लोकसभा सार्वत्रिक निवडणूक

निवडणूक निरिक्षक (खर्च) म्हणून

विरेंद्र सिंघ यांची नियुक्ती

नांदेड, दि. 21 :- निवडणूक आयोगाने लोकसभा सार्वत्रिक निवडणूक-2019 ची घोषणा केली आहे. त्यानुसार 16 नांदेड लोकसभा निवडणुकीसाठी विरेंदर सिंघ यांची निवडणूक निरिक्षक (खर्च) म्हणून नियुक्ती करण्यात आली आहे. 16-नांदेड लोकसभा परिक्षेत्रातील नागरिकांनी लोकसभा सार्वत्रिक निवडणूककरीता आपल्या काही तक्रारी असतील तर त्यांनी 9022069690 या क्रमांकावर संपर्क साधावा किंवा निवडणूक निरीक्षक कक्ष यांचेशी संपर्क करावा, असे आवाहन जिल्हाधिकारी तथा निवडणूक निर्णय अधिकारी 16, नांदेड लोकसभा मतदारसंघ यांनी केले आहे.

00000

जिल्ह्यात जमावबंदी, शस्त्रबंदी आदेश लागू  

नांदेड, दि. 20 :- जिल्ह्यात 6 एप्रिल 2019 रोजी मध्यरात्रीपर्यंत शस्त्रबंदी व जमावबंदी आदेश लागू राहणार आहे, अशी माहिती अपर जिल्हादंडाधिकारी कार्यालयाकडून देण्यात आली आहे.

जिल्ह्यातील कायदा व सुव्यवस्था अबाधित रहावी म्हणून अपर जिल्हादंडाधिकारी यांनी मुंबई पोलीस अधिनियम 1951 चे कलम 37 (1) व (3) अन्वये जिल्ह्यात 23 मार्च ते 4 एप्रिल 2019 रोजी मध्यरात्रीपर्यंत शस्त्रबंदी व जमावबंदी आदेश लागू राहिल. त्यानुसार पाच किंवा पाचपेक्षा अधिक व्यक्तींनी या आदेशात नमुद असलेली कृत्ये सार्वजनिक परिसर किंवा त्याच्या जवळपास करण्यास बंदी घालण्यात आली आहे. हा आदेश पोलीस अधिकारी, शासकीय कर्मचारी, विवाह, अंत्ययात्रा, धार्मिक कार्यक्रम, यात्रा व इतर सक्षम अधिकारी यांनी विशेषरित्या परवानगी दिलेल्या मिरवणुकांना लागू होणार नाही.

अशा मिरवणुकांना परवानगी देण्याचे अधिकार तसेच पाच व पाचपेक्षा जास्त इसम जमण्यासाठी, सभा, मिरवणुका, मोर्चा काढणे, ध्वनीक्षेपक वाजविण्यास परवानगी देण्याचे अधिकार जिल्ह्यातील पोलीस ठाणे प्रभारी अधिकारी यांना तसेच पोलीस अधीक्षक नांदेड यांनी प्राधिकृत केलेल्या इतर पोलीस अधिकारी यांना राहतील.

000000

ग्रामपंचायत मतदान, मतमोजणी केंद्र

परिसरात प्रतिबंधात्मक आदेश

नांदेड दि. 18 :- जिल्ह्यात ग्रामपंचायत सार्वत्रिक व पोटनिवडणुकीची संपूर्ण प्रक्रिया शांततेत, निर्भय व न्याय्य वातावरणात पार पाडण्यासाठी रविवार 24 मार्च रोजी मतदान केंद्र परिसर तसेच सोमवार 25 मार्च रोजी मतमोजणी केंद्र परिसरात फौजदारी प्रक्रिया कलम 144 लागू करण्यात आले आहे. याबाबतचे आदेश जिल्हादंडाधिकारी अरुण डोंगरे यांनी निर्गमीत केले आहेत.  

