ज्येष्ठ नागरिक, सायबर क्राईम,

ताणतणाव व्यवस्थापनाची शनिवारी कार्यशाळा

नांदेड, दि. 6 :- ज्येष्ठ नागरिक, सायबर क्राईम, ताणतणाव व्यवस्थापनाची कार्यशाळा यशदा पुणे व जिल्हाधिकारी कार्यालयाच्यावतीने शनिवार 10 मार्च रोजी जिल्हाधिकारी कार्यालयातील शंकरराव चव्हाण जिल्हा नियोजन भवन येथे सकाळी 9 ते सायं 6 वाजेपर्यंत आयोजित करण्यात आली आहे. संबंधितांनी कार्यशाळेस उपस्थित रहावे, असे आवाहन जिल्हाधिकारी कार्यालयातील सामान्य शाखेच्यावतीने करण्यात आले आहे.

आई-वडील व ज्येष्ठ नागरिक यांच्या चरितार्थ व कल्याणार्थ अधिनियम 2007 व नियम 2010 व सायबर क्राईम, ताणतणावाचे व्यवस्थापन याविषयावर यशवंतराव चव्हाण विकास प्रशासन प्रबोधनी यशदा पुणे व जिल्हाधिकारी कार्यालय नांदेड याच्या संयुक्त विद्यमानाने 250 व्यक्तींची कार्यशाळा आयोजित केली आहे.

या कार्यशाळेत जिल्हाधिकारी, अप्पर जिल्हाधिकारी, सर्व उपजिल्हाधिकारी, उपविभागीय अधिकारी, पोलीस अधीक्षक, अतिरिक्त पोलीस अधीक्षक, सर्व उपविभागीय पोलीस अधिकारी, न्यायाधीश, सहाय्यक आयुक्त समाज कल्याण, प्रमुख जिल्हा न्यायाधीश, विद्यापीठातील समाजशास्त्राचे एमफीलचे व पीएचडीचे विद्यार्थी, ज्येष्ठ नागरिक मंडळ, जिल्हा सरकारी अभियोक्ता, सहाय्यक संचालक सरकारी अभियोक्ता, पोलीस अभियोक्ता, सर्व तहसिलदार, उपविभागीय कार्यालयातील नायब तहसीलदार (महसूल), कुलगुरु, विशेष पोलीस महानिरीक्षक, विधी अधिकारी, जिल्हाधिकारी कार्यालय व पोलीस अधीक्षक कार्यालयातील विभाग प्रमुखांची उपस्थिती राहणार आहे, असेही माहिती देण्यात आली आहे.  

00000

उष्‍णतेच्या लाटेपासून बचाव करण्यासाठी

नागरीकांनी काळजी घ्‍यावी - जिल्‍हा प्रशासन

नांदेड दि. 6 :- उन्‍हाळयाची सुरुवात यावर्षी लवकरच झाली असून मार्च ते जून  या कालावधीत राज्‍यात उष्‍णतेची तिव्रता निर्माण होण्‍याची शक्‍यता भारतीय हवामान खात्यानी व्‍यक्‍त केली आहे.  या उष्‍णतेच्‍या लाटेपासुन बचाव करण्‍यासाठी नागरीकांनी व परिक्षांचा कालावधी पुढे सुरु होत असल्‍यामुळे विद्यार्थ्यांनी योग्‍य ती खबरदारी घ्‍यावी, असे आवाहन जिल्‍हा प्रशासनातर्फे करण्‍यात आले आहे.  

उष्‍माघातामुळे शरीराचे तापमान वाढुन व्यक्ती बेशुद्ध झाल्यास तातडीचे वैद्यकीय उपचार करावे. उष्माघात होऊ नये यासाठी सोबत मोठा पांढरा पंचा आणि डोके झाकेल असा रुमाल, पूर्ण अंगभर शक्यतो सुती कपडे परिधान करणे, कमीत कमी वेळात इच्छित स्थळी पोहोचणे, जवळ पाण्याची बाटली बाळगणे, दर अर्ध्या तासाने दोन तीन ग्लास पाणी पिणे, अधून-मधून बर्फ न टाकलेले लिंबू पाणी, फळांचे रस पिणे अशा उपायानी उष्माघात टाळता येतो.  

