दि. 16 ऑगस्ट 2025 वृत्त क्रमांक 863

केंद्रीय राखीव पोलीस दलाच्या मुदखेड येथील 

केंद्रीय प्रशिक्षण महाविद्यालयात स्वातंत्र्य दिन उत्साहात साजरा

नांदेड, दि. १६ --- केंद्रीय राखीव पोलीस दलाच्या मुदखेड येथील केंद्रीय प्रशिक्षण महाविद्यालयात ७९ वा स्वातंत्र्य दिन मोठ्या उत्साहात साजरा करण्यात आला. सकाळी ८ वाजता, संस्थेचे महानिरीक्षक आणि प्राचार्य  ख्वाजा सजनुद्दीन यांनी क्वार्टर गार्ड येथे मानवंदना घेतली आणि नंतर ध्वजारोहण केले.

प्राचार्यांनी स्वातंत्र्य दिनाच्या शुभेच्छा देताना त्याचे महत्त्व अधोरेखित केले. देशाच्या स्वातंत्र्यासाठी सर्वोच्च बलिदान देणाऱ्या स्वातंत्र्य लढ्यातील शूर स्वातंत्र्यसैनिकांना त्यांनी आदरांजली वाहिली. ते म्हणाले की, आपण स्वातंत्र्यसैनिकांना प्रेरणास्त्रोत मानले पाहिजे आणि आपल्या जीवनाच्या, समाजाच्या आणि देशाच्या उन्नतीसाठी समर्पितपणे काम केले पाहिजे, जेणेकरून आपण स्वतःचा, समाजाचा आणि राष्ट्राचा समग्र विकास करू शकू आणि देशाला प्रगतीच्या मार्गावर पुढे नेऊ शकू.  आपला देश विकसित राष्ट्र बनण्यासाठी आपण जीवनाच्या सर्व क्षेत्रात प्रामाणिकपणा आणि समर्पणाने काम केले पाहिजे.

याप्रसंगी, प्राचार्यांनी राष्ट्राच्या माननीय राष्ट्रपतींकडून विविध पदके प्राप्त केलेल्या अधिकाऱ्यांची/कर्मचाऱ्यांची नावे जाहीर केली आणि त्यांना त्यांच्या शौर्यासाठी राष्ट्रपतींच्या शौर्य पदकांनी सन्मानित करण्यात आल्याची माहिती दिली.

स्वातंत्र्यदिनानिमित्त संस्थेत विविध कार्यक्रमांचे आयोजन करण्यात आले होते, ज्यामध्ये संस्थेच्या वरिष्ठ अधिकाऱ्यांना अधीनस्थ अधिकाऱ्यांनी 'अॅट होम' पार्टीसाठी आमंत्रित करणे, कर्मचाऱ्यांमध्ये व्हॉलीबॉल स्पर्धा, मुलांसाठी सांस्कृतिक कार्यक्रम, संयुक्त दुपारचे जेवण आणि सर्व इमारतींवर भव्य रोषणाई सजावट यांचा समावेश होता.

याप्रसंगी कमांडंट  व्ही.पी. त्रिपाठी, डेप्युटी कमांडंट  अरुण कुमार, डेप्युटी कमांडंट  मोहम्मद शाहनेवाज, डेप्युटी कमांडंट  करणजीत सिंग, असिस्टंट कमांडंट  यू.टी. साखरे, सहाय्यक कमांडंट (मंत्रालयीन), डॉ. सी. संजीवन, वैद्यकीय अधिकारी, इतर अधीनस्थ अधिकारी, कर्मचारी आणि प्रशिक्षणार्थी उपस्थित होते.

0000

दि. 16 ऑगस्ट 2025 

आज पहाटे तीन वाजता पासून ईसापूर धरणाच्या पाणलोट क्षेत्रात जोरदार स्वरूपात पाऊस सूरू आहे. त्यामुळे धरणाच्या वरील बाजूस असलेल्या जयपुर बंधा-याच्या पाणी पातळीत वाढ होत आहे. त्यानुषंगाने येणारा येवा लक्षात घेऊन 16 ते 31 ऑगस्ट साठीच्या मंजूर द्वार प्रचालन (ROS) नुसार धरण पाणी पातळी नियंत्रित ठेवण्याचे दृष्टीने अतिरिक्त पाणी ईसापूर धरणाच्या सांडव्याचे वक्र द्वारे 9:00 वाजता ऊघडून पेनगंगा नदी पात्रात सोडण्यात येणार आहे.

-------

🚫 ALERT 🚫

🚫 विसर्ग संदेश 🚫

उर्ध्व पेनगंगा प्रकल्प प्रकल्प

ईसापुर धरण

आज दि. 16/08/2025 रोजी ठीक 09.00 वाजता इसापूर धरणाच्या सांडव्याची  3 वक्रद्वारे   50 सेंटिमीटर ने उघडण्यात आली असून सद्यस्थितीत पेनगंगा नदीपात्रात 4988 क्यूसेक्स  (141.229 क्यूमेक्स )इतका विसर्ग  सोडण्यात आला आहे.

धरणामध्ये येणारी पाण्याची आवक पाहून विसर्ग वाढवणे/कमी करणे बाबत निर्णय घेण्यात येईल.तरी, नदी काठावरील/ पुरामुळे बाधित होणाऱ्या गावातील नागरीकांनी खबरदारी घ्यावी.

ईसापुर धरण पुरनियंत्रण कक्ष