कला व संस्कृतीच्या संवर्धनासाठी नांदेड येथे महासंस्कृती महोत्सवाचे आयोजन

 वृत्त क्र. 11

कला व संस्कृतीच्या संवर्धनासाठी

नांदेड येथे महासंस्कृती महोत्सवाचे आयोजन

·         जिल्ह्यातील स्थानिक कलावंतासाठी स्वतंत्र वेळ

·         नंदगिरी किल्ल्यावर एक दिवस विशेष कार्यक्रम

·         क्रीडा स्पर्धातून खेळाडूंचा होणार गौरव

नांदेड (जिमाका) दि. 3 :- स्वातंत्र्याच्या अमृत महोत्सवी वर्षाला अधोरेखित करुन विविध प्रांतातील संस्कृतीचे जतन, संवर्धन, स्वातंत्र्य लढ्यातील लढवय्याची माहिती जनसामान्यापर्यत पोहचविण्याच्या उद्देशाने नांदेड येथे पाच दिवसीय महासंस्कृती महोत्सवाचे आयोजन केले जाणार आहे. फेब्रुवारी महिन्याच्या पहिल्या आठवड्यात होणाऱ्या या महोत्सवाचे उद्घाटन पालकमंत्री गिरीश महाजन यांच्या हस्ते होणार असून स्थानिक प्रतीथयश कलावंताचा सन्मान त्यांच्या हस्ते होणार आहे.

राज्य शासनाच्या पर्यटन व सांस्कृतिक विभागातर्गंत हा महोत्सव प्रत्येक जिल्ह्यात आयोजित केला जात आहे. शासन निर्णयान्वये या महासंस्कृती महोत्सवाच्या आयोजन व सुयोग्य नियोजनासाठी समन्वय व सनियंत्रण समिती गठीत करण्यात आली आहे. जिल्हाधिकारी यांच्या अध्यक्षतेखाली असलेल्या समितीत जिल्हा परिषदेच्या मुख्य कार्यकारी अधिकारी, मनपा आयुक्त, जिल्हा पोलीस अधिक्षक, सार्वजनिक बांधकाम विभाग, महावितरणचे कार्यकारी अभियंता, पर्यटन विभागाचे क्षेत्रिय अधिकारी, जिल्हा माहिती अधिकारी, सांस्कृतिक कार्य विभागाचे  सहाय्यक संचालक, पुरातत्व, पुराभिलेख विभाग, प्राथमिक व माध्यमिक शिक्षणाधिकारी आदी या समितीचे सदस्य असून निवासी उपजिल्हाधिकारी हे सदस्य सचिव म्हणून जबाबदारी पार पाडतील.

पाच दिवस चालणाऱ्या या सांस्कृतिक महोत्सवात महाराष्ट्राची संस्कृती दर्शविणारे, शिव चरित्रावर आधारित सांस्कृतिक कार्यक्रम, लोक कलेतील विविध प्रकार, कवि संमेलन/व्याखाने, जिल्ह्यातील ऐतिहासिक, पुरातत्व, भौगोलिक आणि नैसर्गिक वैभवावर आधारित छायाचित्राचे विशेष प्रदर्शन आयोजित केले जाणार आहे. हा पाच दिवशीय महोत्सव लोकसहभागातून यशस्वी करण्याचा मनोदय जिल्हाधिकारी अभिजीत राऊत यांनी व्यक्त केला. समितीची पहिली बैठक काल त्यांच्या कक्षात संपन्न झाली. यात नियोजनाबाबत चर्चा करण्यात आली.

00000