रोजगार व स्वयंरोजगाराला चालना देण्यासाठी

सहकारी संस्थांचे योगदान मोलाचे - महादेव जानकर  

नांदेड, दि. 14 :- रोजगार व स्वयंरोजगाराला चालना देण्यासाठी विविध विकासाच्या योजना अधिक प्रभावीपणे राबविण्यासाठी सहकारी संस्थाचे योगदान मोलाचे आहे. पारदर्शक काम करणाऱ्या सहकारी संस्थांच्या पाठीमागे राज्य शासन सक्षमपणे उभे राहील, अशी ग्वाही राज्याचे पशुसंवर्धन, दुग्धविकास, मत्सव्यवसाय मंत्री महादेव जानकर यांनी दिली.

गोदावरी अर्बन मल्टिस्टेट क्रेडिट को-ऑप. सोसायटी लि. नांदेडच्या धर्माबाद शाखेचे उद्घाटन श्री. जानकर यांच्या हस्ते आज करण्यात आले. त्यावेळी ते बोलत होते. याप्रसंगी हैद्राबाद तेलुगू राष्ट्र समिती एम.एल.सी. अध्यक्ष आ. हणमंतराव मैनापल्ली, तेलंगणा शिवसेना प्रदेश अध्यक्ष दिनेशजी तिवारी, निजामाबाद शिवसेना जिल्हा प्रमुख किशोर तिवारी, गोदावरी अर्बन मल्टिस्टेट क्रेडिट को-ऑप. सोसायटीचे संस्थापक आ. हेमंत पाटील, अध्यक्षा सौ. राजश्री हेमंत पाटील, येताळा जिल्हा परिषदेच्या सदस्या सौ. पद्मारेड्डी येताळकर, जिल्हा परिषदेचे माजी अध्यक्ष बाबाराव एंबडवार, हैद्राबाद येथील नगरसेवक आदी मान्यवर उपस्थित होते.  

धर्माबाद येथील गोदावरी अर्बन मल्टिस्टेट क्रेडिट को-ऑप. सोसायटी शाखेच्या पहिल्या दिवशी जमा केलेले ठेवीदाराचे आभार मानून जानकर पुढे म्हणाले की, दुग्धव्यवसाय, पशुसंवर्धन, मत्सव्यवसायच्या विविध विकास योजनेचा महिला बचगटांना लाभ होण्यासाठी सहकारी पतसंस्थेचे सहकार्य महत्वाचे आहे. शेतकरी, व्यापाऱ्यांनी पतसंस्थेच्या व्यवहारात सहभाग घ्यावा. घेतलेल्या कर्जाची परतफेड वेळेवर करावी. या भागातील शेतकऱ्यांचा मुलगाही मोठा उद्योजक झाला पाहिजे. यासाठी राज्य शासनाच्या विविध विकास योजना आहेत, त्याचा अधिक लाभ घ्यावा. राज्य शासनाने अनेक लोकाभिमूख निर्णय घेतले आहेत. जनावरांच्या उपचारासाठी अत्याधुनिक सुविधा उपलब्ध करुन दिल्या आहेत, असेही त्यांनी सांगितले.

तत्पुर्वी जानकर यांनी धर्माबाद येथील लघु पुश चिकित्सालयास भेट देवून नवीन बांधकामाबाबत माहिती घेवून संबंधीत अधिकाऱ्यांना सूचना केल्या.  

सर्वसामान्य नागरिकांना सहज कर्ज उपलब्ध करुन देण्यासाठी गोदावरी अर्बन मल्टिस्टेट क्रेडिट को-ऑप. सोसायटी प्रयत्नशील राहील. सोसायटीच्या विविध शाखेतून नागरिकांना अत्याधुनिक सुविधा उपलब्ध करुन दिल्या जात आहेत, असे आ. हेमंत पाटील यांनी सांगितले.

गरजुंना संस्थेतून नियमानुसार कर्ज वाटप केले जात आहे. येत्या काळात पाच राज्यात संस्थेच्या शाखा सुरु होणार आहे. समाजातील सर्व घटकांच्या प्रगतीचे ध्येय समोर ठेवून संस्था कार्यरत आहे. त्यामुळे व्यवसाय, व्यापार करणाऱ्यांना आर्थिक हातभार संस्थेच्या माध्यमातून मिळत आहे. धर्माबाद शाखेत ठेवीदारांच्या माध्यमातून जमा होणाऱ्या रक्कम याच भागातील नागरिकांना कर्ज रुपात वितरीत केली जाईल, असेही संस्थेच्या अध्यक्षा सौ. राजश्री पाटील यांनी सांगितले.

