गोरठा येथे चारा टंचाईच्या वृत्ताची प्रत्यक्ष पाहणीत पडताळणी

 

गोशाळेत पुरेशा प्रमाणात कडबा व सोयाबीन कुटार उपलब्ध

वस्तुस्थितीची पडताळणी करण्याचे आवाहन

नांदेड(जिमाका), दि. १८ : उमरी तालुक्यातील मौजे गोरठा येथे चारा टंचाई निर्माण झाल्याबाबत तसेच चारा छावणी सुरू करण्याच्या मागणीसंदर्भात दि. १६ ऑक्टोबर २०२६ रोजी साम टीव्हीवर प्रसारित झालेल्या वृत्ताची पशुसंवर्धन विभागाच्या पथकाने प्रत्यक्ष पाहणी करून वस्तुस्थितीची पडताळणी केली. या पाहणीत संबंधित गोशाळेत पशुधनासाठी पुरेशा प्रमाणात चारा उपलब्ध असल्याचे निदर्शनास आले.

पशुसंवर्धन विभागाच्या पथकाने पशुवैद्यकीय चिकित्सालय, गोरठा तसेच श्री संत दासगणू महाराज प्रतिष्ठान, गोरठा संचलित गोशाळेस प्रत्यक्ष भेट देऊन उपलब्ध चारा, पशुधनाची स्थिती आणि चारा व्यवस्थापनाची पाहणी केली.

गोशाळेत पुरेसा चारा उपलब्ध

प्रत्यक्ष पाहणीदरम्यान गोशाळेत पुरेशा प्रमाणात वाळलेला कडबा व सोयाबीन कुटार उपलब्ध असल्याचे आढळून आले. तसेच संबंधित वृत्तातील व्यक्ती आणि गोशाळा व्यवस्थापक यांच्याशी चर्चा करण्यात आली. प्रसारित वृत्तातील माहिती वस्तुस्थितीशी सुसंगत नसल्याचे तसेच संबंधित विधाने जाणीवपूर्वक करण्यास सांगितल्याचे त्यांनी लेखी निवेदनाद्वारे स्पष्ट केले.

पशुपालकांना चारा उत्पादन व साठवणुकीबाबत मार्गदर्शन

पाहणीदरम्यान चारा साक्षरता अभियानांतर्गत गावातील पशुपालक व शेतकऱ्यांशी संवाद साधून चारा उत्पादनात वाढ करणे, उपलब्ध चाऱ्याचे संवर्धन, योग्य साठवणूक आणि व्यवस्थापन याबाबत मार्गदर्शन करण्यात आले.

रब्बी हंगामात पशुसंवर्धन विभागामार्फत उपलब्ध करून देण्यात येणाऱ्या वैरण बियाणांचा जास्तीत जास्त लाभ घेऊन चारा उत्पादन वाढवावे, असे आवाहनही यावेळी करण्यात आले.

प्रत्यक्ष पाहणीत संबंधित गोशाळेत पुरेशा प्रमाणात चारा उपलब्ध असल्याचे आढळून आले. त्यामुळे चारा टंचाईसंदर्भातील वृत्त प्रसारित करण्यापूर्वी प्रत्यक्ष पाहणी करून वस्तुस्थितीची वस्तुनिष्ठ पडताळणी करणे आवश्यक असल्याचे पशुसंवर्धन विभागाने स्पष्ट केले आहे.

**********