स्कुलबस धोरणाबाबत

मुख्याध्यापकांची कार्यशाळा संपन्न

नांदेड, दि. 13 :- प्रादेशिक परिवहन कार्यालय तसेच शिक्षण विभाग महानगरपालिका नांदेड यांच्या संयुक्त विद्यमाने स्कुल बस धोरण-2011 अंतर्गत शालेय विद्यार्थी वाहतुक सुरक्षीतपणे होण्यासाठी नांदेड तालुक्यातील सर्व शाळांच्या मुख्याध्यापकांची कार्यशाळा आज श्री सचखंड गुरु ग्रंथभवन नांदेड येथे आयोजीत करण्यात आली होती.

या कार्यशाळेत उपप्रादेशिक परिवहन अधिकारी अविनाश राऊत, सहा. प्रा.परिवहन अधिकारी रोहीत काटकर,  मनपा शिक्षणाधीकारी डी. आर. बनसोडे, प्राचार्य तथा उपप्रबंधक गुरुव्दारा सचखंड बोर्डचे रंजीत सिंग चिरागिया तसेच औद्योगिक  प्रशिक्षण संस्था खालसा स्कुलचे प्राचार्य बच्चनसिंग, मोटार वाहन निरिक्षक श्री चव्हाण, श्री यादव, शाळेचे मुख्याध्यापक, वरिष्ठ लिपीक श्री गाजुलवाड, श्री पवळे व क.लिपीक काकडे या कार्यशाळेत उपस्थित होते.

उपप्रादेशिक परिवहन अधिकारी अविनाश राऊत यांनी स्कुल बस धोरण 2011 अंतर्गत असलेल्या नियमांची मुख्याध्यापकांना माहिती दिली. या नियमावली अंतर्गत शाळेचे मुख्याध्यापकांचे कर्तव्य व जबाबदाऱ्याची माहिती  दिली. मा. उच्च न्यायालय मुंबई  यांनी जनहित याचिका क्र.97/2011 मधील दि.25-11-2019 च्या आदेशान्वये ऑटोरिक्षा मधुन विद्यार्थ्याची वाहतुक करणे धोकादायक असल्याने पालक त्यांच्या पाल्यांना ऑटोरिक्षामधून प्रवास करण्यास मनाई करतील याबाबतची न्यायालयाने व्यक्त केलेली अपेक्षेची माहितीही श्री. राऊत यांनी दिली.

शिक्षणाधिकारी श्री बनसोडे  यांनी  नांदेड तालुक्यातील सर्व मुख्याध्यपकांना स्कुल बस धोरण 2011 च्या अनुषंगाने माहिती  दिली व काही अडचणी असल्यास त्यांना कळविण्याचे आवाहन केले. सहाय्यक प्रादेशिक परिवहन अधिकारी श्री काटकर यांनी प्रस्ताविक केले.

00000

पंचायत समिती सभापती पदांच्या

आरक्षित पदांची सोडत संपन्न

नांदेड, दि. 13 :- जिल्ह्यातील 16 पंचायत समिती सभापती पदांच्या आरक्षित पदांची सोडत पंचायत समिती निहाय वाटप करण्यासाठी जिल्हाधिकारी अरुण डोंगरे यांच्या अध्यक्षतेखाली जिल्हाधिकारी कार्यालयातील बचत भवन येथील आयोजित बैठकीत पंचायत समिती निहाय सभापती पदांच्या आरक्षित पदांची सोडत आज काढण्यात आली.   

यावेळी उपजिल्हाधिकारी (सामान्य) संतोषी देवकुळे, जिल्हा परिषदेचे अतिरिक्त मुख्य कार्यकारी अधिकारी डॉ. शरद कुलकर्णी, तहसिलदार (सामान्य) प्रसाद कुलकर्णी, नायब तहसिलदार संजीवनी मुकडे, पंचायत समिती, जिल्हा परिषदेतील लोकप्रतिनिधी, अधिकारी, कर्मचारी आदी उपस्थित होते.   

