​वृत्त क्र. 1222

​​विमुक्त जाती, भटक्या जमाती, विशेष मागास प्रवर्गातील लोकांसाठी विविध योजना 

नांदेड दि. 20 डिसेंबर :- वसंतराव नाईक विमुक्त जाती व भटक्या जमाती विकास महामंडळ मर्या. अंतर्गत विमुक्त जाती, भटक्या जमाती व विशेष मागास प्रवर्गातील लोकांसाठी विविध योजना राबविल्या जात आहेत. तसेच महाराष्ट्र शासनाने वडार समाजासाठी पैलवान कै. मारुती चव्हाण वडार आर्थिक विकास महामंडळ (उपकंपनी) व रामोशी समाजासाठी उमाजी नाईक आर्थिक विकास महामंडळ (उपकंपनी) या दोन महामंडळाची स्थापना केलेली आहे. ही महामंडळे वसंतराव नाईक विमुक्त जाती व भटक्या जमाती विकास महामंडळ मर्या. अंतर्गत कार्यरत असुन त्यांना स्वतंत्र उद्दीष्ट देण्यात आलेले आहे. 

या तिन्ही महामंडळांअंतर्गत वैयक्तिक कर्ज व्याज परतावा योजना, गट कर्ज व्याज परतावा योजना, रुपये एक लाख थेट कर्ज योजना, बीज भांडवल योजना राबविल्या जात आहेत. जिल्ह्यायातील इच्छुक लाभार्थ्यांनी अर्ज करण्यासाठी महामंडळाच्या www.vjnt.in या संकेतस्थळाला भेट द्यावी. अधिक माहितीसाठी जिल्हा कार्यालय वसंतराव नाईक वि.जा.भ.ज. विकास महामंडळ ( मर्या.) डॉ.बाबासाहेब आंबेडकर सामाजिक न्याय भवन नांदेड. फोन क्र. 02462-220244 येथे संपर्क साधावा, असे आवाहन महामंडळाचे जिल्हा व्यवस्थापक आर. एस. नरवडे यांनी केले आहे. 

वैयक्तिक कर्ज व्याज परतावा योजना  

या योजनेची मर्यादा 10 लाख रु. पर्यंत असुन अर्जदार हा विमुक्त जाती, भटक्या जमाती व विशेष मागास प्रवर्गातील असावा. अर्जदाराचे वय 18 ते 50 वर्ष दरम्यान असावे. अर्जदाराचे बँक खाते आधार कार्ड लिंक असणे आवश्यक आहे. योजना ही ऑनलाईन असून याकरिता जातीचा दाखला, उत्पन्नाचा दाखला, रेशनकार्ड, आधारकार्ड, वयाचा पुरावा संबंधित व्यवसायाचे कोटेशन व प्रकल्प अहवाल व इतर कागदपत्रे वेबसाईटवर अपलोड करणे आवश्यक आहे.

गट कर्ज व्याज परतावा योजना

या योजनेची मर्यादा 10 लाख ते 50 लाख रुपयापर्यत असुन या योजनेचा लाभ घेण्यासाठी नोंदणीकृत गट असावा व गटातील सदस्य हे विमुक्त जाती, भटक्या जमाती व विशेष मागास प्रवर्गातील असावे. गटातील सदस्यांचे वय 18 ते 45 वर्ष पर्यत असावे. गटातील लाभार्थ्याचे कर्ज खाते आधार कार्ड लिंक असणे आवश्यक आहे. उत्पन्नाची मर्यादा नॉनक्रिमिलिअर, आधारकार्ड, वयाचा पुरावा संबंधीत व्यवसायाचे कोटेशन व प्रकल्प अहवाल वेबसाईटवर मुळ कागदत्रासह अपलोड करणे आवश्यक आहे. 

रुपये एक लाख थेट कर्ज योजना

या योजनेमध्ये महामंडळाकडुन 1 लाख रुपये थेट कर्ज दिले जाते. या योजनेसाठी दोन जामीनदार व गहाणखत तसेच बोझा नोंद करुन देणे आवश्यक आहे. या योजनेकरिता जातीचा दाखला, उत्पन्नाचा दाखला ( रु.1 लाखापर्यत), रेशनकार्ड, आधार कार्ड, वयाचा पुरावा, व्यवसायाचा परवाना आदी कागदपत्रांसह संबंधीत व्यवसायानुसार कागदपत्रे आवश्यक आहे. या योजनेचे अर्ज महामंडळाच्या कार्यालयातुन जातीचा मुळ दाखला व आधार कार्ड दाखवुन रितसर नोंद करुन अर्जदारास मिळतील.

