ग्रंथोत्सवात शालेय विद्यार्थ्यांसाठी निबंध स्पर्धा

नांदेड दि. 14 :- शालेय विद्यार्थ्यांचा ग्रंथोत्सवामध्ये सहभाग असावा यासाठी माध्यमिक स्तरावरील शालेय विद्यार्थ्यांसाठी "मानवी जीवनात ग्रंथाचे महत्व" या विषयावर 2 हजार शब्दमर्यादेत निबंध स्पर्धेचे आयोजन करण्यात आले आहे. स्पर्धकांनी निबंध शनिवार 18 नोव्हेंबर 2017 पर्यंत स्पर्धेचे संयोजक वसंतनगर येथील राजर्षी शाहू विद्यालयाचे मुख्याध्यापक डॉ. सुरेश सावंत यांचेकडे पाठवावेत. या स्पर्धेमध्ये जास्तीतजास्त स्पर्धकांनी भाग घ्यावा, असे आवाहन ग्रंथोत्सव समन्वय समितीचे अध्यक्ष तथा जिल्हाधिकारी अरुण डोंगरे यांनी केले आहे.

नांदेड जिल्हा ग्रंथालय अधिकारी कार्यालयाच्यावतीने "नांदेड ग्रंथोत्सव 2017" चे आयोजन 22 व 23 नोव्हेंबर 2017 रोजी करण्यात आले आहे. या ग्रंथोत्सवामध्ये ग्रंथप्रदर्शन, ग्रंथविक्री व इतर कार्यक्रमाचे आयोजन करण्यात आले आहे. या स्पर्धेतील विजेत्यांना स्मृतीचिन्ह, प्रमाणपत्र, ग्रंथ व रोख रक्कम देण्यात येणार आहे. यामध्ये प्रथम विजेत्यांना 500 रुपये, द्वितीय 400 रुपये, तृतीय 300 रुपये व दोन उत्तेजनार्थक विजेत्यांना प्रत्येकी 200 रुपयाचे बक्षिस देण्यात येईल, अशी माहिती  ग्रंथोत्सव समन्वय समितीचे सदस्य सचिव तथा जिल्हा ग्रंथालय अधिकारी सुनील हुसे यांनी दिली.   

000000

जिल्हाधिकारी कार्यालयात

आज पेन्शन अदालत

नांदेड, दि. 13 :- जिल्हाधिकारी कार्यालयात मंगळवार 14 नोव्हेंबर 2017 रोजी पेन्‍शन अदालत आयोजीत करण्‍यात आली आहे. जिल्‍ह्यातील महसूल विभागातून सेवानिवृत्‍त झालेले अधिकारी, कर्मचारी यांच्‍या अडचणी निवारण्‍यासाठी या दिवशी सकाळी 11 ते दुपारी 1.30 वाजेपर्यंत उपस्थित राहुन तक्रारीचे निवेदने दयावीत, असे आवाहन नांदेड जिल्हाधिकारी कार्यालयाच्यावतीने करण्‍यात आले आहे.

000000

महाविहार बावरी नगरची कामे दर्जेदार करावीत

- पालकमंत्री अर्जुन खोतकर

नांदेड, दि. 13 :- महाविहार बावरीनगर दाभड येथील तिर्थक्षेत्र विकास कार्यक्रमांतर्गत प्रस्तावित असलेली उर्वरीत कामे दर्जेदार व वेळेत पुर्ण करावीत, असे निर्देश राज्याचे पशुसंवर्धन, दुग्धव्यवसाय विकास, मत्स्यव्यवसाय व वस्त्रोद्योग राज्यमंत्री तथा नांदेड जिल्ह्याचे पालकमंत्री अर्जुन खोतकर यांनी आज येथे दिले.