महाराष्‍ट्र शासनाने ग्रामविकास यांच्याकडील महाराष्‍ट्र शासन राजपत्र असाधारण भाग चार- ब अंक 151 (8) बुधवार 27 नोव्हेंबर 2019 अन्‍वये जिल्‍ह्याच्‍या अधिकार क्षेत्रातील पंचायत समीतींमधील सभापती पदाच्‍या विद्यमान आरक्षणाची संपल्‍याच्‍या दिवसानंतर लगतच्‍या दिवसापर्यंत सुरू होणाऱ्या उर्वरीत कालावधीकरीता (दिनांक 21 डिसेंबर 2019 पासुन) अनुसूचित जाती, अनुसूचित जमाती, आणि नागरिकांचा मागासवर्ग प्रवर्ग (विमुक्‍त जाती, भटक्‍या जमातीसह) आणि महिला (अनुसूचित जाती, अनुसूचित जमाती आणि नागरिकांचा मागासवर्ग प्रवर्ग यामधील महिलांसह) सोबतच्‍या अनुसूचिमध्‍ये दर्शविल्‍याप्रमाणे विनिर्दिष्‍ट केली आहे.

अ.क्रं.	प्रवर्ग	पंचायत समिती संभापती करीता निर्धारीत आरक्षण	पंचायत समिती सभापती करीता निर्धारीत महिला आरक्षण
1	अनुसूचित जाती	03	02
2	अनुसूचित जमाती	02	01
3	नागरिकांचा मागासवर्ग प्रवर्ग	04	02
4	सर्वसाधारण	07	04
	एकुण	16	09

 महाराष्‍ट्र जिल्‍हा परिषदा (अध्‍यक्ष, उपाध्‍यक्ष व विषय समित्‍यांचे सभापती) आणि पंचायत समित्‍या (सभापती व उपसभापती) (पदाचे आरक्षण व निवडणुक) नियम 1962 च्‍या नियम 2 (फ) च्‍या उपकलम 2(अ), 2(ब), 3(अ), 3(ब), 4(अ), 4(ब), 5(अ), 5(ब) अन्‍वये प्राप्‍त अधिकारानुसार नांदेडचे जिल्हाधिकारी अरुण डोंगरे यांनी जिल्‍ह्याचे अधिकार क्षेत्रातील पंचायत समित्‍यांकरीता, पंचायत समितींमधील सभापतीच्‍या पदाच्‍या आरक्षणाची मुदत संपल्‍याच्‍या दिनांकानंतर येणाऱ्या लगतच्‍या दिवसापासुन सुरु होणाऱ्या उर्वरीत (दिनांक 21 डिसेंबर, 2019 पासुन) कालावधी करीता अनुसूचित जाती, अनुसूचित जमाती, आणि नागरिकांचा मागासवर्ग प्रवर्ग (विमुक्‍त जाती, भटक्‍या जमातीसह) आणि महिला (अनुसूचित जाती, अनुसूचित जमाती आणि नागरिकांचा मागासवर्ग प्रवर्ग यामधील महिलांसह) सोडतीव्‍दारे सोबतच्‍या अनुसूचीमध्‍ये दर्शविल्‍याप्रमाणे आरक्षण नेमुन दिले आहे.

अ.क्र.	पंचायत समिती नाव	आरक्षण
1	उमरी	अनुसूचित जाती  (महिला)
2	अर्धापुर	अनुसूचित जाती (महिला)
3	मुदखेड	अनुसूचित जाती
4	हदगांव	अनुसूचित जामाती (महिला)
5	देगलुर	अनुसूचित जमाती
6	धर्माबाद	नागरिकांचा मागास प्रवर्ग
7	बिलोली	नागरिकांचा मागास प्रवर्ग
8	हिमायतनगर	नागरिकांचा मागास प्रवर्ग (महिला)
9	माहुर	नागरिकांचा मागास प्रवर्ग (महिला)
10	नांदेड	सर्वसाधारण (महिला)
11	कंधार	सर्वसाधारण (महिला)
12	भोकर	सर्वसाधारण (महिला)
13	किनवट	सर्वसाधारण (महिला)
14	लोहा	सर्वसाधारण
15	नायगांव खै.	सर्वसाधारण
16	मुखेड	सर्वसाधारण

00000

 दिव्यांगांना मुक्त संचारासाठी कार्यालयात  

  रॅम्स उपलब्ध करुन देण्याच्या सूचना

नांदेड, दि. 12 :-  महाराष्ट्र दिव्यांग कर्मचारी, अधिकारी संघटनांनी दिलेल्या निवेदनाच्या अनुषंगाने सामाजिक न्याय विभागाचे प्रधान सचिव यांचा निर्णय दिव्यांग कर्मचाऱ्यांच्या समस्यांचे निराकरण करण्यासाठी जिल्हाधिकारी अरुण डोंगरे यांनी जिल्ह्यातील सर्व कार्यालय प्रमुख, उपविभागीय अधिकारी, तहसिलदार यांना पत्राद्वारे सूचित केले आहे.

