जिल्ह्यात 57 मंडळांमध्ये 28 जुलै रोजी

अतिवृष्टीची नोंद  

 

जिल्हा प्रशासनाने संपूर्ण क्षमतेसह

बचाव कार्यासाठी शक्ती लावली पणाला

 

नांदेड (जिमाका) दि. 28 :- नांदेड जिल्ह्यात शुक्रवार 28 जुलै रोजी झालेल्या अतिवृष्टीने धर्माबाद, बिलोली, देगलूर, मुखेड, नांदेड, मुदखेड, किनवट, अर्धापूर, उमरी, लोहा आदी  तालुक्यातील 57 मंडळांमध्ये अतिवृष्टीची नोंद झाली. यामुळे नदी-नाल्यांना मोठ्या प्रमाणात पूर आला. पुराचे पाणी अनेक गावात शिरले. मोठ्याप्रमाणात विद्युत पुरवठा खंडीत झाला. मुखेड व इतर तालुक्यात विद्युत खांब खाली पडल्यामुळे लोकांना अडचणीला सामोरे जावे लागले. किनवट, बिलोली, धर्माबाद तालुक्यात मंडळातील काही गावात लोक पुरात अडकले. पुरात अडकलेल्या लोकांना सुरक्षित स्थळी हलविण्यासह प्रशासनाने सर्व विभागाच्या समन्वयातून अहोरात्र मेहनत घेऊन मदत पोहचविली. या मदत कार्यात अनेक गावात स्थानिक नागरिकांनी आपली कर्तव्य भावना जपत प्रशासनासमवेत मदतीचे हात मजबूत केले. या अतिवृष्टीमध्ये तालुकानिहाय घडलेला घटनाक्रम जिल्हा आपत्ती व्यवस्थापन विभागाने पुढीलप्रमाणे दिला आहे.  

 

सद्यस्थितीत नांदेड जिल्ह्यात दि. 27 जुलैच्या रात्रीपासून पाऊस थांबलेला आहे. किनवट तालुक्यातील चिखली खु. येथे नाल्याचा पूर ओसरला आहे परंतु रस्ता बंद आहे. पर्यायी मार्गाने वाहतूक चालू आहे. बेल्लोरी किनवट येथील बेलोरी नाल्यावरून एक व्यक्ती वाहुन गेले अशोक पोशट्टी दोनेवार वय अंदाजे 40 पुरात वाहुन गेला. भोई समाजाचे लोक मदतीला घेऊन शोध बचाव कार्य चालु आहे तहस‍िलदार किनवट यांच्‍याकडुन माहिती प्राप्‍त झाली आहे. किनवट तालुक्‍यातील इस्लापूर येथील साईबाबा मंदिराजवळील 27 जुलै रोजी नाल्याचे पाणी पुलावरून जात असताना हर्दुके नावाचे इसम वय अंदाजे 55 वर्ष पाण्यात अडकले होते. या इसमाचा बचाव करण्यासाठी महसूल विभागाचे तलाठी बालाजी वसमतकर हे स्वतः पाण्यात उतरून सदर इसमाला धोक्याच्या पातळी बाहेर काढले.त्यानंतरही पाण्याचा प्रवाह वाढतच होता.वाढणाऱ्या पाण्याच्या प्रवाहाबरोबर आत्ता  पूर्णपणे बाहेर येणे शक्य नव्हते.त्यामुळे पुढे मंडळ अधिकारी,शिवनी आणि पोलीस प्रशासनाच्या पुढाकाराने जेसीबीच्या मदतीने सदर इसम व तलाठी वसमतकर याना सुखरूप बाहेर काढले. एका इसमाच्या बचावासाठी महसूलचे तलाठी बालाजी वसमतकर यांनी दाखविले प्रसंगावधान आणि धाडस कौतुकास्पद आहे अशी सर्वत्र चर्चा होत आहे.

 

मुखेड तालुका  मौजे राजुरा बु. येथील युवक प्रदीप साहेबराव बोयाळे वय वर्ष 25 पाण्याच्या प्रवाहात वाहुन  गेल्याची प्राथमिक माहिती असून मृतदेह सापडला आहे. उमरी-मुदखेड रस्ता रेल्वे पुलाच्या खाली पाणी असल्यामुळे मागील 8 दिवसापासून बंद आहे. धर्माबाद तालुक्यातील बनाळी येथे अति पावसामुळे 60 ते 70 कुटुंबाचे दोन बसेस द्वारे धर्माबाद येथील जिल्हा परिषद शाळेमध्ये स्थलांतर करण्यात आलेले आहे. उमरी तालुक्यात बेलदरा ते उमरी रस्ता बंद आहे.