कडक उन्हामध्ये शरीराचे तापमान वाढल्याची शंका येताच स्वत:च्या रक्षणासाठी सावलीमध्ये बसणे आणि भरपूर पाणी पिणे या उपायानी पुरेसा आराम मिळतो. बाहेरील तापमान चाळीसहून अधिक आणि शरीराचे तापमान चाळीस झाल्यास उष्माघात होतो. प्रखर तापमानात बाहेर उन्हात फिरल्‍याने शरीरातील पाण्याची मात्रा अचानक कमी होते व मृत्यु ओढावतो. कानास फडके न बांधल्‍याने उष्णता मेंदुपर्यंत जाते व व्‍यक्‍ती बेशुध्‍द होते, उपाशी पोटी उन्हात फिरल्‍याने शरीरास साखरेचा, ग्लुकोजचा पुरवठा कमी होतो. अती थंड पाणी पिल्‍याने शरीराच्या तापमानात अचानक बदल होतो. अशावेळी त्‍वरीत वैद्यकीय उपचार घेणे आवश्‍यक आहे. कारण नसताना उन्‍हात न जाणे, भरपुर पाणी पिणे आणि  सुती  कपडे परिधान करने याद्वारे उष्‍माघात टाळता येतो.

नागरीकांना उष्‍माघाताचा रुग्‍ण आढळल्‍यास तात्‍काळ त्‍यास जवळच्‍या रुग्‍णालयात प्रथमोपचारासाठी पाठवावे. मागील वर्षापेक्षा यावर्षी उन्‍हाळयाची सुरुवात लवकर झालेली असुन उष्‍णतेच्‍या लाटेपासून कोणत्‍याही प्रकारची जीवित‍हानी होऊ न देण्‍यासाठी जिल्‍हयातील महानगरपालिका आणि आरोग्‍य यंत्रणेशी समन्‍वय साधून उष्‍णतेच्‍या  लाटेपासुन नागरीकांचे बचाव करावयाच्‍या तसेच यंत्रणा सज्‍ज ठेवावयाच्‍या सूचना जिल्‍हा प्रशासनाव्‍दारे निर्गमित करण्‍यात आल्‍या आहेत. उष्‍णतेची तिव्रता आणि तापमानात अचानक होणाऱ्या  वाढीवर नागरीकांनी व विद्यार्थ्यांनी सावधगिरी बाळगावी, असेही आवाहन जिल्हा प्रशासनाकडून करण्यात आले आहे.

000000

विद्यार्थ्यांच्या सर्वांगीण विकासासाठी

प्रशासन कटिबद्ध - जिल्हाधिकारी अरुण डोंगरे

नांदेड दि. 5 :- विद्यार्थ्यांसाठी अभ्यास-मुलाखत मार्गदर्शन व सराव चाचणी परीक्षेसोबत त्यांचेवरील मानसिक स्थितीचा विचार करुन ताण-तणावाचे व्यवस्थापन व सर्वांगीण विकासासाठी जिल्हा प्रशासन कटिबद्ध असल्याचे प्रतिपादन जिल्हाधिकारी अरुण डोंगरे यांनी केले.

            स्पर्धा परीक्षेची तयारी करणाऱ्या विद्यार्थ्यांसाठी जिल्हा प्रशासनाच्यावतीने "उज्ज्वल नांदेड" मोहिम राबविण्यात येत आहे. याअंतर्गत जिल्हाधिकारी कार्यालय सेतू समिती, नांदेड मनपा व जिल्हा ग्रंथालय अधिकारी कार्यालय यांच्यावतीने आयोजित दरमहा 5 तारखेच्या स्पर्धा परीक्षा मार्गदर्शन शिबिरात जिल्हाधिकारी श्री डोंगरे आज बोलत होते.

            यावेळी सुप्रसिद्ध मानसोपचार तज्ज्ञ डॉ. नंदकुमार मुलमुले, पुणे येथील प्रा. अभिजित राठोड, नायगावचे मुख्याधिकारी प्रियंका टोंगे, प्रा.जगदीश राठोड, गणेश कऱ्हाडकर व जिल्हा ग्रंथालय अधिकारी सुनिल हुसे यांची प्रमुख उपस्थिती होती.