अर्धापुर तालुक्यातील बावरीनगर दाभड येथील तिर्थक्षेत्राच्या विविध विकास कामांबाबत जिल्हास्तरीय सिकाणु समितीची बैठक पालकमंत्री श्री खोतकर यांच्या अध्यक्षतेखाली संपन्न झाली त्यावेळी ते बोलत होते. जिल्हाधिकारी कार्यालयातील डॉ. शंकरराव चव्हाण जिल्हा नियोजन भवन येथे बैठक संपन्न झाली.

यावेळी आमदार हेमंत पाटील, सिकाणु समितीचे कार्यकारी अध्यक्ष एस. पी. गायकवाड, जिल्हाधिकारी अरुण डोंगरे, जिल्हा परिषदेचे मुख्य कार्यकारी अधिकारी अशोक शिनगारे, अप्पर जिल्हाधिकारी संतोष पाटील, सार्वजनिक बांधकाम विभागाचे कार्यकारी अभियंता व्ही. टी. बडे, उपविभागीय अधिकारी प्रदिप कुलकर्णी, तहसिलदार अरविंद नरसीकर, समाज कल्याण सहायक आयुक्त भगवान वीर उपस्थित होते.

पालकमंत्री श्री. खोतकर यांनी तिर्थक्षेत्र विकास कार्यक्रमांतर्गत महाविहार बावरीनगर दाभड येथील मुख्य ध्यान केंद्र, बहुउद्देशीय सभागृह, प्रवेशद्वार, अशोकस्तंभ, प्रशासकीय इमारत, यात्री निवास, संरक्षण भिंत, ट्रान्सफार्मर व महावितरण खर्च, अंतर्गत रस्ते, बागबगीचा, सायकल स्टँड, कार पार्कींग आदी कामांचा आढावा घेतला. उर्वरीत कामांमध्ये दिरंगाई होणार नाही यासाठी जबाबदारी निश्चित करण्यात यावी. प्रत्यक्ष झालेल्या कामांची पाहणी करण्यात येईल. शासनस्तरावरील मान्यतेसाठी सादर करण्यात आलेल्या प्रस्तावाबाबत मुख्यमंत्री महोदयांशी चर्चा करण्यात येईल, असे त्यांनी यावेळी सांगितले.

कार्यकारी अभियंता श्री. बडे यांनी झालेल्या व सुरु असलेल्या कामांची सविस्तर माहिती दिली.

00000

भविष्यात पाणी टंचाई भासणार नाही

यासाठी पाणी आरक्षणाचे नियोजन करावे  

- पालकमंत्री अर्जुन खोतकर

नांदेड, दि. 13 :- जिल्ह्यात भविष्यात पाणी टंचाई भासणार नाही यासाठी आवश्यक त्या ठिकाणी जलाशयातील पाणी आरक्षणाबाबत योग्य नियोजन करावे, असे निर्देश राज्याचे पशुसंवर्धन, दुग्धव्यवसाय विकास, मत्स्यव्यवसाय व वस्त्रोद्योग राज्यमंत्री तथा नांदेड जिल्ह्याचे पालकमंत्री अर्जुन खोतकर यांनी आज येथे दिले. जिल्ह्यातील पाणी आरक्षणाबाबत बैठकीच्या अध्यक्षस्थानावरुन श्री. खोतकर बोलत होते. जिल्हाधिकारी कार्यालयातील डॉ. शंकरराव चव्हाण जिल्हा नियोजन भवन येथे बैठक संपन्न झाली.

यावेळी आमदार हेमंत पाटील, आमदार प्रदिप नाईक, जिल्हाधिकारी अरुण डोंगरे, जिल्हा परिषदेचे मुख्य कार्यकारी अधिकारी अशोक शिनगारे, अप्पर जिल्हाधिकारी संतोष पाटील, मनपा आयुक्त गणेश देशमुख, उपजिल्हाधिकारी श्रीमती अनुराधा ढालकरी, नांदेड पाटबंधारे मंडळाचे अधीक्षक अभियंता एस. के. सब्बीनवार, उपविभागीय अधिकारी प्रदीप कुलकर्णी, तहसिलदार किरण अंबेकर, पाटबंधारे विभागाचे कार्यकारी अभियंता, जिल्ह्यातील नगरपरिषदेचे मुख्याधिकारी उपस्थित होते.

