वृत्त  

मतपेट्या, मतदान साहित्यासह पथके केंद्रांकडे रवाना

०५ - औरंगाबाद विभाग पदवीधर मतदारसंघ निवडणूक : आठही जिल्ह्यांत मतदान साहित्याचे वितरण पूर्ण

उद्या ८४२ केंद्रांवर सकाळी ८ ते दुपारी ४ या वेळेत मतदान

छत्रपती संभाजीनगर, दि. २२ : ०५ - औरंगाबाद विभाग पदवीधर मतदारसंघ निवडणूक २०२६ साठी छत्रपती संभाजीनगर विभागातील आठही जिल्ह्यांत आज मतदान साहित्याचे वितरण पूर्ण करण्यात आले. मतपेट्या व आवश्यक मतदान साहित्यासह नियुक्त अधिकारी-कर्मचाऱ्यांची पथके संबंधित मतदान केंद्रांकडे रवाना झाली. उद्या शुक्रवार, दि. २३ ऑक्टोबर रोजी सकाळी ८ ते दुपारी ४ या वेळेत विभागातील ८४२ मतदान केंद्रांवर मतदान होणार असून, त्यासाठी प्रशासन सज्ज झाले आहे.

विभागीय आयुक्त तथा निवडणूक निर्णय अधिकारी जी. श्रीकांत यांच्या मार्गदर्शनाखाली छत्रपती संभाजीनगर, जालना, बीड, लातूर, धाराशिव, परभणी, नांदेड व हिंगोली या आठही जिल्ह्यांत निवडणूक यंत्रणा कार्यरत आहे. संबंधित जिल्ह्यांचे जिल्हाधिकारी हे सहायक निवडणूक निर्णय अधिकारी म्हणून कामकाज पाहत आहेत. त्यांच्या नियंत्रणाखाली आज तालुकानिहाय वितरण केंद्रांवरून मतदान पथकांना साहित्याचे वाटप करून नेमून दिलेल्या मतदान केंद्रांकडे रवाना करण्यात आले.

छत्रपती संभाजीनगर तालुक्यातील मतदान केंद्रांसाठी नियुक्त पथकांना शासकीय अभियांत्रिकी महाविद्यालय येथून मतदान साहित्याचे वितरण करण्यात आले. जिल्ह्यातील अन्य तालुक्यांतही संबंधित मतदान केंद्रांसाठी नियुक्त पथकांना साहित्य देण्यात आले.

आठ जिल्ह्यांत ८४२ मतदान केंद्रे

मतदारसंघात छत्रपती संभाजीनगर जिल्ह्यात २१७, जालना ८९, परभणी ७६, हिंगोली ३६, नांदेड १२०, लातूर ८८, धाराशिव ७६ व बीड जिल्ह्यात १४० अशी एकूण ८४२ मतदान केंद्रे आहेत. या निवडणुकीसाठी ४१ उमेदवार रिंगणात असून, एकूण ३ लाख २६ हजार ७०१ मतदारांना मतदानाचा हक्क बजावता येणार आहे. मतदारांनी मतपत्रिकेवर पसंतीक्रम नोंदवून मतदान करावयाचे आहे.

मतदान प्रक्रिया शांततेत, निर्भय व पारदर्शक वातावरणात पार पाडण्यासाठी सर्व यंत्रणांनी परस्पर समन्वय राखावा. संबंधित अधिकारी - कर्मचाऱ्यांनी सतर्क राहून मतदानाच्या दिवशी उद्भवणाऱ्या अडचणींवर तातडीने उपाययोजना कराव्यात, असे निर्देश निवडणूक निर्णय अधिकारी जी. श्रीकांत यांनी दिले आहेत.

***

 वृत्त क्रमांक

मातासाहिब देवांजी यांच्या 345 व्या जन्मोत्सवानिमित्त विशेष पशुवैद्यकीय आरोग्य शिबिर

 

• मुगट येथे देशभरातून आलेल्या घोडे व हत्तींच्या आरोग्य तपासणीसह उपचारांची व्यवस्था

 

नांदेड, दि. 22: मातासाहिब देवांजी यांच्या 345 व्या जन्मोत्सव सोहळ्यानिमित्त मुदखेड तालुक्यातील मुगट येथील गुरुद्वारा परिसरात पशुसंवर्धन विभाग, नांदेड यांच्या वतीने विशेष पशुवैद्यकीय आरोग्य शिबिराची व्यवस्था करण्यात आली आहे. देशाच्या विविध भागांतून या सोहळ्यासाठी आलेल्या घोडे व हत्तींची आरोग्य तपासणी करून आवश्यक उपचार उपलब्ध करून देण्यासाठी औषधसाठा आणि पुरेसे मनुष्यबळ तैनात करण्यात आले आहे.

