सहायक निबंधक, सहकारी संस्था यांच्या कार्यालयात तक्रार नोंदवावी. प्राप्त तक्रारींची पडताळणी करून संबंधितांविरुद्ध कायद्यानुसार कारवाई करण्यात येईल. त्यामुळे अवैध सावकारीच्या प्रकारांना आळा घालण्यासाठी नागरिकांनी पुढे येऊन तक्रारी नोंदवाव्यात, असे आवाहन सहकार विभागाने केले आहे.

******

वृत्त क्रमांक

दुष्काळी परिस्थितीत पशुधनासाठी चारा व पाणी उपलब्धतेची संयुक्त पाहणी

आंडगा (दक्षिण) येथे पशुसंवर्धन विभागाच्या अधिकाऱ्यांची क्षेत्रीय भेट; ग्रामस्थांशी साधला संवाद

नांदेड, दि. ७ : जिल्ह्यातील दुष्काळजन्य परिस्थितीच्या पार्श्वभूमीवर पशुधनासाठी चारा व पिण्याच्या पाण्याची उपलब्धता जाणून घेण्यासाठी पशुसंवर्धन विभागाच्या अधिकाऱ्यांनी आज लोहा तालुक्यातील आंडगा (दक्षिण) येथे संयुक्त क्षेत्रीय भेट देऊन प्रत्यक्ष पाहणी केली.

आंडगा (दक्षिण) येथील ग्रामस्थ व शेतकऱ्यांनी मन्याड (लिंबोटी) धरणावरील विद्युत मोटारींचा वीजपुरवठा दररोज दोन ते तीन तास सुरू ठेवून जनावरांसाठी चारा व पिण्याच्या पाण्याची व्यवस्था करावी, अशी मागणी जिल्हाधिकाऱ्यांकडे निवेदनाद्वारे केली होती. या निवेदनाच्या अनुषंगाने अधिकाऱ्यांनी गावाला भेट देऊन ग्रामस्थ व शेतकऱ्यांशी संवाद साधला. यावेळी जनावरांसाठी चारा व पाण्याच्या उपलब्धतेबाबत तसेच विद्युत मोटारींच्या वीजपुरवठ्याबाबतच्या मागणीच्या अनुषंगाने स्थानिक परिस्थितीची माहिती घेतली.

परिसरात उपलब्ध असलेल्या वाळलेल्या चाऱ्याचा काटकसरीने व योग्य पद्धतीने वापर करण्याबाबत, निकृष्ट चाऱ्याचे पोषणमूल्य वाढविण्याच्या उपाययोजनांबाबत तसेच पशुधनासाठी संतुलित आहार व्यवस्थापनाबाबत शेतकऱ्यांना मार्गदर्शन करण्यात आले.

या संयुक्त पाहणीत जिल्हा उपआयुक्त, पशुसंवर्धन व दुग्धव्यवसाय डॉ. सखाराम खुणे, सहाय्यक आयुक्त डॉ. प्रविणकुमार घुले, लोहा येथील तालुका पशुवैद्यकीय चिकित्सालयाचे  सहाय्यक आयुक्त डॉ. अंकुश पाटील आणि पशुवैद्यकीय अधिकारी डॉ. उत्तम बोदेमवाड उपस्थित होते.

दुष्काळी परिस्थितीत पशुधनाचे संरक्षण करण्यासाठी चारा व पिण्याच्या पाण्याचे योग्य व्यवस्थापन करण्यासह ग्रामस्थांच्या अडचणी जाणून घेऊन आवश्यक उपाययोजना करण्याच्या दृष्टीने ही पाहणी करण्यात आली.

**