लोकराज्यच्या ‘वारी’ विशेषांकाचे

मुख्यमंत्री देवेंद्र फडणवीस यांच्या हस्ते प्रकाशन

नागपूर, दि. 18 : माहिती व जनसंपर्क महासंचालनालयामार्फत प्रसिद्ध केल्या जाणाऱ्या लोकराज्यच्या ‘आषाढी वारी’ विशेषांकाचे आज विधानभवन येथे मुख्यमंत्री देवेंद्र फडणवीस यांच्या हस्ते प्रकाशन करण्यात आले.

यावेळी महसूल मंत्री तथा या विशेषांकाचे अतिथी संपादक चंद्रकांत पाटील, विभागीय आयुक्त अनुप कुमार, माहिती व जनसंपर्क महासंचालनालयाचे सचिव तथा महासंचालक ब्रिजेश सिंह, जिल्हाधिकारी अश्विन मुदगल आदी उपस्थित होते.

आषाढी वारीचा संग्राह्य विशेषांक

पंढरपुरची आषाढी वारी ही महाराष्ट्राच्या सांस्कृतिक आणि सामाजिक वैभवाचा सर्वश्रेष्ठ आविष्कार आहे. यंदाच्या वारीत माहिती आणि जनसंपर्क महासंचालनालयामार्फत ‘संवादवारी’ हा विशेष उपक्रम राबविण्यात येत आहे. या माध्यमातून शासनाच्या विविध लोकोपयोगी योजना वारकऱ्यांपर्यंत पोहोचविण्यात येत आहेत. त्याच पार्श्वभूमीवर लोकराज्यच्या या विशेषांकाचे आज प्रकाशन करण्यात आले.

या विशेषांकाचे अतिथी संपादक असलेल्या महसूल मंत्री श्री. पाटील यांनी ‘रंगले हे चित्त माझे विठुपायी’ असे म्हणत वारकऱ्यांसाठी संदेश दिला आहे. अंकामध्ये श्रीपाद अपराजित, डॉ. द. ता. भोसले, श्रीधरबुवा देहूकर, संदेश भंडारे, बाळासाहेब बोचरे, डॉ. यू. म. पठाण, प्रा. राम शेवाळकर, डॉ. प्रतिमा इंगोले, जयंत साळगावकर आदी मान्यवरांनी  वारीच्या विविध अनुषंगाने विचार मांडले आहेत. विठ्ठल-रुक्म‍िणी मंदिर समितीचे अध्यक्ष अतुल भोसले यांनी समितीमार्फत भक्तांसाठी दिल्या जाणाऱ्या सोयी सुविधांची माहिती दिली आहे. पुणे विभागीय आयुक्त डॉ. दीपक म्हैसेकर आणि सोलापूर जिल्हाधिकारी डॉ. राजेंद्र भोसले यांनी पालखी मार्गावर तसेच पंढरपूर येथे प्रशासनामार्फत करण्यात आलेल्या सोयी सुविधा तसेच उपाय योजनांची माहिती दिली आहे. राज्य शासनामार्फत आयोजित केल्या जाणाऱ्या स्वच्छतेच्या वारीसंदर्भातही विशेषांकात माहिती आहे.

0000

सहस्त्रकुंडाचा मनमोहक धबधबा....

मराठवाडा-विदर्भ सिमेवरील किनवट तालुक्यातील इस्लापूर येथील पैनगंगा नदीवरील मनमोहक सहस्त्रकुंड धबधबा नुकत्याच झालेल्या पावसामुळे भरुन वाहत आहे. अन् शेकडो वर्षापासून जनतेच्या मनाचा ठाव घेणारा प्रचंड आकर्षक असलेला हा धबधबा पर्यटकांचे आकर्षन ठरत आहे. पावसाळी पर्यटनाचा आनंद घेणाऱ्या पर्यटकांसाठी नांदेड ते किनवट मार्गावर इस्लापूर पासून अवघ्या 3 कि.मी. अंतरावर असणारा या धबधब्याच्या दोन्ही धारेतून सततधार पाणी वाहत असून न लागणाऱ्या खोलीच्या तळाचा अंदाज घेत  साठलेल्या कुंडातून पाणी पुढे जात आहे. निसर्गरम्य अल्हादायक या सहस्त्रकुंडाच्या धबधब्यास पर्यटन प्रेमींनी भेट देण्याची संधी दवडू नये.  ( प्रकाशचित्रे : विजय होकर्णे, नांदेड )   

सहस्त्रकुंडाचा मनमोहक धबधबा....

