जिल्हा वार्षिक योजनेच्या

प्रारूप आराखड्यास मान्यता

औरंगाबाद येथे राज्यस्तरीय बैठक संपन्न

नांदेड , दि. 1 :- जिल्हा नियोजन समितीच्या सर्वसाधारण जिल्हा वार्षिक योजनेचा सन 2017-18 चा प्रारूप आराखडा अंतिम करण्यासाठी आज औरंगाबाद विभागीय आयुक्त कार्यालय येथे राज्यस्तरीय बैठक संपन्न झाली. या बैठकीत नांदेडच्या सर्वसाधारण जिल्हा वार्षिक योजनेच्या सन 2017-18 साठी 215 कोटी 26 लाख रुपयांच्या प्रारूप आराखड्यास मान्यता देण्यात आली. राज्याचे वित्त व नियोजन, वने मंत्री सुधीर मुनगंटीवार यांच्या अध्यक्षतेखाली झालेल्या या बैठकीस वित्त व नियोजन राज्यमंत्री दिपक केसरकर, पशुसंवर्धन, दुग्धविकास, मत्स्यव्यवसाय आणि वस्त्रोद्योग राज्यमंत्री तथा नांदेड जिल्ह्याचे पालक मंत्री अर्जून खोतकर यांचीही प्रमुख उपस्थिती होती.

बैठकीस नियोजन विभागाचे प्रधान सचिव सुनिल पोरवाल, विभागीय आयुक्त पुरूषोत्तम भापकर, उपायुक्त नियोजन विजय आहेर, नांदेडचे प्रभारी जिल्हाधिकारी संतोष पाटील, मुख्य कार्यकारी अधिकारी अशोक शिनगारे, मनपा आयुक्त समीर उन्हाळे, जिल्हा नियोजन अधिकारी सुरेश थोरात, उपवनसंरक्षक सुजय डोडल, जिल्हा अधीक्षक कृषी अधिकारी डॅा. तुकाराम मोटे, कार्यकारी अभियंता व्ही. पी. शाहू आदींसह विविध विभागाच्या अधिकाऱ्यांचीही उपस्थिती होती.

बैठकीत सर्वसाधारण जिल्हा वार्षिक योजना 2017-18 च्या 215 कोटी 26 लाख रुपयांच्या प्रारूप आराखड्यास मान्यता देण्यात आली. तसेच अतिरिक्त निधीच्या मागणीबाबतचा प्रस्तावही आगामी काळात विचारात घेण्यात येईल, असे सांगण्यात आले. बैठकीत विभागनिहाय विविध योजना व त्याअनुषंगाने मागण्या व तरतुदींचाही आढावा घेण्यात आला.

000000

 वेतन पडताळणी पथकाचा दौरा

नांदेड, दि. 1 :- वेतन पडताळणी  पथकाचा माहे मार्च 2017 चा नांदेड जिल्हा दौरा कार्यक्रम खालील प्रमाणे आयोजित केला आहे, असे सहसंचालक लेखा व कोषागारे औरंगाबाद यांनी कळविले आहे. 

हे पथक मंगळवार 21 मार्च 2017 रोजी पोलीस अधिक्षक कार्यालय व बुधवार 22 मार्च ते शुक्रवार 24 मार्च 2017 काळात जिल्हा व तालुका स्तरावरील इतर कार्यालयाची वेतन पडताळणी करील. त्यासाठी  हे पथक या कालावधीत जिल्हा कोषागार कार्यालय नांदेड येथे उपस्थित राहील.

वेतन पडताळणीस सेवा पुस्तके सादर करण्यापुर्वी शासन निर्णय वित्त विभाग क्र. वेपुर 1299/प्र.क्र.5/99/सेवा-10 दि. 20 जानेवारी 2001 चे सोबत जोडलेले विवरणपत्र संबंधितांच्या सेवा पुस्तकात लावून त्याप्रमाणे सेवा पुस्तके पडताळणीस सादर करावीत. सेवा पुस्तके पडताळणीस सादर करताना पुढील एक वर्षात सेवा निवृत्ती होणारी प्रकरणे, मयत, न्यायालयीन, लोकायुक्त प्रकरणे प्राधान्याने सादर करावीत. सेवा पुस्तके पडताळणी पथकाकडे सादर करताना संबंधित आहरण व संवितरण अधिकारी यांनी महाकोष मधील वेतनिका प्रमाणित डीडीओ लॉगीन करावे डीडीओ लॉगीन करण्यासाठी बीडीएससाठी वापरण्यात येत असलेले युजरनेम आणि पासवर्ड वापरावे. ज्या कर्मचाऱ्यांची सेवापुस्तके पडताळणीसाठी सादर करावयाची आहे त्या कर्मचाऱ्यांचे सेवार्थ Employee ID टाकून Submit करावे. म्हणजे लेखाधिकारी, वेतन पडताळणी पथक यांच्या नावाने कर्मचाऱ्यांच्या तपशिलासह पत्र तयार होईल. त्याच पत्रासह सेवापुस्तके पडताळणीसाठी  पथकाकडे  सादर  करावीत, असे सूचित केले आहे.  

