मान्सून कालावधीत दामिनी ॲपचा वापर करा - जिल्हाधिकारी अभिजीत राऊत

 मान्सून कालावधीत दामिनी ॲपचा वापर करा

-  जिल्हाधिकारी अभिजीत राऊत

 

नांदेड (जिमाका) दि. 17 :- मान्सून कालावधीत विशेषत: जून व जुलै या महिन्यात वीज पडून जीवीत हानी होते. ही जीवीतहानी होवू नये यासाठी नागरिकांनी व विशेषत: शेतकऱ्यांनी वीज पडून होणाऱ्या धोक्यापासून वाचण्यासाठी दामिनी ॲप अवश्य वापरावे, असे आवाहन जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष अभिजीत राऊत यांनी केले आहे.

 

भारत सरकारच्या पृथ्वी मंत्रालयाने हे दामिनी ॲप तयार केले असून हे ॲप गुगल प्ले स्टोअरवर उपलब्ध आहे. सुरक्षेच्या दृष्टीने प्रशासनाने प्रतिबंधात्मक उपाययोजना म्हणून सर्व नागरिकांना तसेच शासकीय यंत्रणा, अधिकारी-कर्मचारी, क्षेत्रिय अधिकारी / मंडळ अधिकारी, अव्वल कारकून, महसूल सहाय्यक, गाव स्तरावरील सरपंच, पोलीस पाटील, तलाठी, ग्रामसेवक, कृषीसेवक, कोतवाल, आशा वर्कर, अंगणवाडी सेविका, आरोग्य सेविका, आरोग्य सेवक, ग्रामपंचायत डाटा ईन्ट्री ऑपरेटर यांना दामिनी ॲप डाऊनलोड करुन त्याचा वापर करणेबाबत प्रवृत्त करावे. या ॲपचे जीपीएस लोकोशनचे काम करीत असून वीज पडण्याचा 15 मिनीटापूर्वी ॲपमध्ये स्थिती दर्शविण्यात येते. ॲपमध्ये आपले सभोवतालच्या वीज पडत असल्यास ठिकाणापासून सुरक्षित स्थळी जावे. तसेच त्यावेळी झाडाचा आश्रय घेऊ नये. गावातील सर्व नागरिक, शेतकरी यांनी दामिनी ॲप डाऊनलोड करुन घ्यावे. दामिनी ॲपमध्ये प्राप्त होणाऱ्या अर्लटनुसार आवश्यक पूर्वसूचना गावातील सर्व नागरिकांना देवून, होणारी जीवीत व वित्तहानी  टाळावी, असेही आवाहन जिल्हा आपत्ती व्यवस्थापन प्राधिकरणाच्यावतीने करण्यात आले आहे.

00000

संत रोहिदास चर्मोद्योग महामंडळाच्या एनएसएफडीसी च्या योजनासाठी कर्ज प्रस्ताव दाखल करण्याचे आवाहन

 संत रोहिदास चर्मोद्योग महामंडळाच्या एनएसएफडीसी च्या

योजनासाठी कर्ज प्रस्ताव दाखल करण्याचे आवाहन

नांदेड (जिमाका) दि. 17 :- संत रोहिदास चर्मोद्योग व चर्मकार विकास महामंडळ मर्या. नांदेड जिल्हा कार्यालयास सन 2023-24 या आर्थिक वर्षासाठी एन.एस.एफ.डी.सी यांच्या योजनांचे भौतीक उद्दीष्ट प्राप्त झाले आहे. या योजनांचा कर्जप्रस्ताव महामंडळाच्या विहित नमुन्यात 16 जून 2023 पर्यंत अर्ज कार्यालयीन वेळेत (सकाळी 9.30 ते सायं 6.15 वाजेपर्यंत) जिल्हा कार्यालय डॉ. बाबासाहेब आंबेडकर सामाजिक न्याय भवन ग्यानमाता शाळेसमोर तळमजला, कामठा रोड, नांदेड येथे स्विकारले जातील. 

