वृत्त क्र. 527

सामाजिक न्याय दिनानिमित्त समता दिंडी व व्याख्यान 

नांदेड, दि. 26 :- समाज कल्याण कार्यालयाच्यावतीने आज राजर्षी छत्रपती शाहू महाराज यांच्या 150 व्या जयंती निमित्त सामाजिक न्याय दिन साजरा करण्यात आला. सामाजिक न्याय दिनानिमित्त आज सकाळी 8 वाजता समता दिंडीचे आयोजन करण्यात आले होते. या दिंडीस आमदार बालाजी कल्याणकर व सहाय्यक आयुक्त शिवानंद मिनगिरे यांच्या हस्ते हिरवी झेंडी दाखवून सुरवात करण्यात आली. 

या दिंडीच्या माध्यमातून सामाजिक न्यायाचा संदेश देत राजर्षी छत्रपती शाहू महाराजांच्या विचारांचा जागर करण्यात आला. सुरवातीला आमदार बालाजी कल्याणकर व सहाय्यक आयुक्त शिवानंद मिनगिरे यांनी महात्मा ज्योतीबा फुले व सावित्रीबाई फुले यांच्या पुर्णाकृती पुतळयास पुष्पहार अर्पण करुन अभिवादन केले. या समता दिंडीचा मार्ग महात्मा ज्योतिबा फुले पुतळा स्नेहनगर ते छत्रपती राजर्षी शाहू महाराज पुतळा असा होता. या दिंडीत आमदार बालाजी कल्याणकर, सहाय्यक आयुक्त शिवानंद मिनगिरे, जिल्हा समाज कल्याण अधिकारी सतेंद्र आऊलवार व शासकीय वसतिगृहाचे विद्यार्थी, विविध शाळा महाविद्यालयाचे शिक्षक, सामाजिक कार्यकर्ते, अधिकारी, कर्मचारी यांची उपस्थिती होती. सामाजिक न्याय दिनानिमित्त आमदार बालाजी कल्याणकर यांनी उपस्थितांना शुभेच्छा देवून मनोगत व्यक्त केले. सहाय्यक आयुक्त शिवानंद मिनगिरे यांनी छत्रपती शाहू महाराज यांच्या 150 व्या जयंती निमित्त सर्व विद्यार्थी, शिक्षक व अधिकारी कर्मचाऱ्यांना शुभेच्छा दिल्या.

सामाजिक न्याय भवनात व्याख्यान संपन्न 

सामाजिक न्याय दिनानिमित्त आज सकाळी 11 वाजता डॉ. बाबासाहेब आंबेडकर, सांस्कृतिक सभागृह, सामाजिक न्याय भवन नांदेड येथे व्याख्यानाचे आयोजन करण्यात आले होते. या व्याख्यानात “छत्रपती राजर्षी शाहू महाराज वसा आणि वारसा” या विषयावर प्रा. डॉ. विश्वाधार देशमुख यांनी मार्गदर्शन केले.  सामाजिक न्यायाची सुरुवात खऱ्या अर्थाने आपल्या पासून केली पाहिजे. आपण ज्या पदावर आहोत त्या पदाला न्याय देता आला पाहिजे असे मत त्यांनी यावेळी व्यक्त केले. राजर्षी छत्रपती शाहू महाराज यांच्या विविध विचार पैलु व कार्यावर सखोल मार्गदर्शन त्यांनी केले. तसेच यावेळी राजर्षी छत्रपती शाहू महाराज यांना अपेक्षीत सामाजिक न्याय, समता बंधुता अधिक सक्षम होण्यासाठी सर्वानी जोमाने कार्य करण्याचा संकल्प केला.  