या निवडणूक कालावधीत कायदा व सुव्यवस्था अबाधीत रहावी यादृष्टीने 24 मार्च रोजी जिल्ह्यात ज्या ग्रामपंचायतीच्या हद्दीत मतदान होणार आहे अशा मतदान केंद्राच्या हद्दीपासून तर 25 मार्चला संबंधीत तहसिलदार यांनी निश्चित केलेल्या मतमोजणी केंद्रापासून 200 मीटर परिसरातील मंडपे, सर्व दुकाने, मोबाईल, कॉडलेस फोन, पेजर, वायरलेस सेट, ध्वनीक्षेपके, सर्व प्रकारचे फेरीवाले व इतर इलेक्ट्रॉनिक्स उपकरणे, निवडणुकीच्या कामाव्यतीरिक्त खाजगी वाहन, चिन्हांचे प्रदर्शन, व्यक्तींस प्रवेश करण्यास प्रतिबंध करण्यात आला आहे.

हा आदेश नांदेड जिल्ह्यातील ग्रामपंचायतीच्या सार्वत्रिक व पोटनिवडणूकीसाठी ग्रामपंचायत हद्दीत 24 मार्च रोजी मतदानाच्या दिवशी मतदान केंद्राच्या हद्दीपर्यंत सकाळी 6 वाजेपासून ते मतदानाची प्रक्रिया संपेपर्यंत अंमलात राहील. तसेच मतमोजणी केंद्राच्या हद्दीपर्यंत 25 मार्च रोजी सकाळी 8 वाजेपासून ते मतमोजणी प्रक्रिया संपेपर्यंत हा आदेश लागू राहील, असे आदेशात नमूद केले आहे.

000000

मतदारांनी मतदार यादीत

नाव असल्याची खात्री करुन घ्यावी

नांदेड दि. 18 :- नांदेड लोकसभा मतदारसंघाअंतर्गत 86- नांदेड उत्तर नांदेड विधानसभा मतदारसंघातील मतदारांनी मतदार यादीत नाव असल्याची खात्री करुन घ्यावी. मतदार यादीत नाव शोधण्यासाठी सहाय्यक मतदार नोंदणी अधिकारी कार्यालय तहसिल कार्यालय नांदेड येथे जाऊन पडताळणी करता येईल किंवा मोबाईल, संगणकावर www.votersearch.gov.in या संकेतस्थळावर नाव शोधू शकतात.

लोकसभा सार्वत्रिक निवडणूक 2019 साठी गुरुवार 18 एप्रिल 2019 रोजी मतदान होत असून मतदार यादीत नाव असलेल्या सर्व मतदारांना मतदान करण्याचा अधिकार आहे. मतदान करण्यासाठी जाताना मतदान ओळखपत्र असणे आवश्यक आहे. परंतू ज्या मतदारांना अद्याप मतदान ओळखपत्र मिळालेले नाही किंवा त्यांच्याकडील मतदान ओळखपत्र गहाळ झाले असेल तर त्यांनी पुढील पुरावे मतदान अधिकारी यांना दाखवून मतदान करु शकतात.

पासपोर्ट, ड्रायव्हींग लायसन्स, कर्मचारी ओळखपत्र, छायाचित्र असलेले बँकेचे / पोस्टाचे पासबुक, पॅनकार्ड, स्मार्टकार्ड, मनरेगा जॉबकार्ड, आरोग्यविमा स्मार्ट कार्ड, छायाचित्रासह असलेले सेवानिवृत्त वेतन कागदपत्रे, खासदार, आमदार यांना वितरीत केलेले ओळखपत्र, आधारकार्ड यापैकी एक ओळखपत्र दाखवता येईल.

मतदान करणे हा या अधिकाराचा वापर सर्व मतदारांनी  करावा, असे आवाहन सहाय्यक निवडणूक निर्णय अधिकारी तथा उपजिल्हाधिकारी रोहयो यांनी केले आहे.