            पहिल्या सत्रातील प्रमुख वक्ते डॉ. मुलमुले यांनी “ताणतणावाचे व्यवस्थापन व सुखाचा शोध” या विषयावर विद्यार्थ्यांना आपल्या खुसखुशीत विनोदी शैलीत मार्गदर्शन केले. डॉ. मुलमुले यांनी विद्यार्थ्यांना यशाचा सतत ध्यास करणे आवश्यक असल्याचे सांगुन अपयशाचा किंचीतही विचार न करता आनंदी मनाने पुढे मार्गक्रमण करावे, असे सांगीतले. सुखाचा शोध म्हणजे नेमके काय ? याबाबत पद, पैसा, प्राप्तीनंतरही आनंद न मिळता आणखी काही मिळविण्याची लालसा, ईर्षा याबाबी माणसांना सुखी न करता दु:खीच करीत असल्याचे प्रकर्षाने जाणवते. यासाठी कोणत्याही बाबतीत समाधानी असणे म्हणजे सुखी असणे होय असे डॉ. मुलमुले म्हणाले.

            दुसऱ्या सत्रात प्रा. राठोड यांनी राजकोषिय धोरण, वित्तीय तूट व अर्थसंकल्प 2018 याबाबत विद्यार्थ्यांना मार्गदर्शन करताना अर्थसंकल्पाची संरचना, शुन्याधारित अर्थसंकल्प, फलनिष्पती अर्थसंकल्प, लिंगाधारित अर्थसंकल्प याविषयी माहिती दिली. सोबत राजकोषीय व्यवस्थापन, वित्तीय तूट यांचे परीक्षेसंबधी महत्व याविषयी विद्यार्थ्यांना माहिती दिली.

सुत्रसंचलन जिल्हा ग्रंथालय अधिकारी श्री. हुसे यांनी यांनी केले तर आभार आरती कोकुलवार यांनी मानले. सुरुवातील श्री कऱ्हाडकर यांच्या मराठी शब्दसंग्रह ग्रंथाचे प्रकाशन मान्यवरांच्या हस्ते करण्यात आले. शिबीर यशस्वीतेसाठी प्रताप सुर्यवंशी, संजय कर्वे, कोंडीबा गाडेवाड, मुक्तीराम शेळके, मयुर कल्याणकर, लक्ष्मण शेन्नेवाड, मनोज उरुडवाड रघुवीर श्रीरामवार यांनी संयोजन केले.

00000

"उज्ज्वल नांदेड" अंतर्गत आज

पर्यावरण परिस्थितीवर मार्गदर्शन    

नांदेड, दि. 5 :- स्पर्धा परीक्षेची तयारी करणाऱ्या विद्यार्थ्यांसाठी जिल्हा प्रशासनाच्यावतीने सुरु करण्यात आलेल्या “उज्ज्वल नांदेड” अभियानांतर्गत मंगळवार 6 मार्च 2018 रोजी सकाळी 10 ते दुपारी 1 यावेळेत स्पर्धा परीक्षा मार्गदर्शन शिबिराचे आयोजन डॉ. शंकरराव चव्हाण प्रेक्षागृह नांदेड येथे करण्यात आले आहे.

या शिबिरात पुणे येथील डॉ. तुषार घोरपडे हे पर्यावरण परिस्थिती या विषयावर मार्गदर्शन करणार आहेत. यावेळी मनपा आयुक्त गणेश देशमुख, निवासी उपजिल्हाधिकारी जयराज कारभारी यांची उपस्थिती राहणार आहे. या ‍शिबिरास स्पर्धा परीक्षेची तयारी करणाऱ्या विद्यार्थ्यांनी उपस्थित रहावे, असे आवाहन जिल्हा प्रशासनाच्यावतीने जिल्हा ग्रंथालय अधिकारी सुनील हुसे यांनी केले आहे.

0000

लोकशाही दिनाचे 5 मार्चला आयोजन

नांदेड, दि. 5 :- सामान्य जनतेच्या तक्रारी, अडचणी ऐकून घेऊन त्या सोडविण्यासाठी राज्य शासनाच्यावतीने प्रत्येक महिन्याचा पहिला सोमवार लोकशाही दिन आयोजित करण्यात येतो. त्यानुसार सोमवार 5 मार्च 2018 रोजी दुपारी 1 ते 3 वाजेपर्यंत जिल्हाधिकारी कार्यालयात लोकशाही दिन आयोजित केला आहे. यासाठी अर्ज स्विकारण्याचे व न स्विकारण्याबाबतच्या निकषांचीही नागरिकांनी नोंद घ्यावी. तक्रार किंवा निवेदन वैयक्तिक स्वरुपाचे नसेल तर असे अर्ज स्विकारण्यात येणार नाहीत. त्यामुळे केवळ वैयक्तिक स्वरुपाच्या तक्रारी, निवेदन, अर्ज सादर करावेत, असे आवाहन जिल्हा प्रशासनाच्यावतीने करण्या‍त आले आहे.

