जिल्हाधिकारी कार्यालयात
मंगळवारी पेन्शन अदालत
नांदेड (जिमाका) दि. 10 :- जिल्हाधिकारी कार्यालयात मंगळवार 11 जुलै 2023 रोजी पेन्शन अदालत आयोजीत करण्यात आली आहे. जिल्ह्यातील महसूल विभागातून सेवानिवृत्त झालेले अधिकारी, कर्मचारी यांच्या अडचणी निवारण्यासाठी या दिवशी सकाळी 11 ते दुपारी 1.30 यावेळेत उपस्थित राहुन तक्रारीचे निवेदन दयावीत, असे आवाहन जिल्हाधिकारी कार्यालय नांदेड यांनी केले आहे.
0000
औद्योगिक प्रशिक्षण संस्थेत प्रवेशासाठी
11 जुलै पर्यत अर्ज करण्याचे आवाहन
नांदेड (जिमाका) दि. 10 :-औद्योगिक प्रशिक्षण संस्थामधील प्रवेश प्रक्रिया 12 जून 2023 पासून सुरु आहे. दहावी उत्तीर्ण अथवा अनुर्तीण इच्छूक विद्यार्थ्यांनी www.admission.dvet.gov.in या संकेतस्थळावर 11 जुलै 2023 पर्यत अर्ज सादर करावेत, असे आवाहन औद्योगिक प्रशिक्षण संस्थेचे प्राचार्य यांनी केले आहे.
औद्योगिक प्रशिक्षण संस्थेत प्रवेश घेण्यासाठी तयार करण्यात आलेल्या प्रमाणित कार्यपध्दती माहिती पुस्तिका ऑनलाईन स्वरुपात संकेतस्थळावर उपलब्ध करुन देण्यात आलेली आहे. अर्ज नोंदवून झाल्यावर उमेदवारांनी नजीकच्या औद्योगिक प्रशिक्षण संस्थेत जावून आपला अर्ज निश्चित करावा. त्यानंतर विकल्प सादर करावेत. प्रवेश प्रक्रीयेच्या विविध टप्प्यांबाबत औद्योगिक प्रशिक्षण संस्थामध्ये समुपदेशन करण्यात येत आहे. यामध्ये उमेदवारांना विविध व्यवसाय अभ्यासक्रमांची माहिती देण्यात येते.
औद्योगिक प्रशिक्षण संस्था नांदेड येथे राज्यभरात एकूण 85 व्यवसाय उपलब्ध असून 1 हजार 549 एवढया जागा प्रवेशासाठी उपलब्ध आहेत. येणाऱ्या कालावधीत औद्योगिक प्रशिक्षण संस्थामध्ये जादा मागणीचे तसेच अधिकचे तंत्रज्ञानावर आधारित 652 नवीन अभ्यासाच्या तुकड्या समाविष्ठ करण्यात प्रस्तावित आहे. जागतिक बँकेच्या सहकार्याने औद्योगिक प्रशिक्षण संस्थेचे आधुनिकीकरण करण्यात येत आहे. तसेच आयटीआय प्रवेशित उमेदवारांना प्रतिमाह देण्यात येणाऱ्या विद्या वेतनात वाढ करण्यात आलेली आहे. विविध प्रवर्गातील उमेदवारांसाठी प्रशिक्षण शुल्क प्रतिपुर्वी योजनाही लागू करण्यात आलेली आहे. दहावी अनुउत्तीर्ण विद्यार्थ्यांना आयटीआय अभ्यासक्रम पूर्ण केल्यानंतर नियमानुसार दहावी समकक्षता प्रदान करण्यात येते. दहावी उत्तीर्ण विद्यार्थ्यांना आयटीआय अभ्यासक्रम पूर्ण केल्यानंतर नियमानुसार बारावी उत्तीर्ण समकक्षता प्रदान करण्यात येते. आयटीआयतून व्यावसायिक शिक्षण पूर्ण करुन त्वरीत रोजगार स्वयंरोजगार अथवा उच्च शिक्षणाच्या संधी प्राप्त होण्यासाठी दहावी उत्तीर्ण अथवा अनुत्तीर्ण विद्यार्थ्यांनी आयटीआय मध्ये प्रवेश घ्यावा असे औद्योगिक प्रशिक्षण संस्थेने प्रसिध्दीपत्रकाद्वारे कळविले आहे.
