वृत्त क्र. 504

दहाव्या आंतरराष्ट्रीय योग दिनाच्या आयोजनाची

जिल्हा प्रशासनाच्यावतीने जिल्ह्यात जय्यत तयारी  

 

·   श्री गुरुग्रंथ साहिबजी भवन येथे 10 व्या आंतरराष्ट्रीय योग दिनाचे आयोजन

·   नागरिकांनी आंतरराष्ट्रीय योग दिनाचा लाभ घ्यावा   

 

नांदेड दि. 19 :- ‍जिल्हा प्रशासनाच्यावतीने दहावा आंतरराष्ट्रीय योग दिन शुक्रवार 21 जून, 2024 रोजी सकाळी 6.30 वा. श्री गुरुग्रंथ साहिबजी भवन एनआरआयच्या बाजुस हिंगोली गेट नांदेड येथे साजरा करण्यात येणार आहे.  नांदेड जिल्हयातील विविध योग समिती, योग प्रशिक्षक, आयुष मंत्रालयाचे प्रतिनिधी, यांच्यावतीने सदरील कार्यक्रमास मार्गदर्शन लाभणार आहे. जिल्हयातील नागरीकांनी 21 जुन रोजी सकाळी 6.15 वा. श्री गुरुग्रंथ साहिबजी भवन, एनआरआयच्या बाजुस हिंगोली गेट नांदेड येथे उपस्थित राहुन आंतरराष्ट्रीय योग दिनाचा लाभ घ्यावा, असे आवाहन करण्यात आले आहे.

 

हा कार्यक्रम 21 जुन रोजी सकाळी 6.30 ते 8 वाजेदरम्यान सामुहिक योगा कार्यक्रमाअंतर्गत प्रार्थना चल क्रिया व खडे आसान, बैठे आसन, पोटावरचे आसन व पाठीवरचे आसन, प्राणायम ध्यान शांतिपाठ इत्यादी योग क्रिया घेण्यात येणार आहेत. योग दिन हा कार्यक्रम मोठया प्रमाणात साजरा करण्यासाठी शासकीय विविध विभागातील सर्व कर्मचारी, आरोग्य विभागाचे अधिकारी-कर्मचारी, पोलीस विभाग, जिल्हा परिषद, सर्व शैक्षणिक संस्था, क्रीडा क्षेत्रातील मान्यवर, क्रीडा पुरस्कारार्थी, खेळाडू व मागदर्शक, स्कॉऊट गाईड, एन.एस.एस., एन.सी.सी., योग संघटना इत्यादी विभागाचे कर्मचारी उपस्थित राहणार आहेत. नांदेड जिल्ह्यातील जिल्हा परिषद शाळा, कनिष्ठ महाविद्यालय, वरीष्ठ महाविद्यालय, ग्रामपंचायतच्यावतीने गावातील सर्व नागरीकांनी कमीतकमी 50 च्या गटामध्ये एकत्र येऊन 21 जुन 2024 रोजी सकाळी 7 ते 8 या कालावधीत योगाचे आयोजन करण्यात यावे.

 

आंतरराष्ट्रीय योग दिन साजरा करण्याबाबत सविस्तर माहिती www.ayush.gov.in या संकेत स्थळावर उपलब्ध आहे. तसेच नांदेड जिल्हायातील नागरीकांनी आपआपल्या संस्थेत, शाळेत, कार्यालयात, मोठ्या प्रमाणात योग दिनाचे आयोजन करून 7517536227 या भ्रमणध्वनीवर किंवा dsonanded.dsys-mh@gov.in, dsonanded@rediffmail.com या ई-मेलवर फोटोसह कार्यक्रम आयोजनाचा संपुर्ण अहवाल सादर करावा, असे जिल्हाधिकारी अभिजीत राऊत नांदेड यांनी सुचित केले आहे.

