देगलूर विधानसभा पोटनिवडणूक 2021

विविध बाबींवरील निर्बंध आदेश निर्गमीत      

नांदेड (जिमाका), दि. 5 :- भारत निवडणूक आयोगाकडून 90-देगलूर विधानसभा पोटनिवडणूक 2021 ची दिनांक 28 सप्टेंबर 2021 रोजी घोषणा केली असून घोषणेच्‍या दिनांकापासून आदर्श आचारसंहिता अंमलात आली आहे. नांदेड जिल्‍ह्यातील देगलूर विधानसभा पोट निवडणूकीची संपूर्ण प्रक्रिया शांततेत, निर्भय व न्‍याय वातावरणात पार पाडण्‍याच्‍या दृष्‍टीकोणातून नांदेडचे जिल्‍हादंडाधिकारी डॉ. विपीन इटनकर यांनी  फौजदारी प्रक्रिया संहिता 1973 चे कलम 144 अन्‍वये अधिकाराचा वापर करुन विविध बाबींवर निर्बंध आदेश 29 सप्टेंबर 2021 रोजी निर्गमीत केले आहेत.   

ध्‍वनीक्षेपक, ध्‍वनिवर्धकाचा वापर  

कोणतीही व्‍यक्‍ती, संस्‍था, पक्ष व पक्षाचे कार्यकर्ते यांना ध्‍वनीक्षेपक व ध्‍वनिवर्धकाचा वापर सक्षम प्रधिकाऱ्याच्‍या पूर्व परवानगीशिवाय करता येणार नाही. फिरत्‍या वाहनांवर ध्‍वनिक्षेपक व ध्‍वनिवर्धकाचा वापर करता येणार नाही. महाराष्‍ट्र शासन पर्यावरण विभाग, शासन निर्णय क्रमांक ध्‍वनीप्र 2009/प्र.क्र.12/08/ता.क.1, दिनांक 31 जुलै, 2013 नुसार ध्‍वनिक्षेपक व ध्‍वनिवर्धकाचा वापर ध्‍वनि प्रदुषणाची पातळी विहित मर्यादेत राखून करावी. ध्‍वनिक्षेपक व ध्‍वनिवर्धकाचा वापर सकाळी 6 वाजेपुर्वी आणि रात्री. 10 वाजेनंतर करता येणार नाही. हे आदेश देगलूर विधानसभा मतदारसंघ कार्यक्षेत्राच्या हद्दीत 29 सप्टेंबर ते 5 नोव्हेंबर रोजीच्या मध्यरात्रीपर्यंत अंमलात राहील. 

कार्यालये, विश्रामगृहे परिसरातील निर्बंध

सर्व शासकीय, निमशासकीय व स्थानिक स्वराज्य संस्थेची कार्यालये, विश्रामगृह याठिकाणी कोणत्‍याही प्रकारची मिरवणूक, मोर्चा काढणे, सभा घेणे, उपोषण करणे, कोणत्‍याही प्रकारच्‍या घोषणा देणे, वाद्य वाजविणे किंवा गाणी म्‍हणने, कोणत्‍याही प्रकारचा निवडणूक प्रचार करण्यावर प्रतिबंध करण्यात आले. हे आदेश देगलूर विधानसभा मतदारसंघ कार्यक्षेत्राच्या हद्दीत 29 सप्टेंबर ते 5 नोव्हेंबर रोजीच्या मध्यरात्रीपर्यंत अंमलात राहील. 

शासकीय वाहनाच्‍या गैरवापरास प्रतिबंध

90-देगलूर विधानसभा मतदारसंघासह नांदेड जिल्ह्यात निवडणूकीचे कालावधीत कोणत्‍याही वाहनांच्‍या ताफ्यामध्‍ये तीन पेक्षा जास्‍त मोटारगाडया अथवा वाहने (Cars/Vehicles) वापरण्‍यास या आदेशाव्‍दारे प्रतिबंधीत करण्‍यात आले आहे. हा आदेश देगलूर विधानसभा मतदारसंघ कार्यक्षेत्रासह नांदेड जिल्ह्यात 29 सप्टेंबर ते 5 नोव्हेंबर रोजी मध्यरात्री पर्यंत अंमलात राहील. 