बीज भांडवल योजना

ही योजना बँकेमार्फत राबविली जात असुन अर्जदाराने महामंडळाकडे जातीचा दाखला, उत्पन्नाचा दाखला (एक लाख रुपयापर्यंत), रेशनकार्ड, आधार कार्ड, वयाचा पुरावा, रहिवासी प्रमाणपत्र, संबंधित व्यवसायानुसार आवश्यक कागदपत्रे अर्जासोबत जोडुन कार्यालयात दाखल करावी लागतील. यापुर्वी लाभार्थ्याने कर्जाचा लाभ घेतला असल्यास त्यांना परत कर्ज प्रस्ताव दाखल करता येणार नाही. 

या योजनेचे सन 2024-25 या आर्थिक वर्षाकरीता वैयक्तिक कर्ज व्याज परतावा योजनेचे-100,05,05. गट कर्ज व्याज परतावा योजना योजनेचे- 01,01,01. बीज भांडवल कर्ज योजना-01,01,01. रुपये 1 लाख थेट कर्ज योजना-100,30,30 असे उदिष्ट प्राप्त झाले आहे, असेही प्रसिद्धी पत्रकात महामंडळाचे जिल्हा व्यवस्थापक यांनी नमूद केले आहे.  

0000

 ​वृत्त क्र. 1221

अल्पसंख्याक समुदायातील विद्यार्थ्यांसाठी  

शिष्यवृत्ती योजना अर्ज करण्याचे आवाहन

 

नांदेड दि. 20 डिसेंबर :- अल्पसंख्याक समुदायातील विद्यार्थ्यांकरीता अभ्यासक्रमासाठी शिष्यवृत्ती योजनेंतर्गत रिक्त असलेल्या जागा भरण्यात येणार आहेत. यासाठी विद्यार्थ्यांकडून 16 डिसेंबर पासून प्रत्यक्षरित्या व ऑनलाईन अर्ज मागविण्यात आली आहेत.

 

महाराष्ट्र शासनाच्या www.maharashtra.gov.in यासंकेतस्थळावर याबाबत ताज्या घडामोडीमध्ये विस्तृत माहिती प्रसिद्ध करण्यात आली आहे. अर्ज सादर करण्याची अंतिम मुदत मंगळवार 31 डिसेंबर 2024 पर्यंत आहे.

 

नांदेड जिल्ह्यातील अल्पसंख्याक समुदायातील विद्यार्थ्यांनी आपले अर्ज आयुक्त, समाज कल्याण आयुक्तालय 3 चर्च पथ पुणे या कार्या​लयात मुदतीत सादर करावेत, असे आवाहन समाज कल्याणचे सहाय्यक आयुक्त शिवानंद मिनगिरे यांनी केले आहे.

 

महाराष्ट्र शासनाच्या सामाजिक न्याय व विशेष सहाय्य विभागांतर्गत सन 2024-25 मध्ये राज्यातील अल्पसंख्याक समुदयातील विद्यार्थ्यांसाठी परदेशात पदव्युत्तर पदवी व पी.एच.डी. अभ्यासक्रमासाठी शिष्यवृत्ती योजनेंतर्गत विद्यार्थ्यांकडून अर्ज मागविण्यासाठी शासनाच्या अल्पसंख्यांक विभागाने मंजुरी दिली आहे, असेही प्रसिद्धी पत्रकात स्पष्ट केले आहे.  

00000

  वृत्त क्र. 1220

नांदेड निर्यातदार जिल्हा म्हणून नावलौकिकाला आणू या ! 

 जिल्हा उद्योग केंद्र नांदेड निर्यात प्रचालन कार्यशाळा 

नांदेड दि. २० डिसेंबर : नांदेड मध्ये केळी, हळद व अन्य अनेक क्षेत्रात अव्वल पद्धतीचे निर्यातदार होण्याची ताकद आहे. इथल्या शेतकऱ्यांनी,व्यापाऱ्यांनी,प्रशासनाने जोर लावल्यास ही बाब सहज शक्य होऊ शकते. त्यामुळे नांदेड निर्यातदार जिल्हा म्हणून नावलौकिकाला आणण्यासाठी आपापल्या भूमिका नुसार प्रयत्न करूया, असे प्रतिपादन विदेश व्यापार महानिदेशालयाचे अधिकारी जयंतकुमार रावल यांनी केले आहे.

जिल्हा उद्योग केंद्र नांदेड यांच्या पुढाकारात उद्योग संचालनालय मुंबई मार्फत निर्यात प्रचालन कार्यशाळा ( एक्सपोर्ट प्रमोशन वर्कशॉप ) आयोजित करण्यात आली होती. 16 डिसेंबर रोजी झालेल्या या उद्योग भवनातील कार्यक्रमात वेगवेगळ्या क्षेत्रातील मान्यवरांनी या संदर्भात विचार मंथन केले.