या निर्णयानुसार दिव्यागांना मुक्त संचार करण्यासाठी रॅम्स उपलब्ध करुन देणे ही सर्व शासकीय, निमशासकीय, अशासकीय कार्यालय, स्वायत्त संस्था, सार्वजनिक उपक्रम, महामंडळे व इतर संबंधीत सर्व कार्यालय प्रमुखांची जबादारी आहे. याविषयी सक्षमरित्या कार्यवाही करण्याबाबत सर्व विभागांना सुचना देण्यात आल्या आहेत. 

00000

राष्ट्रीय ऊर्जा संवर्धन दिन 14 डिसेंबरला

नांदेड, दि. 12 :- ऊर्जा संवर्धनाचे महत्व पटवून देण्यासाठी 14 डिसेंबर 2019 रोजी “राष्ट्रीय ऊर्जा संवर्धन दिन” व 14 ते 20 डिसेंबर 2019 दरम्यान “राष्ट्रीय ऊर्जा संवर्धन सप्ताह” साजरा करावा. राष्ट्रीय ऊर्जा संवर्धन दिनाची शपथ घ्यावी. तसेच शासन परिपत्रकात नमूद केल्यानुसार कार्यवाही करुन त्याबाबत अहवाल सादर करावा, असे निर्देश जिल्हाधिकारी अरुण डोंगरे यांनी सर्व शासकीय विभाग प्रमुखांना दिले आहेत.

00000

देगलूर, नायगाव येथील कृत्रिम अवयव

मोजमाप शिबिरातील तारखेत बदल

            नांदेड दि. 12 :- जेष्ठ नागरिक व दिव्यांगांना  सहाय्यभूत साधने व कृत्रिम अवयव वितरणासाठी आयोजित देगलूर व नायगाव येथील मोजमाप शिबिरातील तारखेत बदल करण्यात आला असून देगलूर 21 डिसेंबर तर नायगावला 23 डिसेंबर रोजी शिबिराचे आयोजन करण्यात आले आहे. याची संबंधितांनी नोंद घ्यावी, असे आवाहन तहसिलदार देगलूर व नायगाव यांनी केले आहे.

जिल्ह्यातील सर्वच तालुक्यातील 10 ते 26 डिसेंबर कालावधीत या शिबिराचे आयोजन करण्यात आले आहे. देगलूर येथे 23 ऐवजी 21 डिसेंबर व नायगाव 21 ऐवजी 23 डिसेंबर रोजी शिबिराचे आयोजन करण्यात आले आहे. इतर तालुक्यातील शिबिर ठरलेल्या दिनांकाला होणार आहेत. यासाठी लाभार्थ्यांना आधार कार्ड, उत्पन्नाचे प्रमाणपत्र अथवा बिपीएल कार्ड सादर करणे आवश्यक आहे.

जिल्ह्यात तालुकास्तरावर, नांदेड येथे 10 डिसेंबर, अर्धापूर- 11, मुदखेड- 12 रोजी संपन्न झाले तर भोकर- 13, हदगाव- 14, किनवट- 15 व 16, माहूर- 17, हिमायतनगर- 18, लोहा- 19, कंधार- 20, देगलूर- 21, मुखेड- 22, नायगाव- 23, बिलोली- 24 धर्माबाद- 25 तर उमरी येथे 26 डिसेंबर रोजी मोजमाप शिबिराचे आयोजन करण्यात आले आहे.