या दिवशी महसूल, गृह, ग्रामविकास, पाटबंधारे, बांधकाम, परिवहन, सहकार, कृषि विभागाचे जिल्हा स्तरावरील प्रमुख अधिकारी व जिल्हा पाणी पुरवठा समन्वय अधिकारी व ज्या कार्यालयाचे लोकशाही दिनात प्रलंबीत प्रकरणे आहेत असे अधिकारी जिल्हाधिकारी कार्यालय प्रांगणातील बचत भवन येथे उपस्थित राहतील. दुपारी 12 वाजेपासून निवेदनाची नोंदणी सुरु होणार आहे. त्यानंतर लगेचच प्राप्त झालेल्या अर्जावर, निवेदनावर म्हणणे ऐकूण घेण्याच्या कामास सुरुवात करण्यात येईल.

न्याय प्रविष्ट, राजस्व तसेच अपील, सेवाविषयक, आस्थापना विषयक तसेच विहीत नमुन्यात नसलेले अर्ज, अंतिम उत्तर दिलेले आहे किंवा देण्यात येणार असलेले अर्ज, तक्रार निवेदन वैयक्तीक स्वरुपाचे नसेल तर असे अर्ज स्विकारण्यात येणार नाहीत. अर्ज स्विकृतीसाठी विहीत नमुन्यात तसेच तक्रार व निवेदन वैयक्तीक स्वरुपाचेच असावे. अर्जदाराने विहीत नमुन्यात 15 दिवस अगोदर दोन प्रतींमध्ये जिल्हाधिकारी कार्यालय येथे अर्ज पाठविणे आवश्यक आहे. तालुकास्तरावर अर्ज दिल्यानंतर एक महिन्यानंतर जिल्हाधिकारी कार्यालय येथे लोकशाही दिनामध्ये अर्ज करता येणार आहे.

लोकशाही दिनाच्या दिवशी प्राप्त होणाऱ्या जनतेच्या तक्रारी, अडचणी एकत्रीतरीत्या समजावून घेऊन त्या शक्य तितक्या लवकर सोडविण्यात येतील ज्या प्रकरणात कालावधी लागणार आहे अशा प्रकरणी पुढील महिन्याच्या पुढील महिण्याच्या होणाऱ्या लोकशाही दिनात मागील अर्जावर कार्यवाहीची माहिती देण्यात येईल, असे जिल्हाधिकारी नांदेड यांनी कळविले आहे.                             

00000

वंचित शेतकऱ्यांना पीक कर्जमाफीचे

अर्ज करण्यास 31 मार्चची मुदत

नांदेड, दि. 3 :-  छत्रपती शिवाजी महाराज शेतकरी सन्मान योजनेंतर्गत यापुर्वी विहित कालावधीत अर्ज करण्यापासून वंचित राहिलेल्या शेतकऱ्यांसाठी ऑनलाईन अर्ज करण्याची सुविधा 1 ते 31 मार्च 2018 यादरम्यान उपलब्ध करुन देण्यात आली आहे. राज्याच्या सहकार, पणन व वस्त्रोद्योग विभागाचे  दि. 28 फेब्रुवारी, 2018 रोजी शासन निर्णय निर्गमित झालेला  असून या आदेशाच्या अनुषंगाने शेतकऱ्यांनी 31 मार्च, 2018 पर्यंत  “आपले सरकार” या सेवा केंद्रावर किंवा शेतकऱ्यांना https://csmssy.mahaonline.gov.in या पोर्टलवर स्वत: नोंदणी करुन युजर आय.डी. व पासवर्डच्या आधारे ऑनलाईन अर्ज सादर करता येतील.