पालकमंत्री श्री. खोतकर म्हणाले की, जिल्ह्यात पाणी टंचाई काळात पिण्याच्या पाण्यासाठी प्रथम प्राधान्य देऊन आवश्यक त्या ठिकाणी पाणी आरक्षण करण्यात यावे. जायकवाडी पुर्ण क्षमतेने भरुन आहे. मनपाने नांदेड शहराच्या पाण्यासाठी जायकवाडी प्रकल्पातील पाणी आरक्षण मागणीचा प्रस्ताव सादर करावा. जिल्ह्यातील गेल्या वर्षीच्या पाणी टंचाई परिस्थितीचा आढावा घेऊन त्यावेळी केलेल्या उपाययोजनांचीही माहिती श्री. खोतकर यांनी घेतली.  

यावेळी जिल्हाधिकारी अरुण डोंगरे यांनी नांदेड जिल्ह्यातील पर्जन्यमान, जलाशयातील उपलब्ध पाणीसाठा, जलाशयातील पाणी आरक्षण, पाणीटंचाई याबाबत संभाव्य उपाययोजनेची सादरीकरणाद्वारे माहिती दिली.

0000000

शेतकऱ्यांच्या कृषिपंपाची वीज जोडणी तोडण्यात येऊ नये

- पालकमंत्री अर्जुन खोतकर

जिल्हा वार्षिक योजनेतील निधी वेळेत खर्च करण्याच्या सूचना

नांदेड, दि. 13 :- शेती पिकासाठी देण्यात येणारी कृषिपंपाची वीज जोडणी तोडण्यात येऊ नये, तोडण्यात आलेले जोडणी त्वरीत सुरळीत करुन शेतकऱ्यांची काळजी घ्यावी, असे निर्देश राज्याचे पशुसंवर्धन, दुग्धव्यवसाय विकास, मत्स्यव्यवसाय व वस्त्रोद्योग राज्यमंत्री तथा नांदेड जिल्ह्याचे पालकमंत्री अर्जुन खोतकर यांनी आज येथे दिले. जिल्हा नियोजन समिती बैठकीच्या अध्यक्षस्थानावरुन श्री. खोतकर बोलत होते. बैठकीत जिल्हा वार्षिक योजना (सर्वसाधारण) सन 2017-18, अनुसुचित जाती उपयोजना, आदिवासी उपयोजना अंतर्गत ऑक्टोंबर 2017 अखेर झालेल्या खर्चाचा आढावा घेण्यात आला.

जिल्हाधिकारी कार्यालयातील डॉ. शंकरराव चव्हाण जिल्हा नियोजन भवनातील मुख्य सभागृहात बैठक संपन्न झाली. बैठकीस माजी मुख्यमंत्री तथा खासदार अशोकराव चव्हाण, जिल्हा परिषद अध्यक्षा शांताबाई पवार जवळगावकर, आमदार सर्वश्री अमर राजुरकर, डी. पी. सावंत, वसंतराव चव्हाण, हेमंत पाटील, प्रदीप नाईक, डॉ. तुषार राठोड, जिल्हाधिकारी अरुण डोंगरे, जिल्हा परिषदेचे मुख्य कार्यकारी अधिकारी अशोक शिनगारे, पोलीस अधीक्षक चंद्रकिशोर मिना, मनपा आयुक्त गणेश देशमुख, अप्पर जिल्हाधिकारी संतोष पाटील, जिल्हा नियोजन समितीचे नवनिर्वाचित सदस्य, जिल्हा परिषद, कृषि, जलसंपदा, सार्वजनिक बांधकाम विभाग, आरोग्य, शिक्षण, महावितरण यांच्यासह जिल्ह्यातील विविध विभागांचे प्रमुख अधिकारी आदींची उपस्थिती होती.