00000

राष्ट्रीय तंबाखू नियंत्रण कार्यक्रमांतर्गत

शालेय विद्यार्थ्यांना पारितोषिकाचे वितरण

नांदेड दि. 14 :- राष्ट्रीय तंबाखू नियंत्रण कक्ष जिल्हा रुग्णालय नांदेड यांच्यामार्फत नांदेड तालुक्यातील एकूण 39 शाळांमध्ये निबंध, चित्रकला व रांगोळी स्पर्धांचे आयोजन करण्यात आले होते. त्यात एकूण 559 विद्यार्थी बक्षिसास पात्र ठरले. त्यापैकी प्रथम आलेल्या 113 विद्यार्थ्यांना सन्मानचिन्ह व प्रमाणपत्र तसेच उर्वरित 446 विद्यार्थ्यांना प्रोत्साहनपर प्रमाणपत्राचे वाटप दि. १४ मार्च रोजी जिल्हा शल्यचिकित्सक कार्यालयातील सर्जिकल हॉल येथे करण्यात आले.

या कार्यक्रमासाठी अध्यक्ष म्हणून जिल्हा शिक्षणाधिकारी श्री दिग्रसकर, उद्घाटक म्हणून जिल्हा शल्यचीकीत्सक डॉ. बी. पी. कदम, प्रमुख पाहुणे म्हणून जिल्हा आरोग्य अधिकारी डॉ. विठ्ठल मेकाने, मनपाचे शिक्षणाधिकारी श्री बनसोडे, नोडल अधिकारी डॉ. एच.आर. गुंटूरकर, गटशिक्षणाधिकारी, संबंधीत शाळांचे मुख्याधापक व प्रथम पुरस्कार विजेते विद्यार्थी उपस्थित होते.

यावेळी मान्यवरांनी तंबाखू मुक्त शाळा, विद्यार्थांचा सहभाग तसेच राष्ट्रीय तंबाखू नियंत्रण कार्यक्रम व कोटपा कायदा याबाबत उपस्थितांना मार्गदर्शन केले. याप्रकारच्या स्पर्धा व कार्यक्रमांमधून विद्यार्थ्यांमध्ये तंबाखू दुष्परिणामाबाबत माहिती होऊन, मुले तंबाखू व्यसनापासून दूर राहण्यास मदत होते असे मत उपस्थित मुख्याध्यापक प्रतिनिधींनी व्यक्त केले. राष्ट्रीय तंबाखू नियंत्रण कक्ष जिल्हा रुग्णालय नांदेड यांचे कार्य उत्कृष्ट असून जिल्ह्यातील सर्व शाळा तंबाखू मुक्त करण्यासाठी शिक्षण विभाग कटिबद्ध आहे असे प्रतिपादन कार्यक्रम अध्यक्ष यांनी भाषणामध्ये केले.

सूत्रसंचालन डॉ. साईप्रसाद शिंदे यांनी केले तर आभार प्रदर्शन डॉ. डी. एन. हजारी यांनी केले. सदर कार्यक्रम यशस्वी करण्यासाठी कार्यक्रम समन्वयक डॉ. प्रदीप बोरसे, सामाजिक कार्यकर्ता बालाजी गायकवाड, प्रयोग शाळा तंत्रज्ञ संतोष बेटकर, समुपदेशक सदाशिव सुवर्णकार, दत्तात्रय सवादे आदींनी परिश्रम घेतले.  

