मंत्रालय आणि विधीमंडळ वार्ताहर संघाकडून

उत्कृष्ट पत्रकार पुरस्कारासाठी प्रवेशिका पाठविण्याचे आवाहन

मुंबई, दि. १३ : मंत्रालय आणि विधिमंडळ वार्ताहर संघाच्यावतीने पत्रकारिता क्षेत्रात भरीव योगदान देणाऱ्या पत्रकारांना दरवर्षी पुरस्कार देवून गौरवण्यात येते. सन २०१८ च्या उत्कृष्ट पत्रकार पुरस्काराकरिता राज्यातील पत्रकारांनी आपली नामांकने येत्या २५ डिसेंबर २०१८ पूर्वी पाठवावीत, असे आवाहन मंत्रालय आणि विधिमंडळ वार्ताहर संघाच्यावतीने करण्यात आले आहे.

पुरस्कारामध्ये जीवनगौरव पुरस्कार (राज्यस्तरीय), वृत्तपत्र प्रतिनिधी, इलेक्ट्रॉनिक माध्यम प्रतिनिधी (राज्यस्तरीय), उत्कृष्ट पत्रकारिता पुरस्कार अशा एकूण चार पुरस्कारांचा समावेश आहे. शाल, श्रीफळ, मानचिन्ह आणि सन्मानपत्र असे पुरस्काराचे स्वरूप आहे.

पत्रकारितेत उल्लेखनीय लिखाण करणाऱ्या पत्रकारांनी आपल्या नामांकनाच्या प्रवेशिका तपशिलासह (वृत्तवाहिनींच्या पत्रकारानी वृत्तांकन केलेली सी. डी. सोबत पाठविणे आवश्यक आहे) येत्या २५ डिसेंबर २०१८ पूर्वी अध्यक्ष, मंत्रालय आणि विधिमंडळ वार्ताहर संघ, तळमजला, पत्रकार कक्ष, मंत्रालय, मुंबई ४०००३२ या पत्त्यावर पाठवाव्यात, असे आवाहन अध्यक्ष दिलीप सपाटे आणि कार्यवाह प्रमोद डोईफोडे यांनी केले आहे.

पुरस्कार व निकष   

१)जीवनगौरव पुरस्कार ( राज्यस्तरीय )

 पत्रकाराने किमान २५ वर्षे पूर्णवेळ पत्रकारिता केलेली असावी. वय किमान ६० वर्षे पूर्ण असावे.

अन्य पुरस्कारप्रमाणे जीवनगौरव पुरस्कारासाठी प्रवेशिका स्वीकारण्यात येणार नाहीत. निवडीचे अधिकार निवड समितीला असतील. समिती विविध वार्ताहर संघाचे सदस्य, पत्रकार संघटना व राज्यातील पत्रकारांकडून नामांकने व सूचना स्वीकारेल.

२) राज्यस्तरीय पत्रकारीता पुरस्कार (दोन), अ) वृत्तपत्रीय प्रतिनिधी ब) इलेक्ट्रॉनिक माध्यम प्रतिनिधी

या पुरस्कारासाठी पत्रकारितेत पूर्णवेळ सेवा देणा-या कोणत्याही भाषेच्या पत्रकारांना प्रवेशिका पाठविता येईल. मागील दोन वर्षाच्या (२०१७ आणि २०१८) बातम्याची कात्रणे किंवा चित्रफित/ ध्वनीफीत प्रवेशिकेसोबत पाठवाव्यात. कात्रणे किंवा ध्वनीफीत यावर अर्जदाराचे नाव तसेच संपादक किंवा संस्थेचे प्राधिकृत केलेल्या अधिकाऱ्याकडून प्रवेशिका सांक्षाकित केलेली असावी. राजकिय, सामाजिक, सांस्कृतिक, क्रीडा आदी क्षेत्रात प्रभाव पाडणारे आणि त्यांचा दृष्य परिणाम झालेले वृत्तसंकलन व लेखन करणाऱ्या पत्रकारांचा या पुरस्कारासाठी विचार करण्यात येईल. तसेच पुरस्कारासाठी योग्य प्रमाणात पात्र ठरतील अशा प्रवेशिका न आल्यास निवड समिती स्वत:च्या अधिकारात पुरस्कार विजेते घोषित करेल.

३)उत्कृष्ट पत्रकारिता पुरस्कार-(एक)

या पुरस्कारासाठी केवळ मंत्रालय आणि विधिमंडळ वार्ताहर संघाच्या सदस्यांना भाग घेता येईल.

एकवर्षांची (१ जानेवारी २०१८ ते अर्ज करण्याचा दिनांक) कात्रणे/ध्वनीफीत/चित्रफितीसह प्रवेशिका  द्याव्या लागतील. सदस्यांनी गेल्या वर्षभरातील बातम्या, लेख,वार्तापत्रे यांची कात्रणे किंवा ध्वनिफित/चित्रफित/प्रवेशिकेबरोबर जोडावीत. संपादक किंवा संस्थेचे प्राधिकृत केलेल्या अधिकाऱ्याकडून प्रवेशिका सांक्षाकित केलेली असावी.

000