विद्यार्थ्यांनी तंबाखू पदार्थांपासून दूर रहावे

- डॉ. गुंटूरकर

नांदेड दि. 9 :-  निकोटीनयुक्त तंबाखू हे मानवी आरोग्यास  घातक असून प्रत्येक विद्यार्थ्यांनी तंबाखू व तंबाखूजन्य पदार्थांपासून दूर राहून  निरोगी जीवन जगण्याचा प्रयत्न करावा, असे प्रतिपादन अतिरिक्त जिल्हा शल्यचिकित्सक डॉ. एच. आर. गुंटुरकर यांनी केले.

राष्ट्रीय तंबाखू नियंत्रण कार्यक्रमांतर्गत श्री गुरु गोविंदसिंघजी स्मारक जिल्हा रुग्णालय व राष्ट्रीय सेवा योजना यांच्या संयुक्त विद्यमाने यशवंत महाविद्यालयात जागतिक मौखिक, डोके, मान व चेहरा कर्करोग दिन व सप्ताहच्या अनुषंगाने कर्करोग विषयी जनजागृती कार्यक्रम नुकताच घेण्यात आला. त्यावेळी डॉ. गुंटुरकर बोलत होते.  

जिल्हा कार्यक्रम अधिकारी  डॉ. दीपक हजारी व दंत शल्यचिकित्सक डॉ. किरण घोडजकर यांनी उपस्थित विद्यार्थ्यांना चित्रफितीच्या माध्यमातून तंबाखू व तंबाखुजन्य सेवनामुळे होणाऱ्या कर्करोगाबद्दल  मार्गदर्शन करण्यात आले. यावेळी विद्यार्थ्याच्या विविध शंकांचे निरसन  करण्यात आले.

कार्यक्रमास महाविद्यालयाचे प्राचार्य डॉ. जाधव, एनएसएस प्रमुख प्रा. डॉ. बोकडे, कार्यक्रम अधिकारी संगीता घुगे, जिल्हा रुग्णालयातील समुपदेशक सुवर्णकार, प्रकाश आहेर व सामाजिक कार्यकर्ता बालाजी गायकवाड, प्राध्यापक, विद्यार्थी उपस्थित होते.

000000