 

केंद्र शासनाने 21 जून 2024 हा दिवस 10 वा आंतरराष्ट्रीय योगा दिन म्हणून आयोजित करण्याचे निर्देश दिले असून संयुक्त राष्ट्रसंघाने 21 जून हा दिवस आंतरराष्ट्रीय योगादिन म्हणून दरवर्षी साजरा करण्याचा ऐतिहासिक निर्णय घेतला आहे. त्यानुषंगाने दरवर्षी दि. 21 जून हा दिवस आंतरराष्ट्रीय योगा दिन म्हणून जगभरात मोठया उत्साहाने साजरा करण्यात येतो. योगा दिनाच्या निमीत्ताने जगभरात योगासनाची परंपरा स्वीकारणे व ती करणे, ही आपल्या देशासाठी अभिमानाची बाब आहे. कारण, योगा हा आपल्या भारताच्या सांस्कृतीक वारसाचा अविभाज्य भाग आहे.

 

जिल्हा प्रशासन नांदेड, शिक्षण विभाग (जिल्हा परिषद, नांदेड), जिल्हा क्रीडा अधिकारी कार्यालय नांदेड, नांदेड जिल्हा योग संघटना व योग विद्येचा प्रचार-प्रसार करणाऱ्या स्थानिक संस्थांचे प्रतिनिधी यांच्या संयुक्त विद्यमाने आंतरराष्ट्रीय योग दिन आयोजनाची पूर्व तयारी आढावा घेण्यासाठी जिल्हाधिकारी अभिजीत राऊत यांच्या अध्यक्षतेखाली नुकतीच बैठक संपन्न झाली.

 

या बैठकीस जिल्हा परिषद शिक्षणाधिकारी (माध्य.) माधव सलगर, जिल्हा क्रीडा अधिकारी जयकुमार टेंभरे, ने.यु.कें. जिल्हा युवा अधिकारी श्रीमती चंदा रावळकर, जिल्हा संघटक गाईड श्रीमती शिवकाशी तांडे, संजय बेतीवार क्रीडा अधिकारी, राज्य क्रीडा मार्गदर्शक प्रवीण कोंडेकर, बालाजी शिरसीकर, चंद्रप्रकाश होनवडजकर, टी. एन. रामनबैनवाड नांदेड जिल्हा योग असो. आदि मान्यवर उपस्थित होते. त्याचबरोबर गजानन हुगे (प्रतिनिधी, प्राचार्य शासकीय तंत्रनिकेतन,नांदेड), आर. डी. केंद्रे (योग विद्या धाम), सुरेश येवतीकर (योग विद्या धाम), प्रलोभ कुलकर्णी (क्रीडा भारती),गंगाबिशन कांकर (गिता परिवार),किशन रंगराव भवर (प्रतिनिधी, क्रीडा भारती), राम शिवपनोर (भारत स्वाभिमान न्यास, पतंजली), सुरेश लंगडापुरे (पतंजली योग समिती), नागोराव पोटबदवार (सचिव योग विद्याधाम नांदेड), डॉ. अवधूत पवार (इंटरनॅशनल नॅपरोपॅथी ऑर्गनायझेशन,नांदेड), बालाजी लंगडापुरे (आय.एन.ओ. जिल्हा संघटक नांदेड), एस.गंगाधर पाटील (आय.एन.ओ. सचिव, नांदेड), शिवा बिरकले (आर्ट ऑफ लिव्हींग), शिवाजीराजे पाटील (आर्ट ऑफ लिव्हींग) आदी उपस्थित होते.  सदर कार्यक्रम आयोजन-नियोजनासाठी बैठकीमध्ये कामकाज वाटप करण्यात आले असून याबाबत जय्यत तयारी सुरु आहे, असे प्रसिद्धीपत्रकाद्वारे जिल्हा क्रीडा अधिकारी जयकुमार टेंभरे यांनी कळविले आहे.

00000

वृत्त क्र. 502

मौजे ब्रम्हपुरी गोदावरी नदीच्या  पात्र परिसरात कलम 144  

नांदेड दि. 19 :- मौजे ब्रम्हपुरी येथील गोदावरी नदी पात्र परिसरात शांतता व सुव्यवस्था अबाधीत रहावी यासाठी फौजदारी प्रक्रिया संहिता 1973 चे कलम 144 प्रमाणे नांदेड ग्रामीण पोलीस स्टेशनच्या हद्दीतील नदी पात्रातील परिसर प्रतिबंधीत क्षेत्र म्हणून 20 जून 2024 रोजी सकाळी 6 वाजेपासून ते 19 जुलै 2024 चे मध्यरात्री पर्यंत घोषित करण्यात आले आहे. त्याबाबत जिल्हादंडाधिकारी कार्यालयाने आदेश निर्गमित केले आहेत.  