कार्यक्रमाचे अध्यक्ष समाज कल्याण अधिकारी बापु दासरी हे होते. तर कार्यक्रमाचे आयोजक सहायक आयुक्त शिवानंद मिनगिरे हे तर प्रमुख पाहूणे जिल्हा समाज कल्याण अधिकारी सतेंद्र आऊलवार, समाजभुषण पुरस्कार प्राप्त भगवान ढगे, यु.एस. ढाणकीकर, सामाजिक कार्यकर्ते सत्यपाल सावंत हे होते. यावेळी सहाय्यक लेखाधिकारी डी.वाय पंतगे, विचारवंत प्रा. डॉ. विश्वाधार देशमुख हे उपस्थित होते. सामाजिक न्याय दिनानिमित्त निबंध व वत्कृत्व स्पर्धा घेण्यात आली. या कार्यक्रमास छत्रपती शाहू महाराज पुरस्कार प्राप्त मधुबाला संजय भोळे व नंदिनी भास्कर लोणे या विद्यार्थीनींना धनादेश देवून सत्कार करण्यात आला. तसेच आंतरराष्ट्रीय मादक द्रव्य सेवन विरोधी दिनानिमित्त सर्व अधिकारी कर्मचारी यांना यावेळी शपथ देण्यात आली. या कार्यक्रमाचे प्रास्ताविक सहायक आयुक्त शिवानंद मिनगिरे यांनी तर सूत्रसंचालन तालुका समन्वयक गजानन पांपटवार यांनी केले. आभार प्रदर्शन वरिष्ठ समाज कल्याण निरीक्षक लक्ष्मी गायके यांनी मानले. कार्यक्रमाची सांगता राष्ट्रगीताने करण्यात आली. 

ooo

 वृत्त क्र. 526 

अतिवृष्टीची मदत मिळण्यासाठी शेतकऱ्यांनी ई-केवायसी करून घ्यावी

- जिल्हाधिकारी अभिजीत राऊत

 
नांदेड दि. 25 :- जिल्ह्यात गत दोन वर्षातील विविध नैसर्गिक आपत्तीमध्ये झालेल्या शेतकऱ्यांच्या पिकांच्या नुकसानीची मदत मिळविण्यासाठी गावातील तलाठ्याकडून विशिष्ट क्रमांक मिळवून घेत ई-केवायसी करून घेणे अनिवार्य आहे. त्यामुळे शेतकऱ्यांनी तात्काळ आपल्या खात्याची ई-केवायसी करून घेण्याचे आवाहन जिल्हाधिकारी अभिजीत राऊत यांनी केले आहे.

सप्टेंबर-ऑक्टोबर 2022 मध्‍ये झालेल्‍या अतिवृष्‍टीमुळे, मार्च-एप्रिल 2023 मध्‍ये झालेल्‍या गारपिठ  व अवकाळी पावसामुळे, जुन-जुलै  2023 मधील झालेल्या अतिवृष्टीमुळे व नोव्‍हेंबर 2023 मधील अवेळी पावसामुळे बाधित शेतकऱ्यांच्या नुकसानीचे पंचनामे करण्यासाठी तलाठी, ग्रामसेवक व कृषि सहायक यांची त्रिस्तरीय समिती स्थापन करण्यात आली होती. या त्रिस्तरीय समितीमार्फत जिल्ह्यातील शेतकऱ्यांच्या पिकांचे झालेल्या नुकसानीचे पंचनामे करण्यात आले होते. आजपर्यंत  5 लाख 14 हजार 183  शेतक-यांना 415 कोटी रुपयांचे  अनुदान बॅंक खात्‍यावर  वितरण  करण्‍याची  मान्‍यता  देण्‍यात आली आहे.  त्‍यापैकी जिल्ह्यातील 66 हजार 339 शेतकरी यांनी ई-केवायसी न केल्‍यामुळे रक्‍कम  रुपये 42 कोटी नुकसान  भरपाईचा निधी प्रलंबित आहे. तरी शेतक-यांकडून विशिष्ट क्रमांकासह लवकरात लवकर ई-केवायसी करून घेण्याची कार्यवाही पूर्ण करण्याचे निर्देश जिल्हाधिकारी अभिजीत राऊत यांनी तहसीलदारांना दिले आहेत.

