वृत्त क्र. 8
विद्यार्थ्यांनी मॅट्रिकोत्तर शिष्यवृत्तीची उर्वरित रक्कम
7 दिवसाच्या आत महाविद्यालयात जमा करावी
- सहायक आयुक्त शिवानंद मिनगिरे
नांदेड (जिमाका) दि. 3 :- गेल्या काही दिवसांपासून सामाजिक न्याय व विशेष सहाय्य विभागामार्फत भारत सरकार मॅट्रिकोत्तर शिष्यवृत्ती ची सन 2021-22 व सन 2022-23 या शैक्षणिक वर्षातील केंद्र शासनाची 60 टक्के रक्कम विद्यार्थ्यांच्या आधार संलग्न बँक खात्यावर जमा करण्याची कार्यवाही सुरु आहे. ज्या विद्यार्थ्यांच्या बँक खात्यात अशी रक्कम जमा झाली आहे अथवा काही दिवसात जमा होणार आहे. अशा विद्यार्थ्यांनी जमा झालेल्या रकमेमधून त्यांच्या शिष्यवृत्ती अर्जातील मंजूर एकूण निर्वाह भत्ता रकमेच्या 60 टक्के रक्कम वजा करून उर्वरित रक्कम 7 दिवसाच्या आत महाविद्यालयात जमा करावी. याप्रमाणे कार्यवाही न केल्यास त्याची सर्वस्वी जबाबदारी संबंधित विद्यार्थ्याची राहील याची नोंद घ्यावी, असे आवाहन समाज कल्याण विभागाचे सहाय्यक आयुक्त शिवानंद मिनगिरे यांनी केले आहे.
केंद्र शासनाने अनुसूचित जाती व नवबौद्ध घटकातील विद्यार्थ्यांना भारत सरकार मॅट्रिकोत्तर शिष्यवृत्ती योजना लागू केली आहे. या योजनेंतर्गत सामाजिक न्याय व विशेष सहाय्य विभागाच्या दिनांक 17 मार्च 2022 व 7 जुलै 2023 या शासन निर्णयात नमूद केल्यानुसार अनुसूचित जाती प्रवर्गातील विद्यार्थ्यांना केंद्र शासनाची 60 टक्के हिश्याची रक्कम महाडीबीटी प्रणालीद्वारे विद्यार्थ्यांच्या आधार संलग्नित बँक खात्यात जमा होणार आहे. ही रक्कम जमा झाल्यानंतर विद्यार्थ्यांनी त्यांना अनुज्ञेय असलेल्या निर्वाह भत्त्याची रक्कम वजा करून उर्वरित शिक्षण शुल्क, परीक्षा शुल्क इतर ना परतावा शुल्काची रक्कम संबंधित महाविद्यालयात 7 दिवसांच्या आत जमा करण्याचे निर्देश दिले आहेत.
0000
No comments:
Post a Comment