000000

लोकसभा निवडणूक

विविध बाबींवर निर्बंध आदेश

नांदेड दि. 14 :- भारत निवडणूक आयोगाने 10 मार्च 2019 रोजी लोकसभेचा सार्वत्रिक निवडणूक 2019 चा कार्यक्रम घोषित केला आहे. त्यानुसार आदर्श आचारसंहिता अंमलात आली असून या काळात निवडणूकीची संपूर्ण प्रक्रिया शांततेत, निर्भय व न्‍याय वातावरणात पार पाडण्‍याच्‍या दृष्‍टीकोणातून तसेच निवडणूकीचे कामे हाताळतांना कायदा व सुव्यवस्थेचा प्रश्न निर्माण होऊ नये म्हणून जिल्हादंडाधिकारी अरुण डोंगरे यांनी फौजदारी प्रक्रिया संहिता 1973 चे कलम 144 अन्वये  विविध निर्बंधाबाबत आज आदेश निर्गमीत केले आहेत.

कार्यालय / विश्रामगृह  परिसरात

मिरवणूका, घोषणा, सभा घेण्यास निर्बंध                                  

            जिल्‍हाधिकारी कार्यालय, सर्व उपविभागीय अधिकारी कार्यालये, तहसिल कार्यालये आणि शासकीय कार्यालय व विश्रामगृह या ठिकाणी कोणत्‍याही प्रकारची मिरवणूक / मोर्चा काढणे, सभा घेणे, उपोषण करणे, घोषणा देणे, वाद्य वाजविणे किंवा गाणी म्‍हणने आदी प्रकारचा निवडणूक प्रचार करण्यास बंदी घालण्यात आली आहे. हा आदेश 11 मार्च ते 19 एप्रिल 2019 पर्यंत अंमलात राहील.

ध्‍वनीक्षेपकाचा वापर  

            जिल्ह्यात कोणतीही व्‍यक्‍ती, संस्‍था पक्ष कार्यकर्ते यांना ध्‍वनीक्षेपकाचा लाऊडस्पिकरचा वापर सक्षम पोलीस अधिका-यांच्‍या पुर्व परवानगीशीवाय करता येणार नाही. फिरते वाहन रस्त्यावरुन धावत असतांना त्‍यावरील ध्‍वनिक्षेपकाचा वापर करता येणार नाही. निवडणूक कालावधीत लाऊडस्पिकरचा वापर सकाळी 6 वाजे पुर्वी व रात्री 10 वाजेनंतर करता येणार नाही. हा आदेश 11 मार्च ते 19 एप्रिल 2019 पर्यंत अंमलात राहील.

वाहनाचा वापर, पक्ष कार्यालये,

सार्वजनिक मालमत्‍तेची विरुपता करण्‍यास निर्बंध

            जिल्ह्यात कोणत्‍याही वाहनांच्‍या ताफ्यामध्‍ये तीन पेक्षा जास्‍त मोटारगाडया अथवा वाहने वापरण्‍यास, जिल्‍ह्यातील धार्मिक स्‍थळे, रुग्‍णालये किंवा शैक्षणिक संस्‍था व सार्वजनिक ठिकाणाच्‍या जवळपास तात्‍पुरती पक्ष कार्यालये स्‍थापीत करता येणार नाही. तसेच संबंधीत पक्षांचे चित्रे / चिन्‍हांचे कापडी फलके, सार्वजनिक ठिकाणी भाषण देणे, शासकीय, निमशासकीय, सार्वजनिक मालमत्‍तेची प्रत्‍यक्ष किंवा अप्रत्‍यक्ष स्‍वरुपात विरुपता करण्‍यास निर्बंध घालण्‍यात आला आहे, हा आदेश 11 मार्च ते 19 एप्रिल 2019 पर्यंत अंमलात राहील.