त्याअनुषंगाने मदत व पुनर्वसन मंत्रालय मुंबई यांच्याकडून निर्गमित करण्यात आलेल्या शासन निर्णयान्वये बाधित शेतकऱ्यांना अनुदानाची रक्कम वितरीत करण्याबाबत शासनाच्या पोर्टलवरून यादी अपलोड करण्याची कार्यवाही करण्यात आली. ही यादी अपलोड केल्यानंतर बाधित शेतकऱ्यांना आपल्या गावातील तलाठ्याकडून VK (विशिष्ट क्रमांक) घेऊन ई-केवायसी  (e-Kyc)करणे बंधनकारक आहे.

त्याबाबत तहसील कार्यालयाकडून तलाठ्यामार्फत जाणीवपूर्वक प्रयत्न करण्यात आले असून, बाधित शेतकऱ्यांनी अद्याप ई-केवायसी केली नाही. अशा शेतक-यांनी तात्काळ जवळच्या आपले सरकार सेवा केंद्रावर जावून ती  करून घ्यावी अन्यथा आपल्या आधार लिंक खात्यावर अनुदान जमा होणार नाही, असे जिल्हाधिकारी अभिजीत राऊत यांनी प्रसिद्धीपत्रकाद्वारे कळविले आहे.

000000

 वृत्त क्र. 525

सिकलसेल तपासणी करा आणि सिकल आजाराची साखळी खंडीत करा

·  19 जून ते 3 जुलै 2024 या कालावधीत सिकलसेल पंधरवड्याचे आयोजन

·  1 ते 40 वयोगटातील व्यक्तीने सिकलसेल तपासणी करुन घेण्याचे आवाहन

नांदेड दि. 25 :- “सिकल आजाराची साखळी खंडित करणे अत्यंत आवश्यक आहे. “ सिकलसेल आजाराविषयी लोकांमध्ये जनजागृती करण्यासाठी दरवर्षी राज्याने निवडक जिल्ह्यामध्ये 19 जून रोजी सिकलसेल नियंत्रण दिन साजरा करण्याच्या सूचना दिलेल्या आहेत. सिकलसेल रोग हा लाल रक्तपेशीसी संबंधित विकार आहे. हा विकार सामान्यतः लाल रक्तपेशींच्या आकारावर आणि कार्यावर परिणाम करतो. ही एक गंभीर समस्या आहे. लोकांना जागरूक करण्याच्या उद्देशाने दरवर्षी 19 जून रोजी जागतिक सिकलसेल जागरुकता दिवस साजरा केला जातो. त्यानुषंगाने जन-जाती कार्य मंत्रालय भारत सरकार आणि जिल्हा प्रशासन नांदेड यांच्यावतीने 19 जून ते 3 जुलै 2024 सिकलसेल पंधरवाडा आयोजित करण्यात आलेला आहे. तरी प्रत्येक 1 ते 40 वयोगटातील व्यक्तीने जबाबदारीने स्वताहून पुढे येऊन सिकलसेल तपासणी करून घ्यावी, असे आवाहन जिल्हाधिकारी अभिजित राऊत, मुख्य कार्यकारी अधिकारी मीनल करनवाल, जिल्हा शल्य चिकित्सक डॉ. निळकंठ भोसीकर, जिल्हा आरोग्य अधिकारी डॉ. बालाजी शिंदे यांनी केले आहे.

हा आनुवंशिक आजार असून एका पिढीतून पुढच्या पिढीत बालकांना संक्रमित होत असतो. त्यामुळे विवाहापूर्वी रक्त तपासणी करूनच विवाह करा असा सल्ला देण्यात येत असतो.

काय आहे सिकल सेल आजार ?

