वृत्त क्रमांक 

मतदार यादी विशेष सखोल पुनरीक्षण (SIR) अंतर्गत गणना फॉर्म संकलन व डिजिटायझेशनसाठी विशेष कॅम्प

मतदार यादी अधिक अचूक, अद्ययावत व पारदर्शक करण्यासाठी भारत निवडणूक आयोगाची व्यापक मोहीम

नांदेड दि. 12 जुलै :- भारत निवडणूक आयोगाच्या निर्देशानुसार राज्यभर सुरू असलेल्या मतदार यादी विशेष सखोल पुनरीक्षण (Special Intensive Revision – SIR) कार्यक्रमांतर्गत 087 नांदेड दक्षिण विधानसभा मतदारसंघात मतदार यादी अधिक अचूक, अद्ययावत, सर्वसमावेशक आणि त्रुटीमुक्त करण्यासाठी व्यापक मोहीम राबविण्यात येत आहे. या मोहिमेचा मुख्य उद्देश प्रत्येक पात्र नागरिकाची मतदार म्हणून नोंद सुनिश्चित करणे, मृत, स्थलांतरित किंवा दुबार नोंदी अद्ययावत करणे तसेच प्रत्येक मतदाराची माहिती डिजिटल स्वरूपात उपलब्ध करून मतदार यादीची विश्वासार्हता अधिक बळकट करणे हा आहे.

या उपक्रमांतर्गत जिल्हाधिकारी तथा जिल्हा निवडणूक अधिकारी राहुल कर्डिले यांच्या मार्गदर्शनाखाली मतदार नोंदणी अधिकारी तथा उपविभागीय अधिकारी डॉ. सचिन खल्लाळ, तहसीलदार तथा सहाय्यक मतदार नोंदणी अधिकारी संजय वारकड तसेच सहाय्यक मतदार नोंदणी अधिकारी श्री. सानप (उपअभियंता, पाटबंधारे विभाग) यांनी गुजराती हायस्कूल, नांदेड येथे 11 बीएलओंच्या कार्यक्षेत्रातील मतदारांसाठी विशेष कॅम्पची पाहणी केली.

कॅम्पला नागरिकांचा उत्स्फूर्त प्रतिसाद लाभला. बीएलओंनी मतदारांकडून गणना फॉर्म भरून घेणे, आवश्यक कागदपत्रांची पडताळणी करणे आणि त्याचवेळी माहितीचे डिजिटायझेशन करण्याची प्रक्रिया प्रभावीपणे राबविली. यामुळे मतदार नोंदणीची प्रक्रिया अधिक जलद, पारदर्शक आणि अचूक होत असल्याचे यावेळी निदर्शनास आले.

यावेळी उपविभागीय अधिकारी डॉ. सचिन खल्लाळ यांनी उपस्थित सर्व बीएलओंना मार्गदर्शन करताना गणना फॉर्मचे शंभर टक्के वाटप, त्वरित संकलन आणि त्याच दिवशी डिजिटायझेशन करण्याच्या सूचना दिल्या. फॉर्म संकलन आणि डिजिटायझेशन यामध्ये कोणताही फरक राहता कामा नये. दोन्ही कामे समांतर आणि शंभर टक्के पूर्ण करावीत, अशा सक्त सूचना त्यांनी दिल्या.

सुपरवायझर श्री. सापटगावकर यांनी कॅम्पमध्ये उपस्थित राहून बीएलओंच्या अडचणी जाणून घेतल्या आणि त्यांचे तत्काळ निराकरण केले.

भारत निवडणूक आयोगाचे ध्येय "कोणताही पात्र मतदार वंचित राहू नये आणि कोणतीही अपात्र नोंद मतदार यादीत राहू नये" हे आहे. त्याच अनुषंगाने SIR कार्यक्रमाद्वारे घराघरात जाऊन पडताळणी, अचूक माहिती संकलन, तात्काळ डिजिटायझेशन आणि पारदर्शक मतदार नोंदणी प्रक्रिया राबविण्यात येत आहे. यामुळे भविष्यातील निवडणुकांसाठी अधिक विश्वासार्ह, अद्ययावत आणि त्रुटीमुक्त मतदार यादी तयार होण्यास मोठी मदत होणार आहे.

प्रशासनाने सर्व पात्र नागरिकांना या विशेष मोहिमेत सक्रिय सहभाग नोंदवून आवश्यक माहिती व कागदपत्रे बीएलओंकडे वेळेत उपलब्ध करून देण्याचे आवाहन केले आहे.

00000