योजनांचे लाभधारक व कार्यान्वयीन यंत्रणेसाठी

“शासन आपल्या दारी” अभियान मोलाचे

- जिल्हाधिकारी पांडुरंग बोरगांवकर

नांदेड (जिमाका) दि. 25 :- “शासन आपल्या दारी” हे अभियान शासकीय योजनांच्या लाभधारकांचे मनोबल, आत्मविश्वास आणि शासकीय योजनांप्रती सकारात्मकता निर्माण करण्याच्या दृष्टीने अत्यंत महत्त्वाचे आहे. जिल्ह्यातील सर्व विभागाच्या प्रमुखांनी आपल्या विभागांतर्गत असलेल्या योजना अधिकाधिक सकारात्मक भावनेने पोहोचविण्यासाठी कटिबध्द असले पाहीजे. या अभियानाच्या निमित्ताने राज्याचे मुख्यमंत्री एकनाथ शिंदे यांचा प्रस्तावित दौरा व इतर मान्यवरांची उपस्थिती लक्षात घेता सर्व विभागप्रमुखांनी मिशन मोडवर येऊन काम करावे, असे आवाहन प्र. जिल्हाधिकारी पांडुरंग बोरगावकर यांनी केले.

“शासन आपल्या दारी” या अभियानानिमित्त आज येथील डॉ. शंकरराव चव्हाण जिल्हा नियोजन भवन येथे अधिकाऱ्यांच्या आयोजित बैठकीत ते बोलत होते. या बैठकीस मनपा आयुक्त डॉ. सुनिल लहाने, अपर पोलीस अधीक्षक अबिनेश कुमार, उपजिल्हाधिकारी संतोषी देवकुळे, जिल्हा परिषदेचे अतिरिक्त मुख्य कार्यकारी अधिकारी संदीप माळोदे, सार्वजनिक बांधकाम विभागाचे अधिक्षक अभियंता गजेंद्र राजपूत, उपविभागीय अधिकारी, तहसिलदार, गटविकास अधिकारी, विविध विभागाचे विभाग प्रमुख उपस्थित होते.

या अभियानाच्या निमित्ताने प्रादेशिक परिवहन विभागाच्या वतीने वाहन परवाना शिबीर, कौशल्य विकास रोजगार व उद्योजकता विभाग, औद्योगिक प्रशिक्षण संस्था आणि विद्यापीठ यांच्या संयुक्त विद्यमाने रोजगार मेळावा, आरोग्य विभागाच्या वतीने प्राथमिक तपासणी शिबीर, कृषी विभागाच्या वतीने प्रगतशील शेतकऱ्यांचे आपल्या गुणवत्तापूर्ण उत्पादनाबाबतचे स्टॉल्स, महिला बचतगटांच्या वैशिष्ट्यपूर्ण उत्पादनांचे स्टॉल्स यााबाबत बैठकीत प्र. जिल्हाधिकारी बोरगावकर यांनी निर्देश दिले.