बैठकीच्या अध्यक्षस्थानावरुन पालकमंत्री श्री खोतकर यांनी जिल्हा नियोजन समितीच्या यापुर्वी संपन्न झालेल्या बैठकीच्या अनुपालन अहवालावरील चर्चेच्या अनुषंगाने ते म्हणाले की, जिल्हा वार्षिक योजनेतील उपलब्ध झालेली तरतुद मार्च अखेर अखर्चित अथवा व्यपगत होऊ नये यासाठी सर्व कार्यान्वीत अधिकाऱ्यांनी आतापासून नियोजन करुन उपलब्ध निधी विकास कामांवर पुर्ण खर्च करावा. शेतकऱ्यांच्या कृषि पंपाची वीज जोडणी तोडण्यात येऊ नयेत, याबाबत शासनाच्या स्पष्ट सुचना आहेत. या सुचनांची अंमलबजावणी त्वरीत करावी. शेतकऱ्यांच्या मागणीनुसार रोहित्र (ट्रान्सफार्मर) बदलुन देण्याची कार्यवाही करावी. जिल्ह्यात सोयाबीन, उडीद खरेदी केंद्रे सुरु करण्यात आली आहेत. उर्वरीत ठिकाणीही खरेदी केंद्रे लोकप्रतिनिधींशी चर्चा करुन सुरु करावीत, असे निर्देश त्यांनी दिले.  

पालकमंत्री श्री. खोतकर यांनी आगामी टंचाई परिस्थतीवर मात करण्यासाठी उपाययोजनांचाही सविस्तर आढावा घेतला. जिथे पाण्याची आवश्यकता आहे, तेथे मागणीनुसार पाणी सोडण्याच्या सुचनाही केली. तसेच गावातील पिण्याच्या पाण्याचे कनेक्शन मागील थकबाकीचा विचार न करता, चालु थकबाकी भरुन विद्युत जोडणी सुरळीत करण्यात यावी. आगामी काळात नांदेड शहराला जायकवाडी धरणातुन पाणी पुरविण्याबाबत मनपाने पाणी आरक्षणाचा प्रस्ताव सादर करावा, असेही त्यांनी सांगितले. शहरातील घनकचरा व्यवस्थापन कामाची माहिती घेऊन याबाबत त्वरीत कार्यवाही पुर्ण करावी. रस्त्यावरील खड्डे बुजविण्यासाठी कार्यक्रम ठरविण्यात आला आहे. ही कामे गुणवत्तापुर्ण स्थानिक लोकप्रतिनिधींच्या सुचना लक्षात घेऊन 15 डिसेंबर पर्यंत पुर्ण करावीत. जिल्हा नियोजन समितीचा निधी इतरत्र वळविण्यात येणार नाही याबाबत मुख्यमंत्री महोदयांशी चर्चा करण्यात येईल. जिल्ह्यातील कायदा व सुव्यवस्थेचा आढावा घेऊन विविध प्रकरणांची निष्पक्षपणे समाधानकारक चौकशी केली जाईल, असेही पालकमंत्री श्री खोतकर यांनी सांगितले.

यावेळी दलितवस्ती योजनेतील कामे, तलावातील गाळ काढणे, पिकांची आणेवारी, जलयुक्त शिवार,  विष्णुपुरी प्रकल्प गेट दुरुस्ती, अतिदुर्गम गावे रस्त्यांना जोडणे, डॉ. शंकरराव चव्हाण वैद्यकीय महाविद्यालय व रुग्णालयातील स्वच्छता, श्री गुरुगोबिंदसिंघजी रुग्णालय पुर्ण क्षमतेने चालु राहिले पाहिजे, स्वा. रा. तीर्थ मराठवाडा विद्यापिठ- शासकीय वैद्यकीय महाविद्यालय- श्री गुरुगोबिंदसिंघजी आभियांत्रिकी महाविद्यालय मार्गावर नागरीक, विद्यार्थी व कर्मचाऱ्यांसाठी वेळेनुसार बसेसच्या फेऱ्या तसेच त्या ठिकाणी पोलीस बंदोबस्त वाढवणे, नांदेड व देगलूर शहरात सीसीटीव्ही कॅमेरे बसविणे, ग्रामीण आरोग्य, शाळा, लेंडी प्रकल्प, पर्यटनक्षेत्र, पशुवैद्यकीय आरोग्य सेवा, मत्स्यव्यवसाय, आदर्श ग्राम योजना, आदी विषयांवर पालकमंत्री श्री. खोतकर यांनी चर्चा करुन संबंधित विभागाला उपयुक्त सुचना दिल्या.