सिकल सेल रोग हा एक आनुवंशिक विकार आहे. ज्यामध्ये शरीरातील लाल रक्तपेशी विकृत होतात. यामुळे शरीरातील या पेशी लवकर नष्ट होतात आणि त्यामुळे शरीरात निरोगी लाल रक्तपेशीची कमतरता निर्माण होते. यामुळे, रक्तवाहिनीतील रक्तप्रवाह देखील थांबू शकतो. लाल पेशी सामान्यतः गोल आकाराच्या असतात, परंतु सिकलसेल रोग असलेल्या लोकांमध्ये त्यांचा आकार सामान्य विळाच्या (सिकल) आकाराच्या असतात. सिकलसेलची लक्षणे सामान्यत: लाल रक्तपेशी या गोलाकार व लवचीक असतात तर सिकलसेल लाल रक्तपेशी विळाच्या आकाराच्या असतात तसेच कडक असतात. शरीरातील रक्त कमी होणे किंवा अशक्तपणा, सांधेदुखी, सांधे सुजणे, हात आणि पाय सुजणे, शरीर पिवळसर होणे, असह्य वेदना होणे, लहान बालकांना वारंवार जंतु संसर्ग होणे, अवयवांचे नुकसान, संसर्ग, शरीराच्या वेगवेगळ्या भागात तीव्र वेदना, दृष्टी समस्या, थकवा जाणवणे इत्यादी प्रमुख लक्षणे आढळून येतात.

सिकल सेल तपासणी कोणी, कशी आणि कुठे करावी ?

जिल्ह्यात 1 ते 40 वर्षे वयोगटातील सर्व व्यक्त्तींची मोफत सिकलसेल तपासणी करून त्यांना सिकलसेल आजार नियंत्रण कार्यक्रम विषयी मार्गदर्शन करण्यात येते. त्यानुसार बाधित रुग्णांना मोफत औषधोपचार व समुपदेशन करण्यात येत आहे. सिकलसेल हा आनुवंशिक आजार आहे. या आजाराचे संपूर्ण उपचार नाही, पण नियंत्रण मात्र शक्य आहे. सिकलसेल रुग्णास नियमित समतोल आहार आवश्यक असल्याने त्यांची विशेष काळजी घेणे आवश्यक आहे. यासाठी सिकलसेलचे गांभीर्य ओळखून सर्व 1 ते 40 वयोगटातील व्यक्तींची सिकलसेल तपासणी अवश्य करून घेणे आवश्यक आहे. 1 ते 40 वर्षे वयोगटातील व्यक्तींच्या बोटातून एक थेंब रक्त घेऊन सोल्युबिलिटी चाचणी केली जाते. ही चाचणी पॉझिटिव्ह असल्यास हिमोग्लोबिन एलेक्ट्रोफोरेसिस चाचणी केली जाते. आरोग्य उपकेंद्र, प्राथमिक आरोग्य केंद्र, ग्रामीण रुग्णालये, उपजिल्हा रुग्णालये, जिल्हारुग्णालये, स्त्री रुग्णालये, शासकीय वैद्यकीय महाविद्यालये, मोबाईल मेडिकल युनिट यांच्या मार्फत सिकलसेल सोल्यूबिलिटी चाचणी मोफत केली जाते.

सिकल आजाराची साखळी खंडित करण्यासाठी असे विवाह टाळा

सिकलसेल बाधित रुग्णांना लाल रंगाचे कार्ड, सिकलसेल आजार वाहक असलेल्या रुग्णांना पिवळे कार्ड आणि निरोगी असल्यास पांढरे कार्ड उपलब्ध करून देण्यात येते. करीता लाल आणि लाल कार्ड धारक किंवा लाल आणि पिवळे कार्ड धारक तसेच पिवळे आणि पिवळे कार्ड धारक बाधितांचे (दोन रंगीत कार्ड धारकांचे) लग्न टाळणे आवश्यक आहे जेणेकरून सिकल आजाराची साखळी खंडित करणे शक्य होईल आणि हा आजार नियंत्रणात ठेवणे शक्य होईल.

