Friday, July 20, 2018


भाऊसाहेब फुंडकर फळबाग लागवड योजना
शेतकऱ्यांनी 7 ऑगस्ट पर्यंत अर्ज सादर करावीत  
नांदेड, दि. 20 :- भाऊसाहेब फुंडकर फळबाग लागवड योजना सन 2018-19 मध्ये राबविण्यात येणार आहे. या योजनेसाठी नांदेड जिल्ह्यास 490.00 लक्ष रुपयाचे आर्थिक लक्षांक प्राप्त झाले आहे. या योजनेचा लाभ घेण्यासाठी शेतकऱ्यांनी विहीत नमुन्यातील अर्ज मंगळवार 7 ऑगस्ट 2018 पर्यंत संबंधीत तालुका कृषि अधिकारी कार्यालयात सादर करावा, असे आवाहन जिल्हा अधिक्षक कृषि अधिकारी नांदेड यांनी केले आहे. 
या योजनेत निवड झालेल्या लाभार्थ्यांनी सोडतीनंतर दोन दिवसात सात-बारा व आठ-अ चा उतारा, संयुक्त खातेदार असल्यास सर्व खातेदारांचे संमतीपत्र, हमीपत्र, आधार कार्ड प्रत, जातीचे प्रमाणपत्र (अनु.जाती/अनु.जमाती) आधार संलग्न राष्ट्रीयकृत बँक पासबुकातील प्रथम पानाची प्रत (फोटो सहीत) इ. कागदपत्रे तालुका कृषि अधिकारी कार्यालयात सादर करावीत.
या योजनेंतर्गत फळबाग आंबा कलमे, आंबा कलमे (सधन लागवड), काजु कलमे, पेरु कलमे, पेरु कलमे (सधन लागवड), दाळींब कलमे, संत्रा, मोसंबी, कागदी लिंबु कलमे, संत्रा कलमे (इंडो इस्त्राईल तंत्रज्ञान), नारळ रोपे बानावली, नारळ रोपे टी/डी, सिताफळ कलमे, आवळा कलमे, चिंच कलमे, जांभुळ कलमे, पोकम कलमे, फनस कलमे, अंजीर कलमे, चिकु कलमे इ. तसेच या योजने अंतर्गत कलमांच्या लागवडीला (नारळ वगळता) अनुदान देय राहील. योजनेअंतर्गत फळबागेसाठी ठिबक सिंचन बंधनकारक राहील. फळपिकांचे कलमे / रोपे प्राधान्याने शासकीय, कृषि विद्यापीठ, राष्ट्रीय संशोधन संस्था व राष्ट्रीय बागबानी मंडळ, मानांकीत रोपवाटीकेतुनच घेणे बंधनकारक राहील.
प्रत्येक तालुक्यात प्राप्त होणाऱ्या आर्थिक लक्षांकाच्या मर्यादित योजनेच्या निकषानुसार पात्र लाभार्थ्यांची निवड करण्यात येईल. फळबाग लाभार्थ्यांना अनुदानाची रक्कम पहिल्या, दुसऱ्या व तिसऱ्या वर्षी अनुक्रमे 50, 30 व 20 टक्के प्रमाणे त्यांच्या आधार संलग्न बँक खात्यात अदा करण्यात येईल.
या घटकांचा लाभ घेण्यासाठी शेतकऱ्यांनी आपल्या तालुका कृषि अधिकारी कार्यालयाशी संपर्क साधुन अर्ज भरुन घ्यावा. योजनेच्या सविस्तर माहितीसाठी लाभार्थ्यांनी संबंधीत तालुका कृषि अधिकारी यांचेशी संपर्क करावा. योजनेच्या अटी व शर्तींचा भंग झाल्यास लाभार्थी वसुली व दंडात्मक कारवाईस प्राप्त राहील. या योजनेचा लाभ घेणेसाठी शेतकऱ्यांनी तालुका कृषि अधिकारी कार्यालयात अर्ज करावा, असेही आवाहन जिल्हा अधिक्षक कृषि अधिकारी, नांदेड यांनी केले आहे.
000000