एडीआयपी (ADIP) व वयोश्री योजनेअंतर्गत भारतीय कृत्रिम अंग निर्माण निगम (अलिम्को), जिल्हा प्रशासन, जिल्हा परिषद व जिल्हा दिव्यांग पुनर्वसन केंद्र नांदेडच्यावतीने आयोजित शिबिरात अस्थिव्यंगांसाठी 3 चाकी सायकल, कुबडी, रोलेटर, व्हीलचेअर, सर्व प्रकारच्या काठ्या, सीपीचेअर देण्यात येणार आहे तर मोटराइज ट्रायसायकलसाठी 80  टक्के दिव्यांगत्व असलेले प्रमाणपत्र व 12  हजार रुपये स्थानिक सहभाग गरजेचा आहे. अंधप्रवर्गासाठी 75 टक्क्यावरील दिव्यांगत्व प्रमाणपत्र असणाऱ्याना स्मार्ट केन, ब्रेल कीट, डेसी प्लेअर, स्मार्ट फोन. मतिमंद प्रवर्गासाठी व्हीलचेअर, एम आर कीट, सी. पी. चेअर तर कर्णबधीर प्रवर्गासाठी श्रवणयंत्राचे वितरण करण्यात येणार आहे.

पूर्व नोंदणीसाठी त्या-त्या तालुक्यातील पंचायत समिती कार्यालयात जेष्ठ नागरिकांनी व  दिव्यांगांनी दिव्यंगत्व प्रमाणपत्र, चालू वर्षाचे उत्पन्न प्रमाणपत्र, आधार कार्डच्या झेरॉक्स व दोन फोटोसह संपर्क साधावा. असे आवाहन करण्यात आले आहे.  

000000

जिल्हा नियोजन कार्यालयाचे कामकाज

“आयपास” संगणकीय प्रणालीद्वारे होणार

13 व 16 डिसेंबरला दुसरी कार्यशाळा  

नांदेड, दि. 12 :- जिल्हा वार्षिक योजना (सर्वसाधारण), खासदार व आमदार स्थानिक विकास कार्यक्रम तसेच डोंगरी विकास कार्यक्रम योजनांचे प्रभावी संनियंत्रण करण्यासाठी “आयपास” संगणकीय प्रणाली विकसित करण्यात आली आहे. या प्रणालीद्वारे 1 एप्रिलपासून कामकाज होणार असून याचे पहिली कार्यशाळा जिल्हा नियोजन भवनच्या सभागृहात आज संपन्न झाले. या प्रणालीबाबत दुसरी कार्यशाळा शुक्रवार 13 डिसेंबर व सोमवार 16 डिसेंबर रोजी आयोजित करण्यात आली आहे.   

यावेळी औरंगाबाद विभागीय आयुक्त कार्यालयाचे उपआयुक्त (नियोजन) रविंद्र जगताप, जिल्हा नियोजन अधिकारी एस. बी. कोलगणे, जिल्हा नियोजन अधिकारी (मानव विकास) सुरेश थोरात, सहाय्यक जिल्हा नियोजन अधिकारी जी. बी. सुपेकर यांच्यासह विविध विभागाचे अधिकारी, कर्मचारी उपस्थित होते.  

उपआयुक्त (नियोजन) श्री. जगताप म्हणाले, “आयपास” प्रणालीचा परिपूर्ण माहिती घेऊन प्रत्येक स्टेपचा स्वत: वापर केल्यास प्रणालीद्वारे काम करणे सुलभ होईल. जिल्हा नियोजन अधिकारी श्री. कोलगणे यांनी येत्या 1 एप्रिलपासून राज्यात ही प्रणाली लागू होणार आहे. या प्रणालीद्वारे जिल्हा नियोजन समितीचे कामकाज पेपरलेस व गतीमान होणार असून प्रशिक्षणात दिलेल्या माहितीच्या आधारे प्रणालीचा वापर करावा, असे सांगितले.  

ईएसडीएस सॉफ्टवेअरचे संदेश उगाळे यांनी प्रणालीतील विविध विषयासह मोबाईलद्वारे भरण्यात येणारी माहिती सादरीकरणाद्वारे देऊन विचारलेल्या शंकांचे समाधानही केले. शेवटी सहाय्यक जिल्हा नियोजन अधिकारी श्री. सुपेकर यांनी आभार मानले.  

या प्रणालीच्या दुसरी कार्यशाळा शुक्रवार 13 डिसेंबर व सोमवार 16 डिसेंबर रोजी जिल्हा नियोजन भवन येथे आयोजित करण्यात आली आहे. जिल्ह्यातील विविध यंत्रणांनी या कार्यशाळेस उपस्थित रहावे, असे आवाहन जिल्हा नियोजन कार्यालयाकडून करण्यात आले आहे.     

00000