नांदेड-किनवट मार्गावर इस्लापूर पाटी पासून 3 कि.मी. तर किनवटपासून सुमारे 50 कि.मी. अंतरावर असणारा सहस्त्रकुंड धबधबा सध्या पर्यटकांचे आकर्षण ठरत आहे. पैनगंगा नदीचा प्रवाह एका मोठ्या खडकामुळे विभागला आहे. त्यामुळे पाणी खाली कोसळतांना वेगवेगळ्या धारा पडतात. नदीच्या अलीकडील पात्रात कोसळणाऱ्या धारेचा हा सर्वांत मोठा धबधबा असून मराठवाडा आणि विदर्भाचे सिमेवर असलेल्या पैनगंगा नदीवरील हा धबधबा खरोखरच नयनरम्य आहे. अंदाजे 30 ते 40 फूट उंची वरून कोसळणारा हा धबधबा आपले खरे रौद्र रुप धारण करतो, ते पावसाळ्यात डोळ्याचे पारणे फेडणारा हा धबधबा प्रत्येक वेळी आपले वेगळे रुप दाखवतो. पैनगंगेच्या मराठवाड्याच्या बाजूकडून दुधाचा महापूर भासणारा एकच धबधबा दिसतो. हा धबधबा अगदी 15 ते 20 फुटावरुन पाहता येतो. खडकावरील शेवाळ्यामुळे खूप जवळ जाणे धोक्याचे आहे. नदीच्या विदर्भाच्या बाजूकडून मात्र 4 ते 5 अप्रतिम धबधब्याच्या धारा पहावयास मिळतात. त्या बाजूला जाण्यासाठी उमरखेड ते किनवट मार्गावरील बिटरगावहून आत जावे लागते. धबधब्याजवळ इस्लापूर वन विभागाच्यावतीने छोटी नर्सरी बगीचा उभारला असून पर्यटकांसाठी आवश्यक सोयी उपलब्ध करुन दिल्या आहेत. सध्या येथे पर्यटकांनी सेल्फी काढण्याचा मोह टाळला पाहिजे, असे आवाहनही प्रशासनाच्यावतीने करण्यात आले आहे. 

मतदार यादी शुध्‍दीकरण कामास वेग,

लोहा तालुक्‍यात 19 रोजी चावडी वाचन

      भारत निवडणूक आयेागाने निर्धारीत केलेल्‍या कार्यक्रमांतर्गत लोहा तालुक्‍यात मतदार यादीचे शुध्‍दीकरण व पुनरिक्षण कार्यक्रम कामास वेग आला असून मतदार यादी शुध्‍दीकरणाचे काम प्रभावीपणे होण्‍यासाठी लोहा तालुक्‍यात दिनांक 19 जुलै रोजी गावपातळीवर चावडी वाचनाचा अभिनव उपक्रम राबविण्‍यात येत आहे. अशी माहिती लोहयाचे तहसिलदार डॉ. आशिषकुमार बिरादार यांनी प्रसिध्‍दी पत्रकाव्‍दारे दिली आहे.

        भारत निवडणूक आयोगाने निर्धारीत केलेल्‍या कार्यक्रमान्‍वये मतदार यादीचे शुध्‍दीकरण व पुनरिक्षणाचे काम जिल्‍हाधिकारी अरुण डोंगरे, अपर जिल्‍हाधिकारी संतोष पाटील, उपजिल्‍हाधिकारी निवडणूक दिलीप कच्‍छवे यांचे मार्गदर्शनाखाली तसेच कंधारचे उपविभागीय अधिकारी प्रभोदय मुळे यांच्‍या नियोजनात करण्‍यात येत आहे. लोहा तालुक्‍यातील नियुक्‍त 211 बिएलओ यांनी मतदारांच्‍या घरोघरी भेटी देवून दुबार, मयत, कायमस्‍वरुपी स्‍थलांतरीत मतदारांची माहिती गोळा करण्‍यात आलेली आहे. सदरील काम अधिक प्रभावीपणे होण्‍यासाठी लोहा तालुक्‍यात दिनांक 19 जुलै रोजी सकाळी 9 वाजता  गावपातळीवर चावडी वाचनाचा अभिनव उपक्रम तहसिलदार डॉ. आशिषकुमार बिरादार यांनी राबविला आहे. सदर चावडी वाचनाच्‍यावेळी संबंधीत गावचे ग्रामसेवक, तलाठी यांनी उपस्थित रहावे, असे निर्देश देण्‍यात आलेले आहेत.

