मतदारांनी ओळखपत्रासाठी रंगीत फोटो बीएलओ,तहसिल कार्यालयाकडे जमा करावीत.

धर्माबाद:दिनांक-07/04/2018 

धर्माबाद तालुक्यातील ज्या मतदारांची मतदार यादीत फोटो नाहित व  मतदार ओळखपत्रात ब्लॅक & व्हाईट फोटो आहेत त्यांनी रंगीत फोटो  बीएलओ कडे  देवून उत्फुर्त प्रतिसाद दिला आहे.

     मतदार यादी शुध्दीकरण मोहिम आयोजीत केली असुन ज्या मतदारांचे मतदार यादीत फोटो नाहीत किंवा ब्लॅक & व्हाईट फोटो आहेत त्या मतदान केंद्रनिहाय बी.एल.ओ.यांचा दि 07 एप्रिल 2018 रोजी तहसिल येथे आढावा घेतला असता मास्टी येथील बी.एल.ओ.ए.डी.मंगनाळे,बाभळी येथील बी.एल.ओ.यादव चाबुकस्वार,रत्नाळी येथील बी.एल.ओ.जी.बी.मदनुरकर व नजिर शेख,विळेगांव थडी येथील बी.एल.ओ.एम.एन.हिमगिरे,

बाळापूर येथील बी.एल.ओ.भालके,करखेली येथील बी.एल.ओ.डहाळे व धर्माबाद येथील बी.एल.ओ.सोनार व सोनकांबळे तसेच बी.एल.ओ.यांचे पर्यवेक्षक तथा तलाठी नारायण गाजेवार,पवन देशपांडे,आंबेराय,विसपुते यांनी दोन दिवसात मतदार यांच्या कडे संपर्क साधून व प्रसिध्दी केल्यांने मतदार यांनी बी.एल.ओ. कडे रंगित फोटो गोळा केले.तालूक्यातील उर्वरित मतदार  यांचे बी.एल.ओ. यांनी  दि 11/04/2018 पुर्वी रंगित फोटो जमा करावेत असे बैठकीत नायब तहसीलदार सुनील माचेवाड यांनी सांगितले.

सदरिल मोहिम यशस्वी करण्यासाठी बीएलओ ,तलाठी,मंडळ अधिकारी व प्रेरक,तहसिल कार्यालयातील  मिलिंद टोणपे,ऑपरेटर मोहन भंडरवाड अदि परिश्रम घेत आहेत.    

                ....  तहसिलदार धर्माबाद

सहकार राज्यमंत्री गुलाबराव पाटील यांचा दौरा

नांदेड , ‍दि. 7 :- राज्याचे सहकार राज्यमंत्री गुलाबराव पाटील हे नांदेड दौऱ्यावर येत असून त्यांचा दौरा कार्यक्रम पुढील प्रमाणे राहील.

सोमवार 9 एप्रिल 2018 रोजी कोनेरवाडी ता. पालम येथुन दुपारी 12 वा. शासकीय विश्रामगृह नांदेड येथे आगमन व राखीव. सायं. 6 वा. नांदेड येथून देवगिरी एक्सप्रेसने मुंबईकडे प्रयाण करतील.

000000

जिल्ह्यातील पोलीस अधिकाऱ्यांना

अंमलबजावणी अधिकारी म्हणून अधिकार प्रदान

नांदेड, दि. 7 :- आगामी काळात शनिवार 14 एप्रिल 2018 रोजी बौद्ध बांधवाच्यावतीने डॉ. बाबासाहेब आंबेडकर यांची 127 वी जयंती साजरी करण्यात येणार आहे. तसेच सोमवार 30 एप्रिल 2018 रोजी बौद्ध पोर्णिमा आहे. त्याअर्थी वरील सर्व कार्यक्रम, मिरवणुका शांततेत पार पडावेत व त्यात कसल्याही प्रकारची बाधा येवू नये व जिल्हयात शांतता टिकुन राहावी म्हणुन पोलीस अधीक्षक चंद्र किशोर मीणा यांनी महाराष्ट्र पोलीस कायदा अधिनियम 1951 प्रमाणे प्रदान झालेल्या अधिकारान्वे पुढील आदेश काढले आहेत.

गुरुवार 12 एप्रिल 2018 ते सोमवार 30 एप्रिल 2018 च्या मध्यरात्री पर्यंत नांदेड जिल्हयात सर्व पो.स्टे. स्वाधिन अधिकारी असलेले अमलदार किंवा वरीष्ठ अधिकाऱ्यांना महाराष्ट्र पोलीस कायदा कलम 36 मधील पोट कलम "अ" ते "ई" प्रमाणे पुढील लेखी किंवा तोंडी आदेश आपआपले हद्दीत देण्याचा अधिकार प्रदान करण्यात आला आहे.

