वृत्त क्र. 145

दिव्यांग मुला-मुलींचे जिल्हास्तरीय सांस्कृतिक  स्पर्धेचे उद्घाटन संपन्न 

नांदेड दि. 4 फेब्रुवारी :- समाज कल्याण विभाग व नांदेड जिल्हा परिषदेच्यावतीने कुसुम सभागृहात आज दि.4 फेब्रुवारीला दिव्यांग मुला-मुलींचा जिल्हास्तरीय सांस्कृतिक  स्पर्धेचे उद्घाटन झाले. जिल्हा परिषदेचे अतिरिक्त मुख्य कार्यकारी अधिकारी संदीप माळोदे यांच्या हस्ते उद्घाटन झाले कार्यक्रमाच्या अध्यक्षस्थानी  जिल्हा विधी सेवा प्राधिकरणच्या सचिव श्रीमती दलजीत कौर जज होत्या. यावेळी जिल्हा समाज  कल्याण अधिकारी सत्येंद्र आऊलवार ओम प्रकाश गिल्डा, डॉ.अजय मालपाणी, बापू दासरी आदींची उपस्थिती होती. जिल्ह्यातील एकूण 55 शाळांनी सहभाग नोंदवला पारंपारिक लोककला,नृत्य,गायन या सह विविध कला गुणांचे अविष्कार विद्यार्थ्यांनी  सादर केले

0000

वृत्त क्र. 144

सामाजिक न्याय विभागाच्या विविध पुरस्कारांसाठी अर्ज करण्याचे आवाहन 

 १५ फेबुवारी शेवटची तारीख 

नांदेड, दि. ४ फेब्रुवारी : सामाजिक न्याय विभागामार्फत समाज कल्याण क्षेत्रामध्ये वैशिष्ट्यपूर्ण काम करणाऱ्या व्यक्ती व काम करणाऱ्या स्वयंसेवी संस्थांसाठी शासनाने विविध पुरस्कार जाहीर केले आहे. दरवर्षी दिल्या जाणाऱ्या या पुरस्कारांसाठी 15 फेब्रुवारी शेवटची तारीख असून तत्पूर्वी अर्ज दाखल करावे, असे आवाहन सहाय्यक आयुक्त समाज कल्याण शिवानंद मिनगिरे यांनी केले आहे.

सामाजिक न्याय विभागामार्फत डॉ. बाबासाहेब आंबेडकर समाज भूषण पुरस्कार, साहित्यरत्न लोकशाहीर अण्णाभाऊ साठे पुरस्कार, पद्मश्री कर्मवीर दादासाहेब गायकवाड पुरस्कार, शाहू, फुले, आंबेडकर पारितोषिक व डॉ. बाबासाहेब आंबेडकर सामाजिक न्याय प्रवीण पुरस्कार असे पुरस्कार दिले जातात. सध्या 2023-24 या आर्थिक वर्षात देणार येणाऱ्या पुरस्कारांची घोषणा शासनाने केली असून यासाठी 1 जानेवारी ते 31 डिसेंबर अशी गणना केली जाणार आहे. त्यामुळे एक जानेवारी 23 ते 31 डिसेंबर 23 या काळात केलेल्या कार्यकाळाची माहिती आपल्या अर्जामध्ये असावी.

अर्जाचा नमुना समाज कल्याण विभागाच्या वेबसाईटवर उपलब्ध आहे. विहित नमुन्यातील अर्ज सहाय्यक आयुक्त समाज कल्याण कार्यालय नांदेड यांच्याकडे तसेच शासनाच्या सामाजिक न्याय व विशेष सहाय्य विभागाच्या वेबसाईटवर उपलब्ध आहे. पुरस्काराचे प्रस्ताव शनिवार, रविवार व कार्यालयातील सुट्टीच्या दिवशीही स्वीकारण्यात येतील, याची नोंद घ्यावी. अधिक माहितीसाठी समाज कल्याण विभागातील एस सी पाटील ( 87669 O5865 )यांच्याशी संपर्क साधावा.