      दरम्‍यान, मतदार यादीत एकापेक्षा जास्‍त ठिकाणी नाव आढळून आल्‍यास लोकप्रतिनिधीत्‍व अधिनियम 1950 व 1951 अन्‍वये संबंधीत मतदारावर फौजदारी गुन्‍हा दाखल होवून 6 महिण्‍याच्‍या कारावासाची तरतूद आहे. त्‍याअनुषंगाने मतदार यादीमध्‍ये एकसारखी नावे असलेली/एकसारखे फोटो असलेली अशा एकूण 6701 दुबार नावे असलेल्‍या मतदारांना भारत निवडणूक आयोगाकडून नोटीसा बजावण्‍यात आलेल्‍या आहेत. त्‍यांची सुनावणी 28 जून व 11 जुलै 2018  रेाजी घेण्‍यात आली तसेच, पुढील सुनावणी 20 जुलै रोजी तहसिल कार्यालय लोहा येथे घेण्‍यात येणार आहे.

      लोहा तालुक्‍यातील सुजान मतदारांनी त्‍यांचे नाव मतदार यादीत एकाच ठिकाणी असल्‍याची खात्री करावी. दुबार, मयत, कायमस्‍वरुपी स्‍थलांतरीत मतदारांची नावे वगळण्‍यासाठी बिएलओ यांना सहकार्य करुन, मतदार यादीचे शुध्‍दीकरण व पुनरिक्षण कार्यक्रम यशस्‍वी करावा, असे आवाहन तहसिलदार डॉ. आशिषकुमार बिरादार यांनी केले आहे.

      सदर कार्यक्रम यशस्‍वी करण्‍यासाठी निवडणूक विभागाचे नायब तहसिलदार एस.एम देवराये, अव्‍वल कारकून पी.पी. बडवणे, प्रशांत आपशेटे, लिपीक एन.एम.सोनकांबळे, सुर्यकांत पांचाळ, विजय मुंडे आदि परिश्रम घेत आहेत.

जिल्ह्यात गत 24 तासात

सरासरी 18.30 मि. मी. पाऊस

नांदेड, दि. 17 :- जिल्ह्यात मंगळवार 17 जुलै 2018 रोजी सकाळी 8 वा. संपलेल्या गत 24 तासात सरासरी 18.30 मिलीमीटर पावसाची नोंद झाली असून दिवसभरात एकूण 292.76 मिलीमीटर पाऊस झाला आहे. तर जिल्ह्यात आतापर्यंत सरासरी 399.80 मि. मी. पावसाची नोंद झाली आहे. जिल्ह्यात आतापर्यंत सरासरी 42.06 टक्के एवढा पाऊस झाला आहे.

जिल्ह्यात 17 जुलै 2018 रोजी सकाळी 8 वा. संपलेल्या 24 तासात झालेला पाऊस मिलीमीटरमध्ये तालुकानिहाय पुढील प्रमाणे कंसात एकूण पाऊस : नांदेड- 58.13 (471.69), मुदखेड- 17.00 (551.01), अर्धापूर- 15.67 (392.68), भोकर- 11.75 (543.25), उमरी- 28.00 (435.98), कंधार- 19.17 (390.83), लोहा- 23.67 (412.32), किनवट- 9.57 (389.55), माहूर- 11.00 (530.50), हदगाव- 18.00 (532.88), हिमायतनगर- 18.00 (515.02), देगलूर- 6.00 (148.33), बिलोली- 12.40 (258.80), धर्माबाद- 13.00 (298.98), नायगाव- 20.40 (316.60), मुखेड- 11.00 (208.40). आज अखेर पावसाची सरासरी 399.80 (चालू वर्षाचा एकूण पाऊस 6396.82) मिलीमीटर आहे.  