या कार्यशाळेत विदेश व्यापार महानिदेशालयाचे जयंतकुमार रावल,  मुख्य डाक कार्यालयाचे अधीक्षक कुलकर्णी, TJSB बँकेचे निखील गोसावी, अग्रणी बँक अधिकारी अनिल गचके,तसेच उद्योग आघाडीचे अध्यक्ष तथा ज्येष्ठ उद्योजक हर्षद शहा, जिल्हयातील केळी निर्यातदार श्री. देशमुख आणि निर्यातक्षम उद्योजक, नव उद्योजक, कृषी उत्पादक, प्रक्रिया उत्पादक इत्यादी उद्योगाशी संबंधीत उपक्रमाचे पदाधिकाऱ्यांची उपस्थिती होती.

सदर कार्यशाळेचा उद्देश हा राज्यामध्ये निर्यात क्षेत्रात प्रोत्साहन देण्यासाठी तसेच रोजगार निर्मितीचे लक्ष्य साध्य करण्यासाठी आणि निर्यात वाढीला प्रत्येक जिल्हयाला उत्तरदायी बनविण्यासाठी राज्याकडून केंद्र शासनाच्या जिल्हा हे निर्यात केंद्र (District as Export Hub) उपक्रमाला प्रोत्साहन देणे हा आहे, असे जिल्हा निर्यात प्रचालन समितीचे सदस्य सचिव तथा जिल्हा उद्योग केंद्राचे महाव्यवस्थापक अमोल इंगळे यांनी त्यांच्या प्रास्ताविकात सांगितले.

 कार्यशाळेत विदेश व्यापार महानिदेशालय (DGFT) पुणे येथील जयंतकुमार रावल यांनी मार्गदर्शन करतांना,निर्यात बाबत महत्व व प्रक्रिया विषद केली. अनिल मोहिते यांनी कोरोनानंतर निर्यातीमध्ये झालेल्या वाढीचे प्रमाण हे सन 2029-2030 पर्यंत दुपटीने होईल असे सांगितले. देशात महाराष्ट्र राज्याचा निर्यातीमध्ये दुसरा क्रमांक लागतो. छत्रपती संभाजीनगर विभागामध्ये संभाजीनगर जिल्हयाचा इंजिनिअरिंग क्षेत्रात तर नांदेड जिल्ह्याचा फार्मास्युटीकल क्षेत्रात अग्रेसर आहे.तसेच जेम्स व ज्वेलरी, कृषी, वैद्यकीय आणि सेवाक्षेत्र आयटी, बँक क्षेत्रांमध्ये निर्यात होत असल्याचे कथन केले. 

 ग्रामीण भागातील उद्योजकांच्या उत्पादित वस्तूंच्या निर्यातीसाठी डाक निर्यात केंद्राची उपयुक्तता  मुख्य डाक कार्यालयाचे अधीक्षक श्री.कुलकर्णी यांनी सांगितली. ई-कॉमर्सद्वारा उत्पादित वस्तूची ऑर्डर आल्यास, पोस्टाद्वारे करण्यात येणारी कस्टम क्लीअरन्सची प्रक्रिया विषद केली.

निखील गोसावी यांनी निर्यातीबाबत TJSB ही कॉपरेटीव्ह बँक कमी दराने अर्थसहाय्य  करत असल्याचे सांगितले. SWIFT (Society For Worldwide Interbank Financial Telecommunication) द्वारा होत असलेल्या आयात-निर्यातीबाबत प्रक्रिया विषद केली. 

देशातंर्गत व जागतिक पातळीवर बाजारपेठ मिळविण्यासाठी निर्यातीबाबत केलेली कार्यवाही, प्रयत्नांची माहिती व जिल्हयांमधील उद्योजकांमध्ये जागरुकता निर्माण करुन निर्यात वाढीसाठी प्रेरीत माहिती केळी, हळद निर्यातदार श्री.देशमुख यांनी कार्यशाळेत दिली. त्यांनी कृषी आधारीत केलेल्या उत्पादित वस्तू निर्यातबाबत संभाव्य अडचणी व त्यावरील करण्यात येणारी उपाययोजना आदी बाबत सविस्तर सांगितले.  

सुरूवातीला या एक दिवसीय कार्यशाळेची उपस्थित मान्यवरांच्या हस्ते दीपप्रज्ज्वलाने सुरुवात करुन पुष्पगुच्छ देवून त्यांचे स्वागत करण्यात आले. या कार्यशाळेचा समारोप उद्योग निरीक्षक सतीश चव्हाण यांच्या आभार प्रदर्शनानंतर करण्यात आला.

0000