0000

  वृत्त क्र. 143

खासगी पशुसेवकांना नोंदणी करणे बंधनकारक 

नांदेड दि. ४ फेब्रुवारी : जिल्हात प्रजनन क्षम पशुंसाठी कृत्रिम रेतनाची सुविधा व अन्य सुविधा पुरविणाऱ्या सर्व खाजगी पशुसेवकांनी आपल्या नावाची नोंदणी करावी,असे आदेश  सहाय्यक आयुक्त पशुसंवर्धन यांनी जारी केले आहे.त्यामुळे सर्व खाजगी पशुसेवकांनी आपल्या नावाची नोंदणी करावी,असे आवाहन प्रशासनाने केले आहे.

जिल्ह्यात प्रजनन क्षम पशूंसाठी कृत्रिम रेतनाची सुविधा उपलब्ध करून देण्यासाठी कृत्रिम रेतन करणारे खाजगी पशु सेवक मोठ्या प्रमाणात कार्यरत आहेत. जिल्ह्यातील सर्व खासगी कृत्रिम रेतन सेवा पुरविणाऱ्या तंत्रज्ञ, गोठीत रेत मात्रा वितरक व रेत बँकांनी पशुसंवर्धन उपायुक्त किंवा गोजातीय प्राधिकरण यांच्याकडे नाव नोंदणी करणे बंधनकारक असल्याचे आदेश काढण्यात आले आहे.

कृत्रिम रेतन तंत्रज्ञ म्हणून नोंदणी करण्यासाठी भारतीय पशुवैद्यक परिषदेने मान्यता दिलेल्या विद्यापीठातून पशुवैद्यक शास्त्रामधील पदवी, भारत सरकारच्या मैत्री भारतातील बहुउपयोगी कृत्रिम रेतनचे प्रशिक्षण घेतलेले असावे. तसेच इयत्ता दहावी उत्तीर्ण, आणि महाराष्ट्र राज्य नोंदणीकृत कृत्रिम रेतन प्रशिक्षण संस्थेमधून प्रशिक्षण पूर्ण केले आहे. पशुसंवर्धन क्षेत्रात एक वर्षाचा अनुभव आहे. किंवा महाराष्ट्र राज्य ग्रामीण जीवनोन्नती अभियानाद्वारे कृत्रिम रेतनाचे प्रशिक्षण पूर्ण केलेले पशुसखी अशा पात्र खाजगी कृत्रिम रेतन तंत्रज्ञानांना तंत्रज्ञांना पाच वर्षाकरिता 1000 रुपये नोंदणी शुल्क आकारण्यात आले आहे. 

जिल्हा पशुसंवर्धन उपायुक्त कार्यालयात किंवा सहाय्यक आयुक्त जिल्हा कृत्रिम रेतन केंद्र नांदेड येथे भरून नोंदणी करून घेणे बंधनकारक आहे.अन्यथा या कायद्याचे कलम चार व पाच अन्वये दंड आकारणी होऊ शकते, अशी माहिती जिल्हा पशुसंवर्धन उपायुक्त डॉ.राजकुमार पडले यांनी दिली आहे.

0000

 वृत्त क्र. 142

नांदेड जिल्हा रुग्णालयात जागतिक कर्करोग दिनाचे उद्घाटन

 

नांदेड दि. 4 फेब्रुवारी :- जिल्हा रुग्णालय नांदेड येथे जिल्हा शल्य चिकित्सक डॉ. एन. आय. भोसीकर यांच्या हस्ते जागतिक कर्करोग दिनाचे उद्घाटन आज करण्यात आले. याप्रसंगी कर्करोग क्षेत्रातील तज्ज्ञांकडून कर्करोग आजारासंबंधी अनमोल असे मार्गदर्शन करण्यात आले. Globocan २०२० च्या सर्वेक्षणानुसार महाराष्ट्रामध्ये मुख कर्करोग, स्तन कर्करोग, व गर्भाशयमुख कर्करोग याचे प्रमाण दिवसेंदिवस वाढत असून त्याचे प्रमाण एक लाख लोकसंख्येमागे मुख कर्करोग (२६.३,) स्तन कर्करोग (७७.९,) व गर्भाशयमुख कर्करोग (५०.२) असे आहे.