 

मुदखेड तालुक्यात आनंदराव गुंडाजी पवार, गयाबाई आनंदराव पवार, गजानन आनंदराव पवार, लता गजानन पवार, आनंद गजानन पवार, मिना आनंदराव पवार हे वैजापूर पारडी येथे घराला पुराच्या पाण्याने घेराव घातला आहे. सीता नदी वैजापूर. स्थानिक लोकांनी या लोकांना सुखरूप बाहेर काढल्याचे तहसिलदार मुदखेड यांनी कळविले आहे. नायगाव कोपरा येथील पुल तुटला आहे. मुदखेड तालुक्‍यातील नागेली गावामध्ये मातंग वाडा येथील घरांमध्ये पाणी शिरल्यामुळे 25  व्यक्तींना सुरक्षित जागी (समाज मंदिर) हलवण्यात आले आहे. मुदखेड तालुक्‍यातील शेंबोली गावामध्ये शंबोली फाट्या वरील घरांमध्ये पाणी शिरल्यामुळे 30   व्यक्तींना सुरक्षित जागी (प्राथमिक आरोग्य केंद्र शेंबोली) हलवण्यात आले आहे. मुदखेड तालुक्‍यातील बारड गावातील 12 (सुभाष रुखाजी व‍िशी वय 36 वर्ष, रंजना सुभाष व‍िशी 30 वर्ष, राम सुभाष व‍ि‍शी 8 वर्ष, कृष्‍णा सुभाष व‍िशी 5 वर्ष, द‍ि‍व्‍या सुभाष व‍ि‍शी 4 वर्ष, राजाराम मारुती फुलारी-36 वर्ष, संजय सदाशीव देशमुख 35 वर्ष, चंद्रकांत धोंडीबा वसुमते 30 वर्ष, मनोज प्रकाशराव देशमुख 37 वर्ष, कौशल नवनाथ देशमुख 17 वर्ष, प्रकाश गणेशराव देशमुख 32 वर्ष, साईनाथ दत्‍ता वसुमते 32वर्ष) जणांना एसडीआरएफ टीमने सुखरुप बाहेर काढले. मुदखेड तालुक्‍यातील बारड गावांमध्ये इंदिरानगर, शंकरनगर पांदन व भीमनगर येथील घरांमध्ये पाणी शिरल्यामुळे 10  कुटुंबातील 35  व्यक्तींना सुरक्षित जागी (गावातील नातेवाईक यांचेकडे) हलवण्यात आले व इतर कुटुंबासाठी जि. प. येथे व्यवस्था करण्यात आली आहे. मुदखेड तालुक्‍यातील बोरगांव स‍िता या गावातील 2 शेतकरी रामकिशन माधव धबडगे व मारोती माधव धबडगे असे एसडीआरएफ टीमने सुखरुप बाहेर काढले. मुदखेड तालुक्‍यातील हजापूर येथील पुरात अडकलेले शेतकरी दिलीप वामनराव कदम वय 54 यांची सुखरूप रेस्क्यू करण्यात आलेली आहे. मुदखेड तालुक्‍यातील सरेगाव गावामध्ये पाणी शिरल्यामुळे-23 कुटुंबातील-87 व्यक्तींना सुरक्षित जागी (गावातील त्यांचा नातलगांच्या घरी) याठिकाणी हलवण्यात आले.

 

अर्धापुर तालुक्‍यातील लोणी खु. येथील मंदीरात पुराच्‍या पाण्‍यात अडकून बसलेल्‍या एका व्‍यक्‍तीस माधव फुलाजी सोळंखे यांना स्थानिक ग्रामस्थांच्या बचाव पथकाने सुखरुप बाहेर काढले.अर्धापुर तालुक्‍यातील स्वप्नील शंकरराव कदम वय 26 वर्ष रा. कोंढा ही व्यक्ती मौ. गणपूर येथे पुराच्या पाण्यामध्ये विद्युत खांबावर लटकून मागील 2 तासापासून अडकून होता. यशस्वीरीत्या पूर्ण झालेल्या रेस्क़्यु ऑपरेशन मध्ये एसडीआरएफ टीमच्या सहाय्याने त्याला सुखरूप बाहेर काढण्यात आले आहे.

 

धर्माबाद पोलीस स्टेशनच्या सतर्कतेमुळे बनाळी गावातल्या एका परिवाराला पुरात वाहून जाताना जीवनदान. पीआय अभिषेक शिंदे, एपीआय जाधववर, पीएसआय पंतोजी, जमादार सोमनाथ मठपती इत्यादी सर्वांनी मिळून पांचाळ कुटुंबीयांना बाहेर काढले. धर्माबाद तालुक्यात बनाळी येथील स्थलांतरित करण्यात आलेल्या एकूण 234 नागरिकांपैकी सद्यस्थितीत एकूण 150 नागरीक अजून धर्माबाद येथील जिल्हा परिषद शाळेत तात्पुरत्या निवाऱ्यात आहेत. आता बनाळी येथे अडचण नाही सर्वांची राहाणेची आणि जेवणाची व्यवस्था प्रशासनाने जिल्हा परिषद शाळा येथे केली आहे.

                        

उमरी तालुका-सावरगाव कला येथील तलाव ओव्हरफ्लो झाला आहे, तूर्तास गावाला धोका नाही. धर्माबाद तालुका-मो. सिरजखोड ब्रीज पाण्याखाली गेल्याने बामणी, विलेगाव,संगम,मनुर या गावाचा संपर्क तुटला आहे. त्यांना पर्यायी मार्ग कुंडलवाडी आहे. भोकर तालुक्‍यात मौ.नांदा म्‍हेता येथे 15 ते 16 घरात पाणी श‍िरुन जनावरे व धान्‍यांची हानी झालेली आहे.