लोकशाही दिनाचे 6 मार्च रोजी आयोजन

नांदेड, दि. 1 :- सामान्य जनतेच्या तक्रारी, अडचणी ऐकून घेऊन त्या सोडविण्यासाठी राज्य शासनाच्यावतीने प्रत्येक महिन्याचा पहिला सोमवार लोकशाही दिन आयोजित करण्‍यात येतो. त्यानुसार सोमवार 6 मार्च 2017 रोजी दुपारी 1 ते 3 वाजेपर्यंत जिल्हाधिकारी कार्यालयात लोकशाही दिन आयोजित केला आहे. यासाठी अर्ज स्विकारण्‍याचे व न स्विकारण्‍याबाबतच्‍या निकषांचीही नागरिकांनी नोंद घ्‍यावी. तक्रार किंवा निवेदन वैयक्तिक स्‍वरुपाचे नसेल तर असे अर्ज स्विकारण्‍यात येणार नाहीत. त्‍यामुळे केवळ वैयक्तिक स्‍वरुपाच्‍या तक्रारी, निवेदन, अर्ज सादर करावेत असे आवाहन जिल्‍हा प्रशासनाच्‍यावतीने करण्‍यात आले आहे.

यादिवशी महसूल, गृह, ग्रामविकास, पाटबंधारे, बांधकाम, परिवहन, सहकार, कृषि विभागाचे जिल्हा स्तरावरील प्रमुख अधिकारी व जिल्हा पाणी पुरवठा समन्वय अधिकारी व ज्या कार्यालयाचे लोकशाही दिनात प्रलंबित प्रकरणे आहेत असे अधिकारी जिल्हाधिकारी कार्यालय प्रांगणातील बचत भवन येथे उपस्थित राहतील. दुपारी 12 वाजेपासून निवेदनाची नोंदणी सुरु होणार आहे. त्यानंतर लगेचच प्राप्त झालेल्या अर्जावर, निवेदनावर म्हणणे ऐकूण घेण्याच्या कामास  सुरुवात करण्यात येईल.  

न्याप्रविष्ट, राजस्व तसेच अपिलातील सेवाविषयक, आस्थापना विषयक तसेच विहीत नमुन्यात नसलेले अर्ज, अंतिम उत्तर दिलेले आहे, किंवा देण्यात येणार असलेले अर्ज, तसेच तक्रार निवेदन वैयक्तीक स्वरुपाचे नसेल, तर असे अर्ज स्विकारण्यात येणार नाहीत. अर्ज स्विकृतीसाठी विहीत नमुन्यात तसेच तक्रार व निवेदन वैयक्तीक स्वरुपाचेच असावे. अर्जदाराने विहीत नमुन्यात पंधरा दिवस अगोदर दोन प्रतींमध्ये जिल्हाधिकारी कार्यालय येथे अर्ज पाठविणे आवश्यक आहे. तालुकास्तरावर अर्ज दिल्यानंतर एक महिन्यांनंतर जिल्हाधिकारी कार्यालय येथे लोकशाही दिनामध्ये अर्ज करता येणार आहे.

लोकशाही दिना दिवशी प्राप्त होणाऱ्या जनतेच्या तक्रारी, अडचणी एकत्रीतरीत्या समजावून घेऊन त्या शक्य तितक्या लवकर सोडविण्यात येतील ज्या प्रकरणात कालावधी लागणार आहे अशा प्रकरणी पुढील  महिन्याच्या पहिल्या सोमवारी होणाऱ्या उपक्रमात मागील अर्जावर कार्यवाहीची माहिती देण्यात येईल , असे जिल्हाधिकारी नांदेड यांनी कळविले आहे.

000000

डिजीटल प्रदानांतर्गत ‘डिजीधन’ मेळावा

6 ऐवजी 24 मार्च रोजी होणार

नियोजन भवन येथे आयोजन

नांदेड दि. 28 :- केंद्र शासनाच्या निती आयोगाच्या धोरणानुसार डिजीटल प्रदान मोहिमे अंतर्गत राज्यभरात डिजीधन मेळावे आयोजित करण्यात येत आहेत. नांदेड जिल्ह्यात अशा या डिजीधन मेळाव्याचे सोमवार 6 मार्च 2017 रोजी आयोजन करण्यात येणार होते. तथापी निती आयोगाच्या बदललेल्या वेळापत्रकानुसार हा मेळावा शुक्रवार 24 मार्च 2017 रोजी आयोजित करण्यात येणार असल्याचे , जिल्हा प्रशासनाच्यावतीने कळविण्यात आले आहे. 

