ः प्रेस नोट:

जिल्हा विधी सेवा प्राधिकरण नांदेड मार्फत नांदेड जिल्हयात फिरते लोक अदालत व कायदेविषयक शिबीराचे आयोजन.

‘‘ न्याय आपल्या दारी ’’

नांदेड - समाजातील अगदी तळागाळातील लोकांना न्याय मिळावा हे उद्दीष्ट डोळयासमोर ठेवून मा. सर्वोच्च न्यायालय, नवी दिल्ली यांच्या ‘‘न्याय आपल्या दारी’’ या संकल्पनेतून सुरू केलेल्या फिरते लोक अदालत व कायदेविषयक शिबीराचे आयोजन मा. महाराष्ट्र राज्य विधी सेवा प्राधिकरण, मुंबई यांच्या आदेशान्वये नांदेड जिल्हयातील सर्व तालुक्यामधील निवडक गावांमध्ये दि. 02/03/2020 ते दिनांक 23/03/2020 या कालावधीत करण्यात आलेले आहे. 

    दिनांक 02/03/2020 रोजी सकाळी 10ः30 वाजता जिल्हा व सत्र न्यायालय, नांदेड येथे मा. श्री. दिपक अ. धोळकिया, प्रमुख जिल्हा न्यायाधीश  साहेब तथा अध्यक्ष जिल्हा विधी सेवा प्राधिकरण, नांदेड यांच्या शुभहस्ते फिरते लोक अदालत व कायदेविषयक शिबीरासाठी मा. उच्च न्यायालय, खंडपीठ औरंगाबाद येथुन सदर लोकअदालतसाठी आलेल्या मोबाईल व्हॅनचे उद्घाटन करण्यात येणार आहे.

दिनांक 02/03/2020 ते दिनांक 23/03/2020 या कालावधीत सदर फिरते लोकअदालत हे नांदेड जिल्हयातील सर्व तालुक्यातील नियोजीत गावात फिरून न्यायालयात प्रलंबित असलेले दिवाणी व फौजदारी प्रकरणे तसेच बॅंकांचे, विमाकंपनी, विद्युत महामंडळ, बीएसएनएल, व इतर दिवाणी दाखलपुर्व प्रकरणे सदर लोक अदालतीत तडजोडीने निकाली काढण्याचा प्रयत्न करण्यात येणार आहे. त्याचबरोबर कायदेविषयक शिबीराद्वारे जनजागृती केली जाणार आहे. तसेच सदर लोकअदालतीचे पॅनल प्रमुख म्हणून  सौ. कमल वडगावकर, सेवा निवृत्त जिल्हा न्यायाधीश यांची नियुक्ती करण्यात आली आहे. 

  करिता मा. श्री. दिपक अ. धोळकिया, प्रमुख जिल्हा न्यायाधीश साहेब, तथा अध्यक्ष जिल्हा विधी सेवा प्राधिकरण, नांदेड व न्यायाधीश श्री. आर. एस. रोटे, सचिव, जिल्हा विधी सेवा प्राधिकरण, नांदेड. यांनी सदरील फिरते लोक अदालत यशस्वी करण्यासाठी सदरील गावातील लोकांनी सहकार्य करावे व जास्तीत जास्त लाभ घ्यावा असे अवाहन केले आहे.

000000