14 मे रोजी 45 वर्षांवरील लाभार्थ्यांनाच

कोविशिल्डचा दुसरा डोस

लसीकरण कर्मचाऱ्यांना सहकार्य करण्याचे आवाहन

नांदेड (जिमाका) दि. 13 :- जिल्ह्यातील 45 पेक्षा अधिक वय वर्षे असलेल्या ज्या नागरिकांचा दुसरा डोस बाकी आहे अशा नागरिकांना डोसच्या उपलब्धतेप्रमाणे जिल्ह्यातील 91 केंद्रांवर लसीकरण केले जात आहे. आजही या केंद्रासाठी प्रत्येकी 100 डोस याप्रमाणे कोविशिल्ड मिळाले आहे. ज्या नागरिकांनी पहिला कोविशिल्डचा डोस घेतला आहे त्यांनी लसीकरण केंद्रावर उपलब्धतेप्रमाणे लस घेऊन सहकार्य करावे, असे आवाहन जिल्हा आरोग्य विभागातर्फे करण्यात आले आहे. लस ज्या प्रमाणात जिल्ह्यातील केंद्रांसाठी उपलब्ध होत आहेत त्याप्रमाणात लसीकरणासाठी संपूर्ण आरोग्य यंत्रणा कटिबद्ध असून टप्याटप्यात सर्वांना लसीकरण केले जाईल. नागरिकांनी आरोग्य कर्मचाऱ्यांना सहकार्य करुन लसीकरणाबाबतची वस्तुस्थिती समजून घ्यावी, असेही आवाहन केले आहे. 

जिल्ह्यातील ज्येष्ठ व्यक्तींना प्राधान्याने लसीकरण व्हावे याची खबरदारी कुटुंबातील सदस्यांनी घेऊन तसे नियोजन करणे उचित राहिल. लसीकरण केंद्रावर 18 ते 45 वयोगटातील युवक-नागरिकांनी लसीकरण केंद्रावर जाऊन अनावश्यक गर्दी करु नये. नांदेड शहरात पुढीलप्रमाणे लसीकरण केंद्र आहेत. यात श्री गुरु गोविंदसिंघ जिल्हा रुग्णालय, डॉ. शंकरराव चव्हाण वैद्यकीय महाविद्यालय, शासकिय आयुर्वेदीक महाविद्यालय, शहरी दवाखाना हैदरबाग, शिवाजीनगर, जंगमवाडी, कौठा असे एकूण 7 केंद्र आहेत. शहरी हद्दीत सर्व उपजिल्हा रुग्णालय, ग्रामीण रुग्णालय असे एकूण 16 केंद्र आहेत. ग्रामीण हद्दीत सर्व प्राथमिक आरोग्य केंद्रात लसीकरण सुरु असून एकूण 67 केंद्र आहेत. या प्रत्येक केंद्रावर आजच्यासाठी कोविडशिल्ड या लसीचे 100 डोस उपलब्ध मिळाले आहेत. लसीकरणाच्या या मोहिमेत नागरिकांनी सहकार्य करावे. नांदेड जिल्ह्यात 13 मे पर्यंत कोविशिल्डचे 3 लाख 23 हजार 730, कोवॅक्सीनचे 96 हजार 440 डोस असे एकुण 4 लाख 20 हजार 170 डोस मिळाले आहेत.

0000