‘महाराष्ट्र माझा 2018’ छायाचित्र स्पर्धेसाठी आवाहन
छायाचित्रांचे भरणार राज्यभर प्रदर्शन
नांदेड, दि. 18 :- महाराष्ट्राच्या प्रगतीचे सचित्र दर्शन घडावे यासाठी महाराष्ट्राचा प्राचीन, ऐतिहासिक वारसा आणि शासनाच्या विविध महत्वाच्या योजनांवर आधारित ‘महाराष्ट्र माझा 2018’ छायाचित्र स्पर्धेचे माहिती व जनसंपर्क महासंचालनालयाच्यावतीने आयोजन करण्यात आले आहे.माहिती व जनसंपर्कचे सचिव तथा महासंचालक ब्रिजेश सिंह यांनी ही स्पर्धा आज जाहीर केली आहे.
या स्पर्धेत प्राप्त छायाचित्रांपैकी दर्जेदार छायाचित्रांचे मंत्रालयात त्रिमूर्ती प्रांगणात तसेच राज्यभरात प्रदर्शन भरविण्यात येणार आहे.या स्पर्धेसाठी दर्जेदार छायाचित्र पाठविण्याचे आवाहन महासंचालनालयाच्यावतीने करण्यात आले आहे.
या स्पर्धेत प्रथम, द्वितीय, तृतीय क्रमांकासाठी निवड झालेल्या छायाचित्रांना अनुक्रमे 25 हजार रूपये, 20 हजार रूपये, 15 हजार रूपये पारितोषिक प्रदान केले जाणार असून तीन हजार रुपयांची पाच उत्तेजनार्थ  बक्षीसे देण्यात येणार आहेत.
            ‘महाराष्ट्र माझा’ या संकल्पनेवर आधारित महाराष्ट्राचा प्राचीन, ऐतिहासिक वारसा आणि शासनाच्या जलयुक्त शिवार, सेवा हमी कायदा,  मेक इन महाराष्ट्र, स्वच्छ महाराष्ट्र, स्मार्ट सिटी, कुशल महाराष्ट्र्,माझीकन्या भाग्यश्री, पर्यटन महाराष्ट्र, आपले सरकार आणि चार कोटी वृक्ष लागवड कार्यक्रम आदी योजनांशी संबंधित छायाचित्रे स्पर्धेसाठी पाठवता येतील.
स्पर्धेत भाग घेऊ इच्छिणा-या छायाचित्रकारांनी maharashtramaza2018@gmail.com या ईमेलवर दि. 31 जुलै 2018 पर्यंत छायाचित्र पाठवावीत. ही छायाचित्रे पाठविताना छायाचित्रकाराने आपले नाव, संपूर्ण पत्ता, मोबाईल क्रमांक, छायाचित्र कोणत्या ठिकाणचे आहे याची माहिती देणे आवश्यक आहे. तसेच ही छायाचित्र 18X30 इंचएचडी (हायरिझॉल्युशन) असावीत. या स्पर्धेसाठी प्रवेशिका म्हणून सादर होणाऱ्या छायाचित्रांवर माहिती व जनसंपर्क महासंचालनालयाचे हक्क राहतील.
राज्यभरातून प्राप्त दर्जेदार छायाचित्रांची प्रदर्शनासाठी निवड करण्यासाठी तज्ज्ञांची समिती गठित करण्यातयेणार आहे. ही स्पर्धा सर्वांसाठी खुली असून या स्पर्धेत जास्तीत जास्त छायाचित्रकारांनी सहभाग घ्यावा, असे आवाहन करण्यात आले आहे.
0000


संप कालावधीत सर्व प्रकारच्या
वाहनातून माल वाहतुकीस परवानगी  
नांदेड, दि. 20 :- विविध मागण्यांसाठी ऑल इंडिया मोटार ट्रान्सपोर्ट कॉग्रेस यांनी शुक्रवार 20 जुलै पासून माल वाहतूकदराचे बेमुदत चक्का जामआंदोलन करण्यात येणार असल्याचे निदर्शनास आले आहे. शासनाने 19 जुलै 2018 रोजी अधिसुचनेद्वारे सर्वसामान्य जनतेची गैरसोय होऊ नये यासाठी राज्यातील सर्व प्रकारच्या वाहनांतून, खाजगी वाहनांतून त्याचप्रमाणे सर्व प्रकारच्या कंत्राटी व टप्पा वाहतुक करणाऱ्या बसेस मधून माल वाहतुकीस अंदोलन संपेपर्यंतच्या कालावधीसाठी परवानगी दिली आहे, असे नांदेडचे प्रादेशिक परिवहन अधिकारी दिनकर मनवर यांनी कळविले आहे.    
00000

Thursday, July 19, 2018


सहकार राज्यमंत्री गुलाबराव पाटील यांचा दौरा
नांदेड, दि. 19 :- राज्याचे सहकार राज्यमंत्री गुलाबराव पाटील हे नांदेड दौऱ्यावर येत असून त्यांचा दौरा कार्यक्रम पुढील प्रमाणे राहील.
शुक्रवार 20 जुलै 2018 रोजी नागपूर येथून शासकीय वाहनाने सायं. 5.30 वा. नांदेड येथे आगमन व राखीव. सायं. 6 वा. नांदेड येथे आषाढी महोत्सव 2018 या कार्यक्रमास उपस्थिती स्थळ - शंकरराव चव्हाण प्रेक्षागृह स्टेडियम नांदेड. सायं 7 वा. नांदेड येथून जालनाकडे प्रयाण करतील.
00000