रस्त्यावरील व रस्त्यावरुन जाणाऱ्या मिरवणुकीतील किंवा जमावातील लोकांनी कोणत्या रितीने चालावे कोणत्या रितीने वागावे ते फर्माविण्यासाठी. अशा कोणत्याही मिरवणुकांना कोणत्या मार्गाने आणि कोणत्या वेळी जावे किंवा जाऊ नये हे ठरविण्याबद्दल. सर्व मिरवणुकी व जमावाच्या प्रसंगी व पुजे अर्चेच्या प्रार्थनास्थळांच्या सर्व जागेच्या आसपास पुजे-अर्चेच्या वेळी कोणताही रस्ता किंवा सार्वजनिक जागा येथे गर्दी होणार असेल किंवा अडथळे होण्याचा संभव असेल अशा सर्व बाबतीत अडथळा होण्याचा संबध असेल अशा सर्व बाबतीत अडथळा होऊ न देण्याबाबत. सर्व रस्त्यावर किंवा रस्त्यामध्ये सर्व धक्यावर व धक्यामध्ये आणि सार्वजनिक स्नांनाच्या कपडे धुण्याच्या व उतरण्याच्या जागेमध्ये व इतर कर्कश वाद्य वाजविणे वगैरेचे नियमन करण्याबद्दल आणि त्यावर नियत्रंण ठेवण्याबाबत. महाराष्ट्र पोलीस अधिनियम कलम 33, 35 ते 40,42,43,45 या अन्वये नमुद केलेल्या कोणत्याही हुकूमापेक्षा कमी दर्जाचे व त्या पुष्टी देणारे दुय्यम अधिका-यांना जबाबदारीवर हुकूम करण्याचा मार्गदर्शन पर आदेश देण्याबाबत. तसेच सार्वजनिक ठिकाणी अथवा सार्वजनिक करमणुकीचे ठिकाणी ध्वनीक्षेपण आवाजावर नियंत्रण ठेवण्यासाठी सुचना देण्यासंबधी.

हा आदेश लागू असेपर्यंत नांदेड जिल्हयात जाहिर सभा, मोर्चे, निदर्शने, पदयात्रा इत्यादी कार्यक्रम संबधीत पोलीस फौजदार किंवा त्यांच्या वरिष्ठांकडून तारीख व वेळ, सभेची जागा मिरवणुकीचा, मोर्चाचा मार्ग व त्यात दिल्या जाणाऱ्या घोषणा पुर्व परवानगी शिवाय आयोजित करु नयेत तसेच संबंधीत पोलीस अधिकाऱ्यांनी दिलेले आदेशाचे पालन करावे.  जाहिर सभा, मिरवणुक पदयात्रा, समायोचीत घोषणा सोडून किंवा ज्या घोषणांनी शांतता व सुव्यवस्थेला बांधा येवु शकतो अशा घोषणा देऊ नयेत.

हा आदेश लग्नांच्या वरातीस, प्रेत यात्रेस लागु नाही. या आदेशाचे उल्लंघन केल्यास तो महाराष्ट्र पोलीस कलम 134 प्रमाणे अपराधास पात्र ठरेल. हा आदेश गुरुवार 12 एप्रिल 2017 ते सोमवार 30 एप्रिल 2018 रोजी मध्यरात्री पर्यंत लागू राहील, असे पोलीस अधीक्षक चंद्र किशोर मीणा यांनी आदेशात नमूद केले आहे.

00000000

महात्मा ज्योतिबा फुले यांची जयंती

साजरी करण्याचे आवाहन  

नांदेड, दि. 7 :- महात्मा ज्योतीबा फुले यांची जयंती संबंधित विभागाने उत्साहात साजरी करुन विविध प्रबोधनात्मक कार्यक्रमाचे आयोजन करावे, असे निर्देश जिल्हाधिकारी नांदेड यांनी दिले आहेत.