वाहनांवर पक्ष प्रचाराचे कापडी फलके,

झेंडे लावणे इत्‍यादी बाबीस काही प्रतिबंध

फिरत्‍या वाहनांवर पक्ष प्रचाराचा झेंडा हा वाहनाच्‍या डाव्‍या बाजुला विंड स्‍क्रीन ग्‍लासच्‍या पुढे राहणार नाही आणि तो त्‍या वाहनाच्‍या टपापासून 2 फुट उंची पेक्षा जास्‍त राहणार नाही. प्रचाराच्‍या फिरत्‍या वाहनावर कापडी फलक वाहन चालकाच्‍या आसनामागे वाहनाच्‍या डाव्‍या व उजव्‍या बाजुनेच लावण्‍यात यावा. इतर कोणत्‍याही बाजूस तो लावता येणार नाही. फिरत्‍या वाहनावर लावावयाचा पक्ष प्रचाराचा झेंडा किंवा कापडी फलक संबंधीत पक्षाचे जिल्‍हाध्‍यक्ष, उमेदवार व उमेदवाराचे निवडणूक प्रतिनिधी यांच्‍या वाहना व्‍यति‍रीक्‍त इतर कोणत्‍याही वाहनावर लावता येणार नाही. हा आदेश देगलूर विधानसभा मतदारसंघ कार्यक्षेत्रासह नांदेड जिल्ह्यात 29 सप्टेंबर ते 11 नोव्हेंबर रोजी मध्यरात्री पर्यंत अंमलात राहील. 

निवडणूक कालावधीत विश्रामगृह वापरावरील निर्बंध

शासकीय व निवडणूकीच्‍या कामावर असलेले अधिकारी व कर्मचारी यांच्‍या व्‍यतीरिक्‍त, इतर कोणत्‍याही व्‍यक्‍तीस विश्रामगृहात थांबण्‍यासाठी संबंधित खात्‍याने दिलेला अधिकृत परवाना असल्‍याशिवाय किंवा सक्षम अधिकाऱ्याच्‍या पूर्व परवानगीशिवाय जिल्‍ह्यातील शासकीय/निमशासकीय विश्रामगृहात अथवा त्‍या परिसरात प्रवेश करता येणार नाही. हा आदेश देगलूर विधानसभा मतदारसंघ कार्यक्षेत्रासह नांदेड जिल्ह्यात 29 सप्टेंबर ते 5 नोव्हेंबर रोजी मध्यरात्री पर्यंत अंमलात राहील. 

सार्वजनिक ठिकाणी तात्पुरती पक्ष कार्यालय स्‍थापन करण्यास निर्बंध

निवडणूकीचे कालावधीत धार्मिक स्‍थळे, रुग्‍णालये किंवा शैक्षणिक संस्‍था व सार्वजनिक ठिकाणाच्या जवळपास तात्‍पुरती पक्ष कार्यालये स्‍थापन करण्‍यास प्रतिबंधीत करण्‍यात आले आहे. हा आदेश देगलूर विधानसभा मतदारसंघ कार्यक्षेत्राच्या हद्दीत 29 सप्टेंबर ते 5 नोव्हेंबर रोजी मध्यरात्री पर्यंत अंमलात राहील. 

सार्वजनिक ठिकाणी पक्षांचे चित्रे, चिन्‍हांचे कापडी फलके, भाषण देण्याबाबतचे निर्बंध

मतदार संघ कार्यक्षेत्रात निवडणूक कालावधीत सार्वजनिक ठिकाणी पक्षांचे चित्रे, चिन्‍हांचे कापडी फलके, सार्वजनिक ठिकाणी भाषण देण्यास प्रतिबंधीत करण्‍यात आले आहे. हा आदेश देगलूर विधानसभा मतदारसंघ कार्यक्षेत्राच्या हद्दीत 29 सप्टेंबर ते 5 नोव्हेंबर रोजी मध्यरात्री पर्यंत अंमलात राहील. 

शासकीय, सार्वजनिक मालमत्‍तेची विरुपता करण्‍यास निर्बंध  

निवडणूक कालावधीत शासकीय, निमशासकीय, सार्वजनिक मालमत्‍तेची प्रत्‍यक्ष किंवा अप्रत्‍यक्ष स्‍वरुपात विरुपता करण्‍यास प्रतिबंधीत करण्‍यात आले आहे. हा आदेश देगलूर विधानसभा मतदारसंघ कार्यक्षेत्राच्या हद्दीत 29 सप्टेंबर ते 5 नोव्हेंबर रोजी मध्यरात्री पर्यंत अंमलात राहील. 

शस्‍त्र परवानाधारकाकडील शस्‍त्रास्‍त्रे वाहून नेण्‍यावर बंदी  

निवडणूकीचे कालावधीत शासकीय कर्तव्‍य पार पाडणाऱ्या अधिकारी व कर्मचारी, बँक सुरक्षा गार्ड यांचे व्‍यतिरिक्‍त इतर सर्व परवाना धारकास परवान्‍यातील शस्‍त्रास्‍त्रे वाहून नेण्‍यास या आदेशान्‍वये बंदी घालण्‍यात आली आहे. हा आदेश देगलूर विधानसभा पोटनिवडणूक अनुषंगाने मतदारसंघ कार्यक्षेत्राहद्दी पर्यंत 29 सप्‍टेंबर ते 5 नोव्हेंबर 2021 रोजी मध्यरात्री पर्यंत अंमलात राहतील.  