 

त्यामुळे महाराष्ट्र शासनाने सार्वजनिक आरोग्य विभागामार्फत संपूर्ण राज्यभर 100 दिवसाची कर्करोग तपासणी मोहिम सुरुवात हाती घेतली आहे. या मोहिमेंतर्गत नांदेड जिल्ह्यांतर्गत ३० वर्ष वयोगटावरील लोकांचे मुख कर्करोग, स्तन कर्करोग, व गर्भाशयमुख कर्करोग इ तपासणी करण्यात येणार आहे. यामध्ये जिल्हा शल्य चिकित्सक, जिल्हा आरोग्य अधिकारी, मनपा वैद्यकीय अधिकारी यांच्या अधिनिस्त उपकेंद्र, प्राथमिक आरोग्य केंद्र ,ग्रामीण रुग्णालये, उपजिल्हा रुग्णालये, स्त्री रुग्णालय व जिल्हा रुग्णालय या  आरोग्य संस्थेअंतर्गत समुदाय आरोग्य अधिकारी, वैद्यकीय अधिकारी, दंत शल्य चिकिस्तक, स्त्री रोग तज्ञ जनरल सर्जन यांच्या मार्फत कर्करोग संबंधित VIA, OVE, CBE इत्यादी संदर्भात  आरोग्य तपासणी करण्यात येणार आहे.

 

तसेच उपरोक्त आरोग्य संस्थेमार्फत 9 फेब्रुवारी ते 16 फेबुवारी या कालावधीमध्ये कर्करोग जन जागृती मोहीम राबविण्यात येणार आहे. या अंतर्गत कर्करोग संबंधित रुग्णांना Biopsy ,Sonograpy, CT Scan इत्यादी सेवा कर्करोग उपचार केंद्राच्या माध्यमातून मोफत देण्यात येणार आहे. त्याचबरोबर रुग्णांना कर्करोग संबंधित समुपदेशन करण्यात येणार आहे. तरी या कर्करोग मोहिमेच्या कालावधीत जिल्ह्यांतर्गत ३० वर्ष वयोगटावरील सर्व जनतेने याचा लाभ घ्यावा असे आवाहन जिल्हा शल्य चिकित्सक डॉ. नीलकंठ भोसीकर यांनी केले आहे.

 

या उद्घाटन कार्यक्रम प्रसंगी अतिरिक्त जिल्हा शल्य चिकित्सक डॉ. संजय परके यांनी स्त्रियांमध्ये आढळून येणाऱ्या गर्भाशय मुख कर्करोगासंबंधी व IDA चे अध्यक्ष डॉ.संदीप दंडे यांनी मौखिक कर्करोगसंबंधी अनमोल असे मार्गदर्शन केले.

 

या कार्यक्रमास निवासी वैद्यकीय अधिकारी (बा.स.) डॉ. राजाभाऊ बुट्टे, डॉ. विद्या झिने, नोडल अधिकारी डॉ. हनुमंत पाटील, डॉ.एच.के.साखरे, डॉ पुष्पा गायकवाड, दंत शल्य चिकित्सक डॉ. कांतीलाल इंगळे, डॉ. विजय पवार, डॉ. बालाजी माने, जनरल सर्जन डॉ गोपाळ शिंदे, स्त्रीरोग तज्ञ डॉ सुजाता राठोड, वैद्यकीय अधिकारी डॉ सुर्यकांत नागशेट्टीवार, वैद्यकीय अधिकारी डॉ विखारुनिसा खान, जिल्हा कार्यक्रम समन्वयक डॉ. उमेश मुंडे मेट्रन सुनिता राठोड, जिल्हा सल्लागार डॉ शीतल चातुरे, इतर वैद्यकीय अधिकारी, कर्मचारी, रुग्ण व त्यांची नातेवाईक उपस्थित होते. कार्यक्रमाचे सूत्रसंचालन सामाजिक कार्यकर्ते बालाजी गायकवाड यांनी केले तर कार्यक्रम यशस्वीतेसाठी मानसशास्त्रज्ञ प्रकाश आहेर, समुपदेशक सुवर्णकार सदाशिव, सुनिल तोटेवाड, सुनील खंडागळे यांनी परिश्रम घेतले.