मुदती कर्ज योजना 30, महिला समृध्दी 40 योजना, लघुऋण वित्त योजना 18 व शैक्षणिक कर्ज योजना 10 उद्दीष्ट प्राप्त झाले आहे. या सर्व योजना एन.एस.एफ.डी.सी नवी दिल्ली यांच्या मार्फत राबविल्या जातात. चांभार समाजा अंतर्भाव असणाऱ्या चांभार, ढोर, मोची, होलार या समाजातील अर्जदारांकडून विविध व्यवसायासाठी कर्ज प्रस्ताव मागविण्यात येत आहेत. या समाजातील लाभ घेऊ इच्छिणाऱ्या अर्जदारांनी यापूर्वी महामंडळाच्या कुठल्याही योजनेचा लाभ घेतलेला नसावा. तसेच अर्जदाराने महामंडळाच्या नियमाप्रमाणे आवश्यक त्या कागदपत्रांची पूर्तता करुन कर्ज प्रस्ताव तीन प्रतीत पुढील ठिकाणी स्वत: अर्जदाराने मुळ कागदपत्रासह उपस्थित राहून दाखल करावीत. त्रयस्थ / मध्यस्थामार्फत कर्ज प्रकरणे स्विकारण्यात येणार नाहीत. 

 

अर्जासोबत जोडावयाची कागदपत्रे पुढील प्रमाणे लागतील. सक्षम अधिकाऱ्यांनी दिलेला जातीचा दाखला, तहसीलदार यांच्याकडून घेतलेला अर्जदाराच्या कुटुंबाचा उत्पन्नाचा चालू वर्षाचा दाखला. नुकतेच काढलेले पासपोर्ट आकाराचे छायाचित्र तीन प्रतीत जोडावे. अर्जदाराचा शैक्षणिक दाखला. राशन कार्ड झेरॉक्स प्रती, आधार कार्ड बँक खात्याशी जोडलेले असावे/ मतदान कार्ड / पॅन कार्डची झेरॉक्स प्रत, व्यवसायाचे दरपत्रक जीएसटीचे कोटेशन, व्यवसाय ज्या ठिकाणी करावयाचा आहे त्या जागेची भाडेपावती, करारपत्रक किंवा मालकी हक्काचा पुरावा (नमुना नंबर आठ), लाईट बील, टॅक्स पावती, मुदती कर्ज योजनेसाठी प्रकल्प अहवाल,  व्यवसायाचे ग्रामपंचायत, नगरपालिका यांचे नाहरकत प्रमाणपत्र, व्यवसायासंबंधी तांत्रिक प्रमाणपत्र तसेच अनुभवाचा दाखला. लाभार्थ्याचे उद्योग आधार प्रमाणपत्र, लाभार्थ्यांचा सिबील क्रेडिट स्कोअर 500 च्यावर असावा रिपोर्ट, अनुदान न घेतल्याबाबत प्रतिज्ञापत्र याप्रमाणे कागदपत्रे स्वयंसांक्षाकित करुन घोषणापत्र देण्यात यावे. 

 

जिल्ह्यातील प्रत्येक तालुक्यातील चांभार, ढोर, मोची, होलार, समाजातील बेरोजगार युवक, युवतींना तसेच होतकरु गरजू अर्जदारांनी योजनेचा जास्तीत जास्त लाभ घ्यावा, असे आवाहन महामंडळाचे जिल्हा व्यवस्थापक अरुण राऊत यांनी केले आहे.

00000

 

ग्रामपंचायत पोटनिवडणूक-2023 मतदान, मतमोजणी केंद्र परिसरात प्रतिबंधात्मक आदेश

 ग्रामपंचायत पोटनिवडणूक-2023

मतदान, मतमोजणी केंद्र परिसरात प्रतिबंधात्मक आदेश

 

नांदेड (जिमाका) दि. 17 :- जिल्‍ह्यातील (निधन, राजीनामा, अनर्हता किंवा इतर कारणांमुळे  ग्रामपंचायतीतील सदस्‍य/थेट सरपंचाच्‍या रिक्‍त झालेल्‍या पदांकरीता)  ग्रामपंचायत पोटनिवडणूक-2023 करिता मतदानाच्‍या दिवशी मतदान केंद्र परिसरात गुरूवार 18 मे 2023 रोजी मतदान सुरु झाल्‍यापासून मतदान संपेपर्यन्‍त व मतमोजणीच्‍या दिवशी मतमोजणी केंद्र परिसरात शुक्रवार 19 मे 2023 रोजी मतमोजणी सुरु झाल्‍यापासून मतमोजणी संपेपर्यन्‍त प्रतिबंधात्मक आदेश जिल्हादंडाधिकारी अभिजीत राऊत यांनी लागू केले आहेत.