जन-जागृती

सिकलसेल आजार नियंत्रणात ठेवणे हा राष्ट्रीय सिकलसेल नियंत्रण कार्यक्रमाचा मुख्य उद्देश असल्याने जन-जाती कार्य मंत्रालय, आरोग्य विभाग भारत सरकार, राज्य सरकार आणि जिल्हा प्रशासन यांच्यावतीने विविध कार्यक्रम राबविण्यात येत असतात. विशेषतः आदिवासी भागातील व्यक्तींचे वयोगटातील जेवढ्या लवकर तपासणी होईल तेवढ्या तत्परतने बाधित रुग्णांना औषधोपचार आरोग्य आणि विवाह बाबतीचे समुपदेशन करण्यात येत आहे. अंगणवाडी, शाळा, महाविद्यालये , तांडे – वाडी आणि समूह यांच्यात आरोग्य कर्मचारी प्रत्यक्ष भेटी देऊन समुपदेशन करतात. याकामी आशा कार्यकर्ती आणि आरोग्य कर्मचारी, समुदाय आरोग्य अधिकारी वैद्यकीय अधिकारी यांच्या सहायाने जन-जागृती करण्यात येत आहे. शासनाद्वारे विविध वृत्त-पत्रे, इलेक्ट्रॉनिक मीडिया, आकाशवाणी यावर सिकल संबधित माहिती उपलब्ध करून देत आहेत.

00000

वृत्त क्र. 524

सामाजिक न्याय दिन साजरा करण्याचे निर्देश 

नांदेड दि. 25 :- राजर्षी छत्रपती शाहू महाराजांचा जन्मदिवस 26 जून दरवर्षी “सामाजिक न्याय दिन” म्हणून साजरा करण्यात येतो. त्यानुसार 26 जून 2024 रोजी “सामाजिक न्याय दिन” साजरा करण्याबाबत जिल्हाधिकारी यांनी संबंधीत विभागांना निर्देश दिले आहेत.  

 

सामाजिक न्याय, सांस्कृतिक कार्य व विशेष सहाय्य विभागाचा शासन निर्णय दि. 28 एप्रिल 2006 दिलेल्या निर्देशानुसार जिल्हा परिषदेचे मुख्य कार्यकारी अधिकारी, नांदेड वाघाळा शहर महानगरपालिका आयुक्त, पोलीस अधीक्षक, जि.प. समाज कल्याण अधिकारी, उच्च शिक्षण संचालक, शिक्षणाधिकारी निरंतर जि.प. शिक्षणाधिकारी प्राथमिक व माध्यमिक, जिल्हा क्रीडाधिकारी, प्राचार्य तंत्रशिक्षण, प्राचार्य व्यवसाय शिक्षण व प्रशिक्षण, सहा. आयुक्त समाज कल्याण नांदेड यांनी योग्य ती कार्यवाही करावी व कार्यवाहीचा अहवाल शासन व जिल्हाधिकारी कार्यालयास सादर करावा, असे निर्देश जिल्हाधिकारी नांदेड यांनी दिले आहेत.

000000

 

 वृत्त क्र. 523

कृषी दिनानिमित्त विविध कार्यक्रमांचे आयोजन

 

नांदेड दि. 25 :- माजी मुख्यमंत्री कै. वसंतराव नाईक यांनी कृषिक्षेत्रात केलेल्या भरीव योगदानाबद्दल 1 जुलै हा दिवस त्यांचा वाढदिवस राज्यात कृषिदिन म्हणून साजरा करण्यात येतो. यावर्षी 1 जुलै 2024 रोजी जिल्हा परिषदेच्या कृषि विभागामार्फत कृषिदिन जिल्हा परिषदेच्या मुख्य कार्यकारी अधिकारी मीनल करनवाल यांच्या अध्यक्षतेखाली जिल्हा परिषदेत साजरा करण्यात येणार आहे.

कृषिदिनाच्या दिवशी शेती क्षेत्रात उल्लेखनिय कार्य करणाऱ्या महिलांचा गौरव करण्यात येणार आहे. तसेच राज्यस्तरीय पुरस्कार प्राप्त शेतकऱ्यांचा वृक्ष देवून गौरव करण्यात येणार आहे. या कायर्क्रमात शेतकऱ्यांना किटनाशक फवारणी करतांना घ्यावयाची काळजी, गुलाबी बोंडअळी नियंत्रण, नॅनो फर्टीलायझरचा वापर, एकात्मीक किड व रोग व्यवस्थापन विविध पिके लागवड तंत्रज्ञान, एकात्मीक खत व्यवस्थापनाबाबत शास्त्रज्ञांकडून शेतकऱ्यांना मार्गदर्शन करण्यात येणार आहे. यावेळी किटकनाशक फवारणी करताना वापरावयाची सेफ्टीकिटचे वितरण मान्यवरांच्या हस्ते करण्यात येणार आहे.

