वृत्त क्रमांक 

मोटार सायकल वाहनासाठी नवीन मालिका सुरु

नांदेड दि. 8 जून :- परिवहनेतर संवर्गातील मोटार सायकल वाहनांसाठी MH26-DC ही नवीन मालिका लवकरच सुरु होणार आहे. ज्या अर्जदारांना पसंती क्रमांक घ्यावयाचा आहे त्यांचे (आधारकार्ड, पॅनकार्ड, मोबाईल नंबर व ईमेलसह) अर्ज बुधवार 10 जून 2026 रोजी दुपारी 2.30 पर्यंत स्विकारण्यात येणार आहेत. या अर्जासोबत संबंधीत पसंती क्रमांकाच्या शुल्काचा धनादेश (डी.डी) सुध्दा सादर करावा. मुदतीनंतर व वेळेनंतर पसंती क्रमांकासाठी अर्ज स्विकारण्यात येणार नाहीत.

ज्या पसंती क्रमांकासाठी एकापेक्षा जास्त अर्ज प्राप्त झाल्यास  10 जून 2026 रोजी दुपारी 4 वा. दूरध्वनीद्वारे संबंधीत अर्जदारास कळविण्यात येईल. जिल्ह्यातील सर्व संबंधितांनी याची नोंद घ्यावी, असे प्रादेशिक परिवहन अधिकारी नांदेड यांनी केले आहे.

00000

 वृत्त क्रमांक 

अल-निनोच्या जनजागृतीसाठी कृषी विभागाच्या

गावोगावी 13 हजार गाव बैठकांचे आयोजन 

नांदेड, दि. 8 जून : उत्पन्न आणि उत्पादनाच्या दृष्टीने खरीप हंगाम अत्यंत महत्त्वाचा मानला जातो. मान्सूनच्या अनिश्चिततेमुळे पिकांवर विपरीत परिणाम होऊ नये, यासाठी कृषी विभागाने जनजागृती मोहिमेला वेग दिला आहे. यंदा मान्सूनवर ‘अल-निनो’चा प्रभाव पडण्याची शक्यता हवामान विभागाने व्यक्त केल्याने शेतकऱ्यांना योग्य मार्गदर्शन करण्यावर भर दिला जात आहे.

नांदेड जिल्ह्यात आतापर्यंत सुमारे 13 हजार जनजागृती मोहिमा राबविण्यात आल्या असून, एका सहायक कृषी अधिकाऱ्याने सरासरी 37 मोहिमा पूर्ण केल्या आहेत. या मोहिमा पुढेही सुरू राहणार असून, त्यात जास्तीत जास्त शेतकऱ्यांनी सहभागी व्हावे, असे आवाहन जिल्हा अधीक्षक कृषी अधिकारी दत्तकुमार कळसाईत यांनी केले आहे.

कृषी विभागाच्या नियोजनानुसार प्रत्येक सहायक कृषी अधिकाऱ्याने किमान 50 मोहिमा घेणे बंधनकारक करण्यात आले आहे. तसेच पेरणीपासून काढणीपर्यंतच्या सर्व टप्प्यांबाबत शेतकऱ्यांना मार्गदर्शन करणे अनिवार्य करण्यात आले आहे. पेरणीपूर्व काळात प्रत्येक सहायक कृषी अधिकाऱ्याने दोन कार्यशाळांचे आयोजन केले आहे.

गेल्या वर्षी खरीप पिके अंतिम टप्प्यात असताना अतिवृष्टी आणि सततच्या पावसामुळे उत्पादनात घट झाली होती. यंदा पेरणीपूर्वीच ‘अल-निनो’चे संकट निर्माण होण्याची शक्यता असल्याने कृषी विभाग अधिक सतर्क झाला आहे. संभाव्य परिणामांना तोंड देण्यासाठी शेतकऱ्यांना सक्षम करण्याच्या उद्देशाने विविध मोहिमा आणि कार्यशाळा आयोजित केल्या जात आहेत.