समारंभाचे अध्यक्ष आ. हणमंतराव मैनापल्ली, दिनेश तिवारी, माजी नगराध्यक्ष विश्वनाथ पाटील बन्नाळीकर यांची समयोचित भाषणे झाली. प्रास्ताविकात व्यवस्थापकीय संचालक धनंजय तांबेकर यांनी संस्थेतील ठेवीदारांच्या ठेवी सुरक्षीत राहतील याची काळजी घेतली जाणार आहे, असे सांगून संस्थेच्या कार्याची माहिती दिली. यवतमाळ शाखेच्या उपसरव्यवस्थापक वंदना नखाते (ठवकर) यांनी आभार मानले.

यावेळी संस्थेचे पदाधिकारी, शाखाधिकारी निलेश लाखकर, प्रशासकीय अधिकारी सुरेखा दवे, परिसरातील संस्थेचे ठेवीदार, व्यापारी, महिला बचत गटाच्या सदस्या, कर्मचारी, नागरीक मोठ्या संख्येने उपस्थित होते.

00000000

पशुसंवर्धन मंत्री महादेव जानकर

यांचा नांदेड जिल्हा दौरा कार्यक्रम

नांदेड, दि. 12 :-   राज्याचे पशुसंवर्धन, दुग्धविकास, मत्सव्यवसाय मंत्री महादेव जानकर हे नांदेड जिल्ह्याच्या दौऱ्यावर येत असून त्यांचा दौरा कार्यक्रम पुढील प्रमाणे राहील.

शनिवार 13 मे 2017 रोजी रेणापूर येथून शासकीय मोटारीने रात्री 8.30 वा. शासकीय विश्रामगृह मुखेड येथे आगमन, राखीव व मुक्काम.

रविवार 14 मे 2017 रोजी सकाळी 8.30 वा. मुखेड येथे राष्ट्रीय समाज पक्ष कार्यकर्त्याची बैठक. सकाळी 9.30 वा. शासकीय विश्रामगृह मुखेड येथून शासकीय मोटारीने बिलोली मार्गे धर्माबादकडे प्रयाण. सकाळी 11 वा. धर्माबाद येथे आगमन व गोदावरी अर्बन मल्टिस्टेट क्रेडिट को-ऑप सोसायटी लि. नांदेडचे शाखा शुभारंभ कार्यक्रमास उपस्थिती. दुपारी 12.30 वा. धर्माबाद येथून शासकीय मोटारीने विश्रामगृह धर्माबादकडे प्रयाण, आगमन व राखीव. दुपारी 3.10 वा. धर्माबाद येथून शासकीय मोटारीने धर्माबाद रेल्वे स्टेशनकडे प्रयाण. दुपारी 3.30 वा. धर्माबाद रेल्वे स्टेशन येथे आगमन व राखीव. दुपारी 3.45 वा. रेल्वे स्टेशन धर्माबाद येथून देवगिरी एक्सप्रेसने मुंबईकडे प्रयाण करतील.

000000

केंद्रीय कृषी व संसदीय कार्य राज्यमंत्री

एस. एस. अहुवालिया यांचा दौरा

नांदेड, दि. 12 :-केंद्रीय कृषी आणि शेतकरी कल्याण व संसदीय कार्य राज्यमंत्री एस. एस. अहुवालिया हे नांदेड दौऱ्यावर येत असून त्यांचा दौरा कार्यक्रम पुढील प्रमाणे राहील.

शनिवार 13 मे 2017 रोजी हैद्राबाद येथून विमानाने दुपारी 1 वा. नांदेड विमानतळ येथे आगमन.  दुपारी 1.30 तख्त सचखंड श्री हुजूर साहिब गुरुद्वाराकडे प्रयाण. दुपारी 2.20 तख्त सचखंड श्री हुजूर साहिब गुरुद्वारा येथे आगमन. सायं. 6 वा. मुख्य जत्थेदारजी बाबा कुलवंतसिंगजी यांच्या कार्यक्रमास उपस्थिती व तख्त सचखंड श्री हुजूर साहिब गुरुद्वारा येथील अंगद निवास येथे मुक्काम.

रविवार 14 मे 2017 रोजी सकाळी स्थानिक कार्यक्रमास उपस्थिती व सकाळी 11.30 वा. तख्त सचखंड श्री हुजूर साहिब गुरुद्वारा येथून नांदेड विमानतळाकडे प्रयाण. दुपारी 12.20 वा. नांदेड विमानतळ येथे आगमन. दुपारी 1.30 वा. नांदेड विमानतळ येथून विमानाने हैद्राबादकडे प्रयाण करतील.

00000

वंचितापर्यंत शासनाच्या सेवा पोहचविण्यासाठी

शासन कटीबद्ध - अंकुश पिनाटे

नांदेड, दि. 12 :- जिल्ह्यात वंचितांचा शोध घेवून त्यांच्यापर्यंत शासनाच्या सेवा पोहचविण्याचा प्रयत्न केला जात आहे. त्यासाठी शासन कटीबद्ध आहे, असे प्रतिपादन उपजिल्हा निवडणूक अधिकारी अंकुश पिनाटे यांनी केले. नांदेड तहसिल कार्यालयाच्यावतीने आयोजित शोध शुद्धीकरण प्रतिसाद मोहिमअंतर्गत निवडणूक ओळखपत्राचे नुकतेच वितरण करण्यात आले. यावेळी ते बोलत होते.