तसेच जिल्ह्यातील शेती क्षेत्रात उल्लेखनिय कार्य करणाऱ्या शेतकऱ्यांचे मार्गदर्शन होणार आहे. तालुकास्तरावरु पंचायत समिती व कृषि विभागाच्यावतीने विविध उपक्रम राबविण्यात येणार आहेत. यामध्ये मुख्यत्वाने शेतकऱ्यांच्या शेतावर वृक्ष लागवड, विहिरीचे जलपुजन, विहीर पुर्नभरण, बीबीएफ यंत्राद्वारे पेरणी करण्यात येणार आहे, असे जिल्हा परिषदेच्या कृषि विभागाचे कृषि विकास अधिकारी विजय बेत्तीवार यांनी प्रसिध्दीपत्रकाद्वारे कळविले आहे.

00000 

सारथी अंतर्गत अभिनव उपक्रमाची चित्रफीत इलेक्ट्रॉनिक्स माध्यमांसाठी

मुलांची पाहिली कमाई आणि भावनिक झालेले पालक !

मराठा समाजासाठीच्या योजनेचे 'सारथी'चे प्रशिक्षणानंतरचे दमदार सादरीकरण

•“सारथी व एमकेसीएल” यांच्या मार्फत नांदेड जिल्ह्यात दोन हजार विद्यार्थ्यांना संगणकाचे मोफत प्रशिक्षण.

नांदेड, दि. 25 : सरसेनापती वीर बाजी पासलकर “शिकता शिकता कमवा” या योजने अंतर्गत आज एका अभिनव उपक्रमात विद्यार्थ्यांच्या पहिल्या कमाईतून आपल्या आई-वडिलांना मुलांनी भेटवस्तू दिल्या. जिल्हाधिकारी कार्यालयात निवासी उपजिल्हाधिकारी महेश वडतकर यांच्या उपस्थितीत हा भावनिक कार्यक्रम लक्षवेधी ठरला.

नांदेड जिल्ह्यातील ग्रामीण भागातील मराठा, कुणबी, कुणबी-मराठा व मराठा-कुणबी समाजाच्या विद्यार्थ्यांनी आज या उपक्रमात आपल्या पालकांसह सहभाग नोंदवला होता. मुला मुलींच्या पहिल्या कमाईतील पैशातून आपल्याच आई-वडिलांना भेटवस्तू देण्याचा हा कार्यक्रम एक भावनिक सोहळा झाला.

छत्रपती शाहू महाराज संशोधन प्रशिक्षण व मानव विकास संस्था सारथी पुणे मार्फत एमकेसीएलच्या माध्यमातून संगणक प्रशिक्षण केंद्रद्वारे दिनांक 1 फेब्रुवारीपासून छत्रपती संभाजी महाराज सारथी युवा व्यक्तिमत्व व संगणक कौशल्य कार्यक्रम सहा महिन्याचा डिप्लोमा कोर्स नांदेड जिल्ह्यातील सर्व 16 तालुक्यात राबविला जात आहे.

यामाध्यमातून आतापर्यंत 2100 विद्यार्थ्यांना प्रशिक्षण देण्यात आले आहे. या संगणक प्रशिक्षणाच्या माध्यमातून ग्रामीण भागातील मराठा, कुणबी, कुणबी-मराठा व मराठा-कुणबी समाजाच्या विद्यार्थ्यांना संगणकाचे प्रशिक्षण देऊन त्यांना आधुनिक जगात रोजगारक्षम करण्यासाठी सारथी संस्था प्रयत्नशील आहे. नांदेड शहरातील सारथी संस्थेमार्फत छत्रपती संभाजी महाराज सारथी युवा व्यक्तिमत्व व संगणक कौशल्य कार्यक्रम प्रशिक्षण घेत असलेले विद्यार्थ्यांनी वीर बाजी पासलकर “शिकता शिकता कमवा” या योजने अंतर्गत आत्मसात केलेल्या संगणक कौशल्याचा वापर करून स्थानिक स्तरावर पदवीधर विद्यार्थ्यांचा बायोडाटा तयार केला. एक्सलचा वापर करून लेखा माहिती तयार केली ,डीटीपीचा वापर करून काही बॅनर तयार केले.इत्यादी संगणकीय कामकाज करून त्यांना जो मोबदला मिळाला आहे,या पैशातून सदर कार्यक्रमात सहभागी विद्यार्थ्यांनी आपल्या आई-वडिलांना भेटवस्तू घेतली होती.