या कार्यशाळांचे आयोजन गावांमध्ये लोकप्रतिनिधींच्या सहभागाने सकाळी किंवा रात्री केले जात आहे. विभागीय कृषी सहसंचालक, जिल्हा अधीक्षक कृषी अधिकारी, उपविभागीय कृषी अधिकारी, तालुका कृषी अधिकारी, मंडळ कृषी अधिकारी आणि सहायक कृषी अधिकारी या मोहिमेत सक्रिय सहभाग घेत आहेत.

बदलत्या हवामानाचा विचार करून पीक नियोजन, पीक पद्धतीतील बदल, पाणी व्यवस्थापन आणि इतर आवश्यक कृषी उपाययोजनांबाबत शेतकऱ्यांना सविस्तर मार्गदर्शन करण्यात येत आहे. कृषी विभागाच्या या उपक्रमामुळे शेतकऱ्यांना संभाव्य हवामान बदलांचा सामना करण्यास मदत होणार असल्याचा विश्वास व्यक्त केला जात आहे.

मोहिमांचे स्वरुप काय ?

शेतकऱ्यांच्या कष्टाला योग्य नियोजनाची जोड मिळावी याकरिता कृषी विभागाकडून प्रयत्न केले जात आहेत. यामध्ये पेरणी पुर्व मोहीम व पेरणी पश्चात मोहीमेचा समावेश आहे.

पेरणी पुर्व मोहीम :- माती परीक्षणाच्या आधारे कृषी निविष्ठाच्या वाजवी वापरासाठी मोहीम, टंचाई परिस्थितीत फळबागा वाचविणे व फळबाग लागवडीमध्ये सीआरए तंत्रज्ञानाचा वापर, अल निनो बाबत जागरुकता करणेसाठी शिवार फेरीचे आयोजन, घरगुती चाचणी पद्धतीने बियाण्यांची उगवणक्षमता तपासणी प्रात्यक्षिक मोहीम, बीज प्रक्रिया मोहीम, बीबीएफद्वारे उताराला आडवी पेरणीचा प्रचार व प्रसार करणे, सापळा पिकांची लागवड बाबत प्रचार व प्रसार करणे, शून्य/कमी मशागत पद्धत अवलंब करणे, खरीप हंगाम तयारी व प्रमुख खरीप पिकांच्या तंत्रज्ञान प्रसारासाठी गावनिहाय प्रशिक्षण, पाणी फौंडेशन डिजिटल शेतीशाळा बाबत प्रचार व प्रसिद्धी, मग्रारोहयो अंतर्गत फळबाग लागवड प्रचार व प्रसिद्धी, महाविस्तार ॲप व कृषी विषयक माहिती तंत्रज्ञानाच्या साधने बाबत प्रचार व प्रसिद्धी.

पेरणी पश्चात मोहीम :- हिरवळीच्या खतांची निर्मिती, बायोफर्टीलायझर, बायोपेस्टीसाईड निर्मितीसाठी शेतावर फार्म लॅब स्थापन, निंबोळी अर्क, दशपर्णी अर्क, निमास्त्र, ब्रह्मास्त्र, जीवामृत, बिजामृत, घनजीवामृत यांसारख्या जैविक निविष्ठा निर्मिती करणेबाबत प्रचार प्रसिद्धी करणे,ऊस पाचट व्यवस्थापन,हुमणी कीड एकात्मिक व्यवस्थापन मोहीम,शंखी गोगलगाय निर्मुलन जनजागृती मोहीम,बोंड अळी एकात्मिक व्यवस्थापन मोहीम तसेच कार्यशाळा गावोगावी आयोजित करण्यात येत आहेत.