या अनुषंगाने आज गुरुवार, दि. 22 ऑक्टोबर 2026 रोजी शिबिरस्थळी भेट देऊन पशुवैद्यकीय सेवांसाठी करण्यात आलेल्या व्यवस्थेची पाहणी करण्यात आली. धार्मिक सोहळ्यात सहभागी प्राण्यांचे आरोग्य चांगले राहावे आणि त्यांना वेळेवर आवश्यक उपचार मिळावेत, यासाठी विभागामार्फत आवश्यक नियोजन करण्यात आले आहे.

यावेळी पशुसंवर्धन व दुग्धव्यवसाय विभागाचे जिल्हा उपआयुक्त डॉ. सखाराम खुणे, सहाय्यक आयुक्त डॉ. प्रविणकुमार घुले, मुदखेडच्या सहाय्यक आयुक्त डॉ. निलाक्षी जगताप, पशुवैद्यकीय अधिकारी डॉ. प्रणिता पेंडकर व डॉ. गुलाम मुख्तदिर, मुगटचे सहाय्यक पशुधन विकास अधिकारी बाळासाहेब इंगोले यांच्यासह उपचारविषयक कर्मचारी व परिचर उपस्थित होते.

मुदखेड तालुक्यातील सर्व पशुवैद्यकीय अधिकारी व कर्मचाऱ्यांच्या माध्यमातून या सोहळ्यात सहभागी प्राण्यांसाठी आवश्यक पशुवैद्यकीय सेवा उपलब्ध करून देण्यात आल्या आहेत. प्राण्यांचे आरोग्य व कल्याण सुनिश्चित करण्यासाठी पशुसंवर्धन विभागाने विशेष दक्षता घेतली आहे.

****** 

 वृत्त क्रमांक

पुण्यश्लोक अहिल्यादेवी होळकर शेतकरी कर्जमुक्ती योजनेची चौथी यादी प्रसिद्ध

 

• नांदेड जिल्ह्यातील 4 हजार 161 शेतकरी पात्र
• जिल्ह्यात आतापर्यंत 2 लाख 2 हजार 73 शेतकऱ्यांच्या आधार प्रमाणीकरणासाठी याद्या प्रसिद्ध
• पात्र शेतकऱ्यांनी आधार प्रमाणीकरण करावे
• मयत व ज्येष्ठ लाभार्थ्यांसाठीही कार्यपद्धती

 

 

नांदेड, दि. 22 : पुण्यश्लोक अहिल्यादेवी होळकर शेतकरी कर्जमुक्ती योजना-2026 अंतर्गत नांदेड जिल्ह्यातील 4 हजार 161 पात्र शेतकऱ्यांची चौथी यादी आज गुरुवार, दि. 22 ऑक्टोबर 2026 रोजी प्रसिद्ध करण्यात आली आहे. या योजनेअंतर्गत जिल्ह्यात आतापर्यंत एकूण 2 लाख 2 हजार 73 पात्र शेतकऱ्यांच्या आधार प्रमाणीकरणासाठी याद्या प्रसिद्ध करण्यात आल्या आहेत.

महाराष्ट्र शासनाने दि. 2 जून 2026 रोजीच्या शासन निर्णयानुसार ही योजना सुरू केली आहे. या योजनेंतर्गत दि. 1 एप्रिल 2019 ते 31 मार्च 2025 या कालावधीत वितरित झालेल्या आणि दि. 30 सप्टेंबर 2025 पर्यंत थकीत असलेल्या, तसेच दि. 31 मार्च 2026 पर्यंत परतफेड न झालेल्या पीक कर्ज व पुनर्गठित किंवा फेरपुनर्गठित कर्जासाठी दोन लाख रुपयांपर्यंत कर्जमुक्तीचा लाभ देण्यात येणार आहे.

योजनेची अंमलबजावणी ऑनलाइन संगणकीय प्रणालीद्वारे करण्यात येत असून, यासाठी शासनाने महाआयटीची नियुक्ती केली आहे. योजनेच्या पोर्टलवर नांदेड जिल्ह्यातील बँकांनी एकूण 2 लाख 24 हजार 847 थकीत कर्ज खात्यांची माहिती अपलोड केली आहे. संगणकीय प्रक्रियेनंतर यापूर्वी दि. 24 जुलै, 11 सप्टेंबर आणि 12 ऑक्टोबर 2026 रोजी पात्र शेतकऱ्यांच्या तीन याद्या प्रसिद्ध करण्यात आल्या होत्या. आता चौथी यादी प्रसिद्ध करण्यात आली आहे.

चौथ्या यादीतील पात्र 4 हजार 161 शेतकऱ्यांची यादी संबंधित बँक शाखा, विविध कार्यकारी सेवा सहकारी संस्था आणि ग्रामपंचायतींमध्ये प्रसिद्ध करण्यात येणार आहे. ही यादी कर्जमुक्तीसाठी पात्र ठरलेल्या शेतकऱ्यांची असून, संबंधित लाभार्थ्यांनी आपल्या कर्ज खात्यावरील दि. 31 मार्च 2026 रोजीची थकबाकी तपासून नजीकच्या आपले सेवा केंद्रावर जाऊन आधार प्रमाणीकरण करून घ्यावे.