पीक कर्जमाफीचा लाभ घेण्यासाठी राज्यातील शेतकऱ्यांसाठी शासनाने कर्जमाफी व पीक कर्ज प्रोत्साहनपर लाभ योजना 28 जून 2017 चे शासन निर्णयान्वये जाहीर केली आहे. या योजनेंतर्गत कर्जमाफीसाठी 1 एप्रील 2009  ते 31 मार्च 2016  या कालावधीत पीक कर्ज  घेतलेल्या  व अशा कर्जापैकी   30 जून 2016  रोजी थकबाकीदार आहे त्यांना या योजनेचा लाभ देण्यात आला. याव्यतिरिक्त 2015-16 मध्ये ज्या शेतकऱ्यांनी पीक कर्जाची उचल करुन मुदतीत परतफेड केली आहे. तसेच 2016-17 पुन्हा कर्जाची उचल करुन 31 जुलै 2017 अखेर परतफेड केली आहे अशा नियमित कर्जफेड करणाऱ्या शेतकऱ्यांना 25 हजारांच्या प्रोत्साहनपर योजनेचा लाभ देण्यात आला. मात्र काही शेतकरी वैयक्तिक कारणाने किंवा काही तांत्रिक अडचणीमुळे ऑनलाईन अर्ज करु न शकल्यामुळे कर्जमाफीच्या योजनेत सहभागी होऊ शकले नाहीत. त्यांना लाभ देण्यात येईल अशी घोषणा मुख्यमंत्री देवेंद्र फडणवीस यांनी केली होती. त्यानूसार आता 1 मार्च, 2018 ते 31 मार्च, 2018 दरम्यान   “आपले सरकार”  पोर्टलवर ऑनलाईन अर्ज करुन शेतकऱ्यांना योजनेचा लाभ देण्यात येणार आहे. शेतकऱ्यांनी स्वत: किंवा आपले सरकार पोर्टलवर माहिती भरुन ऑनलाईन अर्ज भरण्याची सुविधा नि:शुल्क आहे. यासाठी अर्ज करणारा शेतकरी व त्यांच्या कुटुबांचे प्रमाणिकरण आधार क्रमांकाच्या आधारे बायोमेट्रिक पध्दतीने  किंवा मोबाईल ओटीपीद्वारे केल्यानंतर संबंधीत अर्ज अपलोड करण्यात येणार आहेत.

कर्जमाफी योजनेअंतर्गत यापुर्वी विहित कालावधीत अर्ज करण्यापासून वंचित राहिलेल्या शेतकऱ्यांनी दि. 31 मार्च 2018 पर्यंत “ आपले सरकार ” सेवा केंद्रावर किंवा शेतकऱ्यांना https://csmssy.mahaonline.gov.in या पोर्टलवर स्वत: नोंदणी करुन युजर आय.डी. व पासवर्डच्या अधारे ऑनलाईन अर्ज भरावा, असे आवाहन प्रवीण फडणीस, जिल्हा उपनिबंधक, सहकारी संस्था, नांदेड यांनी केले आहे.  

000000

महिला दिनानिमित्त

आरोग्य तपासणी शिबीर

नांदेड, दि. 5 :- जागतिक महिला दिनाच्या अनुषंगाने श्री गुरुगोबिंद सिंघजी स्मारक जिल्हा रुग्णालयातील राष्ट्रीय असंसर्गजन्यरोग नियंत्रण कार्यक्रम व राष्ट्रीय तंबाखू नियंत्रण कार्यक्रमांतर्गत 7 व 8 मार्च रोजी सकाळी 10 ते 2 यावेळेत स्त्री रुग्णालय श्यामनगर नांदेड व जिल्हा रुग्णालय छत्रपती शिवाजी पुतळ्याजवळ वजिराबाद नांदेड येथे 30 वर्षांवरील सर्व स्त्रियांसाठी उच्चरक्तदाब, महुमेह व स्त्रीगर्भाशय कर्करोग संबंधीत (PAP SMEAR) तपासणी करण्यात येणार आहे. तसेच जनजागृतीपर पोस्टर्स प्रदर्शन करण्यात येणार असून हे प्रदर्शन 7 व 8 मार्च रोजी सकाळी 10 ते सायं. 5 पर्यंत सर्वांसाठी खुले राहणार आहे. सर्वांनी या तपासणी शिबीर व प्रदर्शनाचा लाभ घ्यावा, असे आवाहन जिल्हा शल्यचिकित्सक डॉ. बी. पी. कदम यांनी केले आहे.

000000