00000

 वृत्त क्रमांक 

जिल्हा परिषदेत शिवस्वराज्य दिन उत्साहात साजरा;

शिवरायांच्या लोककल्याणकारी विचारांचा आदर्श घेऊन शासनाच्या विविध योजनांची प्रभावी अंमलबजावीसाठी कर्मचाऱ्यांनी कटिबद्ध राहावे- जिल्हाधिकारी राहुल कर्डिले

नांदेड, दि. ६ जून:- छत्रपती शिवाजी महाराजांच्या राज्याभिषेक दिनानिमित्त  नांदेड जिल्हा परिषदेत आज शिवस्वराज्य दिन उत्साहपूर्ण वातावरणात साजरा करण्यात आला. यावेळी शिवरायांच्या लोककल्याणकारी, न्यायप्रिय आणि जनहितवादी प्रशासन व्यवस्थेचा आदर्श घेऊन शासनाच्या विविध विकास योजनांची प्रभावी अंमलबजावणी करण्यासाठी अधिकारी व कर्मचाऱ्यांनी कटिबद्ध राहावे, असे आवाहन जिल्हाधिकारी राहुल कर्डिले यांनी केले. 

कार्यक्रमास जिल्हा परिषदेच्या मुख्य कार्यकारी अधिकारी तथा प्रशासक मेघना कावली, पोलीस उपमहानिरीक्षक शहाजी उमाप, जिल्हा ग्रामीण विकास यंत्रणेचे प्रकल्प संचालक डॉ. संजय तुबाकले, उपमुख्य कार्यकारी अधिकारी राजकुमार मुक्कावार, मुख्य लेखा व वित्त अधिकारी महेश देशमुख यांच्यासह विविध विभागांचे अधिकारी उपस्थित होते.

कार्यक्रमाच्या प्रारंभी जिल्हाधिकारी राहुल कर्डिले व मुख्‍य कार्यकारी अधिकारी मेघना कावली यांच्या हस्ते छत्रपती शिवाजी महाराजांच्या प्रतिमेस पुष्पहार अर्पण करण्यात आला. तसेच गुढीपूजन व गुढी उभारणी करून शिवस्वराज्य दिन साजरा करण्‍यात आला. श्री चैतन्य इंग्लिश स्कूलच्या विद्यार्थ्यांनी राष्ट्रगीत व महाराष्ट्र गीत सादर करून कार्यक्रमाची सुरुवात केली.

यावेळी राहुल कर्डिले म्हणाले, छत्रपती शिवाजी महाराजांनी रयतेच्या कल्याणासाठी आदर्श प्रशासन उभे केले. शेतकऱ्यांना मदत, सिंचन व्यवस्थेचा विकास, न्याय्य कारभार आणि दूरदृष्टीपूर्ण नियोजन यामुळे त्यांचे राज्य लोकाभिमुख ठरले. प्रत्येक अधिकारी आणि कर्मचाऱ्याने आपल्या कामातून शिवरायांच्या प्रशासनाची मूल्ये जपली पाहिजेत, असेही ते म्‍हणाले. 

कार्यक्रमात शाहीर रमेश गिरी आणि त्यांच्या सहकाऱ्यांनी पोवाडे व शाहिरी सादर करून उपस्थितांना शिवचरित्राची प्रेरणादायी आठवण करून दिली. उपस्थित मान्यवरांचा शाल, पुस्तक आणि जिल्हा परिषदेचा लोगो असलेला स्मृतिचिन्ह कप देऊन सत्कार करण्यात आला. कार्यक्रमाचे प्रास्ताविक डॉ. संजय तुबाकले यांनी केले. सूत्रसंचालन पद्माकर कुळकर्णी व मिलिंद व्यवहारे यांनी केले, तर आभार उपमुख्य कार्यकारी अधिकारी राजकुमार मुक्कावार यांनी मानले. यावेळी पशुसंवर्धन व दुग्धव्यवसाय विभागाचे जिल्हा उपायुक्त डॉ. एस. बी. खुणे, सहाय्यक आयुक्त डॉ. प्रविणकुमार घुले, शिक्षणाधिकारी वंदना फुटाणे, कृषी विकास अधिकारी डॉ. निलकुमार ऐतवडे, समाजकल्याण अधिकारी सत्येंद्र आऊलवार, कार्यकारी अभियंता राहुल रावसाहेब, जिल्हा आरोग्य अधिकारी डॉ. संतोष सूर्यवंशी यांच्यासह विविध विभागांचे अधिकारी व कर्मचारी मोठ्या संख्येने उपस्थित होते.