 

फौजदारी प्रक्रिया संहिता 1973 चे कलम 144 नुसार प्राप्त अधिकाराचा वापर करुन चतु:सिमा पूर्वेस वाजेगाव कोल्हापुरी बंधारा, पश्चिमेस नांदेड ते देगलूर कडे जाणाऱ्या रोडवरील जुना पूल, दक्षिणेस गोदावरीचे नदीचे पात्र आणि उत्तरेस चिल्ला/दर्गाची संरक्षण भिंत यामधील जागा 20 जून 2024  रोजी सकाळी 6 वाजेपासून ते 19 जुलै 2024 रोजीच्या मध्यरात्री पर्यंत फौजदारी प्रक्रिया संहिता 1973 चे कलम 144 प्रमाणे प्रतिबंधीत क्षेत्र म्हणून जिल्हादंडाधिकारी यांनी घोषित केले आहे.  

 

हा आदेश शासकीय कर्तव्यावरील अधिकारी व कर्मचारी, एक खिडकी पथकातील अधिकाऱ्यांनी परवानगी दिलेल्या भाविकांना तसेच ज्यांना जिल्हाधिकारी नांदेड व पोलीस अधीक्षक नांदेड यांनी परवानगी दिली अशा व्यक्तींना लागू राहणार नाही.

00000

 वृत्त क्र. 501

युवकांनी योग अभ्यास आत्मसात करून योगाचा प्रचार करावा

- माजी मुख्यमंत्री तथा खासदार अशोकराव चव्हाण

नांदेड, दिनांक 19:   विविध आजारांवर नियंत्रण मिळण्यासाठी आणि  निरंतर निरोगी तसेच सुदृढ  राहण्यासाठी योग अभ्यास आणि नियमित योगसाधना आवश्यक आहे. तरुणांनी योग अभ्यास आत्मसात करून लोकांमध्ये योगाचा प्रचार करावा , असे  आवाहन माजी मुख्यमंत्री तथा खासदार अशोकराव चव्हाण यांनी केले आहे.

माहिती आणि प्रसारण मंत्रालयाचे केंद्रीय संचार ब्यूरो व श्री शारदा भवन एज्युकेशन सोसायटी नांदेड यांच्या विद्यमाने व  आर्ट ऑफ लिविंग यांच्या सहकार्याने आज यशवंत महाविद्यालयाच्या परिसरातील बहुउद्देशीय क्रीडा संकुल नांदेड येथे मल्टीमीडिया चित्रपट  प्रदर्शनाचे उदघाटन खासदार अशोकराव चव्हाण यांच्या हस्ते करण्यात आले. यावेळी ते बोलत होते.

यावेळी श्री शारदा भवन एज्यूकेशन सोसायटीचे सचिव  डी. पी. सावंत,  मनपा आयुक्त डॉ. महेशकुमार डोईफोडे, जिल्हा क्रीडा अधिकारी जयकुमार ढेमरे, नगर रचना विभागाचे सहायक संचालक पी.एल. आलूरकर, श्री शारदा भवन एज्यूकेशन सोसायटी रजिष्ट्रार संदीप पाटील, रावसाहेब शेंदारकर, नरेंद्र चव्हाण , क्षेत्रीय प्रचार अधिकारी माधव जायभाये,    द आर्ट ऑफ लिविंगचे समन्वयक शिवा बीरकले, सहायक क्षेत्रीय प्रचार अधिकारी सुमित दोडल आणि सर्व प्राध्यापक वर्ग तसेच संस्थेचे कर्मचारी-विद्यार्थी  आदी मान्यवर होते.