अनुलोम संस्थेचा सहाय्याने शांतीनगर येथील कचरा गोळा करणाऱ्या वंचितांचा शोध घेऊन त्यांच्यासाठी मतदार यादीत नाव नोंदणी शिबीर नुकतेच त्यांच्या भागात जावून घेण्यात आले. यावेळी 102 वंचितांची व काही मुकबधीर दिव्यांगांची नाव नोंदणी करण्यात आली. त्यांना निवडणूक ओळखपत्र उपजिल्हा निवडणूक अधिकारी अंकुश पिनाटे व मतदार नोंदणी अधिकारी प्रदीप कुलकर्णी यांच्या हस्ते वितरीत करण्यात आले.

मतदार नोंदणी अधिकारी प्रदीप कुलकर्णी यांनी कार्यक्रमाचा पार्श्वभुमी स्पष्ट केली. या कार्यक्रमामुळे शासन आमच्या पाठिशी असल्याचा आत्मविश्वास निर्माण झाला आहे, अशी प्रतिक्रिया सुनील हातवळणे यांनी यावेळी व्यक्त केली. यावेळी निवडणूक विभागाचे नायब तहसिलदार गजानन नांदगावकर, शांतीनगर येथील नवीन मतदार व कर्मचारी उपस्थित होते.

0000000

दहावी, बारावी परीक्षा निकालाच्या

दिनांकांच्या अफवांवर विश्वास ठेवू नये  

नांदेड, दि. 12 :-  महाराष्ट्र राज्य माध्यमिक व उच्च माध्यमिक शिक्षण मंडळामार्फत फेब्रुवारी-मार्च 2017 मध्ये घेण्यात आलेल्या उच्च माध्यमिक प्रमाणपत्र इयत्ता बारावी व माध्यमिक शालांत प्रमाणपत्र इयत्ता दहावी परीक्षेच्या निकालाच्या चुकीच्या व अनधिकृत तारखा व्हॉटस्ॲप व इतर सोशल मिडियावर परस्पर व अनधिकृतरित्या प्रसारीत करण्यात येत असलेल्या निकाल दिनांकाच्या अफवांवर विश्वास ठेवू नये, असे आवाहन लातूर शिक्षण विभागीय मंडळाचे विभागीय सचिव यांनी केले आहे.

इयत्ता दहावी व इयत्ता बारावीच्या निकालाबाबत कोणत्याही तारखा मंडळाने जाहीर केल्या नाहीत. या परीक्षेच्या निकालाचे काम पूर्ण झाल्यानंतर रितसर प्रसार माध्यमांद्वारे निवेदन देऊन मंडळाच्या www.mahahsscboard.maharashtra.gov.in या संकेतस्थळावर निकालाची तारीख अधिकृतरित्या जाहीर केली जाईल. व्हॉटस्ॲप व इतर सोशल मिडियावर परस्पर व अनधिकृतरित्या प्रसारीत करण्यात येत असलेल्या निकालाच्या दिनांकाच्या अफवांवर विश्वास ठेवू नये, असेही आवाहन शिक्षण मंडळाने केले आहे.

000000

दहावीच्या विद्यार्थ्यांचा

कलचाचणी अहवाल जाहीर

नांदेड, दि. 12 :- महाराष्ट्र राज्य माध्यमिक व उच्च माध्यमिक शिक्षण मंडळातर्फे फेब्रुवारी-मार्च 2017 च्या माध्यमिक शालांत प्रमाणपत्र परीक्षेसाठी प्रविष्ठ होणाऱ्या विद्यार्थ्यांची कलचाचणी 9 फेब्रुवारी ते 3 एप्रिल 2017 या कालावधीत घेण्यात आली होती. या कलचाचणीचा कल अहवाल http://mahacareermitra.in या संकेतस्थळावर प्रसिद्ध करण्यात आला आहे.

विद्यार्थ्यांनी त्यांचा बैठक क्रमांक नोंदवून कल अहवाल ऑनलाईन पहावा. हा कल अहवाल इयत्ता दहावीच्या गुणपत्रकाबरोबर छापील स्वरुपात देण्यात येणार आहे, अशी माहिती लातूर विभागीय शिक्षण मंडळाचे विभागीय सचिव यांनी दिली.

00000

मोटार सायकलसाठी नवी मालिका सुरु

नांदेड, दि. 12 :- मोटार सायकलसाठी एमएच 26 बीएफ ही नवीन मालिका मंगळवार 9 मे 2017 पासून सुरु करण्यात आली आहे. ज्या अर्जदारांना पसंती क्रमांक घ्यावयाचा आहे त्यांचे अर्ज स्विकारण्यात येणार आहेत. संबंधीतांनी नोंद घ्यावी, असे आवाहन प्रादेशिक परिवहन अधिकारी नांदेड यांनी केले आहे.   

000000