कोविड-19 च्या अनुषंगाने महाशिवरात्री निमित्त मार्गदर्शक सूचना
नांदेड (जिमाका) दि. 10 :- शासनाने कोव्हिड-19 च्या अनुषंगाने यावर्षी सर्व धर्मीय सण, उत्‍सव तसेच सर्व कार्यक्रम अतिशय साधेपणाने साजरे करण्यात येत आहेत. कोरोनाचा प्रादुर्भाव अद्यापही कमी झालेला नसून सध्‍या राज्‍यात तसेच मोठया शहरांमध्‍ये रूग्‍णांच्‍या संख्‍येत पुन्‍हा वाढ होताना दिसत आहे. त्‍यामुळे उद्भवलेल्‍या परिस्थितीचा विचार करता यावर्षी गुरुवार 11 मार्च 2021 रोजी महाशिवरात्री हा उत्‍सव अत्‍यंत साधेपणाने साजरा करणे आवश्यक असल्‍याने शासनाने पुढील सात मागर्दशक सूचनेनुसार कार्यवाही करण्याचे निर्देश दिले आहेत. त्याअनुषंगाने जिल्हादंडाधिकारी डॉ. विपीन इटनकर यांनी फौजदारी प्रक्रीया संहिता 1973 चे कलम 144 नुसार संपूर्ण नांदेड जिल्ह्याच्या हद्दीत गुरुवार 11 मार्च 2021 रोजी महाशिवरात्री या उत्‍सव संदर्भात पुढीलप्रमाणे आदेश निर्गमित केले आहेत.
महाशिवरात्री हा भारतातील पवित्र उत्‍सवांपैकी एक मोठा उत्‍सव मानला जातो. देशभरात हिंदू धर्मीय लोक महाशिवरात्री मोठया उत्‍साहाने साजरी करतात. नांदेड जिल्ह्यातील काळेश्‍वर, गंगनबीड, शिवमंदिर चैतन्‍यनगर नांदेड, मरळक व इतर विविध ठिकाणी असलेल्या शिवमंदिरात दरवर्षी संपूर्ण नांदेड जिल्‍ह्यातून शिवभक्‍त दर्शनाकरिता मोठया प्रमाणात गर्दी करीत असतात. परंतू यावर्षी कोविड-19 च्या संसर्गजन्‍य परिस्थितीचा विचार करता महाशिवरात्री उत्‍सव अत्‍यंत साधेपणाने साजरा करणे आवश्यक आहे. त्या अनुषंगाने सर्व मंदीर विश्‍वस्‍त / व्यवस्थापक यांनी मंदिरात देवदर्शनासाठी गर्दी होणार नाही व सोशल डिस्‍टन्सिंगचे पालन होईल याकडे विशेष लक्ष देणे बंधनकारक राहील.
दरवर्षी महाशिवरात्रीच्‍या निमित्ताने शिवमंदिरात मोठया प्रमाणात पुजाअर्चा केली जाते व दर्शनासाठी अनेक भाविक त्‍याठिकाणी गर्दी करीत असतात. परंतू यावर्षी कोविड-19 च्या संसर्गजन्‍य परिस्थितीचा विचार करता भाविकांनी घराबाहेर न पडता शक्‍यतो घरात राहूनच पूजाअर्चा करावी, यासाठी प्रशासनाकडून स्‍थानिक लोकप्रतिनिधी तसेच स्‍वंयसेवी संस्‍था यांच्या सहाय्याने प्रतिबंधात्‍मक उपाययोजना व जनजागृती करावी.
कोविड-19 चा संसर्ग टाळण्‍यासाठी प्रत्‍येक शिवमंदिराच्‍या आतील बाजूस सोशल डिस्‍टन्सिंगचे पालन होण्‍याच्‍या दृष्‍टीने एकावेळी फक्‍त 50 भाविक दर्शन घेतील, यादृष्‍टीने संबंधित विश्‍वस्‍त अथवा व्यवस्थापक यांनी योग्‍य त्या उपाययोजना कराव्‍यात. तसेच मंदिर व्‍यवस्‍थापनाने आजूबाजूच्‍या परिसरात निर्जंतुकीकरणाची व्‍यवस्‍था, सोशल डिस्‍टन्सिंग व स्‍वच्‍छतेचे नियम (मास्‍क, सॅनीटायझर इत्यादी) चे पालन होईल याकडे विशेष लक्ष द्यावे.
महाशिवरात्रीच्‍या दिवशी मंदिराच्‍या परिसरात हार व फुले विक्रेते यांची गर्दी होणार नाही तसेच सोशल डिस्‍टन्सींगच्‍या नियमाचे तंतोतंत पालन होईल याकडे मंदीराचे व्यवस्थापक व स्‍थानिक प्रशासन यांनी विशेष लक्ष द्यावे. त्‍याचप्रमाणे महाशिवरात्री उत्‍सवाच्‍या निमित्ताने संबंधित स्‍थानिक प्रशासनाचे मंडपाबाबतचे धोरण यांचेशी सुसंगत असे मर्यादित स्‍वरूपाचे मंडप उभारावेत.
प्रत्‍यक्ष मंदिरात येऊन दर्शन घेऊ इच्छिणाऱ्या भाविकांनी स्‍वतःहून मास्‍कचा वापर व सोशल डिस्‍टन्सिंगचे पालन करावे. जेष्‍ठ नागरीक व लहान मुलांना मंदिरात दर्शनाकरीता आणू नये. महाशिवरात्री निमित्त शिवमंदिरातील व्यवस्थापक यांनी दर्शनाची सुविधा ऑनलाईन, केबल नेटवर्क, वेबसाईट व फेसबुक इत्‍यादीद्वारे उपलब्ध करून द्यावी. कोवीड-19 च्या विषाणूंचा प्रादुर्भाव रोखण्‍यासाठी शासनाच्या मदत व पुनर्वसन, आरोग्‍य, पर्यावरण, वैद्यकीय शिक्षण विभाग तसेच संबंधित महानगरपालिका, पोलीस प्रशासन, स्‍थानिक प्रशासन यांनी विहित केलेल्‍या नियमांचे काटेकोर पालन करावे. तसेच या परिपत्रकानंतर व प्रत्‍यक्ष सण सुरू होण्‍याच्‍या मधल्‍या कालावधीत अजून काही सूचना प्रसिध्‍द झाल्यास त्‍यांचे देखील अनुपालन करणे बंधनकारक राहील.
या आदेशाची काटेकोरपणे अंमलबजावणी करुन तात्काळ
कार्यवाही करण्यात यावी. आदेशाचे पालन न करणाऱ्या कोणतीही व्यक्ती, संस्‍था, अथवा समुह, भारतीय
दंड संहिता 1860, साथरोग प्रतिबंधक कायदा 1897 फौजदारी प्रक्रिया संहिता 1973 व आपत्‍ती व्यवस्थापन
अधिनियम 2005, मधील तरतुदी नुसार शिक्षेस पात्र राहील. परंतु
आदेशाची अंमलबजावणी करताना सदभावनेने केलेल्‍या कृत्‍यासाठी कोणत्याही अधिकारी,
कर्मचारी यांचेविरुध्‍द कार्यवाही केली जाणार नाही, असे आदेश जिल्हादंडाधिकारी डॉ. विपीन इटनकर यांनी 10
मार्च 2021 रोजी निर्गमीत केले आहेत.
00000