शासकीय औद्योगिक प्रशिक्षण संस्थेत प्रवेश सत्र ऑगस्ट 2023 साठी 22 व्यवसायाच्या 37 तुकड्या अंतर्गत 796 जागासाठी प्रवेश उपलब्ध आहे. ज्यात 8 व्यवसाय 10 वी उत्तीर्ण /अनुत्तीर्ण पात्रतेवर तर 14 व्यवसाय 10 वी उत्तीर्ण पात्रतेवर प्रवेशासाठी उपलब्ध आहेत. प्रवेशोच्छूक उमेदवारांनी www.admission.dvet.gov.in या संकेतस्थळावर अर्ज व प्रवेश शुल्क भरावे व नजीकच्या शासकीय किंवा खाजगी औद्योगिक प्रशिक्षण संस्थेत जावून अर्ज निश्चित करणे करावा. अर्ज भरण्याची व निश्चीत करण्याची अंतिम तारीख 11 जुलै 2023 आहे. अर्ज निश्चिती केल्यानंतरच उमेदवारांना व्यवसाय निवड करता येणार आहे.
आजपर्यत 1 हजार 516 उमेदवारांनी त्यांचे अर्ज संस्थेत निश्चित केले आहेत. अंतीम गुणवत्ता यादी 16 जुलै 2023 रोजी संकेतस्थळावर प्रसारित होणार आहे. प्रथम फेरीसाठी निवड झालेल्या उमेदवारांची यादी 20 जुलै 2023 रोजी प्रसारित होणार आहे. निवड झालेल्या उमेदवारांनी 21 जुलै ते 25 जुलै 2023 दरम्यान मुळ कागदपत्रासह आपला प्रवेश निश्चित करावा. प्रवेश घेवू इच्छिणाऱ्या उमेदवारांनी आपला प्रवेश अर्ज व निश्चितीकरण दिलेल्या मुदतीत करावे, असे आवाहन औद्योगिक प्रशिक्षण संस्थेचे प्राचार्य एस.व्ही. सुर्यवंशी यांनी केले आहे.
00000
फक्त १ रुपयात पिक विमा कवच ;
शेतकऱ्यांनी 31 जुलै पुर्वी पिक विमा नोंदणी करावी
- जिल्हाधिकारी अभिजीत राऊत
नांदेड (जिमाका) दि. 10 :- आता केवळ एक रुपयात पिकांचा विमा उतरविता येणार आहे. यासाठी शासनाने पंतप्रधान पिक विमा योजनेत सर्वसमावेशक पीक विमा योजना सुरु केली आहे. पेरणी झालेली असेल किंवा अद्यापपर्यंत पावसाअभावी पेरणी झालेली नसेल अशा दोन्ही प्रकारच्या शेतकऱ्यांनी पिक पेरणीचे स्वयंघोषणापत्र 31 जुलै 2023 पुर्वी सादर करून योजनेत सहभागी व्हावे, असे आवाहन जिल्हाधिकारी अभिजीत राऊत यांनी केले आहे.
प्रधानमंत्री पिक विमा योजना कर्जदार तसेच बिगर कर्जदार शेतकऱ्यांना ऐच्छिक आहे. योजने अंतर्गत पुढील जोखिम बाबींचा खरीप हंगाम 2023 साठी समावेश करण्यात आला आहे.