पालकमंत्री श्री. खोतकर यांनी जिल्हा नियोजन समितीतील नवनिर्वाचित सदस्यांचे स्वागत केले. तसेच यशदा पुणे येथे नवनिर्वाचित सदस्यांना प्रशिक्षण देण्यासाठी प्रयत्न केले जातील, असे सांगितले.  

यावेळी ऑक्टोंबर 2017 अखेर झालेल्या खर्चाचा आढावा घेण्यात आला त्याचा तपशील पुढील प्रमाणे आहे. जिल्हा वार्षिक योजना (सर्वसाधारण)- 2017-18 साठी मंजुर तरतुद 235 कोटी 21 लाख, प्राप्त तरतुद 185 कोटी 50 लाख 53 हजार, वितरीत तरतुद 104 कोटी 57 लाख 23 हजार, ऑक्टोंबर 2017 अखेर खर्च 80 कोटी 26 लाख 66 हजार, वितरीत तरतुदीशी खर्च 76.76 टक्के. अनुसुचित जाती उपयोजना- मंजुर तरतुद 159 कोटी 3 लाख, प्राप्त तरतुद 153 कोटी 95 लाख 91 हजार, वितरीत तरतुद 89 कोटी 21 लाख 87 हजार, ऑक्टोंबर 2017 अखेर खर्च- 29 कोटी 95 लाख 26 हजार, वितरीत तरतुदीशी खर्च 33.57 टक्के. आदिवासी उपयोजना (ओटीएसपीसह)- मंजुर तरतुद 74 कोटी 78 लाख 61 हजार, प्राप्त तरतुद 70 कोटी 38 लाख 61 हजार, वितरीत तरतुद 43 कोटी 79 लाख 59 हजार, ऑक्टोंबर 2017 अखेर खर्च 26 कोटी 18 लाख 5 हजार, वितरीत तरतुदीशी खर्चाची टक्केवारी 59.78. एकुण- मंजुर तरतुद 469 कोटी 2 लाख 61 हजार, प्राप्त तरतुद 409 कोटी 85 लाख 5 हजार, वितरीत तरतुद 237 कोटी 58 लाख 69 हजार, ऑक्टोंबर 2017 अखेर खर्च 136 कोटी 39 लाख 97 हजार, वितरीत तरतुदीशी खर्च 57.41 टक्के अशी आहे. 

जिल्हा नियोजन अधिकारी सुरेश थोरात यांनी बैठकीचे संयोजन केले व आभार मानले.

0000000

जिल्हाधिकारी अरुण डोंगरे यांची मौजे धनगरवाडी येथे

रेशीम शेती क्षेत्रास भेट व  रेशीम किटक संगोपन गृहाचे भुमिपूजन 

नांदेड, दि. 11:-   येथील मौजे धनगरवाडी ता . जि. नांदेड येथे रेशीम शेती  क्षेत्र व मौजे धनगरवाडी येथील सहा शेतकऱ्यांना मनरेगा अंतर्गत सहा शेतकऱ्यांना किटक संगोपन गृह मंजूरी मिळाली. या किटक संगोपन गृहाचे भुमिपूजन जिल्हाधिकारी अरुण डोंगरे यांच्या हस्ते झाले.  

तसेच या कार्याक्रमांप्रसंगी मौ. धनगरवाडी येथील मारोती रंगनाथ पगडे, तुळशीराम पगडे यांना माती परिक्षण अहवालाचे प्रमाणपत्र जिल्हाधिकारी श्री. डोंगरे यांच्या हस्ते वितरण करण्यात आले.  

