वृत्त क्रमांक

*चारा विक्री व वाहतुकीवरील निर्बंधांची अर्धापूरमध्ये काटेकोर अंमलबजावणी

*जिल्हाधिकाऱ्यांच्या आदेशानुसार पोलिस प्रशासनाची कारवाई

*नागरिकांनी प्रशासनाला सहकार्य करण्याचे आवाहन

नांदेड(जिमाका), दि. १८ : जिल्ह्यातील चारा टंचाईसदृश परिस्थितीच्या पार्श्वभूमीवर पशुधनासाठी उपलब्ध चारा राखीव ठेवण्याच्या उद्देशाने जिल्हाधिकारी तथा जिल्हादंडाधिकारी, नांदेड यांनी दि. १६ ऑक्टोबर २०२६ रोजी जारी केलेल्या आदेशानुसार चारा पिकांचे अवशेष, कडबा व वैरण यांच्या विक्री आणि वाहतुकीवरील निर्बंधांची अंमलबजावणी सुरू करण्यात आली आहे. या अनुषंगाने अर्धापूर येथे पोलिस प्रशासनाकडून कारवाई करण्यात आली.

या कारवाईच्या वेळी अर्धापूरचे तालुका पशुसंवर्धन अधिकारी  डॉ. दिलीप उदगिरे उपस्थित होते. जिल्ह्यात निर्माण झालेल्या चारा टंचाईच्या संभाव्य परिस्थितीत उपलब्ध चारा स्थानिक पशुधनासाठीच उपलब्ध राहावा, पशुपालकांच्या चाऱ्याची गरज प्राधान्याने पूर्ण व्हावी आणि शासनाच्या आदेशांचे प्रभावीपणे पालन सुनिश्चित व्हावे, यासाठी प्रशासनाकडून आवश्यक कार्यवाही करण्यात येत आहे.

*पशुधनासाठी चारा उपलब्धता सुनिश्चित करण्यावर भर

चारा पिकांचे अवशेष, कडबा व वैरण यांची अनधिकृत विक्री किंवा जिल्ह्याबाहेर वाहतूक झाल्यास स्थानिक पशुधनासाठी चाऱ्याची उपलब्धता कमी होण्याची शक्यता आहे. त्यामुळे लागू निर्बंधांचे उल्लंघन होणार नाही, यासाठी संबंधित यंत्रणांकडून लक्ष ठेवण्यात येत आहे.

पशुधनाचे संरक्षण, उपलब्ध चाऱ्याचे योग्य नियोजन आणि पशुपालकांचे हित जपण्यासाठी जिल्ह्यातील नागरिक, पशुपालक, व्यापारी तसेच संबंधित घटकांनी प्रशासनाला सहकार्य करावे. जिल्हाधिकारी यांच्या आदेशानुसार लागू करण्यात आलेल्या चारा विक्री व वाहतुकीवरील निर्बंधांचे काटेकोरपणे पालन करावे, असे आवाहन प्रशासनाने केले आहे.

********