अलीकडच्या काळात जीवनशैलीमध्ये मोठ्या प्रमाणावर बदल झाला असून लोक वेगवेगळ्या आजारांना बळी पडत आहेत, यासाठी नियमित योगाभ्यासासोबत नैसर्गिक जीवनशैली तसेच योग्य आहार घेतला पाहिजे. नांदेड येथील केंद्रीय संचार ब्यूरो द्वारे प्रदर्शित करण्यात आलेल्या प्रदर्शनाचे कौतुक खासदार अशोकराव चव्हाण यांनी केले. तसेच शहरातील सर्व विद्यार्थी व नागरिकांनी या प्रदर्शनाची  पाहणी करून योग अभ्यासाची माहिती घ्यावी असेही  ते म्हणाले.  पंतप्रधान नरेंद्र मोदी यांच्या पुढाकारामुळे देश विदेशात मोठ्या प्रमाणावर योगाचा प्रचार आणि प्रसार होत असून जनता योगाभ्याकडे वळत असल्याचे ते म्हणाले.

हे प्रदर्शन दिनांक 19 ते 21 जून 2024 दरम्यान सकाळी 9 ते सायंकाळी 6 पर्यंत सर्वासाठी खुले आहे, या प्रदर्शनानिमित्त तीन दिवस योग शिबाराचे आयोजन प्रदर्शनस्थळी करण्यात आले आहे. प्रदर्शानिमित पोष्टर स्पर्धा, सांस्कृतिक कार्यक्रम आणि जनजागरण रॅलीचेही आयोजन करण्यात आले आहे. नागरिकांनी यांचा लाभ घ्यावा असे आवाहन आयोजकांनी केले आहे.

00000

वृत्त क्र. 500

धर्माबाद शहरात 30 तंबाखू विक्रेत्यांवर दंडात्मक कार्यवाही

नांदेड दि. 19 :- धर्माबाद शहरात तंबाखू व तंबाखूजन्य पदार्थाची मोठ्या प्रमाणात विक्री तसेच कोटपा 2003 कायद्याचे उल्लंघन होत असल्याबाबत मिळालेल्या माहितीनुसार जिल्हास्तरीय तंबाखू नियंत्रण पथकाने 18 जून 2024 रोजी धर्माबाद शहरात अचानक धाडी टाकून एकूण 30 तंबाखू विक्रेत्यांकडून 14 हजार  रुपये दंड आकारण्यात आला.

ही कार्यवाही जिल्हा शल्यचिकित्सक डॉ. निळकंठ भोसीकर, अतिरिक्त जिल्हा शल्यचिकित्सक डॉ. संजय पेरके, नोडल अधिकारी डॉ. हनमंत पाटील व वैद्यकीय अधिक्षक डॉ. वेणुगोपाल पंडीत यांच्या मार्गदर्शनाखाली करण्यात आली. या पथकात नोडल अधिकारी डॉ. हनमंत पाटील, जिल्हा सल्लागार डॉ. उमेश मुंडे, मानसशास्त्रज्ञ प्रकाश आहेर, सामाजिक कार्यकर्ता बालाजी गायकवाड, समुपदेशक नितीन आडे व केस रजिस्ट्री सहाय्यक सुनील तोटेवाड तसेच धर्माबाद पोलीस ठाण्याचे पोलीस निरीक्षक अभिषेक शिंदे यांच्या मार्गदर्शनाखाली  पोलीस हेड कॉन्स्टेबल कुमरे व पोलीस कॉन्स्टेबल सुपारे उपस्थित होते.

सार्वजनिक ठिकाणी तसेच शैक्षणिक अथवा शासकीय, निमशासकीय कार्यालयाच्या परिसरात तंबाखू व तंबाखूजन्य पदार्थाची विक्री अथवा सेवन किंवा साठवण होत असल्यास जिल्हा तंबाखू नियंत्रण कक्ष, जिल्हा रुग्णालयात तक्रार नोंदवून नांदेड जिल्हा तंबाखू मुक्त करण्याच्या या अभियानास सहकार्य करावे असे, आवाहन जिल्हा शल्य चिकित्सक डॉ. निळकंठ भोसीकर यांनी केले आहे.