दहावी परीक्षेसाठी खाजगीरित्या प्रविष्ठ
विद्यार्थ्यांची नाव नोंदणी 30 जुलै पासून
नांदेड, दि. 19 :- इयत्ता दहावी फेब्रुवारी-मार्च 2019 या परीक्षेसाठी खाजगीरित्या (फॉर्म नं. 17) प्रविष्ठ होणाऱ्या विद्यार्थ्यांचे ऑनलाईन नाव नोंदणी अर्ज http://form17.mh-ssc.ac.in या संकेतस्थळावर सोमवार 30 जुलै 2018 पासून सुरु करण्यात येत आहे, असे विभागीय सचिव लातूर विभागीय मंडळ लातूर यांनी कळविले आहे.
खाजगी विद्यार्थ्यांने दहावीसाठी नाव नोंदणी अर्ज ऑनलाईन पद्धतीने मंडळाच्या संकेतस्थळावर भरावयाचे आहेत. ऑफलाईन अर्ज स्विकारला जाणार नाही. विद्यार्थ्यांचे नाव नोंदणी अर्ज ऑनलाईन सोमवार 30 जुलै 2018 ते शनिवार 25 ऑगस्ट 2018 या कालावधीत भरावीत. मंगळवार 31 जुलै 2018 ते शनिवार 25 ऑगस्ट 2018 या कालावधीत विद्यार्थ्यांनी मूळ अर्ज, विहित शुल्क व मूळ कागदपत्रे अर्जावर नमूद केलेल्या संपर्क केंद्र शाळेत जमा करावीत. शुक्रवार 31 ऑगस्ट 2018 रोजी संपर्क केंद्र शाळांनी विद्यार्थ्यांचे अर्ज विहित शुल्क, मुळ कागदपत्रे व यादी विभागीय मंडळाकडे जमा करावीत, असेही प्रसिद्धी पत्रकात नमूद केले आहे.
00000

Wednesday, July 18, 2018


लोकराज्यच्या ‘वारी’ विशेषांकाचे
मुख्यमंत्री देवेंद्र फडणवीस यांच्या हस्ते प्रकाशन
नागपूर, दि. 18 : माहिती व जनसंपर्क महासंचालनालयामार्फत प्रसिद्ध केल्या जाणाऱ्या लोकराज्यच्या ‘आषाढी वारी’ विशेषांकाचे आज विधानभवन येथे मुख्यमंत्री देवेंद्र फडणवीस यांच्या हस्ते प्रकाशन करण्यात आले.
यावेळी महसूल मंत्री तथा या विशेषांकाचे अतिथी संपादक चंद्रकांत पाटील, विभागीय आयुक्त अनुप कुमार, माहिती व जनसंपर्क महासंचालनालयाचे सचिव तथा महासंचालक ब्रिजेश सिंह, जिल्हाधिकारी अश्विन मुदगल आदी उपस्थित होते.
आषाढी वारीचा संग्राह्य विशेषांक
पंढरपुरची आषाढी वारी ही महाराष्ट्राच्या सांस्कृतिक आणि सामाजिक वैभवाचा सर्वश्रेष्ठ आविष्कार आहे. यंदाच्या वारीत माहिती आणि जनसंपर्क महासंचालनालयामार्फत ‘संवादवारी’ हा विशेष उपक्रम राबविण्यात येत आहे. या माध्यमातून शासनाच्या विविध लोकोपयोगी योजना वारकऱ्यांपर्यंत पोहोचविण्यात येत आहेत. त्याच पार्श्वभूमीवर लोकराज्यच्या या विशेषांकाचे आज प्रकाशन करण्यात आले.
या विशेषांकाचे अतिथी संपादक असलेल्या महसूल मंत्री श्री. पाटील यांनी ‘रंगले हे चित्त माझे विठुपायी’ असे म्हणत वारकऱ्यांसाठी संदेश दिला आहे. अंकामध्ये श्रीपाद अपराजित, डॉ. द. ता. भोसले, श्रीधरबुवा देहूकर, संदेश भंडारे, बाळासाहेब बोचरे, डॉ. यू. म. पठाण, प्रा. राम शेवाळकर, डॉ. प्रतिमा इंगोले, जयंत साळगावकर आदी मान्यवरांनी  वारीच्या विविध अनुषंगाने विचार मांडले आहेत. विठ्ठल-रुक्म‍िणी मंदिर समितीचे अध्यक्ष अतुल भोसले यांनी समितीमार्फत भक्तांसाठी दिल्या जाणाऱ्या सोयी सुविधांची माहिती दिली आहे. पुणे विभागीय आयुक्त डॉ. दीपक म्हैसेकर आणि सोलापूर जिल्हाधिकारी डॉ. राजेंद्र भोसले यांनी पालखी मार्गावर तसेच पंढरपूर येथे प्रशासनामार्फत करण्यात आलेल्या सोयी सुविधा तसेच उपाय योजनांची माहिती दिली आहे. राज्य शासनामार्फत आयोजित केल्या जाणाऱ्या स्वच्छतेच्या वारीसंदर्भातही विशेषांकात माहिती आहे.
0000





