दाभड बावरीनगर, पुर्णा येथील महाविहार-स्मारक

कामांना गती द्या - समाजिक न्याय मंत्री बडोले

               

नांदेड दि. 31 :- दाभड बावरीनगर येथील महाविहार तसेच डॉ. बाबासाहेब आंबेडकर भवन आणि परभणी जिल्ह्यातील पुर्णा येथील बोधीसत्व डॉ. बी. आर. आंबेडकर स्मारक व बुद्धविहार यांच्या कामांना गती देण्यात यावी व ही कामे वेळेत दर्जेदार पद्धतीने पुर्ण करण्यात यावीत, असे निर्देश राज्याचे सामाजिक न्याय आणि विशेष सहाय्य मंत्री राजकुमार बडोले यांनी आज येथे दिले.

            या कामांबाबतचा आढावा महिनाभरानंतर मुंबईत मंत्रालयात घेण्यात येईल, असेही त्यांनी या आढावा बैठकीत सांगितले. मंत्री श्री. बडोले यांच्या अध्यक्षतेखाली येथील मिनी सह्याद्री शासकीय विश्रामगृहात ही आढावा बैठक संपन्न झाली. या बैठकीत ते बोलत होते. बैठकीस जिल्हाधिकारी अरुण डोंगरे, परभणीचे जिल्हाधिकारी पी शिवाशंकर, दाभड बावरीनगर महाविहार समितीचे कार्याध्यक्ष डॉ. एस. पी. गायकवाड, पुर्णा येथील स्मारक व बुद्धविहार समितीचे अध्यक्ष भदन्त उपगुप्त महाथेरो, नांदेडचे उपविभागीय अधिकारी प्रदीप कुलकर्णी, समाज कल्याण विभाग लातूरचे प्रादेशिक उपायुक्त एल. आय. वाघमारे, नांदेडचे सार्वजनिक बांधकाम विभागाचे कार्यकारी अभियंता गजेंद्र रजपूत, परभणीचे कार्यकारी अभियंता एस. जी. देशपांडे, परभणीचे जिल्हा नियोजन अधिकारी पी. ए. बिरादार, नांदेडचे तहसिलदार किरण अंबेकर, पुर्णाचे तहसिलदार पी. एम. माचेवाड, परभणीचे समाज कल्याण अधिकारी व्ही. जी. सुर्यवंशी, नांदेडचे समाज कल्याण अधिकारी एन.बी. शेख, वास्तुरचनाकार विद्यासागर ठोमके आदींची उपस्थिती होती.

            मंत्री श्री. बडोले यांनी बावरीनगर येथील कामांचा संबंधित यंत्रणांकडून तपशीलवार आढावा घेतला. ते म्हणाले की, या कामांची गती अपेक्षेप्रमाणे नाही. त्यामुळे कामांचा दर्जा राखतांनाच ती वेळेत पुर्ण करण्याबाबत प्रयत्न करण्यात यावेत. याबाबत वेळोवेळी आढावा घेण्यात यावा. नांदेड व परभणीतील या दोन्ही कामांबाबत महिनाभरानंतर मुंबई मंत्रालयस्तरावर  बैठक घेण्यात येईल. यावेळी श्री. बडोले यांनी प्रशासकीय मान्यता तसेच तांत्रिक मान्यतांबाबत संबंधित यंत्रणांनाही निर्देशीत केले.

            यावेळी झालेल्या चर्चेत जिल्हाधिकारी श्री. डोंगरे , परभणीचे जिल्हाधिकारी श्री. शिवाशंकर यांनीही सहभाग घेतला. उपविभागीय अधिकारी कुलकर्णी यांनी प्रास्ताविक केले. बैठकीस समितींचे सदस्य, अधिकारी आदींची उपस्थिती होती.

00000000