00000

वृत्त क्र. 499

सोयाबीन बियाण्याची उगवण क्षमता चाचणी करुनच वापरावे

-    जिल्हा अधिक्षक कृषि अधिकारी भाऊसाहेब बऱ्हाटे

·   पुरेसा पाऊस झाल्याशिवाय पेरणी करु नये

नांदेड दि. 19 :- येत्या खरीप हंगामात शेतकऱ्यांनी पेरणीसाठी सोयाबीन बियाणांची उगवण क्षमता चाचणी करुनच बियाणे वापरावे. तसेच स्वत:कडे उपलब्ध असलेले चांगले बियाणे उपयोगात आणावे, असे आवाहन जिल्हा अधिक्षक कृषि अधिकारी भाऊसाहेब बऱ्हाटे यांनी केले आहे.

 

सोयाबीन हे स्वपरागसिंचीत पिक आहे. या पिकाचे सर्वच वाण सरळ वाण आहेत. त्यामुळे दरवर्षी बियाणे बदलाची आवश्यकता नाही. एकदा प्रमाणीत बियाणे वापरल्यानंतर त्याच्या उत्पादनातून येणारे बियाणे पुढील दोन वर्षापर्यंत वापरता येते. शेतकऱ्यांनी स्वत:कडील बियाणे वापरल्यास उत्पादन खर्च कमी होईल. मागील दोन वर्षात शेतकऱ्यांनी खरेदी केलेल्या प्रमाणित बियाण्यांपासून उत्पादित झालेले सोयाबीन बियाणे चालू वर्षी बियाणे म्हणून शेतकरी पेरणीसाठी वापरू शकतात. तसेच ग्रामबीजोत्पादन, पिक प्रात्याक्षिके योजना अंतर्गत आलेल्या उत्पन्नातून बियाण्यांची निवड करता येते. प्रमाणीत बियाण्यांपासून आलेल्या उत्पादनातून चाळणी करून चांगल्या प्रतीच्या सोयाबीनची बियाणे म्हणून निवड करावी. सोयाबीनचे बियाणे अत्यंत नाजूक असून त्याचे बाह्य आवरण पातळ असते त्यामुळे त्याची उगवणक्षमता अबाधित राखण्यासाठी बियाणे हाताळताना काळजी घ्यावी.  बियाण्याची साठवणूक करताना आर्द्रतेचे प्रमाण 10 ते 12 टक्क्यापेक्षा जास्त नसावे. साठवणुकीसाठी प्लास्टिक पोत्यांचा वापर करू नये. बियाणे साठवताना  त्याची त्याची थप्पी 7 फुटापेक्षा जास्त उंच असणार नाही याची काळजी घ्यावी. बियाणे हाताळताना जास्त प्रमाणात आदळआपट होणार नाही याची दक्षता घ्यावी. प्रती हेक्टरी बियाणे दर 75 किलोवरून 50 ते 55 किलोवर आणण्यासाठी टोकन पदधतीने किंवा प्लॉनटरचा वापर करून पेरणी करावी. सोयाबीन उगवणक्षमता 70 टक्केपेक्षा कमी असल्यास उगवनक्षमतेच्या प्रमाणात अधिकचे बियाणे पेरणीसाठी वापरण्यात यावे. मार्केट मधील बियाणे खरेदी केलेल्या केलेल्या बॅग मधील प्रतिनिधीक स्वरुपातील बियाणाची उगवणक्षमता तपासुनच पेरणी करावी.

 

75 ते 100 मिमी पाऊस झाल्यानंतरच सोयाबीनची पेरणी करावी. बियाण्याची पेरणी 3 ते 4 सेंटीमीटर खोलीपर्यंत करावी. पेरणीपूर्वी प्रती किलो बियाण्यास 3 ग्रॅम थायरमची बुरशीजन्य रोगापासून संरक्षणासाठी बीजप्रक्रिया करावी. रायझोबियम व पीएसबी जीवाणू संवर्धकाची प्रत्येकी 200 ते 250 ग्रॅम प्रती 10 ते 15 किलो बियाण्यास पेरणीपूर्वी ३ तास अगोदर बीजप्रक्रिया करून बियाणे सावलीत वाळवावे व नंतर त्याची पेरणी करावी, असे कृषि विभागाने प्रसिध्दीपत्रकाद्वारे कळविले आहे.