00000

शेतकऱ्यांनी उपकर योजनेतंर्गत अनुदानावर कृषि साहित्याचा लाभ घेण्याचे आवाहन

शेतकऱ्यांनी उपकर योजनेतंर्गत अनुदानावर कृषि साहित्याचा लाभ घेण्याचे आवाहन नांदेड (जिमाका) दि. 25 :- सन 2023-24 मध्ये जिल्हा परिषद उपकर योजने अंतर्गत जिल्ह्यातील शेतकऱ्यांना अनुदानावर डी.बी.टी. व कॅशलेस पध्दतीचा अवलंब करुन ताडपत्री, 3 एचपी / 5 एचपी ओपन वेल सबमर्शिबल पंप संच, पॉवर ऑपरेटेड चाफ कटर (कडबा कटर), ट्रॅक्टरचलित रोटाव्हेटर, सोयाबीन प्लॅन्टर सोलार फेन्सीग एनरगायझर, बिजप्रकियेसाठी अनुदान, सेंद्रीय खत निर्मितीसाठी लागणारे बेड इ. कृषि साहित्याचा लाभ देण्यासाठी कृषी साहित्यांचा लाभ देण्यासाठी पंचायत समिती स्तरावर प्रस्ताव मागविण्यात येत आहेत. तरी गरजू शेतकऱ्यांनी अनुदानावर औजारे / कृषि साहित्य मिळणेसाठी आवश्यक त्या सर्व कागदपत्रासह प्रस्ताव पंचायत समितीचे गट विकास अधिकारी यांचे मार्फत जिल्हा परिषद कृषि विभागाकडे सादर करावेत, असे आवाहन जिल्हा परिषदेचे कृषि विकास अधिकारी यांनी केले आहे. या योजने अंतर्गत औजाराचा, कृषि साहित्याचा लाभ देण्यासाठी लागणारे कागदपत्रे पुढीलप्रमाणे आहेत. शेतकऱ्यांचा अर्ज, स्वत:चे नावे जमीन असल्याबाबत चालू आर्थिक वर्षाचा सात/बारा व 8- अ (होल्डींग) चा उतारा, आधार सलग्न बँक खाते पासबुकाच्या पहिल्या पानाची छायांकीत प्रत, आधार कार्डची छायांकीत प्रत, शेतकऱ्याकडे जनावरे असल्याबाबत पशुसंवर्धन विभागाचे प्रमाणपत्र. (कडबा कटरचा लाभ घेणेसाठी), ओलीताची सोय (विहीर/शेततळे/नाला) असल्याबाबत तलाठी यांचे प्रमाणपत्र. (विद्युत पंप संचचा लाभ घेणेसाठी), अधिकृत विद्युत कनेक्शन असल्याबाबत लाईट बिलाची छायांकित प्रत अथवा कोटेशन भरलेल्या पावतीची छायांकित प्रत. (विद्युत पंप संचचा लाभ घेणेसाठी) , जातीच्या प्रमाणपत्राची स्वयंसाक्षांकित छायांकित प्रत. (लाभार्थी शेतकरी मागास वर्गीय असल्यास), अपंग असल्यास प्राधिकृत वैद्यकीय अधिकाऱ्यांचे अपंग प्रमाणपत्र, अर्जदार आत्महत्याग्रस्त शेतकरी कुटुंबातील असल्यास तहसिलदार यांचे प्रमाणपत्र, घरघुती बियाणे उपलब्ध असलेले/स्वयंघोषणापत्र व उन्हाळी बियाणे उत्पादित केले स्वयंघोषणापत्र (सोयाबिन प्लॅन्टर घेणेसाठी), कुटुंबाचे रेशन कार्ड इ.कागदपत्राची आवश्यकता आहे. अधिक माहितीसाठी पंचायत समितीचे कृषि अधिकारी, कृषि विस्तार अधिकारी यांच्याशी संपर्क साधावा, असेही आवाहन नांदेड जिल्हा परिषदेचे कृषि विकास अधिकारी यांनी केले आहे. 000000

 हदगाव येथे शुक्रवारी छत्रपती शाहू महाराज युवाशक्ती

करिअर समुपदेशन मेळाव्याचे आयोजन

 

नांदेड, (जिमाका) दि. 24 :- व्यवसाय शिक्षण व प्रशिक्षण संचालनालयामार्फत हदगाव येथील शासकीय औद्योगिक प्रशिक्षण संस्थेद्वारे शुक्रवार 26 मे 2023 रोजी छत्रपती शाहू महाराज युवाशक्ती करिअर समुपदेशन मेळाव्याचे आयोजन करण्यात आले आहे. हा मेळावा तामसा रोड हदगाव येथील सुमन गार्डन ॲन्ड लॉन्स येथे सकाळी 10 ते दुपारी 2 वाजेपर्यंत या कालावधीत होईल. या मेळाव्याचे उद्घाटन आमदार माधवराव पाटील जवळगावकर यांच्या हस्ते होईल. हदगाव तालुक्यातील विद्यार्थी, पालकवर्ग व शिक्षकांनी https://mahacareer.globalsapio.com या लिंकवर नोंदणी करावी असे आवाहन संयोजक समितीच्यावतीने करण्यात आले आहे.   

 

या मेळाव्यात प्रामुख्याने दहावी, बारावीनंतर महाविद्यालयीन शिक्षण व इतर अभ्यासक्रम, अभ्यासक्रम प्रवेश प्रक्रिया, शैक्षणिक शिष्यवृत्ती योजना, कर्ज योजना या विषयांवर तज्ज्ञांमार्फत मार्गदर्शन केले जाईल. या मेळाव्यास हदगावचे उपजिल्हाधिकारी ब्रिजेश पाटील, औद्योगिक प्रशिक्षण संस्था व्यवस्थापन समितीचे अध्यक्ष अब्दुल वहिद, तहसीलदार जीवराज डापकर, प्रभारी पोलीस निरीक्षक जगन पवार, नगरपरिषदेचे मुख्यधिकारी दामोधर जाधव, उपकोषागार अधिकारी सचिन कद्रे, एसबीआय बँकेचे शाखा अधिकारी अभिषेक रोहतगी, सार्वजनिक बांधकाम विभागाचे उपअभियंता देवराव भिसे, गटविकास अधिकारी दशरथ आडेराघो, गटशिक्षणाधिकारी किसनराव फोले यांची प्रमुख उपस्थिती राहणार आहे.