थोर समाज सुधारक महात्मा ज्योतिबा फुले यांचा जन्म दिवस 11 एप्रिल 1827 असा आहे. त्यांची जयंती बुधवार 11 एप्रिल 2018 रोजी विमुक्त जाती भटक्या जमाती, इतर मागासवर्ग व विशेष मागासप्रवर्ग कल्याण विभागातर्फे उत्साहात साजरी करण्याचा निर्णय घेतला आहे. यासंदर्भात विशेष मागासवर्ग प्रवर्ग कल्याण विभागाचे परिपत्रक 10 एप्रिल 2017 अन्वये दिलेल्या सुचनेनुसार योग्य कार्यवाही करुन त्याचा अहवाल शासनास व जिल्हाधिकारी कार्यालयास सादर करावा. असे निर्देश मुख्य कार्यकारी अधिकारी जिल्हा परिषद, आयुक्त मनपा नांदेड, समाज कल्याण अधिकारी जि. प., आयुक्त समाज कल्याण कार्यालय नांदेड यांच्यासह सर्व उपविभागीय अधिकारी, तहसिलदार यांना दिले आहेत.   

000000

शेतकऱ्यांनी शेतात गाळ

टाकून जमीन सुपीक करावी

- उपजिल्हाधिकारी डॉ. खल्लाळ

नांदेड, दि. 7 :- धर्माबाद तालुक्यातील मालगुजारी तलावातील अनेक वर्षापासुन साचलेला सुपिक गाळ काढणे व पाणीटंचाईमुक्त गाव करण्याबाबत जिल्हाधिकारी अरुण डोंगरे यांच्या प्रेरणेने गाळमुक्त तलाव व गाळयुक्त शिवार  अभियानांतर्गत जारिकोट मालगुजारी तलावातील गाळ  काढणे शुभारंभ धर्माबादचे उपविभागीय अधिकारी डॉ. सचिन खल्लाळ यांच्या हस्ते करण्यात आला. यावेळी नांदेडचे जिल्हा उपनिबंधक सहकारी संस्था पी. आर. फडणीस यांनी मार्गदर्शन केले.

जारिकोट येथील शेतकऱ्यांनी गाळ शेतात टाकण्यास सुरुवात करुन जमीन सुपिक व पाणी टंचाईमुक्त  करण्यासाठी पुढाकार घेतला आहे. महसूल व कृषी उत्पन्न बाजार समिती धर्माबाद यांच्या संयुक्त विद्यमाने जारिकोट व चिकना येथे गाळ काढण्यात येत आहे. यासाठी कृषी उत्पन्न बाजार समितीने दोन जेसीपी डिझेलसह दिले आहेत. जारिकोट व चिकना येथील जवळपासच्या शेतकऱ्यांनी ट्रॅक्टरची व्यवस्था करुन मालगुजारी तलावातील काळी माती व  सुपिक गाळ शेतात टाकुन जमीन सुपीक करावी, असे आवाहन डॉ. खल्लाळ यांनी केले.

          कार्यक्रमास तहसिलदार धर्माबाद ज्योती चौहान, नायब तहसिलदार सुनिल माचेवाड, जलसंपदाचे उपविभागीय अभियंता प्रशांत कदम, धर्माबाद कृषी उत्पन्न बाजार समितीचे सचिव सी. डी. पाटील, उपसचिव वैभव कुलकर्णी, सरपंच नागनाथ इंगळे, उपसरपंच संजय धुप्पे, आनुलोमचे रमेश कुंभारे, गजानन रामोड, चिकना येथील प्रगतशिल शेतकरी दत्ताहारी आवरे आदि उपस्थित होते.

000000

कर्जमाफी योजनेला 14 एप्रिलपर्यंत मुदतवाढ

वंचित शेतकऱ्यांनी योजनेचा लाभ घ्यावा

- जिल्हा उपनिबंधक सहकारी संस्था

नांदेड , ‍दि. 6 :- छत्रपती शिवाजी महाराज शेतकरी सन्मान योजनेत ऑनलाईन अर्ज करण्यापासून वंचित राहिलेल्या शेतकऱ्यांसाठी अर्ज करण्याची मुदत आता 14 एप्रिलपर्यंत वाढविण्यात आली आहे. तरी  अशा शेतकऱ्यांनी अर्ज करून योजनेचा लाभ घ्यावा, असे आवाहन जिल्हा उपनिबंधक सहकारी संस्था नांदेड यांनी   केले.  

तसेच मुद्दल व व्याजासह दीड लाखापेक्षा जास्त थकबाकी असलेल्या शेतकऱ्यांसाठीही एकवेळ समझोता (वन टाईम सेंटलमेट) योजनेंतर्गतही पात्र शेतकऱ्यांनी त्यांच्या हिश्श्याची रक्कम भरण्याचा कालावधी 30 जूनपर्यंत वाढवण्यात आला आहे.