सहस्त्रकुंडाचा मनमोहक धबधबा....
मराठवाडा-विदर्भ सिमेवरील किनवट तालुक्यातील इस्लापूर येथील पैनगंगा नदीवरील मनमोहक सहस्त्रकुंड धबधबा नुकत्याच झालेल्या पावसामुळे भरुन वाहत आहे. अन् शेकडो वर्षापासून जनतेच्या मनाचा ठाव घेणारा प्रचंड आकर्षक असलेला हा धबधबा पर्यटकांचे आकर्षन ठरत आहे. पावसाळी पर्यटनाचा आनंद घेणाऱ्या पर्यटकांसाठी नांदेड ते किनवट मार्गावर इस्लापूर पासून अवघ्या 3 कि.मी. अंतरावर असणारा या धबधब्याच्या दोन्ही धारेतून सततधार पाणी वाहत असून न लागणाऱ्या खोलीच्या तळाचा अंदाज घेत  साठलेल्या कुंडातून पाणी पुढे जात आहे. निसर्गरम्य अल्हादायक या सहस्त्रकुंडाच्या धबधब्यास पर्यटन प्रेमींनी भेट देण्याची संधी दवडू नये.  ( प्रकाशचित्रे : विजय होकर्णे, नांदेड )   



सहस्त्रकुंडाचा मनमोहक धबधबा....
नांदेड-किनवट मार्गावर इस्लापूर पाटी पासून 3 कि.मी. तर किनवटपासून सुमारे 50 कि.मी. अंतरावर असणारा सहस्त्रकुंड धबधबा सध्या पर्यटकांचे आकर्षण ठरत आहे. पैनगंगा नदीचा प्रवाह एका मोठ्या खडकामुळे विभागला आहे. त्यामुळे पाणी खाली कोसळतांना वेगवेगळ्या धारा पडतात. नदीच्या अलीकडील पात्रात कोसळणाऱ्या धारेचा हा सर्वांत मोठा धबधबा असून मराठवाडा आणि विदर्भाचे सिमेवर असलेल्या पैनगंगा नदीवरील हा धबधबा खरोखरच नयनरम्य आहे. अंदाजे 30 ते 40 फूट उंची वरून कोसळणारा हा धबधबा आपले खरे रौद्र रुप धारण करतो, ते पावसाळ्यात डोळ्याचे पारणे फेडणारा हा धबधबा प्रत्येक वेळी आपले वेगळे रुप दाखवतो. पैनगंगेच्या मराठवाड्याच्या बाजूकडून दुधाचा महापूर भासणारा एकच धबधबा दिसतो. हा धबधबा अगदी 15 ते 20 फुटावरुन पाहता येतो. खडकावरील शेवाळ्यामुळे खूप जवळ जाणे धोक्याचे आहे. नदीच्या विदर्भाच्या बाजूकडून मात्र 4 ते 5 अप्रतिम धबधब्याच्या धारा पहावयास मिळतात. त्या बाजूला जाण्यासाठी उमरखेड ते किनवट मार्गावरील बिटरगावहून आत जावे लागते. धबधब्याजवळ इस्लापूर वन विभागाच्यावतीने छोटी नर्सरी बगीचा उभारला असून पर्यटकांसाठी आवश्यक सोयी उपलब्ध करुन दिल्या आहेत. सध्या येथे पर्यटकांनी सेल्फी काढण्याचा मोह टाळला पाहिजे, असे आवाहनही प्रशासनाच्यावतीने करण्यात आले आहे. 




दुष्काळ निवारणासाठी प्रत्येक ग्रामपंचायतीला १५ लाखांचा निधी.! खरीप हंगामातील दुष्काळ निवारणासाठी राज्य शासनाने महत्त्वपूर्ण पाऊल उचलले असून,...