या यादीतील काही शेतकऱ्यांनी एकापेक्षा अधिक बँकांकडून पीक कर्ज घेतलेले आहे. शेतकऱ्यांच्या कर्ज थकबाकीची गणना दि. 31 मार्च 2026 रोजीच्या स्थितीनुसार करण्यात आली आहे. दि. 1 एप्रिल 2026 नंतरचे व्याज व इतर खर्च माफ करण्यात येणार आहेत. तसेच, राष्ट्रीयीकृत व व्यापारी बँकांमधील काही कर्ज खात्यांची थकबाकी दोन लाख रुपयांपेक्षा अधिक असली, तरी शासनाच्या ‘हेअर कट’ धोरणानुसार ही कर्जे निरंक करण्यात येणार आहेत.

योजनेतील पात्र लाभार्थ्यांपैकी मयत झालेले, वयोवृद्ध तसेच बोटांचे ठसे नोंदविण्यात अडचण येणाऱ्या लाभार्थ्यांना कर्जमुक्तीचा लाभ देण्यासाठी दि. 19 ऑगस्ट 2026 रोजी मानक कार्यप्रणाली (एसओपी) निर्गमित करण्यात आली आहे. आधार प्रमाणीकरणाची प्रक्रिया पूर्ण झाल्यानंतर पात्र शेतकऱ्यांच्या कर्ज खात्यावर कर्जमुक्तीची रक्कम जमा करण्यात येणार आहे. त्यामुळे पात्र शेतकऱ्यांनी आपली यादीतील नोंद तपासून आधार प्रमाणीकरणाची प्रक्रिया पूर्ण करावी, असे आवाहन जिल्हा उपनिबंधक शाहुराज हिरे यांनी केले आहे.

******* 

 वृत्त क्रमांक

सावरगाव माळ येथे पशुधनाच्या पाणीटंचाईची अधिकाऱ्यांकडून पाहणी

 

• पशुधनाला पुरेसे पिण्याचे पाणी उपलब्ध करून देण्यासाठी तातडीच्या उपाययोजना राबविण्याबाबत मार्गदर्शन

 

नांदेड, दि. 22 : भोकर तालुक्यातील सावरगाव माळ येथे पशुधनासाठी निर्माण झालेल्या पाणीटंचाईच्या पार्श्वभूमीवर पशुसंवर्धन व संबंधित विभागांच्या अधिकाऱ्यांनी नुकतीच प्रत्यक्ष भेट देऊन परिस्थितीची पाहणी केली. यावेळी पशुधनाला पिण्यासाठी पुरेसे पाणी उपलब्ध करून देणे आणि टंचाई निवारणासाठी आवश्यक उपाययोजना करण्याबाबत मार्गदर्शन करण्यात आले.

या पाहणीवेळी जिल्हा उपआयुक्त, पशुसंवर्धन व दुग्धव्यवसाय डॉ. सखाराम खुणे, पंचायत समिती भोकरचे गटविकास अधिकारी शेखर देशमुख, भोकरचे नायब तहसीलदार आणि पशुधन विकास अधिकारी डॉ. अविनाश बुन्नावार उपस्थित होते.

या पाहणीदरम्यान पशुधनासाठी पिण्याच्या पाण्याची पुरेशी उपलब्धता सुनिश्चित करणे, पाणीटंचाईच्या पार्श्वभूमीवर तातडीच्या उपाययोजना राबविणे तसेच भविष्यातील पाणीटंचाईचे निवारण करण्यासाठी कायमस्वरूपी उपाययोजना करण्याबाबत चर्चा करण्यात आली. यासाठी संबंधित विभागांनी परस्पर समन्वयातून आवश्यक कार्यवाही करावी, असे मार्गदर्शन करण्यात आले.

पशुधनाचे संरक्षण आणि त्यांना पिण्याचे पाणी उपलब्ध करून देण्यास प्राधान्य देऊन पाणीटंचाई निवारणासाठी आवश्यक उपाययोजना करण्यावर यावेळी भर देण्यात आला.

******* 

 वृत्त  

विधान परिषदेच्या पदवीधर मतदारसंघाच्या निवडणूकीत असे करा मतदान...!

शुक्रवारी २३ ऑक्टोबरला मतदान !