यावेळी शेतकरी गोविंद दत्ताराम पगडे, पुंडलिक काकडे, माधव दादाराव कदम यांनी आपआपली यावेळी मनोगते व्यक्त केली.

जिल्हाधिकारी अप्पर जिल्हाधिकारी संतोष पाटील, उपविभागीय अधिकारी प्रदीप कुलकर्णी, भोकर येथील उपविभागीय अधिकारी श्रीमती दिपाली मोतीयेळे, जिल्हा परिषदेच्या उपमुख्य कार्यकारी अधिकारी श्रीमती क्षिरसागर, रेशीम विकास अधिकारी पी. जे. पाटील, रेशीम विकास अधिकारी श्री. ढावरे, वैज्ञानिक डी. परभणी ए. जे. कारंडे, प्रकल्प अधिकारी, रेशीम पी. बी. नरवाडे, तहसीलदार किरण अंबेकर, तसेच प्रगतीशील रेशीम उत्पादक शेतकरी सत्कार हरीभाऊ पगडे , धनगरवाडी ता. नांदेड, सईदखान आयुबखान, दिग्रस ता. हदगाव, आनंद बळीराम कदम मुगट ता. मुदखेड, दत्तराव आबाराव क्षिरसागर ता. आडगाव ता. लोहा , प्रभाकर व्यंकटी पांचाळ कोंडा ता. अर्धापूर , सर्व तालुक्यांचे तहसीलदार, उपविभागीय अधिकारी, बार्टीचे प्रकल्प अधिकारी श्रीमती सुजाता पोहरे, समतादुत अविनाश जोंधळे, विनोद पांचगे, शेतकरी, संरपंच आदिं विविध विभागाच्या विभाग प्रमुखांची यावेळी उपस्थिती होती.

****    

शेतकऱ्यांनी शेतीला पुरक व्यवसाय म्हणून तुतीची लागवड करावी

 --- जिल्हाधिकारी अरुण डोंगरे

नांदेड, दि. 11:- दिनांक 1 नोव्हेंबर ते 30 नोव्हेंबर, 2017 या कालावधीत महारेशीम -2018 राबविण्यात येत आहे. त्यासाठी नांदेड जिल्ह्यातील 50 गावांची निवड करण्यात आलेली आहे. तसेच तुती लागवड उद्योग हा पर्यावरणपुरक आहे. शेतकऱ्यांनी शेतीला पुरक व्यवसाय म्हणून तुतीची लागवड करण्यात यावी, असे जिल्हाधिकारी अरुण डोंगरे यांनी सांगितले.

जिल्हाधिकारी श्री. डोंगरे पुढे म्हणाले की,  भारत रेशीम धागा आयात करत आहे. रेशीम धाग्याची उत्पादन क्षमता वाढवून आपली गरज भागविण्यासोबतच अन्य देशांनादेखील मागणीप्रमाणे रेशीम धागा पुरविण्याची संधी भारताला आहे, काही शेतकऱ्यांनी पंधरा वर्षा पूर्वी शाश्वत उत्पन्नाचा मार्ग म्हणून रेशीम शेतीचा पर्याय निवडला आहे. रेशीमची मागणी पाहता उत्पादन फक्त देश पातळीवर 15% आहे. शेतकरी रेशीम शेती करत आहे, असे जिल्हाधिकारी श्री. डोंगरे यांनी सांगितले.  

महा-रेशीम  अभियान -2018  संबंधी महात्मा गांधी राष्ट्रीय ग्रामीण रोजगार हमी योजना अंतर्गत कार्यशाळा जिल्हाधिकारी अरुण डोंगरे यांच्या अध्यक्षतेखाली नियोजन भवन , प्रेक्षागृह जिल्हाधिकारी कार्यालय, नांदेड येथे संपन्न झाली .