चौकट 

शिवरायांच्या कार्यातून प्रेरणा घेऊन जनतेची सेवा करावी- मेघना कावली

छत्रपती शिवाजी महाराजांनी स्थापन केलेल्या हिंदवी स्वराज्याची संकल्पना ही लोककल्याण, न्याय, पारदर्शक प्रशासन, स्त्री सन्मान, पर्यावरण संवर्धन या मूल्यांवर आधारित होती, असे प्रतिपादन जिल्हा परिषदेच्या मुख्य कार्यकारी अधिकारी तथा प्रशासक मेघना कावली यांनी केले. आजच्या प्रशासन व्यवस्थेतही या मूल्यांचे महत्त्व कायम असून प्रत्येक अधिकारी व कर्मचाऱ्याने शिवरायांच्या कार्यातून प्रेरणा घेऊन जनतेच्या सेवेसाठी समर्पित भावनेने कार्य करावे, असे आवाहन त्यांनी केले.

चौकट 

प्रामाणिकपणे कर्तव्य पार पाडणे हीच शिवरायांना खरी आदरांजली- शहाजी उमाप

अनेक संकटांचा सामना करत छत्रपती शिवाजी महाराजांनी लोककल्याणकारी आणि न्यायाधिष्ठित राज्य उभे केले. आपल्या प्रजेवर कोणताही अन्याय होऊ नये यासाठी ते सदैव जागरूक राहिले. शासनाच्या माध्यमातून आपल्या वाट्याला आलेले कार्य प्रामाणिकपणे व जबाबदारीने पार पाडणे हीच शिवरायांना खरी आदरांजली ठरेल, असे प्रतिपादन पोलीस उपमहानिरीक्षक शहाजी उमाप यांनी केले.

00000

 वृत्त क्रमांक 

महसूल कायदे व चॅप्टर प्रकरणांच्या प्रभावी अंमलबजावणीसाठी प्रशिक्षण

नांदेड, दि. ६ जून : महसूल प्रशासनातील अधिकारी व कर्मचाऱ्यांची कायदेशीर समज अधिक बळकट करण्याच्या उद्देशाने जिल्हाधिकारी राहुल कर्डीले यांच्या संकल्पनेतून जिल्हा नियोजन भवन येथे महसूल कायदे, चॅप्टर प्रकरणे आणि कायदा-सुव्यवस्था विषयक बाबींवर चर्चासत्र व प्रशिक्षण कार्यक्रम आयोजित करण्यात आला.

या कार्यक्रमात निवृत्त मुख्य जिल्हा न्यायाधीश श्री. वेदपाठक यांनी प्रमुख मार्गदर्शक म्हणून उपस्थित राहून महसूल प्रशासनाशी संबंधित विविध कायदे, नैसर्गिक न्यायाची तत्त्वे, सुनावणी प्रक्रिया, आदेश लेखन, पुराव्यांचे मूल्यमापन आणि न्यायालयीन पडताळणीत टिकणारे आदेश कसे द्यावेत याबाबत सविस्तर मार्गदर्शन केले.

तसेच भारतीय नागरी सुरक्षा संहिता (BNSS) अंतर्गत चॅप्टर प्रकरणे दाखल करण्याची प्रक्रिया, प्रतिबंधात्मक कारवाई, शांतता व सुव्यवस्था राखण्यासाठी महसूल अधिकाऱ्यांची भूमिका, नोटीस बजावणी, साक्षी-पुरावे नोंदविणे, कारणे दाखवा नोटीस, हमीपत्रे आणि जामीन प्रक्रियेच्या विविध पैलूंवर त्यांनी प्रकाश टाकला.

यावेळी महसूल अधिकाऱ्यांच्या आदेशांमध्ये वस्तुनिष्ठता, कायदेशीर अचूकता आणि पारदर्शकता असणे आवश्यक असल्याचे त्यांनी नमूद केले. जमीन महसूल संहिता, जमीन अभिलेख, अतिक्रमण, अपील प्रक्रिया तसेच महसूल न्यायालयीन कामकाजातील त्रुटी टाळण्याचे उपाय आणि प्रकरणांच्या प्रभावी निपटाऱ्याबाबतही त्यांनी मार्गदर्शन केले.