छत्रपती संभाजीनगर, दि. २२ : भारत निवडणूक आयोगाच्या निवडणूक कार्यक्रमानुसार महाराष्ट्र विधान परिषदेच्या औरंगाबाद विभाग पदवीधर मतदारसंघाच्या निवडणूकीसाठी येत्या शुक्रवारी २३ ऑक्टोबर रोजी मतदान प्रक्रिया राबविण्यात येणार आहे.  भारत निवडणूक आयोगामार्फत घेण्यात येणाऱ्या विधानपरिषदेच्या पदवीधर मतदारसंघाच्या निवडणुकीची मतदान पद्धती आणि आयोगामार्फत घेण्यात येणाऱ्या अन्य सार्वत्रिक निवडणुकातील मतदानाची पद्धती यात मूलभूत फरक आहे. विधानपरिषद निवडणूकीचे मतदान हे मतपत्रिकेवर उमेदवारांच्या नावापुढे पसंतीक्रम नोंदवून घेण्यात येते. जितके उमेदवार निवडणूक लढवित असतील अशा सर्वांपुढे पसंतीक्रम नोंदविता येतो. मतदानाच्या या वेगळ्या पद्धतीमुळे मतदारांनी आणि विशेषत: प्रथमच मतदान करणाऱ्यांनी ही पद्धत जाणून योग्यरितीने मतदान करावे, असे आवाहन निवडणूक निर्णय अधिकारी तथा विभागीय आयुक्त जी श्रीकांत यांनी केले आहे.

असे करा मतदान

मतदान करण्यासाठी निवडणूक अधिकाऱ्याने मतपत्रिकेबरोबर पुरवलेले जांभळ्या (व्हायलेट) रंगाचे स्केच पेनच वापरावे. अन्य कोणतेही पेन, पेन्सिल, बॉलपॉईन्ट पेन किंवा अन्य कोणतेही लेखनाचे साधन मतदानासाठी वापरु नये. असे केल्यास तुमची मतपत्रिका अवैध ठरेल. उमेदवाराच्या नावाच्या स्तंभासमोर पसंतीक्रम म्हणून असलेल्या स्तंभामध्ये तुम्ही प्रथम पसंतीचा उमेदवार म्हणून निवडलेल्या उमेदवाराच्या नावासमोर १  असा आकडा लिहून मतदान करा. १  हा आकडा फक्त एकाच उमेदवाराच्या नावासमोर द्यावा. 

निवडून द्यावयाच्या उमेदवारांची संख्या विचारात न घेता जेवढे उमेदवार निवडणूक लढवत असतील तेवढे पसंतीक्रम तुम्हाला देता येतील. उर्वरीत उमेदवारांबाबतचा तुमचा पुढील पसंतीक्रम, अशा उमेदवारांच्या नावासमोर असलेल्या पसंतीक्रम या स्तंभामध्ये तुमच्या पसंतीक्रमानुसार २, ३, ४ इत्यादी आकडे टाकून दर्शवा.

कोणत्याही उमेदवाराच्या नावासमोर आपण फक्त एकच आकडा टाकलेला आहे याची खात्री करून घ्यावी. तसेच तोच आकडा एकापेक्षा अधिक उमेदवारांच्या नावासमोर टाकलेला नाही याची देखील खात्री करुन घ्यावी. पसंतीक्रम फक्त १, २, ३ इत्यादी आकड्यांमध्येच दर्शवावा. एक, दोन, तीन इत्यादी शब्दांमध्ये दर्शवू नये. पसंतीक्रमाचे आकडे भारतीय अंकाच्या 1, 2, 3 इत्यादींसारख्या आंतरराष्ट्रीय रुपात किंवा I, II, III इत्यादींसारख्या रोमन रुपात किंवा १, २, ३ अशा देवनागरी रुपात किंवा संविधानाच्या आठव्या अनुसूचीमधील मान्यता दिलेल्या कोणत्याही एका भारतीय भाषेमध्ये वापरण्यात येणाऱ्या रुपामध्ये चिन्हांकित करता येतील.

मतपत्रिकेवर मतदाराने आपले नाव, आद्याक्षरे किंवा अन्य शब्द लिहू नयेत किंवा स्वाक्षरी करु नये. तसेच आपल्या अंगठ्याचा ठसा देखील उमटवू नये. असे केल्यास आपली मतपत्रिका अवैध ठरेल. 

पसंतीक्रम दर्शविण्यासाठी तुमच्या निवडीच्या उमेदवाराच्या नावासमोर √ किंवा X अशी खूण करणे टाळावे. अशा मतपत्रिका बाद करण्यात येतील. पसंतीक्रम फक्त आकड्यांमध्येच दर्शवावा. 

आपली मतपत्रिका वैध ठरण्यासाठी एकूण उमेदवारांपैकी एका उमेदवारासमोर १ हा आकडा लिहून तुमची पहिली पसंती दर्शवणे आवश्यक आहे. इतर पसंतीक्रम देणे ऐच्छिक आहेत. म्हणजेच इच्छेनुसार दुसरी किंवा पुढील पसंती दर्शवावी.