या बैठकीस अप्पर जिल्हाधिकारी संतोष पाटील, उपविभागीय अधिकारी प्रदीप कुलकर्णी, भोकर येथील उपविभागीय अधिकारी श्रीमती दिपाली मोतीयेळे, जिल्हा परिषदेच्या उपमुख्य कार्यकारी अधिकारी श्रीमती क्षिरसागर, उपजिल्हाधिकारी श्री.कांबळे, रेशीम विकास अधिकारी पी. जे. पाटील, रेशीम विकास अधिकारी श्री. ढावरे, वैज्ञानिक डी. परभणी ए. जे. कारंडे, प्रकल्प अधिकारी, रेशीम पी. बी. नरवाडे, तहसीलदार किरण अंबेकर, अर्धापूर तहसीलदार अरवींद नरसीकर, मुदखेड तहसीलदार सुरेश घोळवे, देगलूर प्र. तहसीलदार वसंत नरवडे, तसेच प्रगतीशील रेशीम उत्पादक शेतकरी सत्कार हरीभाऊ पगडे , धनगरवाडी ता. नांदेड, सईदखान आयुबखान, दिग्रस ता. हदगाव, आनंद बळीराम कदम मुगट ता. मुदखेड, दत्तराव आबाराव क्षिरसागर ता. आडगाव ता. लोहा , प्रभाकर व्यंकटी पांचाळ कोंडा ता. अर्धापूर , सर्व तालुक्यांचे तहसीलदार,

 उपविभागीय अधिकारी, बार्टीचे प्रकल्प अधिकारी श्रीमती सुजाता पोहरे, समतादुत अविनाश जोंधळे, विनोद पांचगे, तलाठी , ग्रामसेवक , कृषी सहाय्यक , पर्यवेक्षक, ग्रामविकास अधिकारी, विस्तार अधिकारी , मंडळ अधिकारी, तालुका कृषी अधिकारी, शेतकरी, संरपंच आदिं विविध विभागाच्या विभाग प्रमुखांची यावेळी उपस्थिती होती.   

रेशीम विकास अधिकारी श्री. ढावरे म्हणाले की, रेशीम शेती ही एक शास्वत स्त्रोत आहे.यामुळे शेतकऱ्यांची प्रगती होणार आहे. तुती लागवड कमी भांडलातून करता येते.  रेशीम शेती कशी करावी. तसेच त्यासाठी लागणारे वातावरणाविषयीची माहिती दिली.

परभणीचे डी. वैज्ञनिक ए.जे . कारंडे म्हणाले की, रेशीम अळीचे जीवनचक्र व किटक संगोपनाबाबतची माहिती दिली. भारतात तुती रेशीम, टसर रेशीम, एरी रेशी , मुगा रेशीम हे प्रकार आहेत. तसेच तुतीची लागवड , खते, तापमान तसेच शेतकऱ्यांना तुती लागवडीबाबत मार्गदर्शन केले.

प्रकल्प अधिकारी रेशीम श्री. पी.बी. नरवाडे यांनी महात्मा गांधी राष्ट्रीय ग्रामीण हमी योजनेबाबतची माहिती शेतकऱ्यांना दिली.

जिल्हा अधीक्षक कृषी अधिकारी श्री. मोटे यांनी तुती लागवडीचे संगोपन तसेच त्याला पोषक वातावरण व कृषि विभागामार्फत शेततळे , जलयुक्त अभियानामार्फत शेतकऱ्यांना दिल्या जाणाऱ्या योजनांची माहिती देवून मार्गदर्शन केले.

कार्यक्रमाच्या शेवटी शेतकऱ्यांनी तुती लागवडीबाबत तसेच अन्य अडचणींचा प्रश्नोत्तरे झाली. या कार्यक्रमात विभाग प्रमुखामार्फत शेतकऱ्यांच्या अडचणी सोडविण्याबाबत मार्गदर्शन करण्यात आले.

या कार्यक्रमाचे सुत्रसंचालन पांडूरंग मामीडवार यांनी केले . तर आभार रेशिम विकास अधिकारी पी. जी. पाटील यांनी मानले.

*****