 

नांदेड शहरातील-विठ्ठल रामचंद्र कापावार वय 40 राहणार बसवेश्वरनगर हडको येथील एक व्यक्ती काल लातूर फाटा येथून वाहून गेले होते 28 जुलै रोजी सकाळी मृतदेह सापडला आहे. नांदेड तालुक्‍यातील कासारखेडा गावात पुराच्‍या पाण्‍यात अडकलेले लोक-शेतमालक, रजनी सूर्यकांत हळदे गट 335, शेत गडी, उत्तम विठल कल्याणकर 52 वर्ष, मीराबाई उत्तम कल्याणकर 45 वर्ष, लखन उत्तम कल्याणकर 25 वर्ष, वर्षा लखन कल्याणकर 20 वर्ष, लहान बाळ अक्षरा लखन कल्याणकर वय 10 महिने  असे 6 जणांना एसडीआरएफ टीमने सुखरुप बाहेर काढले. पासदगावच्या पुलावरून पाणी वाहत आहे. नांदेड-मालेगाव रोड, पोलीस स्टेशन भाग्यनगर व पोलीस स्टेशन लिंबगाव येथील पोलीस कर्मचारी त्या ठिकाणी ठेवण्यासाठी संबंधित पोलीस निरीक्षक यांना सूचना केली आहे.

 

लोहा तालुक्‍यातील मौजे कापसी खुर्द येथील पावलाचे पाणी गेलेल्या राष्ट्रीय महामार्गाच्या लगतच्या वस्तीस तलाठी व मंडळाधिकारी यांच्यासह भेट दिली. रोडलगत मोठ्या नाल्या तुंबल्यामुळे वस्तीतील घरामध्ये पाणी शिरल्याचे दिसून आले. तसेच सदरील तुंबलेल्या नाल्या ग्रामपंचायतीने एक तासापुर्वी जेसीबीच्या साह्याने मोकळया केल्या असून तुंबलेले पाणी नालीद्वारे काढून देण्यात आले आहे. जवळपास 30 ते 40 लहान-मोठे नागरिक त्याच वस्तीलगत उंचावर व पाणी न गेलेल्या घरी सोयीनुसार थांबलेले आहेत. त्यांच्या जेवणाची व्यवस्था (खिचडी ) करण्यात आली आहे. लोहा तालुक्‍यातील कापशी खु. येथे राष्ट्रीय महामार्गालगत  पावसाचे पाणी काही लोकांच्या घरात पाणी शिरले आहे. तहसि‍लदार व्‍यंकटेश मुंडे यांनी टीमसह भेट देत आहे तसेच करमाळा या गावात छोटा गाव तलाव अंशता फुटल्याने काही शेतकरी यांचे पीकांचे नुकसान होण्याची शकते.

 

दिनांक 27 जुलै रोजी दिवसभर झालेल्या मुसळधार पावसामुळे नांदेड शहरातील बाबानगर, मगनपुरा, आनंदनगर, हमालपुरा, नाथनगर, अबचलनगर, बँक कॉलनी, टाऊन मार्केट, सहयोगनगर, खोब्रागडेनगर, हनुमानगड, दत्तनगर, सखोजीनगर, बालाजीनगर, शिवनगर, वाघीरोड, समीराबाग, तहुराबाग, श्रावस्तीनगर, हिंगोली गेट RUB, डॉक्टरलेन, हिंगोलीगेट खुराना ट्रॅव्हल्स ते बाफना टी पॉइंट, मिल्लतनगर, वाल्मिकीनगर, लक्ष्मीनगर, इकबालनगर, ममता कॉलनी, इस्लामपुरा, सिडको व हडको याठिकाणी मोठ्या प्रमाणात पावसाचे पाणी शिरले होते. साचलेले पाणी निचरा करण्यासाठी आवश्यकतेनुसार जेसीअी मशीन आणि मनुष्यबळ लाऊन पाण्याचा निचरा करण्यात आला आहे. वाघी रोड येथील चुनाल नाल्यामध्ये पाणी वाढून समीरा बागच्या काही भागात पाणी शिरले होते. या ठिकाणी काही भागात नागरिक अडकले होते अग्निशमन विभागाच्या बचाव पथकाने या नागरिकांना सुरक्षित बाहेर काढण्यात आले आहे. तसेच श्रावस्तीनगर मधून 48 लोकांना सुखरूप बाहेर काढण्यात आले असून यापैकी 6 नागरिकांना महापालिकेचे तात्पुरते निवाराकेंद्र नरसिंह विद्यालय येथे स्थलांतरित करण्यात आले. शहरात आनंदनगर जवळील जानकीनगर भागात 27 जुलै रोजी झालेल्या संततधार पावसामुळे नाल्यात एका अज्ञात इसमाचे शव 28 जुलै रोजी सकाळी आढळून आले आहे.

0000