प्रशिक्षणादरम्यान उपस्थित अधिकारी व कर्मचाऱ्यांच्या विविध शंकांचे निरसन करण्यात आले. प्रत्यक्ष कामकाजातील उदाहरणांद्वारे महसूल आणि न्यायालयीन प्रक्रियेतील महत्त्वाचे बारकावे स्पष्ट करण्यात आले.

कार्यक्रमास जिल्हाधिकारी राहुल कर्डीले, सहायक जिल्हाधिकारी झेनिथ चंद्रा दोंतुला, निवासी उपजिल्हाधिकारी किरण अंबेकर यांच्यासह जिल्ह्यातील उपविभागीय अधिकारी, तहसीलदार, नायब तहसीलदार, महसूल अधिकारी, नगरपालिकांचे मुख्याधिकारी तसेच विविध विभागांचे अधिकारी व कर्मचारी उपस्थित होते.

या प्रशिक्षणामुळे महसूल प्रशासनातील निर्णय प्रक्रियेत गुणवत्ता, पारदर्शकता आणि कार्यक्षमता वाढण्यास मदत होईल, असा विश्वास व्यक्त करण्यात आला.

0000

 वृत्त क्रमांक 

लोकप्रशासनाच्या क्षेत्रात संशोधन, प्रशिक्षण व प्रशासकीय सुधारणेला दिशा मिळणार

आय.आय.पी.ए. व स्वा. रा. ती. म. विद्यापीठ यांच्यात

शैक्षणिक व प्रशासकीय सहकार्यासाठी सामंजस्य करार संपन्न 

नांदेड दि.५ जून:- इंडियन इन्स्टिट्यूट ऑफ पब्लिक एडमिनीस्ट्रेशन,नवी दिल्ली ही  भारत सरकारच्या कर्मचारी, लोकतक्रार व निवृत्तीवेतन मंत्रालयाअंतर्गत  लोकप्रशासनाच्या क्षेत्रात संशोधन, प्रशिक्षण व प्रशासकीय सुधारणा विषयी कार्य करणारी लोकप्रशासन क्षेत्रातील सर्वोच्च संस्था आहे. नांदेडचे जिल्हाधिकारी  तथा IIPA नांदेड शाखेचे पदसिद्ध अध्यक्ष राहुल कर्डिले यांच्या मार्गदर्शनाखाली या राष्ट्रीय संस्थेची नांदेड येथे शाखा   स्थापन  करण्यात आली आहे.    लोकप्रशासन विषयात  संशोधन , प्रशिक्षण  व प्रशासकीय सुधारणा या क्षेत्रातील सहकार्य वृद्धिंगत करण्यासाठी इंडियन इन्स्टिट्यूट ऑफ पब्लिक एडमिनीस्ट्रेशन (IIPA) आणि स्वामी रामानंद तीर्थ मराठवाडा विद्यापीठ, नांदेड यांच्यात सामंजस्य करार (MoU) करण्यात आला आहे. 

विद्यापीठाच्या कुलगुरू महोदयांच्या दालनात संपन्न झालेल्या एका कार्यक्रमात IIPA नांदेड शाखेचे पदसिद्ध अध्यक्ष तथा जिल्हाधिकारी राहुल कर्डिले  (भा.प्र.से.) व स्वा.रा.ती.म. विद्यापीठाचे कुलगुरू डॉ. मनोहर चासकर यांनी या सामंजस्य करारावर स्वाक्षरी  केली आहे.  यावेळी विद्यापीठाचे प्र-कुलगुरू डॉ. अशोक महाजन, कुलसचिव डॉ. डी. डी. पवार, IIPA नांदेड शाखेचे सचिव तथा देगलूर महाविद्यालयातील लोकप्रशासन विभागप्रमुख प्रा. डॉ. बी.आर.कतुरवार , विद्यापीठातील नवोपक्रम विभागाचे संचालक डॉ. एस.जे.वाढेर, आयक्यूएसी समन्वयक डॉ.सुरेंद्रनाथ रेडडी, IIPA  कोषाध्यक्ष व प्रतिभा निकेतन महाविद्यालयातील लोकप्रशासन विभागप्रमुख डॉ.दीपक वाघमारे , यशवंत महाविद्यालयातील लोकप्रशासन विभागप्रमुख डॉ.मीरा फड , म.फुले महाविद्यालय मुखेड येथील लोकप्रशासनाचे प्रा.  डॉ.चांदोबा कहाळेकर उपस्थित होते.