जिल्हाधिकारी कार्यालयाच्या प्रांगणातील डॅा. शंकरराव चव्हाण नियोजन भवन परिसरात या मेळाव्याचे आयोजन करण्यात येणार आहे. नियोजन भवन मध्ये मुख्य कार्यक्रम होणार आहे. या मेळाव्यात डिजीटल प्रदानाशी निगडीत बँका, तसेच विविध व्यापारी कंपन्या, शासकीय विभाग आदी सहभागी होणार आहेत.

 रोकडरहित व्यवहारांना प्रोत्साहन देण्यासाठी तसेच डिजीटल व्यवहारांची माहिती व्हावी या उद्देशाने आयोजित या मेळाव्यात डिजीटल व्यवहार करणाऱ्यांसाठीच्या भाग्यवान बक्षीस विजेत्यांनाही सन्मानित करण्यात येणार आहे. या मेळाव्यात बँका व इतर सहभागी घटक विविध दालनांद्वारे डिजीटल प्रदानाच्या व्यवहारांची प्रात्यक्षिके, माहिती देणार आहेत.

0000000

पोलीस, सैन्यदल पूर्व प्रशिक्षणासाठी   

गुरुवारी नांदेड येथे निवड शिबीर

अ.जा., नवबौद्ध घटकातील तरुणांसाठी संधी

नांदेड दि. 28 :- अनुसूचित जाती व नवबौध्द  घटकातील युवक व युवतींसाठी अमरावती येथे आयोजित सैन्य व पोलीस भरती पूर्व प्रशिक्षणासाठी गुरुवार 2 मार्च 2017 रोजी नांदेड जिल्हयातील उमेदवारांची निवड करण्यात येणार आहे. त्यासाठी इच्छुकांनी उपस्थित रहावे, असे आवाहन सहाय्यक आयुक्त समाज कल्याण नांदेड यांनी  केले आहे.

            सामाजिक न्याय व सांस्कृतिक कार्य, क्रीडा व विशेष सहाय्य विभागाने अनुसूचित जाती व नवबौध्द घटकातील युवक व युवतींसाठी सैन्य व पोलीसमध्ये भरती करण्याकरिता भरतीपुर्व प्रशिक्षण कार्यक्रम मंजूर केला आहे. प्रशिक्षणाचा कालावधी तीन महिन्यांचा असून प्रशिक्षण श्री हनुमान व्यायाम प्रसारक मंडळ अमरावती येथे होणार आहे. प्रशिक्षणार्थी 38 पैकी 30 टक्के महिला आरक्षण असल्याने 27 पुरुष व 11 महिला प्रशिक्षणार्थीची निवड करण्यात येणार आहे. अनुसूचित जाती व नवबौध्द घटकातील युवकांसाठी सैन्य व भरतीपुर्व प्रशिक्षणासाठी पात्र अटी व शर्ती खालीलप्रमाणे आहेत.

            उमेदवार हा महाराष्ट्रातील अनुसूचित जाती व नवबौध्द घटकातील असावा. उमेदवाराचे वय हे 18 ते 25 वयोगटातील असावे. उमेदवाराची पुरुष उंची 165 से.मी व महिला उंची 155 से.मी. छाती न फुगवता पुरुष 79 से.मी. (फुगवुन 84 से.मी. ) असावी. शैक्षणिक पात्रता इयत्ता 12 वी पास. जातीचे प्रमाणपत्र, रहिवासी दाखला, सेवायोजन कार्यालयातील नोंदणी आणि ओळखपत्राची सत्यप्रत देणे आवश्यक राहील. उमेदवार हा शारीरीक व मानसिक दृष्टया निरोगी असावा.

            प्रशिक्षणाच्या निवडीसाठी नांदेड जिल्हयातील अनुसूचित जाती व नवबौध्द घटकातील युवक, युवतीनी गुरुवार 2 मार्च 2017 रोजी सकाळी 10 ते सायंकाळी 5 वाजेपर्यत डॉ. बाबासाहेब आंबेडकर सामाजिक न्याय भवन, ग्यानमाता शाळेच्या समोर, नमस्कार चौक, नांदेड येथे मूळ कागदपत्रासह व साक्षांकित प्रतीसह उपस्थित राहावे. उपस्थित राहणाऱ्या उमेदवारांना जाण्या-येण्याचा भत्ता दिला जाणार नाही याची नोंद घ्यावी, असेही आवाहन समाज कल्याणचे सहाय्यक आयुक्त बी. एन. वीर यांनी यांनी केले आहे.