0000

 वृत्त क्र. 141 

दिव्यांग मुला-मुलींचा जिल्हास्तरीय क्रीडा स्पर्धेचे उद्घाटन संपन्न

 

नांदेड दि. 3 फेब्रुवारी :- समाज कल्याण विभाग व नांदेड जिल्हा परिषदेच्यावतीने जागतिक दिव्यांग दिनाच्या निमित्ताने छत्रपती शिवाजी महाराज पोलीस मैदानावर आज दि.३ फेब्रुवारीला दिव्यांग मुला-मुलींचा जिल्हास्तरीय क्रीडा स्पर्धेचे उद्घाटन झाले.

 

 जिल्हा विधी सेवा प्राधिकरणच्या सचिव श्रीमती दलजीत कौर जज यांच्या हस्ते उद्घाटन संपन्न झाले. या स्पर्धेच्या अध्यक्षस्थानी जिल्हा परिषदेचे अतिरिक्त मुख्य कार्यकारी अधिकारी संदीप माळोदे हे होते.

 

यावेळी जिल्हा परिषदेच्या उपमुख्य कार्यकारी अधिकारी राजकुमार मुक्कावार, समाज कल्याणचे प्रादेशिक उपायुक्त अविनाश देवसटवार, समाज कल्याण सहाय्यक आयुक्त शिवानंद मिनगिरे, जिल्हा समाज  कल्याण अधिकारी सत्येंद्र आऊलवार आदींची उपस्थिती होती.

0000

 वृत्त क्र. 140

सन्मान योजनेंतर्गत साहित्यिक, कलाकारांच्या 11 वारसांसाठी अनुदान मंजूर

* जिल्हा प्रशासनाने मानले लाभार्थ्यांनी आभार 

नांदेड दि. 3 फेब्रुवारी :- राजर्षी शाहू महाराज ज्येष्ठ साहित्यिक व कलाकार मानधन सन्मान योजनेअंतर्गत जिल्हयातील 11 मयत लाभार्थ्यांच्या वारसास जिल्हाधिकारी अभिजीत राऊत यांनी नुकतेच अनुदान मंजुर केले आहे. ही योजना पर्यटन व सांस्कृतिक कार्य विभाग मुंबई यांचा शासन निर्णय 16 मार्च 2024 अन्वये राबविण्यात येत आहे. ही योजना गरजू व होतकरु तळागाळातील साहित्यिक, कलावंत यांच्यापर्यंत प्रशासनाने पोहचविल्याबद्दल सर्व स्तरातून समाधान व अभिनंदन व्यक्त केले जात आहे.

राजर्षी शाहू महाराज ज्येष्ठ साहित्यिक व कलावंत यांना मानधन सन्मान योजनेअंतर्गत जिल्हा निवड समितीची पूनर्रचना करण्यात आली आहे. या योजनेचे अध्यक्ष जिल्हाधिकारी तर सदस्य सचिव उप मुख्य कार्यकारी अधिकारी (ग्रामपंचायत) हे आहेत. त्याबाबत जिल्हाधिकारी अभिजित राऊत व जिल्हा परिषदेच्या मुख्य कार्यकारी अधिकारी मिनल करनवाल व उपमुख्य कार्यकारी अधिकारी (पं) श्रीमती मंजुषा जाधव (कापसे) या सर्वांचे जिल्ह्यातील राजर्षी शाहू महाराज ज्येष्ठ साहित्यिक व कलाकार मानधन सन्मान योजने अंतर्गत असलेल्या लाभार्थ्यांकडुन व त्यांच्या विविध संघटनेकडुन आभार व्यक्त करण्यात आले आहे.