या सामंजस्य कराराची प्रमुख उद्दिष्ट्ये लोकप्रशासनाच्या विद्यार्थ्यांना प्रशासकीय व्यवस्थेचे प्रात्यक्षिक ज्ञान देणे, विद्यापीठ  व जिल्हा प्रशासन यांच्यातील संरचित व शाश्वत भागीदारी प्रस्थापित करणे,  लोकप्रशासन व सामाजिक शास्त्रात केल्या जाणा-या संशोधनाचा उपयोग प्रशासकीय सुधारणा व विविध विकासात्मक योजनांची प्रभावीपणे अमलबजावणीसाठी करता यावा, बी.ए.व एम.ए. लोकप्रशासनाच्या विद्यार्थ्यांना जिल्हाधिकारी कार्यालय, जिल्हा परिषद, महानगरपालिका येथे आँन जॉब ट्रेनिंग,  इंटर्नशिप, क्षेत्र भेटी व प्रकल्प  अभ्यासाच्या माध्यमातून प्रत्यक्ष कामकाजाचा अनुभव मिळणार आहे. IIPA व विद्यापीठाच्या संयुक्त विद्यमाने प्रशासकीय अधिकारी,कर्मचारी,  प्राध्यापक,  विद्यार्थी, संशोधक यांच्या  शैक्षणिक,प्रशासकीय  व व्यावसायिक संवर्धनासाठी विशेष व्याख्याने, चर्चासत्र,परिसंवाद कार्यशाळा व मॉक इंटरव्ह्यू आयोजित केले जाणार  आहेत. विद्यार्थ्यांना UPSC/MPSC च्या तयारीसाठी हा उपक्रम महत्त्वाचा ठरणार आहे.  विद्यापीठाच्या पायाभूत सुविधांचा  व शैक्षणिक वातावरणाचा उपयोग लोकप्रशासन व्यवस्थेत संशोधन, प्रशिक्षण, प्रशासकीय सुधारणा व समाज उपयोगी  कार्यासाठी करता येणार आहे.  भविष्यकाळात नांदेड विद्यापीठ व जिल्हा प्रशासन यांच्या सहयोगातून नांदेड प्रशासकीय सुधारणा,  संशोधन व प्रशिक्षणाचे केंद्र म्हणून विकसित होईल. प्रशासन व्यवस्था अधिक गतिमान होण्यासाठी,  प्रभावी सुशासन  विकसित करण्यासाठी  संयुक्त संशोधन प्रकल्प राबवले जाणार आहेत. यातून निघणाऱ्या निष्कर्षांच्या आधारे केंद्र व महाराष्ट्र शासनाला धोरणात्मक शिफारशी केल्या जातील. 