 

या मेळाव्याच्या संयोजक समितीमध्ये जिल्हा व्यवसाय शिक्षण व प्रशिक्षण अधिकारी आर. बी. गणवीर, कौशल्य रोजगार व उद्योजकता विभागाच्या सहाय्यक आयुक्त रेणुका तम्मलवार, हदगाव औद्योगिक प्रशिक्षण संस्थेचे प्राचार्य फारूकी वासे यांचा समावेश आहे.  

0000

23.5.2023.

 छत्रपती शाहू महाराज युवाशक्ती करिअर

समुपदेशन मेळाव्याचे 26 मे रोजी हदगाव येथे आयोजन

 

नांदेड (जिमाका) दि. 23 :- औद्योगिक प्रशिक्षण संस्था हदगाव यांच्यावतीने 26 मे 2023 रोजी सुमन लॉन्स, तामसा रोड, हदगाव येथे सकाळी 10 ते 2 या कालावधीत छत्रपती शाहू महाराज युवाशक्ती करिअर समुपदेशन मेळाव्याचे आयोजन करण्यात आले आहे. या मेळाव्याचे उदघाटन आमदार माधवराव पाटील जवळगावकर यांच्या हस्ते होणार आहे.  

 

या मेळाव्यात प्रामुख्याने दहावी व बारावीनंतरचे महाविद्यालयीन शिक्षण व इतर अभ्यासक्रम, महाविद्यालयीन अभ्यासक्रम प्रवेश प्रक्रिया, शैक्षणिक शिष्यवृत्ती योजना, कर्ज योजना या विषयावर तज्ञामार्फत मार्गदर्शन केले जाणार आहे. हदगाव तालुक्यातील विद्यार्थी, पालक व शिक्षकांनी https://mahacareer.globalsapio.com/ या गुगल फॉर्म लिंकवर नोंदणी करुन या मेळाव्यात सहभागी व्हावे, असे आवाहन संयोजक समितीच्यावतीने करण्यात आले आहे.

0000

23.5.2023.

 मुख्यमंत्री रोजगार निर्मिती कार्यक्रम 

योजनेत ऑनलाईन अर्ज करण्याचे आवाहन

नांदेड (जिमाका) दि. 23 :- राज्यात बेरोजगार उत्पादन उद्योग व सेवा उद्योगांसाठी मुख्यमंत्री रोजगार निर्मिती कार्यक्रम ही योजना राबविण्यात येते.  या योजने अंतर्गत सेवा उद्योगासाठी 20 लक्ष रुपये मर्यादेपर्यंत व उत्पादन उद्योगासाठी 50 लक्ष रुपयांपर्यत बँकेमार्फत अर्थसहाय्य दिले जाते. या योजनेत इच्छुक अर्जदारांनी https/maha-cmegp.gov.in या संकेतस्थळावर अर्ज करावेत, असे आवाहन जिल्हा उद्योग केंद्राचे महाव्यवस्थापक यांनी केले आहे.

या योजने अंतर्गत उद्योग विभागामार्फत बँकेच्या कर्ज मंजुरीनंतर जास्तीत जास्त 35 टक्के पर्यत (जात प्रवर्ग/उद्योग कार्यक्षेत्रानुसार) अनुदान देय आहे. ऑनलाईन केलेल्या कर्ज प्रकरणांची दरमहा छानणी नंतर ऑनलाईन कर्ज प्रस्ताव मंजुरीसाठी शिफारस करण्यात येतात व कर्ज मंजुरी /वाटपानंतर अनुदान ऑनलाईन बँकेत जमा करण्यात येते. या योजनेअंतर्गत अर्ज करण्यासाठी ऑनलाईन पोर्टलवर अपलोड करण्यासाठी लागणारे कागदपत्राची यादी पुढीलप्रमाणे आहे. पासपोर्ट आकाराचे फोटो, आधार कार्ड, पॅन कार्ड, वयाचा दाखला (टीसी), डोमिसाईल /रहिवासी प्रमाणपत्र, अनुसूचित जाती-जमातीसाठी जात प्रमाणपत्र, ग्रामीण भागासाठी गावाचा लोकसंख्येचा दाखला/प्रमाणपत्र (ग्रामसेवक यांचे), हमीपत्र (अंडरटेकींग फॉर्म) वेबसाइटवरील मेन्युबारमध्ये उपलब्ध, प्रकल्प अहवाल इ. कागदपत्रे 300 केबी (KB) पर्यत असावे. तसेच हमीपत्र व प्रकल्प अहवाल 1 (Mb) एमबी पर्यत असावे असे जिल्हा उद्योग केंद्राच्यावतीने कळविण्यात आले आहे.