हवामान घटकांच्या प्रतिकुल परिस्थितीमुळे पिकांची पेरणी किंवा लावणी न झाल्यामुळे होणारे नुकसान -खरीप हंगामातील अपूरा पाऊस, हवामानातील इतर घटकांच्या प्रतिकुल परिस्थितीमुळे केवळ अधिसुचित मुख्य पिकांची अधिसुचित क्षेत्रात सर्वसाधारण क्षेत्राच्या 75 टक्के पेक्षा जास्त क्षेत्रावर पेरणी / लावणी न झाल्यास विमा संरक्षण देय राहील.
पिकांच्या हंगामामध्ये हवामानातील प्रतिकुल परिस्थिती मुळे पिकांचे होणारे नुकसान- सर्वसाधारण काढणीच्या 15 दिवस आधीपर्यंत पूर, पावसातील खंड, दुष्काळ इ. बाबीमुळे शेतकऱ्यांच्या अपेक्षित उत्पादनामध्ये सरासरी उत्पादनाच्या 50 टक्के पेक्षा जास्त घट अपेक्षित असेल तर अधिसूचित क्षेत्र स्तरावर विमा संरक्षण देय राहिल.
पिक पेरणीपासुन काढणी पर्यतच्या कालावधीत पिकांच्या उत्पादनात येणारी घट- टाळता न येणाऱ्या जोखमीमुळे पिकांच्या उत्पन्नात येणाऱ्या घटीपासुन व्यापक विमा संरक्षण दिले जाते. अधिसुचित विमा क्षेत्र घटकातील पिक कापणी प्रयोगावरुन उपलब्ध झालेल्या सरासरी उत्पन्नाची तुलना उंबरठा उत्पन्नाशी करुन नुकसान भरपाई निश्चित केली जाते. जर सरासरी उत्पन्न हे उंबरठा उत्पन्नापेक्षा कमी झाले तर नुकसान भरपाई देय राहील.
स्थानिक नैसर्गिक आपत्ती- याबाबी अंतर्गत गारपीट, भूस्खलन, विमा संरक्षित क्षेत्र जलमय झाल्यास, ढगफूटी, वीज कोसळल्यामुळे लागणारी नैसर्गिक आग या स्थानिक नैसर्गिक आपत्तीमुळे नुकसानग्रस्त झाल्यामुळे होणारे अधिसुचित पिकाचे ठराविक क्षेत्रातील नुकसान हे वैयक्तिक स्तरावर पंचनामे करुन निश्चित करण्यात येते.
काढणी पश्चात नुकसान- ज्या पिकांची काढणीनंतर शेतात पसरवून अथवा पेंढया बांधुन सुकवणी करणे आवश्यक असते. अशा कापणी / काढणी नंतर सुकवणीसाठी शेतात पसरवून ठेवलेल्या अधिसुचित पिकांचे काढणीनंतर दोन आठवड्यांच्या आत (14 दिवस) गारपीट, चक्रीवादळ, चक्रीवादळामुळे आलेला पाऊस आणि बिगरमोसमी पावसामुळे नुकसान झाल्यास वैयक्तिक स्तरावर पंचनामे करुन निकषांचे अधिन राहून नुकसान भरपाई निश्चित केली जाईल.
काढणीपश्चात नुकसान व स्थानिक आपत्ती या जोखिमे अंतर्गत विमा संरक्षण घेतलेल्या शेतकऱ्यांनी सर्वे नंबर नुसार बाधित पीक व बांधीत क्षेत्राबाबत घटना घडल्यापासून 72 तासाच्या आत क्रॉप इश्युरन्स अॅप / संबंधित विमा कंपनीचे टोल फ्री क्रमांक / बँक / कृषि व महसुल विभाग यांना कळवावे. नुकसान कळवताना सर्व्हे नंबर व नुकसानग्रस्त क्षेत्र तपशील कळविणे बंधनकारक असेल.
नांदेड जिल्ह्यात खरीप हंगाम 2023 मध्ये युनायटेड इंडिया इंन्शुरन्स कं. लि. क्षेत्रिय कार्यालय, 2 मजला, काकडे बीझ आयकॉन, ई-स्केअर जवळ, गणेशखिंड रोड, शिवाजीनगर, पुणे - 411016 ई-मेल uiicpmfby2023@uiic.co.in व टोल फ्री क्रमांक 18002337414 या विमा कंपनीद्वारे योजना राबविण्यात येत आहे.