000

वृत्त क्र. 139

 

जागतिक सूर्यनमस्कार दिनरथसप्तमी निमित्त

सूर्यनमस्कार कार्यक्रमाचे आयोजन

 

नांदेड दि. 3 फेब्रुवारी :- जिल्हयातील योगसंघटना, योग शिक्षक, योग मित्रमंडळ, योग विद्याधाम, योग परिषद, पतंजली योग समिती, योग ॲण्ड स्पोर्ट वेल्फेअर असोसिएशन, महाराष्ट्र योग शिक्षक संघ असोसिएशन आदींच्या सहकार्याने जागतिक सुर्यनमस्कार (रथसप्तमी) कार्यक्रम 4 फेब्रुवारी रोजी सकाळी 9.30 वा. यशवंत महाविद्यालय मैदान नांदेड येथे आयोजित करण्यात आला आहे. नांदेड जिल्हा प्रशासन नांदेड, जिल्हा क्रीडा अधिकारी कार्यालय यांच्या संयुक्त विद्यमाने व क्रीडा भारती यांच्या सहकार्याने हा कार्यक्रम मोठया उत्साहात साजरा करण्यात येणार आहे.

 

क्रीडा व युवक सेवा संचालनालयाचे आयुक्त यांच्या मान्यतेने नांदेड जिल्हा क्रीडा परिषद, जिल्हा क्रीडा अधिकारी कार्यालय व क्रीडा भारती यांच्या संयुक्त विद्यमाने सुदृढतेचा मुलमंत्र नागरीक विद्यार्थी युवा यांच्यामध्ये बिंबवण्यासाठी सातत्याने शासन स्वयंसेवी संस्था तसेच या क्षेत्रात कार्य करणाऱ्या संस्था सातत्यपूर्ण विविध उपक्रम राबवित आहेत.

 

क्रीडा भारती महाराष्ट्र प्रदेश यांनी 12 जानेवारी स्वामी विवेकानंद जयंती (राष्ट्रीय युवा दिन) ते 4 फेब्रुवारी जागतिक सूर्यनमस्कार (रथसप्तमी) या कालावधीत सुर्यनमस्कार- योगप्रशिक्षण वर्ग, सुर्यनमस्कार स्पर्धा, योगासन स्पर्धा आणि विविध स्तरीय स्पर्धाचे आयोजन शैक्षणिक संस्था, क्रीडा मंडळे इत्यादीना सदर दिनाच्यानिमीत्ताने कार्यक्रम क्रीडा भारती यांच्या संयुक्त विद्यमाने आयोजित करण्यात आले आहे.

 

तसेच शहरातील महात्मा फुले हायस्कुल, बाबानगर,नांदेड, सावित्रीबाई फुले विद्यालय,बाबानगर, नांदेड, महात्मा फुले विद्यालय, विजयनगर, नांदेड, राजर्षी शाहू विद्यालय, वसंतनगर, नांदेड, नरहर कुरुंदकर हायस्कूल, कौठा, नांदेड, माधवराव वटेमोड विद्यालय नांदेड, शाकुंतल हायस्कुल नांदेड, पिनॅकल इं. मेडीयम स्कुल नांदेड व नांदेड जिल्हयातील सर्व शाळा/ क. महाविद्यालयात क्रीडा भारती यांच्या सहकार्याने 4 फेब्रुवारी रोजी वेळ सकाळी 7.30 वा. जागतिक सूर्यनमस्कार दिन रथसप्तमी निमित्त आपआपल्या ठिकाणी क्रीडा भारती यांच्या सहकार्याने मोठया उत्साहात साजरा करण्यासाठी योग संघटना, योग शिक्षक, योग मित्र मंडळ, योग विद्याधाम, योग परिषद, पतंजली योग समिती, योग ॲण्ड स्पोर्ट वेल्फेअर असोसिएशन, महाराष्ट्र योग शिक्षक संघ असोसिएशन आदींच्या सहकार्याने मोठ्या प्रमाणात आयोजन करुन कार्यक्रमांचा फोटोसह अहवाल जिल्हा क्रीडा अधिकारी कार्यालय नांदेड व क्रीडा भारतीचे ई-मेल आयडी dsonanded@rediffmail.com, udaylakahalekar@rediffmail.com यावर पाठविण्यात यावे, असे आवाहन जिल्हा प्रशासन व जिल्हा क्रीडा अधिकारी जयकुमार टेंभरे यांनी केले आहे.

000000