00000

23.5.2023.

 न्युक्लीअस बजेट योजनेत अर्ज करण्यासाठी 31 मे पर्यत मुदतवाढ 

नांदेड (जिमाका) दि. 23 :- एकात्मिक आदिवासी विकास प्रकल्प कार्यालय किनवट अंतर्गत अनुसूचित जमातीच्या लाभार्थ्यासाठी न्युक्लीअस बजेट योजना राबविण्यात येते. या योजनेअंतर्गत सन 2022-23 अंतर्गत अ गटातील वैयक्तीक व सामुहिक लाभाच्या योजना राबविण्यासाठी 17 एप्रिल ते 17 मे 2023 या कालावधीत लाभार्थ्यांकडून अर्ज मागविण्यात आले होते.

 

तथापि प्रकल्पातील नागरिकांच्या मागणीनुसार न्युक्लीअस बजेट योजना सन 2022-23 अंतर्गत अ गटातील वैयक्तीक व सामुहिक योजनांचे व शबरी घरकुल योजनेचे अर्ज वाटप व स्विकारण्यासाठी 31 मे 2023 पर्यत मुदतवाढ दिली आहे.  या योजनेसाठी लाभार्थ्यांनी 31 मे 2023 पर्यत अर्ज सादर करावेत, असे आवाहन एकात्मिक आदिवासी विकास प्रकलपाच्या सहाय्यक जिल्हाधिकारी तथा प्रकल्प अधिकारी नेहा भोसले यांनी केले आहे.

0000

 शासन आपल्या दारी” अभियानाच्या यशस्वीतेसाठी सर्व शासकिय यंत्रणा दूत म्हणून देईल योगदान

- जिल्हा परिषदेच्या मुख्य कार्यकारी अधिकारी वर्षा ठाकूर-घुगे

नांदेड येथे 1 जून रोजी शासन आपल्या दारी उपक्रमाचे आयोजन

शासकीय योजनांची माहिती व लाभ देण्यासाठी कार्यक्रमस्थळी शासनाच्या सर्व विभागाच्या स्टॉलचे नियोजन

प्रातिनिधिक लाभार्थी व प्रगतशील शेतकऱ्यांचा होणार सन्मान

नांदेड (जिमाका) दि. 23 :- दुर्गम भागासह खेड्यापाड्यातील लोकांपर्यंत शासनाच्या विविध योजना पोहचाव्यात यासाठी जिल्हा प्रशासनातर्फे दक्षता घेतली जात आहे. लाभार्थ्यांना पात्रतेनुसार शासकीय योजनांच्या लाभातून विकासाचा मार्ग गाठता यावा या उद्देशाने “शासन आपल्या दारी” हा महत्वाकांक्षी प्रकल्प शासनाने हाती घेतला आहे. या कार्यक्रमाच्या यशस्वीतेसाठी जिल्ह्यातील सुमारे 21 हजारांपेक्षा अधिक शासकीय अधिकारी-कर्मचारी आपल्या कर्तव्यासह सामाजिक उत्तरदायित्वाच्या भावनेतून योगदान देतील, असा विश्वास जिल्हा परिषदेच्या मुख्य कार्यकारी अधिकारी वर्षा ठाकूर-घुगे यांनी व्यक्त केला. हा उपक्रम नांदेड जिल्ह्यात व्यापक होण्यासाठी सर्वांनी योग्य ती दक्षता घेऊन कटिबद्ध व्हावे असे आवाहनही त्यांनी केले.

“शासन आपल्या दारी” या अभियानानिमित्त विशेष कार्यक्रमासाठी महाराष्ट्राचे मुख्यमंत्री एकनाथ शिंदे यांचा 1 जून रोजी प्रस्तावित नांदेड जिल्हा दौरा देण्यात आला आहे. त्यांच्या हस्ते या अभिनव उपक्रमाचा शुभारंभ केला जाणार आहे. यासंदर्भात आज येथील डॉ. शंकरराव चव्हाण जिल्हा नियोजन भवन येथे अधिकाऱ्यांच्या आयोजित बैठकीत त्या बोलत होत्या. या बैठकीस दूरदृष्यप्रणालीद्वारे खासदार हेमंत पाटील, आमदार बालाजी कल्याणकर, मुख्यमंत्री यांचे खाजगी सचिव डॉ. अमोल शिंदे, प्रभारी जिल्हाधिकारी पांडुरंग बोरगावकर, जिल्हा पोलीस अधिक्षक श्रीकृष्ण कोकाटे, मनपा आयुक्त डॉ. सुनिल लहाने, उपजिल्हाधिकारी संतोषी देवकुळे, जिल्हा परिषदेचे अतिरिक्त मुख्य कार्यकारी अधिकारी संदीप माळोदे, जिल्हा नियोजन अधिकारी सुधाकर आडे, उपविभागीय अधिकारी, तहसिलदार, गटविकास अधिकारी, विविध विभागाचे विभाग प्रमुख यांची प्रत्यक्ष उपस्थिती होती.