00000

 वृत्त क्र. 498

पंडित दीनदयाळ उपाध्याय स्वयंम योजनेसाठी

30 जूनपर्यत प्रस्ताव सादर करण्याचे आवाहन

नांदेड दि. 19 :- अनुसूचित जमातीच्या विद्यार्थ्यांना उच्च शिक्षणासाठी भोजन निवास व शैक्षणिक साहित्यासाठी त्यांच्या आधारसंलग्न बँक खात्यामध्ये थेट रक्कम वितरीत करण्याबाबत पंडित दिनदयाळ उपाध्याय स्वयंम योजना सुरु करण्यात आलेली आहे. या योजनेत सन 2024-25 या वर्षासाठी इच्छूक विद्यार्थी व विद्यार्थीनीनी परिपूर्ण प्रस्ताव संचालक, इतर मागास बहुजन कल्याण नांदेड यांच्याकडे 30 जून 2024 पर्यत विहित नमुन्यात सादर करावेत, असे आवाहन इतर मागास बहुजन कल्याणचे सहायक संचालक शिवानंद मिनगिरे यांनी केले आहे.

इतर मागास बहुजन कल्याण हा विभाग नव्याने निर्माण झालेला असून या विभागांतर्गत नव्याने राबविण्यात येत असलेल्या विमुक्त जाती व भटक्या जमाती आणि विशेष मागास प्रवर्गातील उच्च शिक्षण घेणाऱ्या विद्यार्थ्यांसाठी पंडित दीनदयाळ उपाध्याय स्वयंम योजना लागू करण्याबाबत शासनाने मान्यता दिलेली आहे.

00000

वृत्त क्र. 497

संजय गांधी निराधार व श्रावणबाळ सेवा राज्य निवृत्तीवेतन योजनेच्या

लाभार्थ्यांना डीबीटी पोर्टलद्वारे अर्थसहाय्य वितरित

·   डीबीटी पोर्टलद्वारे अर्थसहाय्य वितरीत करण्यासाठी 25 जूनपर्यत कागदपत्रांची पूर्तता करावी

नांदेड दि. 19 :- जिल्हाधिकारी अभिजीत राऊत यांच्या सूचनेनुसार नांदेड महानगरपालिका क्षेत्रातील संजय गांधी निराधार व श्रावणबाळ सेवा राज्य निवृत्ती वेतन योजनेच्या लाभार्थ्यांना अर्थसहाय्याचे वितरण डीबीटी पोर्टलद्वारे होणार आहे. त्यासाठी प्रत्येक लाभार्थ्यांनी आपल्या बँक खात्याच्या पहिल्या पानाची पासबुकची झेरॉक्स ,आधारकार्डची झेरॉक्स, दिव्यांग प्रमाणपत्र, दुर्धर आजार असेल तर त्याबाबतचे प्रमाणपत्र, मोबाईल नंबर इत्यादी तलाठी शेळके व श्रीमती बोकन संजय गांधी शहर योजना यांच्याकडे अथवा संजय गांधी निराधार योजना कार्यालय, नांदेड शहर जिल्हाधिकारी कार्यालय परिसर येथे 25 जून 2024 पर्यंत जमा करावेत असे आवाहन तहसिलदार संजय गांधी योजना नांदेड शहर यांनी केले आहे.  

 

आजपर्यंत 2 हजार 522 लाभार्थ्यांनी कागदपत्रे कार्यालयात जमा केली आहेत. अजून 4 हजार 117 लाभार्थ्यांचे कागदपत्रे जमा करावयाची शिल्लक आहेत .जे लाभार्थी विहित मुदतीमध्ये आपले कागदपत्रे जमा करणार नाहीत त्यांचा लाभ त्यांच्या खात्यावर जमा होणार नाही. त्यामुळे सर्व संजय गांधी निराधार व श्रावणबाळ सेवा राज्य निवृत्तीवेतन योजनेच्या लाभार्थ्यांना विहित मुदतीत आपले कागदपत्रे सादर करावीत, असे आवाहन तहसीलदार संजय गांधी योजना नांदेड शहर यांनी केले आहे.