 

महाराष्ट्र राज्‍य निवडणूक आयोगाने निवडणूक निर्दिष्‍ट कार्यक्रमानूसार नांदेड जिल्ह्यातील 40 ग्रामपंचायतीच्या एकुण 47 जागेसाठी निवडणूक कार्यक्रम जाहीर केला असून ही निवडणूक प्रक्रिया चालू आहे. या निवडणुकीचे मतदान गुरूवार 18 मे 2023 रोजी तर मतदानाची मतमोजणी  शुक्रवार 19 मे 2023 रोजी निश्चित केलेल्‍या स्‍थळी होणार आहे.

 

नांदेड जिल्‍ह्यात निधन, राजीनामा, अनर्हता किंवा इतर कारणांमुळे ग्रामपंचायतीतील सदस्‍य/थेट सरपंचाच्‍या रिक्‍त झालेल्‍या पदांकरीता ग्रामपंचायत पोटनिवडणूक-2023 ची संपूर्ण प्रक्रिया शांततेत, निर्भय व न्‍याय्य वातावरणात पार पाडण्‍याच्‍या दृष्टीकोणातून कायदा व सुव्‍यवस्‍था अबाधीत राहण्‍यासाठी  जिल्हादंडाधिकारी अभिजीत राऊत यांनी फौजदारी प्रक्रिया संहिता 1973 चे कलम 144 अन्‍वये गुरूवार 18 मे 2023 रोजी ज्‍या ठिकाणी मतदान होणार आहे त्‍या ठिकाणापासून तसेच शुक्रवार 19 मे 2023 रोजी ज्‍या ठिकाणी मतमोजणी होणार आहे अशा मतमोजणी केद्रापासून 200 मीटर परिसरातील सर्व पक्षकारांचे मंडपे, सर्व दुकाने, मोबाईल, कॉडलेस फोन, पेजर, वायरलेस सेट, ध्‍वनीक्षेपके, सर्व प्रकारचे फेरीवाले व इतर इलेक्‍ट्रॉनिक्‍स उपकरणे, निवडणुकीच्‍या कामाव्‍यतीरिक्‍त खाजगी वाहन, संबंधीत पक्षाचे चिन्‍हांचे प्रदर्शन व निवडणूकीच्‍या कामाव्‍यतीरीक्‍त  व्‍यक्‍तीस प्रवेश करण्‍याकरीता प्रतिबंध केले आहे.

000000

 प्रभावी संपर्क आणि तत्परता यातच आपत्ती व्यवस्थापनाचे नियोजन

- जिल्हाधिकारी अभिजीत राऊत

 

· मान्सून पूर्वतयारी व आपत्ती व्यवस्थापन आढावा बैठकीत जिल्हाधिकारी यांचे दक्षतेचे निर्देश 

 

नांदेड (जिमाका) दि. 15 :- येणारा मान्सून हा काही प्रमाणात दरवर्षीच्या तुलनेत कमी प्रमाणात जरी दर्शविला असला तरी संभाव्य आपातकालिन परिस्थिती केंव्हाही उद्भवू शकेल हे गृहीत धरुन सर्व यंत्रणांनी दक्षता घेण्याचे निर्देश जिल्हाधिकारी अभिजीत राऊत यांनी दिले.

 

जिल्हाधिकारी कार्यालयाच्या नियोजन भवन येथे आयोजित मान्सूनपूर्व आढावा बैठकीत ते बोलत होते. या बैठकीस उपजिल्हाधिकारी संतोषी देवकुळे, पाटबंधारे विभागाचे कार्यकारी अभियंता ए. एस. चौगले, ए. बी. बिराजदार, जिल्हा परिषदेचे  अतिरिक्त मुख्य कार्यकारी अधिकारी संदीप माळोदे, जिल्हा आरोग्य अधिकारी डॉ. बालाजी शिंदे, जिल्हा अधीक्षक कृषि अधिकारी आर. बी. चलवदे, जिल्हा आपत्ती व्यवस्थापन अधिकारी किशोर कुऱ्हे पाटील, जिल्ह्यातील सर्व तहसिलदार, गटविकास अधिकारी यांच्यासह विद्युत, अग्निशमन, आदी विभागाचे अधिकारी उपस्थित होते.

 

जिल्ह्यात गोदावरी, पैनगंगा, मांजरा, आसना, लेंडी, कयाधू, मन्याड या नद्या व या नद्याच्या उपनद्या यांची संख्या लक्षात घेता जिल्ह्यातील पूरप्रवण गावाची संख्याही मोठया प्रमाणात आहे. जिल्ह्यातील 16 तालुक्यामध्ये 337 गावे ही पूरप्रवण क्षेत्रात मोडतात. या गावातील शासकीय यंत्रणानी विशेषत: गाव पातळीवरील ग्रामसेवक, तलाठी, पोलीस पाटील, तहसिलदार, गटविकास अधिकारी यांना परस्परात समन्वय ठेवून कोणत्याही स्थितीत एकत्रित दक्षता घेणे आवश्यक असल्याचे जिल्हाधिकारी अभिजीत राऊत यांनी सांगितले.

