वनमंत्री सुधीर मुनगंटीवार यांचे

नांदेड विमानतळावर स्वागत

नांदेड, दि. 12 :- राज्याचे वन, वित्त आणि नियोजन मंत्री सुधीर मुनगंटीवार यांचे येथील श्री गुरु गोबिंद सिंघजी विमानतळावर आगमन झाले. यावेळी जिल्हा प्रशासनाच्यावतीने मंत्री श्री. मुनगंटीवार यांचे अप्पर जिल्हाधिकारी संतोष पाटील यांनी पुष्पगुच्छ देऊन स्वागत केले. तसेच पाथरीचे आमदार मोहन फड, औरंगाबादचे मुख्य वनसंरक्षक प्रकाश महाजन, उपवनसंरक्षक केशव वाबळे, सामाजिक वनीकरण उपसंचालक सुर्यकांत मंकावार, तहसिलदार किरण अंबेकर यांनीही पुष्पगुच्छ देऊन स्वागत केले.  त्यांच्यासोबत वन विभागाचे सचिव विकास खारगे यांचेही आगमन झाले.

तसेच याप्रसंगी जिल्हा परिषद सदस्य डॉ. मिनल पाटील-खतगावकर, नगरसेवक गुरुप्रितकौर सोडी, भारतीय जनता पक्षाचे जिल्हाध्यक्ष संतूक हंबर्डे, परभणीचे जिल्हाध्यक्ष अभय चाटे, प्रवीण साले, चैतन्यबापू देशमुख, दिलीप कंदकुर्ते, डॉ. शोभा वाघमारे, श्रीमती धनश्री देव, श्रीमती शितल भालके, एकनाथ मामडे आदींनी मंत्री श्री. मुनगंटीवार यांचे स्वागत केले. मंत्री श्री. मुनगंटीवार हे गौड ता. पुर्णा. जि. परभणी दौऱ्यावर आले होते. त्यासाठी त्यांचे नांदेड विमानतळावर आगमन झाले होते.

00000

ग्रामीण महिलांसाठी शिवणकला प्रशिक्षण

नांदेड, दि. 12 :- स्टेट बँक-आरसेटी नांदेड येथे ग्रामीण महिलांसाठी शिवणकला (टेलरिंग / ड्रेस डीझायनिंग) प्रशिक्षणाचे आयोजन बुधवार 17 जानेवारी  ते गुरुवार 15 फेब्रुवारी 2018 या कालावधीत केले आहे. इच्छुक युवतींने या प्रशिक्षणाचा लाभ घ्यावा, असे आवाहन संचालक दिलीप शिरपुरकर यांनी केले.

स्टेट बँक ग्रामीण स्वयंरोजगार प्रशिक्षण संस्था नांदेड यांच्यावतीने ग्रामीण भागातील अल्प उत्पन्न गटातील ज्यांचे वय 18 ते 45 वर्षे दरम्यान आहे या युवतींसाठी  शिवणकला (टेलरिंग आणि ड्रेस डीझायनिंग) तीस दिवसाच्या मोफत प्रशिक्षणाचे आयोजन केले आहे. हे प्रशिक्षण निवासी स्वरूपातील असून पात्र उमेदवारांसाठी मोफत  उपलब्ध आहे. प्रशिक्षणात शिवणकला कौशल्य या मुख्य विषयाव्यतिरिक्त उद्योजकीय सक्षमता, विपणन, बँकिंग व्यवहार, मुद्रा कर्ज योजना आदी विषयी माहिती देण्यात येणार आहे.

इच्छुक उमेदवारांनी अधिक माहितीसाठी 02462 230036 या कार्यालयीन क्रमांकावर अथवा संदीप जाधव- 9860366710 शिवाजी चव्हाण- 9405824927 प्रशिक्षक, संदीप नारवाड- 8149711303  कार्यालयीन सहाय्यक यांचेशी संपर्क करून प्रवेश निश्चीत करावा, असेही आवाहन करण्यात आले आहे.

00000

वित्त मंत्री सुधीर मुनगंटीवार यांचा दौरा

नांदेड, दि. 11 :- राज्याचे वित्त आणि नियोजन, वने मंत्री सुधीर मुनगंटीवार हे नांदेड दौऱ्यावर येत असून त्यांचा दौरा कार्यक्रम पुढील प्रमाणे राहील.