00000

Cancer Shibir Mukhed photo

जिल्हाधिकारी डोंगरे यांचे हस्ते

शेतकऱ्यांना पिक कर्जाचे वाटप

नांदेड, दि. 16 :-  बिलोली तालुक्यातील चेकपोस्ट कार्ला फाटा व सैनिकी विद्यालय सगरोळी येथे जिल्हाधिकारी अरुण डोंगरे यांनी नुकतीच भेट देऊन वृक्षारोपण केले. तसेच कासराळी जिल्हा मध्यवर्ती बँकेमार्फत मंजूर पिक कर्जाचे वाटप जिल्हाधिकारी श्री. डोंगरे यांचे हस्ते करण्यात आले. शेतकरी गंगाराम बुद्धेवाड, विठ्ठल मादसवाड, शेख रसुल शे. अहमद, विठ्ठल जंगम, शेख जलाल शे. अहमद या शेतकऱ्यांना पिक कर्जाचे वाटप करण्यात आले.

यावेळी उपविभागीय अधिकारी व्यंकट कोळी, परि. उपजिल्हाधिकारी तथा तहसिलदार श्रीकांत गायकवाड, डॉ. नायब तहसिलदार ओमप्रकाश गोंड, संजय नागमवाड, आर. जी. चौव्हाण, यु. एस. निलावाड, कासराळी जिल्हा मध्यवर्ती बँकेचे व्यवस्थापक, मंडळ अधिकारी, तलाठी, शेतकरी आदींची उपस्थिती होती.

000000

देगलूर येथील 34 तंबाखू विक्रेत्यांवर कार्यवाही2017       /

नांदेड, दि. 16 :- राष्ट्रीय तंबाखू नियंत्रण कक्ष जिल्हा रुग्णालय नांदेड यांना प्राप्त माहितीनुसार जिल्हा शल्यचिकित्सक डॉ. एच. आर. गुंटूरकर व अतिरिक्त जिल्हा शल्य चिकित्सक डॉ. निळकंठ भोसीकर यांच्या मार्गदर्शनाखाली जिल्हास्तरीय तंबाखू नियंत्रण पथकाने देगलूर येथे 13 जुलै रोजी अचानक धाडी टाकण्यात आल्या.

या परिसरात तंबाखू व तंबाखूजन्य पदार्थाची मोठ्या प्रमाणात विक्री होत असल्याचे तसेच कोटपा 2003 कायद्याचे उल्लंघन होत असल्याचे दिसून आले. कायद्यातील तरतुदीनुसार पथकामार्फत 34 तंबाखू विक्रेते यांच्याकडून 20 हजार 700 रुपये इतका दंड आकारण्यात आला. या पथकात जिल्हा सल्लागार डॉ. साईप्रसाद शिंदे, जिल्हा कार्यक्रम अधिकारी डॉ. अर्चना तिवारी, जिल्हा कार्यक्रम समन्वयक डॉ. प्रदीप बोरसे तथा सामाजिक कार्यकर्ता बालाजी गायकवाड व स्थानिक पोलीस उप निरीक्षक श्रीमती मनीषा पवार, पोकॉ शिंदे, चाटे आदी होते.

या अनुषंगाने नांदेड जिल्ह्याअंतर्गत कोणत्याही ठिकाणी कोटपा कायद्याचे उल्लंघन करणारे तसेच शैक्षणिक अथवा शासकीय कार्यालय परिसरात तंबाखू व तंबाखूजन्य पदार्थाची विक्री होत असल्यास जिल्हा तंबाखू नियंत्रण कक्ष, जिल्हा रुग्णालय, नांदेड येथे तक्रार नोंदवून नांदेड जिल्हा तंबाखूमुक्त करण्याच्या अभियानास सहकार्य करावे, असे आवाहन जिल्हा शल्य चिकित्सक डॉ. गुंटूरकर यांनी केले आहे.

0000