००००

 वृत्त क्र. 496

दिव्यांग क्षेत्रात केलेल्या कार्याचा अहवाल

25 जून पर्यंत सादर करण्याचे आवाहन

नांदेड दि. 19 :- दिव्यांग क्षेत्रात कार्य करणाऱ्या व वैद्यकीय क्षेत्रात प्रतिनिधीत्व करणाऱ्या ईच्छूक व्यक्तीनी दिव्यांग क्षेत्रात केलेल्या कार्याचा अहवाल जिल्हा समाज कल्याण अधिकारी , जिल्हा परिषद, नांदेड कार्यालयास 25 जून 2024 पर्यत कार्यालयीन वेळेत सादर करावा, असे आवाहन जिल्हा समाज कल्याण अधिकारी सतेंद्र आऊलवार यांनी केले आहे.

 

दिव्यांग कल्याण विभागाच्या पत्रान्वये दिव्यांग क्षेत्रात कार्य करणाऱ्या अशासकीय व्यक्तीचे नामनिर्देशन सादर करण्याबाबत निर्देश आहेत. त्यानुसार नांदेड जिल्ह्यातील दिव्यांग क्षेत्रात कार्य करणाऱ्या एका व्यक्तीचे नाव व वैद्यकीय क्षेत्रात प्रतिनिधीत्व करणाऱ्या एका व्यक्तीचे नाव अशा दोन व्यक्तीचे नावे व त्यांच्या कार्याचा अहवाल  आयुक्तालयास सादर करावयाचा आहे.

0000

 वृत्त क्र. 495

मुख्यमंत्री शाश्वत कृषि सिंचन योजनेअंतर्गत

वैयक्तिक शेततळे योजनेचा लाभ घेण्याचे आवाहन

·  वैयक्तिक  शेततळयासाठी 4 कोटी 18 लाख रुपये मंजूर तरतूद

 

नांदेड दि. 19 :- नांदेड जिल्ह्यासाठी मुख्यमंत्री शाश्वत कृषि सिंचन योजना-वैयक्तिक शेततळे सन 2024-25 अंतर्गत तालुकानिहाय लक्षांक वाटप करण्यात आले आहे. या लक्षांकासाठी 4 कोटी 18 लक्ष रुपयांची तरतूद मंजूर आहे. त्यानुसार जिल्ह्याची प्रवर्गनिहाय खातेदार संख्या व पेरणी क्षेत्रानुसार तालुकानिहाय लक्षांक निश्चित करण्यात आले आहे. तरी जिल्ह्यातील जास्तीत जास्त शेतकऱ्यांनी मुख्यमंत्री शाश्वत कृषि सिंचन योजनेअंतर्गत वैयक्तीक शेततळे या योजनेचा लाभ घ्यावा, असे आवाहन जिल्हा अधिक्षक कृषि अधिकारी भाऊसाहेब बऱ्हाटे यांनी केले आहे.

 

मुख्यमंत्री शाश्वत कृषि सिंचन योजनेअंतर्गत वैयक्तीक शेततळे सन 2024-25 अंतर्गत सर्वसाधारण, अनु.जाती, अनु. जमातीसाठी तालुका निहाय लक्षांक पुढीलप्रमाणे आहे. नांदेड -31, अर्धापूर-22, मुदखेड-25, लोहा-56, कंधार-58, देगलूर -48, मुखेड-66, नायगांव-43, बिलोली-41, धर्माबाद-23, किनवट-47, माहूर-21, हदगांव-58, हिमायतनगर-29, भोकर-33, उमरी-27 असे एकूण 628 भौतिक लक्षांक प्राप्त झाले आहे. या भौतिक लक्षांकासाठी जिल्ह्यास एकूण 4 कोटी 18 लक्ष रुपये आर्थिक तरतूद मंजूर आहे.

00000