सर्वच नागरिकांना शासनाच्या संबंधित विभागाकडे जाऊन योजनेचा लाभ घेता येऊ शकेल असे शक्य होत नाही. असंख्य नागरिक हे शासनाच्या विविध योजनांचा लाभ घेण्यासाठी पात्र असूनही केवळ संबंधित शासकीय कार्यालयापर्यंत पोहचवू शकत नसल्यामुळे शासनाच्या योजनांपासून वंचित राहतात. शासकीय योजनांसाठी पात्र असलेले लाभधारक व शासन यांच्यामध्ये अधिक समन्वय व्हावा व जबाबदार शासनाचा प्रत्यय सर्वसामान्यांना मिळावा यासाठी शासनाने “शासन आपल्या दारी” ही अभिनव योजना हाती घेतली आहे.

या उपक्रमासाठी सर्वांचा सहभाग हा महत्वाचा असून सर्व विभागामार्फत देण्यात येणारे लाभ एकाच दिवशी विक्रमी लाभार्थ्यांपर्यंत पोहोचविण्याचा महत्वाकांक्षी संकल्प आहे. या अभियानाच्या माध्यमातून जिल्ह्यातील कृषी, आरोग्य, रोजगार व स्वयंरोजगार, कामगार विभाग यांनी त्यांच्यामार्फत देण्यात येणाऱ्या योजनांची माहिती शेवटच्या लाभार्थ्यांपर्यत पोहोचविण्यासाठी यंत्रणांनी सुक्ष्म नियोजन करणे आवश्यक असल्याचे वर्षा ठाकूर-घुगे यांनी सांगितले.

या उपक्रमात जिल्ह्याचे वैशिष्ट्यपूर्ण माहितीचे प्रदर्शन घडेल अशा बाबींच्या प्रदर्शनाचे स्टॉल उभारण्यात यावेत. आदिवासी भागातील लाभार्थ्यानी बाबुपासून तयार केलेल्या वस्तु, आदिवासीचे नृत्य, सांस्कृतिक कार्यक्रम, कृषी वर आधारित सोयाबिन, करडी पिके, मानव विकास अंतर्गत माझी मुलगी या अभियान, होट्टल येथील शिल्पकलेसह जिल्ह्यातील अशा वैशिष्टपूर्ण बाबींची माहिती या उपक्रमाच्या माध्यमातून दाखविण्याचे नियोजन तालुका पातळीवरील यंत्रणानी करावे असेही त्यांनी सांगितले.

किनवट, हदगाव, इस्लापूर तालुक्यातील आदिवासी बांधवांपर्यंत ही योजना पोहचावी

- खासदार हेमंत पाटील

नांदेड जिल्ह्याचा विस्तार मोठा आहे. किनवट, हदगाव, इस्लापूर, मांडवी आदी भागातील नागरिकांना तालुका व जिल्हा पातळीवर असलेल्या शासकीय कार्यालयापर्यंत पोहचणे शक्य होईलच असे नाही. असा नागरिकांनाही विकासाच्या कक्षेत घेण्यासाठी संबंधित अधिकाऱ्यांनी अधिक दक्षता घेतली पाहिजे. “शासन आपल्या दारी” ही अभिनव योजना या दृष्टिकोनातून खूप महत्वाची असल्याचे प्रतिपादन खासदार हेमंत पाटील यांनी केले. व्हिडिओ कॉन्फरन्सिंगद्वारे त्यांनी आपला सहभाग घेतला. जात प्रमाणपत्र पडताळणीबाबत या ग्रामीण भागातील विद्यार्थ्यांना त्रास सहन करावा लागतो. अशा कामात विद्यार्थ्यांचे शैक्षणिक वर्षे लक्षात घेता त्यांची कोणतीही अडचण होणार नाही याबाबत दक्षता घ्यावी, असे त्यांनी सांगितले. आमदार बालाजी कल्याणकर यांनी बैठकीत सूचना केल्या.

00000