याप्रसंगी बोलताना कुलगुरू डॉ. मनोहर चासकर  म्हणाले, "हा करार केवळ कागदावरचा न राहता, मराठवाड्यातील विद्यार्थ्यांना शासन स्तरावर धोरणनिर्मिती, सुशासन व प्रशासकीय सुधारणा कार्याशी जोडणारा दुवा ठरेल.  व लोकप्रशासन विषयात केल्या जाणाऱ्या संशोधनाच्या उपयोग शासन स्तरावर प्रभावी धोरण निर्मितीसाठी होईल.  IIPA  नांदेड शाखेचे पदसिद्ध अध्यक्ष तथा जिल्हाधिकारी राहुल कर्डिले  (भा.प्र.से.) असे म्हणाले की,  विद्यापीठात केल्या जाणाऱ्या  संशोधन कार्य अथवा प्रकल्प शीर्षक ठरविताना प्रशासकीय अधिकारी वर्गाला येणाऱ्या समस्यांचा अभ्यास विद्यापीठ स्तरावर होणे आवश्यक आहे. तसेच त्यातून निघणारे निष्कर्ष व शिफारशी हे विविध  शासकीय योजनांच्या प्रभावी अमलबजावणीसाठी झाला पाहिजे. नागरिकांना दैनदिन जीवनात विविध प्रमाणपत्र काढताना व शासकीय योजनांचा लाभ घेताना अनेक समस्यांना सामोरे जावे लागते त्यासाठी समाजास व शासन प्रशासनास  उपयुक्त असे संशोधन कार्य झाले पाहिजे, समाजाच्या सर्वांगीण विकासासाठी विद्यापीठात पदवी व पदव्युत्तर शिक्षण घेऊन बाहेर पडणारा विद्यार्थी गुणवत्तासंपन्न व सर्व द्र्ष्टीने परिपूर्ण  बनला  पाहिजे, त्यासाठीच कॉपीमुक्त परीक्षा आयोजनाला महत्व देण्यात आले आहे. आय.आ.पी.ए. व स्वा. रा. ती. म. विद्यापीठ यांच्यातील  सामंजस्य करार हा लोकप्रशासन विषयात केले  जाणारे संशोधन हे प्रशासकीय सुधारणेसाठी व सुशासनाच्या विकासासाठी उपयुक्त ठरणार आहे. सामंजस्य करार कार्यक्रमाचे प्रास्ताविक आय.आय.पी.ए.चे  सचिव  डॉ.बी.आर.कतुरवार  यांनी केले तर आभार विद्यापीठातील नवोपक्रम विभागाचे संचालक डॉ. एस.जे.वाढेर यांनी मानले.

00000

 वृत्त क्रमांक 

प्रकल्प ‘AI-सारथी’चा शुभारंभ :

जिल्हा परिषद शिक्षकांच्या डिजिटल सक्षमीकरणासाठी एसआरटीएमयूचा अभिनव उपक्रम

नांदेड, दि. ५ जून २०२६: स्वामी रामानंद तीर्थ मराठवाडा विद्यापीठ, नांदेडच्या गणितशास्त्र संकुल (School of Mathematical Sciences) आणि अंतर्गत गुणवत्ता हमी कक्ष (IQAC) यांच्या संयुक्त विद्यमाने, तसेच जिल्हा परिषद, नांदेड यांच्या सहकार्याने आयोजित *“प्रोजेक्ट AI-सारथी : Capacity Building in Digital Pedagogy and Experiential Learning for ZP Educators”या दोन दिवसीय कार्यकारी विकास कार्यक्रमाचा (Executive Development Program) आज एमओओसीज प्रशिक्षण केंद्र, एसआरटीएमयू येथे उत्साहपूर्ण वातावरणात शुभारंभ झाला.

कार्यक्रमाच्या प्रारंभी स्वामी रामानंद तीर्थ मराठवाडा विद्यापीठ आणि जिल्हा परिषद, नांदेड यांच्यात शैक्षणिक सहकार्य वृद्धिंगत करण्यासाठी सामंजस्य करार (MoU) करण्यात आला. 

कार्यक्रमाच्या उद्घाटन समारंभास प्र-कुलगुरू डॉ. अशोक महाजन, शिक्षणाधिकारी सौ. वंदना फुटाणे, कुलसचिव डॉ. डी. डी. पवार, विज्ञान व तंत्रज्ञान विद्याशाखेचे अधिष्ठाता डॉ. एम. के. पाटील तसेच इनोव्हेशन, इन्क्युबेशन अँड लिंकेजेस (IIL) संचालक डॉ. शैलेश वाधेर यांची प्रमुख उपस्थिती लाभली. यावेळी कार्यक्रमाचे संयोजक *डॉ. सुरेंद्रनाथ रेड्डी, गणितशास्त्र संकुलाच्या संचालिका व कार्यक्रमाच्या सचिव **प्रा. (डॉ.) रुपाली जैन, सीआयसी संचालक **डॉ. कृष्णचैतन्यतसेच जनसंपर्क अधिकारी *डॉ. अशोक कदमहेही उपस्थित होते.