 

गोदावरी नदीवर पूर नियंत्रणासाठी असलेली महत्वाची ठिकाणे व त्या-त्या ठिकाणावरुन अतिवृष्टी झाल्यास पूर वहणाचा सर्वसाधारण कालावधी  हा संबधीत अधिकाऱ्यांनी लक्षात घेतला पाहिजे. यासाठी जलसंपदा विभागाच्या अधिकाऱ्यांनी पूर नियत्रंण कक्ष कार्यान्वित करुन त्यावर जबाबदार अधिकारी, कर्मचारी यांची नेमणूक करावी असे त्यांनी स्पष्ट केले. गावपातळीवर ग्राम आपत्ती व्यवस्थापन समिती यांच्या बैठका घेवून यात गावातील लोकांनाही विश्वासात घेण्याचे निर्देश त्यांनी दिले. आरोग्य व्यवस्थेसाठी लागणारी औषधे, पाण्यातून होणारे आजार लक्षात घेता पुरेशा प्रमाणात ब्लिंचीग पावडर, स्वच्छतेच्यादृष्टीने नगर/महानगर पालिका क्षेत्रातील नाले सफाई, वीज वितरणात अडथळा होणार नाही यादृष्टीने आपतकालिन व्यवस्थापन या बाबीवर त्यांनी भर देवून सर्व यंत्रणेला दक्षतेच्या सूचना दिल्या. जिल्हा आपत्ती व्यवस्थापन अधिकारी किशोर कुऱ्हे पाटील यांनी प्रारंभी आपत्ती व्यवस्थापन बाबत सविस्तर सादरीकरण केले. 

0000

 केंद्रीय रेल्वे राज्यमंत्री रावसाहेब पाटील दानवे यांचा दौरा 

नांदेड (जिमाका) दि. 15 :- केंद्रीय रेल्वे, कोळसा व खाणी राज्यमंत्री रावसाहेब पाटील दानवे हे नांदेड जिल्ह्याच्या दौऱ्यावर येत असून त्यांचा दौरा कार्यक्रम पुढील प्रमाणे राहील.

 

मंगळवार 16 मे 2023 रोजी मुंबई येथून राज्य राणी एक्सप्रेसने सकाळी 7.20 वा. हुजूर साहिब नांदेड येथे आगमन. सकाळी 9.30 वा. जिल्हाधिकारी कार्यालय, नियोजन भवन येथे 5 व्या रोजगार मेळाव्यास उपस्थिती. मा. प्रधानमंत्री यांची दूरदृष्यप्रणालीद्वारे प्रमुख उपस्थिती व राखीव. सायं. 4.45 वा. हुजूर साहिब नांदेड येथून नंदिग्राम एक्सप्रेसने मुंबईकडे प्रयाण करतील.

0000

 

अनुदान योजना, बीजभांडवल योजनेसाठी अण्णाभाऊ साठे विकास महामंडळाचे आवाहन

 

नांदेड (जिमाका) दि. 15 :- साहित्यरत्न लोकशाहीर अण्णाभाऊ साठे विकास महामंडळाच्या वतीने मातंग समाज व 12 पोटजातीना अनुदान योजना व बीज भांडवल योजनेचा लाभ बँकेमार्फत देण्यासाठी पात्र लाभार्थ्यांनी आवश्यक कागदपत्रे घेवुन महामंडळाच्या नांदेड जिल्हा कार्यालयात संपर्क साधावा, असे आवाहन जिल्हा व्यवस्थापकांनी केले आहे.

