मौजे धनगरवाडी येथे ड्रोनद्वारे गावठाण भूमापन कामाचे सर्वेक्षण

 जिल्हाधिकारी व मुख्य कार्यकारी अधिकारी यांच्याकडून पाहणी

नांदेड, (जिमाका) दि. 20 :- भूमि अभिलेख विभाग व भारतीय सर्वेक्षण विभाग डेहराडून यांच्या संयुक्त सहभागाने महाराष्ट्रातील गावठाण भूमापन न झालेल्या गावांचे ड्रोन गावठाण भूमापन काम सुरु आहे. नांदेड तालुक्यातील मौजे धनगरवाडी येथे सुरु असलेल्या गावठाण भूमापन सर्वेक्षण कामाची 19 जानेवारी रोजी जिल्हाधिकारी डॉ. विपीन इटनकर व जिल्हा परिषदेच्या मुख्य कार्यकारी अधिकारी वर्षा ठाकूर यांनी पाहणी केली. तसेच नांदेड व हिमायतनगर तालुक्यात सुरु असलेल्या सर्व्हेक्षण कामात ग्रामपंचायत कर्मचारी व जनतेने सर्व्‍हेक्षण करणाऱ्या पथकांना सहकार्य करावे व मिळकतीचे सिमांकन करुन घ्यावे, असे आवाहन जिल्हा अधीक्षक भूमि अभिलेख सुरेखा सेठिया यांनी  केले. 

 जिल्हाधिकारी डॉ. विपीन इटनकर व जिल्हा परिषदेच्या मुख्य कार्यकारी अधिकारी वर्षा ठाकूर पहाणी करतेवेळी गावातील नागरीकांना गावठाण भुमापन कामाचे महत्व पटवुन दिले. यासाठी ग्रामविकास विभागाच्या 22 फेब्रुवारी 2019 रोजीच्या शासन निर्णयान्वये जीआयएस आधारे गावांच्या गावठाणातील मिळकतींचे सर्व्हेक्षण पूर्ण करण्यात येणार आहे. संगणीकृत नकाशे, सनद व मिळकत पत्रिका तयार होणार आहेत. या गावठाण भुमापनामुळे जिल्हयातील गावठाणातील घरांचे नकाशा व सिमा निश्चित होतील. मिळकतीचे नेमके क्षेत्र किती आहे त्याची नोंद होईल. ग्रामस्थांचे नागरी हक्काचे संवर्धन होईल. गावातील रस्ते, शासनाच्या, ग्रामपंचायतीच्या खुल्या जागा, नाले यांच्या सिमा निश्चित होवून अतिक्रमण रोखता येईल. मिळकत पत्रिका तयार झाल्यामुळे मिळकत धारकांना घरावर कर्ज घेणेची सुविधा उपलब्ध होईल. ग्रामपंचायतींना गावातील कर आकारणी, बांधकाम परवानगी यासाठी अभिलेख व नकाशा उपलब्ध होतील. 

यावेळी जिल्हा अधीक्षक भुमि अभिलेख श्रीमती सुरेखा सेठीया यांनी प्रत्यक्ष गावठाण ड्रोनसर्व्हेची माहिती दिली. त्यावेळी भारतीय सर्व्हेक्षण विभागाचे सर्व्हेक्षक एस. विनोदकुमार यांनी ड्रोनव्दारे मिळकतीच्या प्रत्यक्ष चालु असलेल्या मोजणी कामाची माहिती दिली. त्यावेळी पंचायत समितीचे गट विकास अधिकारी यु.डी.तोटावाड, विस्तार अधिकारी,  ग्रामसेवक व ग्रामपंचायत  प्रशासक हे उपस्थित होते.

00000