राज्य सहकार, पणन व वस्त्रोद्योग विभागाने 31 मार्च 2018 रोजी शासन निर्णय निर्गमित केला असून या आदेशाच्या अनुषंगाने शेतकऱ्यांनी “आपले सरकार” या सेवा केंद्रावर किंवा https://csmssy.mahaonline.gov.in या पोर्टलवर स्वत: नोंदणी करुन युजर आयडी व पासवर्डच्या आधारे ऑनलाईन अर्ज सादर करता येतील. आपले सरकार पोर्टलवर माहिती भरुन ऑनलाईन अर्ज करण्याची सुविधा नि:शुल्क आहे, असेही प्रसिद्धी पत्रकात नमूद केले आहे.

000000

भोकर तालुक्‍यातील जलयुक्‍त शिवार कामांची पाहणी

तलावातून गाळ काढल्यामुळे

साठवण क्षमता वाढण्यास मदत  

- जिल्हाधिकारी अरुण डोंगरे

     

नांदेड दि. 6 :- तलावातून गाळ काढल्‍यामुळे तलावाची साठवण क्षमता वाढण्‍यास मदत होईल तसेच गाळामुळे शेताची उत्‍पादकता वाढेल, असे प्रतिपादन जिल्हाधिकारी अरुण डोंगरे यांनी केले.

भोकर तालुक्यातील जलयुक्‍त शिवार अभियान, गाळमुक्‍त धरण व गाळयुक्‍त शिवार योजनेंतर्गत घेण्‍यात आलेल्‍या विविध कामांना जिल्हाधिकारी श्री. डोंगरे यांनी गुरुवार 5 मार्च रोजी भेटी दिली. यावेळी जिल्‍हा अधिक्षक कृषी अधिकारी डॉ. तुकाराम मोटे हे उपस्थित होते.  

जिल्हाधिकारी श्री. डोंगरे यांनी जलसंधारणच्‍या विविध कामाबाबत मार्गदर्शन करुन जलयुक्‍त शिवार अभियानाच्‍या कामाबाबत समाधान व्‍यक्‍त केले. जलयुक्‍त शिवार अभियान सन 2017-18 मधील सोनारी येथील कृषी विभागामार्फत घेण्‍यात आलेल्या शेततळे व जामदरी तांडा येथील ढाळीचे बांधाची पाहणी केली. जलयुक्‍त शिवार अभियान सन 2016-17 मधील नांदा बु. येथे वन विभागामार्फत घेण्‍यात आलेले खोल सलग समतल चर (डीप सी सी टी) व  धारजनी येथे यांत्रिकी विभागाच्या मशीनद्वारे लामकाणी ते धारजणी या नाल्‍याचे नाला खोलीकरण, रुंदीकरण कामांना तसेच सायाळ येथील लघुसिंचन जलसंधारण विभागाच्या सिमेंट नाला बांध कामास भेट देऊन पाहणी केली.

गाळमुक्‍त धरण गाळयुक्‍त शिवार योजनेतंर्गत रहाटी बु. येथील तलावातून गाळ काढण्याच्या कामाचा शुभारंभ जिल्‍हाधिकारी श्री डोंगरे यांच्‍या हस्‍ते करण्‍यात आला. वनश्री भोकर या स्‍वयंसेवी संस्‍थेचे सहकार्य सदर कामास लाभत आहे. यावेळी रहाटीचे सरपंच व ग्रामस्‍थ मोठया संख्‍येने उपस्थित होते.  विविध कामांबाबत भोकरचे उपविभागीय अधिकारी दीपाली मोतीयेळे यांनी माहिती दिली.

यावेळी तहसिलदार भोकर व्‍यंकटेश मुंडे, तालुका कृषी अधिकारी रमेश देशमुख, यांत्रिकी विभागाचे उपअभियंता दत्‍तात्रय सावंत, जिल्हा परिषद ल.पा. उपविभाग भोकरचे  उपअभियंता सरनाईक, वन परिक्षेत्र अधिकारी आशिष हिवरे, लघुसिंचन जलसंधारण विभागाचे शाखा अभियंता सदावर्ते तसेच सर्व मंडळ अधिकारी, महसूल विभागाचे कर्मचारी, मंडळ कृषी अधिकारी ,संबंधित तलाठी,  ग्रामसेवक, वनपाल, कृषी सहाय्यक, वनश्री भोकरचे अध्‍यक्ष राठोड व ग्रामस्‍थ उपस्थित होते.

000000