पीक व विमा संरक्षित रक्कम रुपये प्रति हेक्टर याप्रमाणे आहे. ज्वारी 30 हजार रुपये, सोयाबीन 54 हजार 500 रुपये, मूग व उडीद 22 हजार 500 रुपये, तूर 36 हजार 802 रुपये, कापूस 57 हजार 500 रुपये याप्रमाणे आहे. बिगर कर्जदार शेतकऱ्यांनी प्रधानमंत्री पीक विमा योजनेअंतर्गत पीक विमा संरक्षण मिळणेस्तव विहित मुदतीपुर्वी नजीकचे बँक व आपले सरकार सेवा केंद्रावर विमा हप्त्यासह तसेच आवश्यक कागदपत्रांसह विमा प्रस्ताव सादर करावा.
कर्जदार शेतकऱ्यांना योजनेत सहभागी होण्याचा / न होण्याचा पर्याय उपलब्ध आहे. शेतकरी योजनेत सहभाग नोंदविण्यास इच्छुक नसेल तर तसे घोषणापत्र योजनेतील सहभागी होण्याच्या अंतिम मुदतीच्या सात दिवस अगोदरपर्यंत देणे आवश्यक आहे. जे शेतकरी योजनेत सहभागी न होणे बाबत घोषणापत्र देणार नाहीत या सर्व शेतकऱ्यांचा विमा हप्ता कपात करुन योजनेत सहभागी करुन घेणेबाबत बँकेमार्फत कार्यवाही केली जाईल.
योजनेच्या मार्गदर्शक सुचनेनुसार विमा कंपनी शेतकरी विमा हप्ता आणि केंद्र व राज्य शासनाकडून विमा अनुदानाचा पहिला हप्ता प्राप्त झाल्यानंतर पिक पेरणी / लावणीपूर्व नुकसान भरपाई / हंगामामध्ये प्रतिकुल परिस्थिती मुळे झालेले नुकसान / स्थानिक आपत्ती या जोखमीच्या बाबींकरिता नुकसान भरपाईची पूर्तता करतील. त्याचप्रमाणे उत्पन्नाच्या आकडेवारीवर आधारीत व काढणी पश्चात नुकसान भरपाई या जोखमीच्या बाबींकरिता नुकसान भरपाईची पुर्तता केंद्र व राज्य शासनाकडून विमा अनुदान अंतिम हप्ता प्राप्त झाल्यानंतर करतील.
विमा योजनेअंतर्गत विविध जोखिमी अंतर्गत निश्चित होणारे नुकसान भरपाई ही केंद्र शासनाच्या मार्गदर्शक सुचनेच्या अटी व शर्तीच्या अधिन राहून निश्चित केले जाते. हंगामात घेण्यात आलेल्या पिक कापणी प्रयोगातून प्राप्त होणाऱ्या सरासरी उत्पन्नाची तुलना ही उंबरठा उत्पन्नाशी करुन हंगामाच्या शेवटी नुकसान भरपाई निश्चित करण्यात येते.
या योजनेअंतर्गत नुकसान भरपाई निश्चित करतांना पैसेवारी, दुष्काळ, टंचाई परिस्थिती आणि पुरामुळे झालेल्या नुकसानी संदर्भात कोणत्याही शासकीय विभाग / संस्थेमार्फत घोषित करण्यात आलेली आकडेवारी ग्राह्य धरता येत नाही.
पिक विमा नोंदणी सीएससी केंद्रामध्ये विनाशुल्क केल्या जाईल. पिक विमा भरणेसाठी मोबदला म्हणून सीएससी केंद्र चालकास प्रति अर्जानुसार 40 रुपये शुल्क शासनाकडून अदा केल्या जाते. त्यादृष्टीने शेतकऱ्यांनी शेतकरी विमा हप्ता व्यतिरिक्त (झेरॉक्स इ. खर्च वगळून) ज्यादा रक्कम फी म्हणून सीएससी केंद्र चालकास देऊ नये.