मतदानाच्या दिवशी 

मतदान केंद्र परिसरात 144 कलम लागू   

जिल्‍ह्यात ज्या मतदान केंद्रावर मतदान होणार आहे त्‍याठिकाणी 200 मीटर परिसरातील सर्व पक्षकारांचे मंडपे, दुकाने, मोबाईल, कॉडलेस फोन, पेजर, वायरलेस सेट, ध्‍वनीक्षेपके, सर्व प्रकारचे फेरीवाले व इतर इलेक्‍ट्रॉनिक्‍स उपकरणे, निवडणुकीच्‍या कामाव्‍यतीरीक्‍त खाजगी वाहन, संबंधीत पक्षाचे चिन्‍हेंचे प्रदर्शन व निवडणूकीच्‍या कामाव्‍यतीरीक्‍त व्‍यक्‍तीस प्रवेश करण्यास प्रतिबंध करण्‍यात आले आहे. हा आदेश 18 एप्रिल 2019 रोजी मतदान सुरु झाल्‍यापासुन मतदान होईपर्यंत अंमलात राहील.

उमेदवारांचे नामनिर्देशनपत्र दाखल करतांना

निवडणूक निर्णय अधिकारी यांच्‍या कार्यालयाच्या परिसरात नामनिर्देशनपत्र दाखल करतेवेळी कार्यालयाच्‍या परिसरात मिरवणूक, सभा घेणे, कोणत्‍याही प्रकारच्‍या घोषणा देणे, वाद्य वाजवणे किंवा गाणी म्‍हणने आणि कोणत्‍याही प्रकारचा निवडणूक प्रचार करण्यास तसेच वाहनाच्‍या ताफ्यामध्‍ये 3 पेक्षा जास्‍त वाहने निवडणूक निर्णय अधिकारी यांचे कार्यालयाच्‍या 100 मिटरचे परिसरात आणण्यास तसेच निवडणूक निर्णय अधिकारी यांच्‍या दालनात नामनिर्देशनपत्र दाखल करण्‍यासाठी पाच व्‍यक्‍ती पेक्षा जास्‍त व्‍यक्‍तींना उपस्थित राहण्‍यास प्रतिबंध घालण्‍यात आले आहे. हा आदेश नांदेड जिल्‍ह्यासाठी 11 मार्च ते 29 मार्च 2019 पर्यंत अंमलात राहील.

0000

जिल्ह्यात जमावबंदी, शस्त्रबंदी आदेश लागू

नांदेड, दि. 14 :- जिल्ह्यात 22 मार्च 2019 रोजी मध्यरात्रीपर्यत शस्त्रबंदी व जमावबंदी आदेश लागू केला आहे, अशी माहिती अपर जिल्हादंडाधिकारी कार्यालयाकडून देण्यात आली आहे.

जिल्ह्यातील कायदा व सुव्यवस्था अबाधित रहावी म्हणून अपर जिल्हादंडाधिकारी यांनी मुंबई पोलीस अधिनियम 1951 चे कलम 37 (1) व (3) अन्वये जिल्ह्यात 9 ते 22 मार्च 2019 रोजी मध्यरात्रीपर्यंत शस्त्रबंदी व जमावबंदी आदेश लागू केला आहे. त्यानुसार पाच किंवा पाचपेक्षा अधिक व्यक्तींनी या आदेशात नमुद असलेली कृत्ये सार्वजनिक परिसर किंवा त्याच्या जवळपास करण्यास बंदी घालण्यात आली आहे. हा आदेश पोलीस अधिकारी, शासकीय कर्मचारी, विवाह, अंत्ययात्रा, धार्मिक कार्यक्रम, यात्रा व इतर सक्षम अधिकारी यांनी विशेषरित्या परवानगी दिलेल्या मिरवणुकांना लागू होणार नाही.

अशा मिरवणुकांना परवानगी देण्याचे अधिकार तसेच पाच व पाचपेक्षा जास्त इसम जमण्यासाठी, सभा, मिरवणुका, मोर्चा काढणे, ध्वनीक्षेपक वाजविण्यास परवानगी देण्याचे अधिकार जिल्ह्यातील पोलीस ठाणे प्रभारी अधिकारी यांना तसेच पोलीस अधीक्षक नांदेड यांनी प्राधिकृत केलेल्या इतर पोलीस अधिकारी यांना राहतील.

000000