अशा मतपत्रिका अवैध ठरतील

१  हा आकडा टाकलेला नसल्यास. १  हा आकडा एकापेक्षा अधिक उमेदवारांच्या नावासमोर टाकलेला असल्यास. १  हा आकडा, तो कोणत्या उमेदवाराला देण्यासाठी टाकलेला आहे याबाबत शंका निर्माण होईल अशाप्रकारे टाकलेला असेल. एकाच उमेदवाराच्या नावासमोर १ आणि त्याबरोबर २, ३ इत्यादी आकडे देखील टाकलेले असतील. पसंतीक्रम आकड्याऐवजी शब्दांमध्ये दर्शवलेला असेल. मतदाराची ओळख पटू शकेल अशी कोणतीही खूण किंवा लेखन असले, आणि असे आकडे टाकण्यासाठी निवडणूक अधिकाऱ्याने दिलेल्या जांभळ्या रंगाच्या स्केच पेन व्यतिरिक्त अन्य साधनाने कोणताही आकडा टाकलेला असेल, तरी अशी मतपत्रिका अवैध ठरेल.

--००--

 वृत्त क्रमांक

वादग्रस्त धार्मिक स्थळाच्या परिसरात प्रतिबंधात्मक आदेश

23 ऑक्टोबर ते 22 नोव्हेंबरपर्यंत कलम 163 लागू

 

• नागरिकांनी प्रशासनास सहकार्य करण्याचे आवाहन

 

नांदेड, दि. 22 : महानुभाव पंथीय व मुस्लिम समाजामध्ये वाद निर्माण झालेल्या नांदेड ग्रामीण पोलीस ठाण्याच्या हद्दीतील मौजे ब्रह्मपुरी येथील वादग्रस्त धार्मिक स्थळाच्या परिसरात कायदा व सुव्यवस्था अबाधित राखण्यासाठी भारतीय नागरिक सुरक्षा संहिता-2023 च्या कलम 163 अन्वये प्रतिबंधात्मक आदेश लागू करण्यात आला आहे. दि. 23 ऑक्टोबर 2026 रोजी सकाळी 6 वाजेपासून दि. 22 नोव्हेंबर 2026 रोजी रात्री 12 वाजेपर्यंत हा आदेश लागू राहणार आहे.

मौजे ब्रह्मपुरी येथील गट क्रमांक 44/1 व 44/2 जवळील गोदावरी नदीच्या पात्रालगत असलेल्या खडकाच्या दगडांच्या जागेवर पूजा-अर्चा करण्यावरून दोन्ही समाजांमध्ये वाद निर्माण झाला आहे. सदर जागेबाबत दोन्ही समाजांकडून वेगवेगळे दावे करण्यात आले असून, यापूर्वीही या ठिकाणी धार्मिक कार्यक्रमांच्या वेळी तणावाची परिस्थिती निर्माण झाल्याचे निदर्शनास आले आहे.

आगामी काळात महानुभाव पंथाचे विविध धार्मिक सण व उत्सव असून, या कालावधीत मोठ्या संख्येने भाविक दर्शनासाठी येण्याची शक्यता आहे. त्यामुळे संबंधित ठिकाणी गर्दी होऊन कायदा व सुव्यवस्थेचा प्रश्न निर्माण होऊ नये, यासाठी प्रतिबंधात्मक उपाय म्हणून हा आदेश जारी करण्यात आला आहे.

प्रतिबंधित क्षेत्राच्या पूर्वेस वाजेगाव कोल्हापुरी बंधारा, पश्चिमेस नांदेड-देगलूर मार्गावरील जुना पूल, दक्षिणेस गोदावरी नदीचे पात्र आणि उत्तरेस चिल्ला/दर्ग्याची संरक्षण भिंत अशी सीमा निश्चित करण्यात आली आहे.

या परिसरात दि. 23 ऑक्टोबर 2026 रोजी सकाळी 6 वाजेपासून दि. 22 नोव्हेंबर 2026 रोजी रात्री 12 वाजेपर्यंत भारतीय नागरिक सुरक्षा संहिता-2023 च्या कलम 163 अन्वये प्रतिबंधात्मक आदेश लागू राहतील.

संबंधित परिसरात अनधिकृतरीत्या प्रवेश करणे, धार्मिक कार्यक्रम आयोजित करणे अथवा गर्दी करून तणाव निर्माण होईल, असे कोणतेही कृत्य करू नये. नागरिकांनी कायदा व सुव्यवस्था अबाधित राखण्यासाठी प्रशासनास सहकार्य करावे, असे आवाहन करण्यात आले आहे.

हा आदेश पोलीस अधीक्षक, नांदेड डॉ. निलाभ रोहण यांनी भारतीय नागरिक सुरक्षा संहिता-2023 च्या कलम 163(2) अन्वये जारी केला आहे.

