मतदार यादीचा विशेष पुनरिक्षण कार्यक्रम

नवीन मतदारांना मतदार यादीत

नाव समाविष्ट करण्याचे आवाहन 

नांदेड (जिमाका) दि. 4 :- मा. निवडणूक आयोगाने 1 जानेवारी 2021 या अर्हता दिनांकावर आधारीत मतदार यादीचा विशेष पुनरिक्षण कार्यक्रम घोषीत केला आहे. त्याअंतर्गत दिनांक 5 व 6 डिसेंबर तसेच 12 व 13 डिसेंबर 2020 रोजी विशेष मोहिमेचे आयोजन करण्यात आले आहे. या दिवशी सर्व बिएलओ हे मतदान केंद्रावर बसणार आहेत. मतदारांनी या विशेष मोहिमेचा लाभ घेवून नवीन मतदारांनी आपले नाव मतदार यादीत समाविष्ट करावे, असे आवाहन उपविभागीय अधिकारी लतीफ पठाण व तहसिलदार किरण अंबेकर यांनी केले आहे. 

या अनुषंगाने यशवंत महाविद्यालय नांदेड येथे विशेष कॅम्पचे आयोजन आज करण्यात आले होते. या कॅम्पचे उद्घाटन औरंगाबाद विभागीय आयुक्त कार्यालय सहाय्यक आयुक्त आर. एच. अहिरे  यांच्या हस्ते करण्यात आले. या कॅम्पमध्ये मतदार जनजागृती करण्यात आली असून मतदारांनी आपले दावे व हरकती तहसिल कार्यालय नांदेड येथे 15 डिसेंबर 2020 पर्यंत सादर करण्याच्या सुचना देण्यात आल्या. दावे व हरकती 5 जानेवारी 2021 पर्यंत निकाली काढण्यात येणार आहे. त्यानंतर अंतिम मतदार यादी 15 जानेवारी 2021 रोजी प्रसिद्ध करण्यात येणार आहे. यावेळी नायब तहसिलदार श्रीमती उर्मिला कुलकर्णी, यशवंत कॉलेजचे प्राचार्य श्री. शिंदे, श्रीमती कविता इंगळे, तलाठी श्री. गाढे यांच्यासह इतर मतदार उपस्थित होते. 

00000