पिक विमा योजनेत सहभागी होणेसाठी खालील कागदपत्रांची आवश्यकता आहे.
आधार कार्ड, पिक पेरा स्वंय घोषणापत्र, बॅक पासबुक, सातबारा, होल्डिंग योजनेतील सहभागासाठी तात्काळ नजीकच्या उपविभागीय कृषि अधिकारी, तालुका कृषि अधिकारी यांचे कार्यालयाशी तसेच नजिकच्या बँक, आपले सरकार सेवा केंद्र सीएससी यांचेशी संपर्क साधावा. पिक विमा भरण्याची अंतिम मुदत 31 जुलै 2023 असुन यामध्ये कोणत्याही प्रकारची मुदतवाढ मिळणार नसल्याने शेवटच्या दिवसांची वाट न बघता या पिक विमा योजनेत सहभागी व्हावे, असे जिल्हा अधिक्षक कृषि अधिकारी भाऊसाहेब बऱ्हाटे यांनी प्रसिध्दीपत्रकाद्वारे कळविले आहे.
0000
माध्यमिक शाळेतील विद्यार्थ्यांसाठी वित्तीय साक्षरता व जी-20 च्या
भारतातील आयोजना संदर्भात प्रश्नमंजुषा कार्यक्रम संपन्न
नांदेड (जिमाका) दि. 10 :- भारतीय रिझर्व बँक व जिल्हा अग्रणी बँक नांदेड यांच्या संयुक्त विद्यमाने जिल्हा परिषद नांदेडद्वारा संचलित माध्यमिक शाळांतील विद्यार्थ्यांसाठी वित्तीय साक्षरता व जी-20 च्या भारतातील आयोजना संदर्भात प्रश्नमंजुषा नुकतीच आयोजित करण्यात आली होती. या परीक्षेत हदगाव तालुक्यातील जिल्हा परिषद माध्यमिक शाळा तामसा या शाळेच्या विद्यार्थिनी पूर्वा लाभशेटवार व समृद्धी ठमके यांचा प्रथम क्रमांक आला. तर द्वितीय क्रमांक देगलूर तालुक्यातील जिल्हा परिषद माध्यमिक शाळा शहापूर येथील आशिष ताटे यांचा तर तृतीय क्रमांक अर्धापूर तालुक्यातील जिल्हा परिषद माध्यमिक शाळा, पिंपळगाव महादेव येथील समीक्षा सरपटे व सुमित सदावर्ते यांचा आला.
विजेत्यांना विद्यार्थ्यांना पारितोषिक वितरण भारतीय स्टेट बँकेचे क्षेत्रीय व्यवस्थापक पक्काला कालिदासू यांच्या हस्ते करण्यात आले. या प्रश्नमंजुषेतील प्रथम क्रमांकाचे मानकरी जिल्हा परिषद माध्यमिक शाळा तामसा यांची राज्यस्तरीय परीक्षेसाठी निवड झाली आहे. प्रथम क्रमांक आलेल्या पूर्वा लाभशेटवार व समृद्धी ठमके यांना राज्यातील शाळांसोबत परीक्षेसाठी 14 जुलै रोजी मुंबई येथे आमंत्रित करण्यात आले आहे.
तालुकास्तरीय परीक्षा नांदेड, नायगाव व हिमायतनगर येथे घेण्यात आल्या. या ठिकाणांवरील प्रथम तीन विजेते संघांची नांदेड येथे 6 जुलै रोजी जिल्हास्तरीय परीक्षा घेण्यात आली होती. परीक्षा घेण्यासाठी रिझर्व बँकेचे व्यवस्थापक निखिल घुलाक्षे, जिल्हा अग्रणी बँकेचे व्यवस्थापक अनिल गचके व त्यांचे सहकारी तसेच ग्रामीण स्वयंरोजगार प्रशिक्षण संस्थेचे कर्मचारी यांनी विशेष परिश्रम घेतले. जिल्हा परिषद नांदेडचे शिक्षणाधिकारी प्रशांत दिग्रसकर व उपशिक्षणाधिकारी बनसोडे यांचे विशेष सहाय्य केले.
