वृत्त क्रमांक 

निवडणूकीच्या अनुषंगाने दिलेल्या जबाबदाऱ्या पार पाडा- अपर जिल्हाधिकारी

विधान परिषद निवडणूक कामकाजाबाबत नोडल अधिकाऱ्यांची बैठक संपन्न                                               

नांदेड, दि. 1 जून : महाराष्ट्र विधान परिषदेच्या नांदेड स्थानिक प्राधिकार मतदारसंघाची द्वैवार्षिक  निवडणूक प्रक्रिया पारदर्शक आणि शांततेत पार पाडण्यासाठी सर्व नोडल अधिकारी व सहाय्यक अधिकारी यांनी दिलेली कामे व जबाबदाऱ्या पार पाडण्याच्या अनुषंगाने कार्यवाही करावी, असे निर्देश अपर जिल्हाधिकारी रत्नदीप गायकवाड यांनी दिले.  

जिल्हाधिकारी कार्यालयातील बैठक कक्षात आज सर्व विभाग प्रमुखांची बैठक आयोजित करण्यात आली होती. यावेळी उपजिल्हाधिकारी (सामान्य) अजय शिंदे, उपजिल्हाधिकारी (निवडणूक) राजकुमार माने, निवासी उपजिल्हाधिकारी किरण अंबेकर, उपजिल्हाधिकारी (रोहयो) हनुमंत कोळेकर,  उपविभागीय अधिकारी डॉ. सचिन खल्लाळ, जिल्हा परिषदेचे अतिरिक्त मुख्य कार्यकारी अधिकारी संदीप माळोदे यांच्यासह विविध विभागांचे अधिकारी उपस्थित होते.  

यावेळी निवडणूकीच्या अनुषंगाने दिलेल्या जबाबदाऱ्या व कामे सर्व नोडल अधिकारी व सहाय्यक अधिकारी यांनी चोखपणे पार पाडाव्यात या अनुषंगाने निवासी उपजिल्हाधिकारी तथा सहा. निवडणूक निर्णय अधिकारी किरण अंबेकर यांनी सूचना दिल्या. निवडणूकीच्या अनुषंगाने एफएसटी पथके व्हिडीओ कॅमेरासह स्थापन करावेत. जिल्ह्यात आचारसंहितेचा भंग होणार नाही याची दक्षता सर्व विभाग प्रमुखांनी घ्यावी असेही त्यांनी यावेळी सांगितले. यावेळी मतदान व मतमोजणीच्या अनुषंगाने करण्यात येणारे नियोजनासह विविध अनुषंगिक  बाबीवर चर्चा करण्यात आली. 

00000