सन 2023-2024 या आर्थिक वर्षामध्ये अनुदान योजनेचे  व बीजभांडवल योजनेचे  उद्दीष्ट प्राप्त झाले आहे. अनुदान योजनेत प्रकल्प मर्यादा 50 हजार रुपयापर्यंत गुंतवणूक असणाऱ्या रक्कमेत 10 हजार रुपये अनुदान व उर्वरीत बँकेचे कर्ज राहील. बिजभांडवल योजनेत प्रकल्प मर्यादा 50 हजार 1 ते 70 हजार रुपयापर्यंत लाभार्थ्याचा सहभाग 5 टक्के, महामंडळाचे कर्ज 20 टक्के (10 हजार रुपये अनुदानासह) व बँकेचे कर्ज 75 टक्के राहील. या योजनेत स्थिर भांडवल निर्मितीच्या उद्योगाचे कर्ज प्रस्ताव जसे वाहन, यंत्रे व मशिनरी खरेदीसाठी व तसेच इतर विविध व्यवसायासाठी उद्दीष्ट देण्यात आले आहे. या योजनेचा लाभ घेण्यासाठी जातीचा दाखला, उत्पन्नाचे प्रमाणपत्र, दोन छायाचित्रे, राशन कार्ड,  आधार कार्ड, व्यवसाय ज्या ठिकाणी करावयाचा आहे त्या जागेचा पुरावा, व्यवसायाचे कोटेशन, अनुभव प्रमाणपत्र, शासकीय योजनेचा लाभ न घेतलेले प्रमाणपत्र व शौचालय बांधल्याबाबत ग्रामसेवकाचे प्रमाणपत्र, प्रकल्प अहवाल, निवडणूक ओळखपत्र, दुकानाचा परवाना / लॉयसन्स, परमीट / बॅच , योजनेचे कर्जाचा लाभ घेण्यासाठी वयोमर्यादा 18 ते 50 वर्षाच्या आत असावे. अधिक माहितीसाठी जिल्हा व्यवस्थापक साहित्यरत्न लोकशाहीर अण्णाभाऊ साठे विकास महामंडळ           डॉ. बाबासाहेब आंबेडकर, सामाजिक न्याय भवन, ग्यानमाता शाळेसमोर, हिंगोली रोड नांदेड या ठिकाणी संपर्क साधावा.

000000

 जिल्हा युवा महोत्सवाचे 22 मे रोजी आयोजन

नांदेड (जिमाका) दि. 15 :- स्वातंत्र्य संग्रामातील देशभक्तीची भावना व मूल्य जागृत करणे, राष्ट्रभक्ती, समता, बंधुत्वाची भावना वृध्दींगत करणे आणि युवा कलावंताना व्यासपीठ उपलब्ध होण्यासाठी 22 मे रोजी शासकीय औद्योगिक प्रशिक्षण संस्था, नांदेड येथे जिल्हा युवा महोत्सवाचे आयोजन करण्यात आले आहे. या महोत्सवाद्वारे युवकांच्या कलागुणांना वाव आणि संधी मिळेल, त्यामुळे जिल्ह्यातील जास्तीत जास्त युवकांनी या महोत्सवात सहभाग घ्यावा, असे आवाहन खासदार प्रतापराव पाटील चिखलीकर यांनी केले आहे.

युवा महोत्सवात युवक-युवतीसाठी विविध स्पर्धाचे आयोजन करण्यात आले आहे. युवा लेखन स्पर्धा (कविता लेखन) पहिले पारितोषक 1 हजार, द्वितीय 750, तृतीय 500 रुपये असे आहे. युवा कलाकार स्पर्धा (चित्रकला) पहिले पारितोषक 1 हजार रुपये, द्वितीय 750 रुपये, तृतीय 500 रुपये आहे. मोबाईल छायाचित्रण स्पर्धा पहिले पारितोषक 1 हजार, द्वितीय 750, तृतीय 500 रुपये असे आहे. भाषण स्पर्धा पहिले पारितोषिक 5 हजार, द्वितीय 2 हजार, तृतीय 1 हजार रुपये असे आहे. जिल्हा सांस्कृतिक महोत्सव (समुह नृत्य) पहिले पारितोषिक 5 हजार, द्वितीय 2 हजार 500 रुपये, तृतीय 1 हजार 250 रुपये असे आहे. विजेत्या स्पर्धकांना रोख बक्षिसे तसेच प्रमाणपत्र, मेडल व ट्रॉफी व सर्व सहभागी स्पर्धकांना प्रमाणपत्र देण्यात येणार आहे. सर्व स्पर्धा सकाळी 9 वा. सुरु होणार आहेत. सांस्कृतिक महोत्सव दुपारी 2 वा. सुरु होईल. युवा महोत्सवात वेगवेगळया शासकीय योजनाच्या माहितीचे स्टॉल लावण्यात येणार आहेत. स्पर्धेत 18 ते 29 वर्षे वयोगटांच्या युवक-युवतीनी 20 मे पर्यत आपला सहभाग नोंदवावा, असे युवा अधिकारी चंदा रावळकर यांनी प्रसिद्धीपत्रकाद्वारे कळविले आहे.

000000