******

 वृत्त क्रमांक

संयुक्त राष्ट्रसंघदिनी संयुक्त राष्ट्रसंघाचा ध्वज राष्ट्रध्वजा समवेत उभारावा

 

नांदेड, दि. 22 :- संयुक्त राष्ट्रसंघ दिन 24 ऑक्टोबर रोजी आहे. या दिवशी संयुक्त राष्ट्रसंघाचा ध्वज राष्ट्र ध्वजा समवेत उभारण्याबाबत शासन परिपत्रकानुसार निर्देश दिले आहेत. ज्या शासकीय कार्यालयात दररोज राष्ट्रध्वज उभारण्यात येतो त्या कार्यालयावर 24 ऑक्टोबर 2026 या संयुक्त राष्ट्रसंघदिनी संयुक्त राष्ट्रसंघाचा ध्वज भारतीय ध्वजसंहिता 2002 च्या परि. 3.36 मध्ये नमूद केल्याप्रमाणे राष्ट्रध्वजाच्या बरोबर उभारण्यात यावा.

संयुक्त राष्ट्रसंघाचा ध्वज राष्ट्रध्वजाच्या कोणत्याही बाजुला फडकविता येतो. सामान्यत: ध्वज स्तंभाच्यासमोर उभ्या असलेल्या प्रेक्षकांच्यादृष्टीने त्यांच्या अगदी डावीकडे राष्ट्रध्वज असावा असे निवासी उपजिल्हाधिकारी नांदेड यांनी प्रसिध्दी पत्रकाद्वारे कळविले आहे.

******

 वृत्त क्रमांक

अमृत दुर्गोत्सव 2026 उपक्रमात नागरिकांनी उत्स्फूर्त सहभाग नोंदवावा

 

• गड-दुर्गांच्या प्रतिकृती निर्मितीतून दुर्गसंवर्धनाविषयी जनजागृती करण्याचे आवाहन

 

नांदेड, दि. 22 : महाराष्ट्र शासनाच्या मार्गदर्शनाखाली महाराष्ट्र संशोधन, उन्नती व प्रशिक्षण प्रबोधिनी (अमृत) यांच्या माध्यमातून राज्यभरात ‘अमृत दुर्गोत्सव 2026’ हा उपक्रम राबविण्यात येत आहे. दिवाळीच्या सुट्ट्यांमध्ये गड-दुर्गांच्या प्रतिकृती तयार करण्याच्या लोकपरंपरेला प्रोत्साहन देणे आणि दुर्गसंवर्धनाविषयी जनजागृती करणे, हा या उपक्रमाचा मुख्य उद्देश आहे.

या दुर्गोत्सवाच्या माध्यमातून राज्यातील सर्व स्तरांतील नागरिकांचा सहभाग वाढविणे अपेक्षित आहे. या उपक्रमात नागरिक, विद्यार्थी, युवा वर्ग तसेच विविध सामाजिक व शैक्षणिक संस्थांनी उत्स्फूर्तपणे सहभागी होऊन गड-दुर्गांच्या ऐतिहासिक वारशाच्या जतन व संवर्धनाविषयी जागरूकता निर्माण करण्यासाठी योगदान द्यावे.

अमृत दुर्गोत्सव 2026 उपक्रमात जिल्ह्यातील सर्व शासकीय कार्यालये, शासकीय व अनुदानित शाळा, महाविद्यालये, शैक्षणिक संस्था तसेच संबंधित विभाग व आस्थापनांनी सक्रिय सहभाग घ्यावा, असे आवाहन अमृतच्या जिल्हा व्यवस्थापकांनी केले आहे. यासाठी संबंधित कार्यालये व संस्थांनी आपल्या अधिनस्त यंत्रणांना आवश्यक सूचना देऊन नागरिकांचा सहभाग वाढविण्यासाठी प्रयत्न करावेत.

या उपक्रमाच्या आयोजनासंदर्भातील संहिता, वेळापत्रक आणि सविस्तर माहिती www.amrutdurgotsav.com या अधिकृत संकेतस्थळावर उपलब्ध आहे. जिल्ह्यातील नागरिक, विद्यार्थी, युवा वर्ग आणि सर्व संबंधित घटकांनी या उपक्रमात स्वयंप्रेरणेने व सक्रियपणे सहभागी व्हावे, असे आवाहन करण्यात आले आहे.

******** 

 वृत्त क्रमांक

जिल्ह्यात जमावबंदी व शस्त्रबंदी आदेश लागू

 

नांदेड, दि. 22 : जिल्ह्यात सलग विविध धार्मिक कार्यक्रम, मोर्चे, आंदोलने व रॅलींची रेलचेल असतानाच दुष्काळाच्या पार्श्वभूमीवर शेतकरी संघटनांकडून आंदोलनाची शक्यता आणि विविध सामाजिक मागण्यांवरून संघर्षाची संभाव्यता लक्षात घेता नांदेड जिल्हा प्रशासनाने खबरदारीचा मोठा निर्णय घेतला आहे. कायदा व सुव्यवस्था अबाधित राखण्यासाठी अपर जिल्हादंडाधिकारी किरण अंबेकर यांनी महाराष्ट्र पोलीस अधिनियम, 1951 च्या कलम 37 (1) (3) अन्वये संपूर्ण नांदेड जिल्ह्यात जमावबंदी व शस्त्रबंदीचे आदेश जारी केले आहेत.