नामनिर्देशनपत्र दाखल करताना अवलंब करावयाची कार्यपद्धत

निवडणूक कालावधीत निवडणूक निर्णय अधिकारी यांच्‍या कार्यालयात उमेदवारांनी नामनिर्देशनपत्र दाखल करतेवेळेस कार्यालयात वाहनांच्‍या ताफ्यामध्‍ये तीन पैक्षा जास्त मोटारगाड्या/वाहनाना तसेच नामनिर्देशनपत्र दाखल करते वेळेस निवडणूक निर्णय अधिकारी यांचे दालनात पाच पेक्षा जास्त व्‍यक्‍तीना, तसेच निवडणूक निर्णय अधिकारी यांच्या कार्यालयात नामनिर्देशनपत्र दाखल करते वेळेस कार्यालयाच्‍या परिसरात मिरवणूक/सभा घेणे, कोणत्‍याही प्रकारच्‍या घोषणा देणे/ वाद्य वाजविणे किंवा गाणी म्‍हणने आणि कोणत्‍याही प्रकारचा निवडणूक‍ प्रचार करणेस प्रतिबंधीत करण्‍यात आले आहे. हा आदेश 90-देगलूर विधानसभा मतदार संघाचे निवडणूक निर्णय अधिकरी यांचे कार्यालयाच्या हद्दीपर्यंत 1 ऑक्टोंबर रोजी सकाळी 6 ते 8 आक्‍टोंबर 2021 रोजी मध्यरात्री पर्यंत अंमलात राहील. 

मतदान केंद्र परिसरात 144 कलम

मतदानाच्‍या दिवशी शनिवार 30 आक्‍टोंबर 2021 रोजी 90-देगलूर विधानसभा पोट निवडणूकीसाठी सर्व मतदान केंद्र परिसरात फौजदारी प्रक्रिया कलम 144 लागु राहील. ज्‍या ठिकाणी मतदान होणार आहे त्‍या ठिकाणापासून 200 मीटर परिसरातील सर्व पक्षकारांचे मंडपे, सर्व दुकाने, मोबाईल, कॉडलेस फोन, पेजर, वायरलेस सेट, ध्‍वनीक्षेपके, सर्व प्रकारचे फेरीवाले व इतर इलेक्‍ट्रॉनिक्‍स उपकरणे, निवडणुकीच्‍या कामाव्‍यतीरिक्‍त खाजगी वाहन, संबंधीत पक्षाचे चिन्‍हांचे प्रदर्शन व निवडणूकीच्‍या कामाव्‍यतीरीक्‍त व्‍यक्तीस प्रवेश करण्‍याकरीता शनिवार 30 ऑक्टोंबर 2021 रोजी प्रतिबंधीत करण्‍यात आले आहे. हा आदेश मतदानाच्‍या दिवशी  शनिवार 30 ऑक्टोंबर रोजी मतदान सुरु झाल्‍यापासून मतदान संपेपर्यन्‍त अंमलात राहील. 

मतमोजणी केंद्र परिसरात 144 कलम

नांदेड जिल्‍ह्यातील 90- देगलूर विधानसभा पोटनिवडणूक मतदार संघाच्‍या मुख्‍यालयी मतमोजणी केंद्र परिसरात मंगळवार 2 नोव्हेंबर 2021 रोजी मतमोजणी शांततेत पार पडावी आणि कायदा व सुव्‍यवस्‍था अबाधीत रहावी या दृष्‍टीकोणातून मतमोजणीच्‍या दिवशी मतमोजणी केंद्रापासून 200 मिटर परिसरात सर्व पक्षकारांचे मंडपे, सर्व दुकाने, मोबाईल, कॉडलेस फोन, पेजर, वायरलेस सेट, ध्‍वनीक्षेपके, फेरीवाले व इतर इलेक्‍ट्रॉनिक्‍स उपकरणे, निवडणुकीच्‍या कामाव्‍यतीरिक्‍त खाजगी वाहन, संबंधीत पक्षाचे चिन्‍हांचे प्रदर्शन व निवडणूकीच्‍या कामाव्‍यतीरीक्‍त व्‍यक्‍तीस प्रवेशास प्रतिबंधीत करण्‍यात आले आहे. हा आदेश मंगळवार 2 नोव्हेंबर,2021 रोजी सकाळी 6 वाजेपासून ते मतमोजणी प्रक्रिया संपेपर्यन्‍त अंमलात राहील. 

कोविड-19 चा प्रादुर्भाव रोखण्याच्या ज्या प्रभावी उपाययोजना जिल्हा प्रशासनाकडून अवलंबिल्या जात आहेत. त्याअनुषंगाने ब्रेक द चेन सुधारित मार्गदशक सूचना लागू करण्यात आल्या आहेत. त्या सूचनांचे काटेकोरपणे पालन आचारसंहिता कालावधीत आदेशाचे पालन होणे क्रमप्राप्त आहे, असेही आदेशात जिल्हादंडाधिकारी डॉ. विपीन इटनकर यांनी स्पष्ट केले आहे.

0000