शुक्रवार 12 जानेवारी 2018 रोजी मुंबई येथुन शासकीय विमानाने दुपारी 4 वा. नांदेड विमानतळ येथे आगमन व मोटारीने गौड ता. पुर्णा. जि. परभणीकडे प्रयाण. सायं. 6.30 वा. गौड ता. पुर्णा येथुन मोटारीने नांदेड विमानतळ येथे आगमन व राखीव. रात्री 7 वा. नांदेड विमानतळ येथून शासकीय विमानाने मुंबईकडे प्रयाण करतील.

00000

अधिस्वीकृतीसाठी पत्रकारांनी

अर्ज करण्याचे आवाहन

         नांदेड, दि. 11 :- लातूर विभागीय अधिस्वीकृती समितीची बैठक बुधवार 31 जानेवारी 2018 रोजी होणार आहे. नांदेड जिल्ह्यातील पत्रकारांनी नवीन अधिस्वीकृती पत्रिका मिळविण्यासाठी जिल्हा माहिती कार्यालय नांदेड येथे गुरुवार 25 जानेवारी 2018 पर्यंत परिपुर्ण अर्ज कागदपत्रांसह सादर करावेत, असे आवाहन जिल्हा माहिती अधिकारी नांदेड यांनी केले आहे.

00000

राज्य शासनाच्या उत्कृष्ट पत्रकारिता पुरस्कार- 2017 साठी

प्रवेशिका पाठविण्याचे आवाहन

नांदेड, दि. 10 :- राज्य शासनाच्या माहिती व जनसंपर्क महासंचालनालयामार्फत उत्कृष्ट पत्रकारिता, उत्कृष्ट लेखन, उत्कृष्ट दूरचित्रवाणी वृत्तकथा, उत्कृष्ट छायाचित्रकार, सोशल मीडिया आणि स्वच्छता अभियानाबाबत केलेल्या जनजागृतीपर लिखाणासाठी पुरस्कार स्पर्धा जाहीर करण्यात येत आहे. या स्पर्धेसाठी दि. 1 जानेवारी 2017 ते 31 डिसेंबर 2017 पर्यंतच्या कालावधीत प्रसिद्ध झालेल्या लेखनाच्या प्रवेशिका मागविण्यात येत आहेत. प्रवेशिका पाठविण्याची अंतिम मुदत बुधवार 31 जानेवारी 2018 अशी आहे.

            स्पर्धकांनी जिल्हा माहिती कार्यालयाकडून, तर मुंबई शहर व मुंबई उपनगर जिल्ह्यातील इच्छुकांनी माहिती व जनसंपर्क महासंचालनालय (तळमजला, हुतात्मा राजगुरु चौक, मादाम कामा मार्ग, मंत्रालय, मुंबई-32) येथून विहित नमुन्यातील अर्ज प्राप्त करुन घ्यावयाचे आहेत. अर्जाचे नमुने dgipr.maharashtra.gov.in किंवा  www.maharashtra.gov.in तसेच www.mahanews.gov.in येथेही उपलब्ध आहेत.  

 राज्यस्तरीय पुरस्कारांची माहिती पुढीलप्रमाणे- बाळशास्त्री जांभेकर पुरस्कार (मराठी), अनंत गोपाळ शेवडे पुरस्कार (इंग्रजी), बाबूराव विष्णू पराडकर पुरस्कार (हिंदी), मौलाना अबुल कलाम आझाद पुरस्कार(उर्दू), यशवंतराव चव्हाण पुरस्कार - शासकीय गट (मराठी) (मा. व ज.), पु. ल. देशपांडे उत्कृष्ट दूरचित्रवाणी वृत्तकथा पुरस्कार, तोलाराम कुकरेजा उत्कृष्ट वृत्तपत्र छायाचित्रकार पुरस्कार, केकी मूस उत्कृष्ट छायाचित्रकार पुरस्कार शासकीय गट (मा.व ज.), सोशल मीडिया पुरस्कार, स्वच्छ महाराष्ट्र जनजागृती पुरस्कार (सर्व पुरस्कार प्रत्येकी 51 हजार रुपये, मानचिन्ह व प्रशस्तीपत्र)