हा आदेश दि. 24 ऑक्टोबर 2026 रोजी सकाळी 6 वाजेपासून दि. 7 नोव्हेंबर 2026 रोजी मध्यरात्री 12 वाजेपर्यंत संपूर्ण नांदेड जिल्ह्यात लागू राहील.

जिल्ह्यातील आगामी विविध कार्यक्रमांच्या पार्श्वभूमीवर कायदा व सुव्यवस्थेचा प्रश्न निर्माण होण्याची शक्यता निदर्शनास आणून दिली आहे. दि. 22 ते 24 ऑक्टोबरदरम्यान गुरुद्वारा माता साहेब, मुगट येथे माता देवजी यांच्या जन्मोत्सवानिमित्त धार्मिक कार्यक्रम आयोजित करण्यात आले असून, या कार्यक्रमास शिख समाजबांधवांसह बाहेरील राज्यांतील नागरिक मोठ्या संख्येने उपस्थित राहण्याची शक्यता आहे.

दि. 24 ऑक्टोबर रोजी अर्धापूर येथे अनुसूचित जाती आरक्षण उपवर्गीकरणाच्या विरोधात महामोर्चाचे आयोजन करण्यात आले आहे. तसेच दि. 25 ऑक्टोबर रोजी वटफळी, ता. हिमायतनगर येथे धम्मचक्र प्रवर्तन दिनानिमित्त भीमगीतांचा तिरंगी सामना, नांदेड शहर व जिल्ह्यात कोजागिरी पौर्णिमेनिमित्त विविध धार्मिक कार्यक्रम, तसेच महाविहार, बावरी नगर, दाभड, ता. अर्धापूर येथे वर्षावास समापन, कठीण चीवरदान, पवारणा, महापरित्राण पाठ व धम्मदेसना महोत्सवाचे आयोजन करण्यात आले आहे.

दि. 2 नोव्हेंबर रोजी उमरी येथे अनुसूचित जाती आरक्षण उपवर्गीकरणाच्या विरोधात मोर्चा व जाहीर सभेचे आयोजन करण्यात आले आहे. याशिवाय जिल्ह्यात विविध समाजांच्या आरक्षणासंदर्भातील मागण्या, इतर विविध मागण्या तसेच दुष्काळी परिस्थितीच्या पार्श्वभूमीवर शेतकरी व शेतकरी संघटनांकडून आंदोलने, मोर्चे व रॅली होण्याची शक्यता आहे.

आदेशानुसार नांदेड जिल्ह्यात सार्वजनिक ठिकाणी किंवा त्याच्या आसपास पाच किंवा पाचपेक्षा अधिक व्यक्तींनी एकत्र येऊन आदेशात नमूद केलेली कृत्ये करण्यास मनाई करण्यात आली आहे.

सार्वजनिक ठिकाणी शस्त्रे, तलवारी, सोटे, दंडे, बंदुका, सुरे, काठ्या, लाठ्या किंवा शारीरिक इजा करण्यासाठी वापरता येईल अशी कोणतीही वस्तू बाळगता येणार नाही. तसेच दाहक अथवा स्फोटक पदार्थ, दगड किंवा इतर क्षेपणास्त्रे तसेच ती फेकण्यासाठीची उपकरणे किंवा साधने बाळगणे, जमा करणे अथवा तयार करणे प्रतिबंधित करण्यात आले आहे.

जाहीरपणे घोषणा देणे, गाणी म्हणणे, वाद्ये वाजविणे, तसेच सभ्यता, नीतिमत्ता, राज्याची सुरक्षितता व शांततेस बाधा पोहोचविणारी किंवा कायदा व सुव्यवस्थेला धोका निर्माण करणारी प्रक्षोभक भाषणे, हावभाव, सोंग, चित्रे, चिन्हे, फलक किंवा इतर साहित्य तयार करणे, प्रदर्शित करणे अथवा त्याचा सार्वजनिक प्रसार करण्यासही मनाई करण्यात आली आहे.