00000

दहावी, बारावी परीक्षा केंद्रांच्या

 परिसरात प्रतिबंधात्मक आदेश

नांदेड, दि. 28 :-  जिल्ह्यात बारावीच्या (उच्च माध्यमिक शालांत प्रमाणपत्र) परीक्षा केंद्र परिसरात 28 फेब्रुवारी 2017 ते 25 मार्च 2017 या कालावधीत व दहावी (माध्यमिक शालांत प्रमाणपत्र) परीक्षा केंद्र  परिसरात 7 मार्च 2017 ते 1 एप्रिल 2017 या कालावधीत प्रतिबंधात्मक आदेश लागू केल्याचे जिल्हादंडाधिकारी नांदेड यांनी कळविले आहे.

उच्च माध्यमिक शालांत प्रमाणपत्र परीक्षा केंद्रावर 28 फेब्रुवारी ते 25 मार्च या कालावधीत व माध्यमिक शालांत प्रमाणपत्र परीक्षा केंद्रावर 7 मार्च ते 1 एप्रिल या कालावधीत होत आहेत. या परीक्षा केंद्रापासून 100 मीटरच्या परिसरात फौजदारी प्रक्रिया संहिता 1973 चे कलम 144 अन्वये सकाळी 8 वाजेपासून सायंकाळी 6 वाजेपर्यंत परीक्षार्थी व परीक्षेच्या कामाशी संबंधीत असलेले अधिकारी व कर्मचारी या व्यतिरिक्त इतर कोणत्याही व्यक्तीस प्रवेश करता येणार नाही. तसेच या वेळेत परीक्षा केंद्राच्या परिसरातील 100 मीटर पर्यंतची सर्व सार्वजनिक टेलिफोन्स एसटीडी, आयएसडी, भ्रमणध्वनी, फॅक्स, झेरॉक्स आणि ध्वनीक्षेपक चालू ठेवण्यास प्रतिबंध करण्यात आले आहे.  

000000

आदिवासी क्षेत्रातील शिक्षकांचे

नेत्र विषयक प्रशिक्षण संपन्न

नांदेड, दि. 27 –  उपजिल्हा रुग्णालय  गोकुंदा येथे 21 व 22 फेब्रुवारी रोजी शासनाच्या दृष्टीदान योजने अंतर्गत  शिक्षकांच्या प्राथमिक दृष्टी तपासणी प्रशिक्षण कार्यक्रम जिल्हा रुग्णालय नांदेड यांचे मार्फत घेण्यात आला. या प्रशिक्षणात शालेय स्तरावर विद्यार्थ्याची दृष्टी तपासून अंशतः ज्या विद्यार्थ्यांची दृष्टी कमी आहे त्यांना संदर्भीत करण्याचे प्रत्याक्षित दाखवून शिक्षकांकडून प्रत्याक्षित करून घेण्यात आले व त्याचा सराव ही करून घेण्यात आला.

शिक्षकांना आवश्यक साहित्य उदा E-chart, मोजपट्ठी टेप, रजिस्टर, संदर्भित करावयाचे कार्ड, पेन इत्यादीचे फोल्डर देण्यात आले. जेणे करून शिक्षकांना काम करताना सोयीचे होईल. ज्या विद्यार्थ्यांची दृष्टी कमी आहे त्यांना शालेयस्तरावरच तपासून  संदर्भीत करण्यात येईल म्हणजे त्यांचा नेत्रविकार दूर होऊन विद्यार्थ्याची दृष्टी कायम उत्तम राहील व अभ्यासात प्रगती होईल. संदर्भीत विद्यार्थ्याना आवश्यक उपचार शासकीय स्तरावर राष्ट्रीय अंधत्व नियंत्रण कार्यक्रमांतर्गत देण्यात येतील व त्यांचा नेत्रविकार दूर होईल.या प्रशिक्षण आदिवासी भागातील 84 शिक्षकांना ( किनवट व माहूर ) देण्यात आले, ज्या शिक्षकांचे प्रशिक्षण झाले आहे ते शिक्षक त्यांचा शाळेतील इतर शिक्षकांना प्रशिक्षित करणार आहेत.

         या कार्यक्रमासाठी नांदेडचे जिल्हा शल्यचिकित्सक डॉ. बी.पी.कदम, अतिरिक्त जिल्हा शल्य चिकित्सक डॉ गुंटूरकर, निवासी वैद्यकीय अधिकारी डॉ. इंगळे, जिल्हा नेत्र शल्य चिकित्सक डॉ. सिरसीकर, वैद्यकीय अधीक्षक डॉ. विकास जाधव यांचे मार्गदर्शन लाभले. कार्यक्रम यशस्वी करण्यासाठी नेत्रतज्ज्ञ डॉ. उंचेगावकर, डॉ. बंद्रेवार, नेत्र चिकित्सा अधिकारी विवेक दिक्षित, राहुल गोरे, विशाल साळवे व गजानन टेकाळे यांनी परिश्रम घेतले.

000000