विभागीय पुरस्कारांची माहिती पुढीलप्रमाणे- अनंतराव भालेराव पुरस्कार (औरंगाबाद विभाग) (लातूरसह), आचार्य अत्रे पुरस्कार (मुंबई विभाग), नानासाहेब परूळेकर पुरस्कार (पुणे विभाग), शि. म. परांजपे पुरस्कार (कोकण विभाग), ग. गो. जाधव पुरस्कार (कोल्हापूर विभाग), लोकनायक बापूजी अणे पुरस्कार (अमरावती विभाग), ग. त्र्यं. माडखोलकर पुरस्कार (नागपूर विभाग) (सर्व पुरस्कार प्रत्येकी 51 हजार रुपये, मानचिन्ह व प्रशस्तीपत्र) तर दादासाहेब पोतनीस पुरस्कार (नाशिक विभाग) (51 हजार रुपये, मानचिन्ह व प्रशस्तीपत्र तसेच याव्यतिरिक्त रुपये 10 हजार दै. गावकरीने पुरस्कृत केले आहेत.) या स्पर्धेत राज्यातील पत्रकारांनी अधिकाधिक संख्येने सहभागी व्हावे, असे आवाहन माहिती व जनसंपर्क महासंचालनालयाच्यावतीने करण्यात आले आहे.

0000

 केळी, हरभरा पीकासाठी कृषि संदेश  

नांदेड, दि. 10 :- केळीच्या पानावर करपा रोगाचा प्रादुर्भाव आकाराने जास्त असेल तर त्याचा परिणाम प्रकाश संश्लेषण प्रक्रियेवर होत असल्याने जास्तीतजास्त पाने कार्यरत ठेवण्यासाठी फक्त पानाचा रोगग्रस्त भाग काढून बागेबाहेर नेऊन नष्ट करावा. पानावरील लहान-लहान तपकिरी ठिपके वाढून एकत्र होतात. त्यामुळे मोठा ठिपका होऊन पानाचा जास्त भाग रोगग्रस्त होतो. त्यासाठी झाडावर प्रोपिकोनेझॉल 0.05 टक्के (0.5 मिली) मिनरल ऑईल 1 टक्के ( 10 मिली) प्रति लिटर पाण्यात मिसळून फवारणी करावी.

तसेच हरभरा घाटेअळीच्या नियंत्रणासाठी इमामेक्टीन बेन्झोएट 5 एसजी 4 ग्रॅम प्रति 10 लिटर पाणी, फवारणी करावी. मर रोग नियंत्रणासाठी कार्बेडेझीम 50 डब्ल्यु पी 10 ग्रॅम 10 लिटर पाण्यात मिसळून आळवणी करावी, असे आवाहन उपविभागीय कृषि अधिकारी डॉ. व्ही. व्ही. भरगंडे यांनी केले आहे.

000000

राष्ट्रीयकृत बॅकेच्या सहकार्याने

विविध व्यवसायासाठी कर्ज योजना

नांदेड, दि. 10 :- शबरी आदिवासी वित्त व विकास महामंडळ मर्या. नाशिक यांनी राष्ट्रीयकृत बँकेच्या सहकार्याने राबवण्याची कर्ज योजना सन 2017-18 करीता प्रकल्प खर्च एक लाख रुपयाच्या आतील विविध व्यवसायासाठी शाखा कार्यालय व जिल्हानिहाय लाभार्थी लक्षांक निश्चित केले आहे, अशी माहिती शबरी आदिवासी वित्त व विकास महामंडळ किनवटचे शाखा व्यवस्थापक यांनी दिली आहे.

यामध्ये किनवट शाखा कार्यालयाच्यावतीने नांदेड, परभणी, हिंगोली जिल्ह्यासाठी प्रत्येकी, पिठाची गिरणी युनिट  संख्या-9, पेपर डिश बनविणे / ज्यूस सेंटर- 9, दुग्ध व्यवसाय युनीट- 15, तंबू सजावट व लाऊड स्पीकर केंद्र- 2, थ्रेशर युनीट-9, ऑटो वर्कशॉप-5, किराणा दुकान- 5, कापड दुकान-9, इलेक्ट्रिक दुकान-9, खाद्य उद्योग (पापड, मसाला, शेवाळ्या)-2, कटलरी दुकान-2 यांचा समावेश आहे. या व्यवसायाव्यतिरिक्त लाभार्थीच्या पसंती, मागणीनुसार इतर कोणत्याही वर्धनक्षम ( नियमित उत्पन्न देणारा ) व्यवसायासाठी कर्ज उपलब्धतेसाठी शिफारस करण्यात येईल, असेही प्रसिद्धी पत्रकात नमूद केले आहे.

000000