हा आदेश कामावरील पोलीस अधिकारी किंवा इतर शासकीय कर्मचारी, विवाह, अंत्ययात्रा, धार्मिक कार्यक्रम, यात्रा तसेच सक्षम प्राधिकाऱ्याने विशेष परवानगी दिलेल्या मिरवणुकांना लागू राहणार नाही. अशा कार्यक्रमांसाठी तसेच पाच किंवा त्यापेक्षा अधिक व्यक्तींना एकत्र येणे, सभा, मिरवणूक, मोर्चा काढणे आणि ध्वनीक्षेपक वापरण्यास परवानगी देण्याचे अधिकार संबंधित पोलीस ठाण्याचे प्रभारी अधिकारी तसेच पोलीस अधीक्षक, नांदेड यांनी प्राधिकृत केलेल्या पोलीस अधिकाऱ्यांना राहतील.

हा आदेश बहुसंख्य नागरिकांना लागू असल्याने त्याची दवंडी, ध्वनीक्षेपक तसेच इतर प्रसिद्धी माध्यमांद्वारे व्यापक प्रसिद्धी करण्याचे निर्देश पोलीस अधीक्षक, नांदेड यांना देण्यात आले आहेत. तसेच आदेशाच्या प्रती जिल्ह्यातील सर्व उपविभागीय दंडाधिकारी, तालुका दंडाधिकारी आणि पोलीस ठाण्यांच्या कार्यालयातील सूचना फलकांवर लावून प्रसिद्धी देण्यात येणार आहे.

*****

 वृत्त क्रमांक                                                                                

औरंगाबाद विभाग पदवीधर निवडणुकीसाठी नांदेड प्रशासन सज्ज

 

• जिल्ह्यातील 120 मतदान केंद्रांवर 36 हजार 687 मतदार बजावणार मतदानाचा हक्क
• जिल्हाधिकारी राहुल कर्डिले यांचे मतदारांना आवाहन

 

 

नांदेड, दि. 22 : महाराष्ट्र विधान परिषदेच्या 5-औरंगाबाद विभाग पदवीधर मतदारसंघाच्या निवडणुकीसाठी नांदेड जिल्हा प्रशासन सज्ज झाले आहे. जिल्ह्यातील 120 मतदान केंद्रांवर उद्या शुक्रवार, दि. 23 ऑक्टोबर 2026 रोजी 36 हजार 687 मतदार मतदानाचा हक्क बजावणार आहेत.

निवडणुकीच्या अनुषंगाने मतदानपूर्व आवश्यक तयारी पूर्ण करण्यात आली आहे. मतदान प्रक्रियेसाठी आवश्यक साहित्याचे वाटप नांदेड येथील शासकीय तंत्रनिकेतनमध्ये करण्यात आले. मतदान प्रक्रिया सुरळीत, पारदर्शक व शांततेत पार पडावी, यासाठी प्रशासनाने आवश्यक नियोजन केले आहे.

जिल्ह्यातील 120 मतदान केंद्रांसाठी 120 मतदान केंद्राध्यक्ष आणि त्यांच्या सहाय्यासाठी 630 मतदान अधिकाऱ्यांची नियुक्ती करण्यात आली आहे. या अधिकारी व कर्मचाऱ्यांना दि. 22 ऑक्टोबर रोजी प्रशिक्षण देण्यात येत असून, मतदान साहित्याचे वाटप करून त्यांना संबंधित मतदान केंद्रांवर रवाना करण्यात आले आहे. मतदान प्रक्रियेवर देखरेख ठेवण्यासाठी 55 क्षेत्रीय अधिकाऱ्यांचीही नियुक्ती करण्यात आली आहे.

 

सकाळी 8 ते दुपारी 4 वाजेपर्यंत मतदान

 

शुक्रवार, दि. 23 ऑक्टोबर रोजी सकाळी 8 ते दुपारी 4 या वेळेत मतदान होणार आहे. मतदानाची वेळ संपल्यानंतर सर्व मतदान पथके मतदानपेट्या सीलबंद करून नांदेड येथील शासकीय तंत्रनिकेतनमधील सुरक्षित कक्षात जमा करतील. त्यानंतर सर्व मतदानपेट्या पोलीस बंदोबस्तात छत्रपती संभाजीनगर येथील सुरक्षित कक्षात नेऊन जमा करण्यात येणार आहेत. या प्रक्रियेच्या समन्वयासाठी देगलूरचे उपविभागीय अधिकारी अनुप पाटील यांची नियुक्ती करण्यात आली आहे.

मतदान प्रक्रिया निर्भय, निष्पक्ष व सुरळीत पार पाडण्यासाठी जिल्हा प्रशासनाकडून आवश्यक त्या सर्व उपाययोजना करण्यात आल्या आहेत. जिल्हाधिकारी तथा जिल्हा निवडणूक अधिकारी राहुल कर्डिले यांनी नांदेड जिल्ह्यातील सर्व पदवीधर मतदारांना शुक्रवार, दि. 23 ऑक्टोबर रोजी मतदान केंद्रावर उपस्थित राहून आपला मतदानाचा हक्क आवर्जून बजावण्याचे आवाहन केले आहे.

*******