हिब्बट, माळाकोळीतील भूगर्भातील आवाज

नैसर्गिक परिस्थितीत न घाबरता

सावधगिरी बाळगण्याचे आवाहन

नांदेड, दि. 30 :- नांदेड जिल्हयातील मुखेड तालुक्यात हिब्बट आणि लोहा तालुक्यात माळाकोळी येथे भूगर्भातील आवाज आणि भुकंपांच्या अनुषंगाने जिल्हाधिकारी अरुण डोंगरे यांनी स्वामी रामानंद तीर्थ मराठवाडा विद्यापिठातील भू-भौतिकी विभागाचे वरीष्ठ अॅसोसिएट प्रोफेसर डॉ. टी. विजय कुमार यांच्यासोबत नुकतीच चर्चा केली आहे.

यावेळी डॉ. विजय कुमार यांनी पावसाचे जास्त प्रमाण असल्यास भूगर्भात जमा होणारे पाणीसाठे आणि जमिनीतील फॉल्ट तथा प्लेटांचे घर्षण बेसॉल्ट खडक, अंतर्गत खनिज यांच्याशी संयुग होऊन मुक्त होणाऱ्या वायुमुळे हे आवाज निर्माण होतात. ही नैसर्गिक प्रक्रिया असून अशी परिस्थिती निर्माण झाल्यास नागरिकांनी न घाबरता सावधगिरी बाळगण्याचे आवाहन केले आहे. जमिनीत होणाऱ्या आवाजांची नोंद ही भूकंपमापक यंत्रावर होत नसुन भूकंपाच्या तिव्रतेची नोंद होते, असे सांगितले.

हिब्बाट आणि माळाकोळी येथे जमीनीतुन ध्वनिक उत्सर्जन आणि भूकंपाच्या हालचाली वारंवार अनुभविण्यात येत असल्याने जिल्हा प्रशासनाने वेळीच याची माहिती राज्य आपत्ती व्यवस्थापन प्राधिकरण मंत्रालय मुंबई, भूकंप अन्वेषण केंद्र केंद्रीय पृथ्वी विज्ञान विभाग नवी दिल्ली आणि भारतीय भू-वैज्ञानिक सर्वेक्षण नागपुर यांना वेळोवेळी निदर्शनास आणुन दिले आहे, यावर संशोधन सुरु आहे.

जिल्हाधिकारी अरुण डोंगरे यांनी नुकतेच 25 नोव्हेंबर रोजी स्वामी रामानंद तिर्थ मराठवाडा विद्यापिठातील भू-भौतिकी विभागाचे वरीष्ठ अॅसोसिएट प्रोफेसर डॉ. टि. विजय कुमार यांच्यासोबत एक तास चर्चा केली. नांदेड आणि सभोवतालचा प्रदेश हा सेस्मिक झोन- 2 या श्रेणीत येत असुन सोलापुर पासुन तेलंगना राज्यातील बोधनपर्यंत संपुर्ण भूगर्भाची स्कॅनिंग होत असल्याची आणि ठिकठिकाणी याचे केंद्र उभारण्यात येत असल्याची माहिती त्यांनी यावेळी दिली.

ग्रामीण भागातील अनेक घर कच्चे आणि पत्र्याचे असतात तसेच त्यावर मोठे लाकडाचे ओडके, खोड किंवा वजनदार दगड ठवले असतात ते अतिशय धोकादायक ठरतात. कारण भूकंपाच्यावेळी हे खाली पडुन मोठी जीवितहानी करतात. दोषपुर्ण बांधकाम हे भूकंपात फार जास्त धोकादायक ठरतात. भूकंपाच्यावेळी सावधानता बाळगाने हे सगळयात जास्त महत्वाचे असल्याचे त्यांनी यावेळी सांगितले, अशी माहिती निवासी उपजिल्हाधिकारी नांदेड यांच्या कार्यालयाकडून देण्यात आली आहे.

00000