प्रास्ताविकात IQAC चे संचालक डॉ. बी. सुरेंद्रनाथ रेड्डी यांनी प्रकल्प AI-सारथीची संकल्पना, उद्दिष्टे आणि प्रशिक्षण कार्यक्रमाची रूपरेषा मांडली. 

प्रमुख पाहुण्या मा. मेघना कावली, आयएएस यांनी आपल्या मार्गदर्शनपर भाषणात शिक्षण क्षेत्रातील तंत्रज्ञानाच्या वाढत्या भूमिकेवर प्रकाश टाकला. कृत्रिम बुद्धिमत्ता आणि डिजिटल साधनांच्या प्रभावी वापराद्वारे विद्यार्थ्यांमध्ये सर्जनशीलता, चिकित्सक विचार आणि स्व-अध्ययनाची क्षमता विकसित करण्यासाठी शिक्षकांनी पुढाकार घेण्याचे आवाहन त्यांनी केले.  जिल्ह्यातील आदीवासी भागातील वाडी तांड्यावर तंत्रज्ञानाची ज्ञानगंगा वाहीली पाहीजे असे या प्रशिक्षणातून अपेक्षा व्यक्त केली. उपस्थित प्रशिक्षणार्थी शिक्षकानी या प्रशिक्षणातून प्रेरीत होऊन आपल्या शाळेत AI या आधुनिक तंत्रज्ञानाचा वापर करून गुणवत्ता वाढवावी असे मार्गदर्शन केले. 

या कार्यक्रमाच्या प्रसंगी जिल्हा परिषदेच्या शिक्षणाधिकारी मा. वंदना फुटाणे यांनी प्रशिक्षणात दिल्या जाणार्या  AI कंटेंट ची माहीती घेऊन प्रशिक्षण घटक आणि इतर बाबींची माहीती घेऊन जिल्ह्यातील शिक्षकाकडून AI च्या माध्यमातून वर्ष 2026-27 हे AI तंत्रज्ञान च्या वापराने समृध्द होईल आणि जिल्हा परिषद शाळांच्या गुणावत्ता विकासासाठी सदर प्रशिक्षणाची मदत् हॊईल ही अपेक्षा व्यक्त केली. 

अध्यक्षीय समारोपात कुलगुरू मा. डॉ. मनोहर चास्कर यांनी शिक्षणातील डिजिटल परिवर्तन ही काळाची गरज असल्याचे नमूद केले. ग्रामीण भागातील विद्यार्थ्यांना जागतिक दर्जाच्या शिक्षण संधी उपलब्ध करून देण्यासाठी शिक्षकांचे सातत्यपूर्ण कौशल्यवर्धन आवश्यक असल्याचे त्यांनी सांगितले. 

या दोन दिवसीय प्रशिक्षण कार्यक्रमात जिल्हा परिषद शाळांतील शिक्षकांना कृत्रिम बुद्धिमत्ता, डिजिटल अध्यापन साधने, आभासी प्रयोगशाळा, गणितीय सॉफ्टवेअर, वेब-आधारित शैक्षणिक संसाधने आणि अनुभवाधारित अध्यापन पद्धतींचे प्रत्यक्ष प्रशिक्षण दिले जाणार आहे. या उपक्रमात जिल्हा परिषद शाळांतील मोठ्या संख्येने स्वंयस्फुर्तीने शिक्षक सहभागी झाले आहेत.

हा उपक्रम शालेय शिक्षण क्षेत्रात कृत्रिम बुद्धिमत्ता आणि डिजिटल अध्यापन तंत्रज्ञानाचा प्रभावी वापर वाढविण्यासाठी तसेच शिक्षकांना भविष्योन्मुख शैक्षणिक कौशल्यांनी सुसज्ज करण्यासाठी महत्त्वपूर्ण ठरणार असेल, अश्या भावना प्रशिक्षणार्थ्यानी व्यक्त केल्या.

000000

  वृत्त क्रमांक