0000
युवक-युवतीना नोकरीच्या संधी उपलब्ध करुन देण्यासाठी
उद्योजकांनी रोजगार मेळाव्यात सहभाग नोंदविण्याचे आवाहन
नांदेड (जिमाका) दि. 10 :- सुशिक्षित बेरोजगार उमेदवारांना रोजगार उपलब्ध करुन देण्यासाठी कौशल्य, रोजगार, उद्योजकता व नाविण्यता विभागामार्फत विविध योजना राबविण्यात येतात. वारंवार रोजगार मेळावे आयोजित करण्यात येतात. या रोजगार मेळाव्यातून उद्योजक व नोकरी इच्छूक उमेदवार एकाच व्यासपीठावर येतात. उद्योजक रोजगार मेळाव्याच्या माध्यमातून उमेदवारांच्या मुलाखती घेवून नोकरीसाठी निवड करतात. उद्योजकांनी जास्तीत जास्त उमेदवारांना रोजगार उपलब्ध करुन देण्यासाठी कौशल्य विकास, रोजगार व उद्योजकता केंद्राशी सामंजस्य करार करावा, असे आवाहन कौशल्य विकास, रोजगार व उद्योजकता केंद्राच्या सहायक आयुक्त रेणूका तम्मलवार यांनी केले आहे.
जिल्ह्यातील बेरोजगार युवक-युवतीना रोजगार उपलब्ध करुन देण्यासाठी रोजगार मेळाव्यात उद्योजकांनी सहभाग नोंदवावा. उदा. इंडस्ट्री, इंडस्ट्रीज असोसिएशन, प्लेसमेंट एजंसी, बीपीओ, केपीओ, रिटेल आऊटलेट डी मार्ट, जीओ मार्ट, बीग बाजार,क्रोमा, होम अप्लायंसेस, सुपर मार्केटस, शॉपिग मॉल्स, ॲमेझॉन, फिल्पकार्ट, झोमाटो, स्विगी, बीव्हीजी, विविध कल्स्टर यामधील सेक्टर संबंधित इंडस्ट्रिज यांनी आपल्याकडील रिक्तपदांसाठी मुलाखतीचे आयोजन करुन बेरोजगार उमेदवारांना नोकरीची संधी उपलब्ध करुन द्यावी. अधिक माहितीसाठी दू. क्र. 02462-251674 किंवा nandedrojgar@gmail.com वर किंवा योगेश यडपलवार मो.क्र.9860725448, इरफान खान यांचा मो.क्र. 7030555244 वर संपर्क साधावा, असे जिल्हा रोजगार व उद्योजकता मार्गदर्शन केंद्राच्यावतीने कळविण्यात आले आहे.
0000
सेवानिवृत्त अधिकारी कर्मचाऱ्यांसाठी
11 जुलै रोजी पेन्शन अदालत
नांदेड (जिमाका) दि. 10 :- नांदेड जिल्ह्यातील महसूल विभागातून सेवानिवृत्त झालेले अधिकारी आणि कर्मचाऱ्यांच्या अडचणीचे निवारण करण्यासाठी जुलै महिन्याच्या दुसऱ्या मंगळवारी 11 जुलै 2023 रोजी सकाळी 11 ते 1.30 वा. जिल्हाधिकारी कार्यालय येथे पेन्शन अदालतीचे आयोजन करण्यात आले आहे. सेवानिवृत्त झालेले अधिकारी कर्मचारी यांनी अडचणी निवारण्यासाठी पेन्शन अदालतीच्या दिवशी उपस्थितीत राहून तक्रारीचे निवेदन द्यावेत, असे आवाहन जिल्हाधिकारी नांदेड यांनी केले आहे.
0000