त्यांना सदर विद्यार्थ्यांनी आपल्या पहिल्या कमाईतून घेतलेली भेट वस्तू निवासी जिल्हाधिकारी महेश वडदकर, एमकेसीएलचे नांदेड जिल्हा समन्वयक पंढरीनाथ आघाव तसेच संबंधित प्रशिक्षण केंद्र प्रमुखांच्या उपस्थितीत भेट वस्तू देण्यात आल्या. सारथी संस्थेच्या प्रशिक्षणाबाबत उपजिल्हाधिकारी श्री.वडदकर यांनी विद्यार्थ्यांचे कौतुक केले व अभिनंदन केले. यावेळी प्रशिक्षण देणारे जिल्ह्यातील बहुतांश संस्थाचालक ही उपस्थित होते. त्यांचाही निवासी उपजिल्हाधिकाऱ्यांनी सत्कार केला.

तत्पूर्वी, विद्यार्थ्यांना पत्रकारितेचे क्षेत्र व त्यातील करियर यासंदर्भात जिल्हा माहिती अधिकारी प्रवीण टाके यांनी मार्गदर्शन केले. कार्यक्रमाचे सूत्रसंचालन राजश्री मिरजकर यांनी केले. या कार्यक्रमाला मोठ्या संख्येने विद्यार्थ्यांचे पालक सहभागी झाले होते अनेकांनी पहिल्यांदाच जिल्हाधिकारी कार्यालयात पाऊल ठेवले होते. आपल्या पाल्याकडून आयुष्यात पहिल्यांदाच भेट वस्तू घेणारे पालक या कार्यक्रमाच्या आयोजनाने व आपल्या मुलांच्या उपलब्धीने भारावून गेले होते.

गरीबी श्रीमंती यापेक्षा

सिद्ध करणे महत्त्वाचे

अपयशासाठी आपण गरीब आहोत. श्रीमंत आहोत. अमूक आहोत. तमूक आहोत, ही सर्व कारणे देता येतात. मात्र सिद्ध करण्यासाठी त्याची गरज नसते. सिद्ध करणारा सर्व अडथळे पार करतो. त्यामुळे स्वतःला सिद्ध करा कोणताही अडथळा तुम्हाला यशापासून परावृत्त करू शकत नाही.त्यामुळे आता बेस बनला आहे. उंच भरारी घ्या, असा संदेश निवासी उपजिल्हाधिकारी महेश वडदकर यांनी आपल्या संक्षिप्त संबोधनात यावेळी विद्यार्थ्यांना दिला.

000000 

 वृत्त क्र. 522 

मुलांची पाहिली कमाई आणि भावनिक झालेले पालक !

मराठा समाजासाठीच्या योजनेचे 'सारथी'चे प्रशिक्षणानंतरचे दमदार सादरीकरण

·  “सारथी व एमकेसीएल” यांच्या मार्फत नांदेड जिल्ह्यात दोन हजार विद्यार्थ्यांना संगणकाचे मोफत प्रशिक्षण.

 

नांदेड, दि. 25 : सरसेनापती वीर बाजी पासलकर “शिकता शिकता कमवा” या योजने अंतर्गत आज एका अभिनव उपक्रमात विद्यार्थ्यांच्या पहिल्या कमाईतून आपल्या आई-वडिलांना मुलांनी भेटवस्तू दिल्या. जिल्हाधिकारी कार्यालयात निवासी उपजिल्हाधिकारी महेश वडतकर यांच्या उपस्थितीत हा भावनिक कार्यक्रम लक्षवेधी ठरला.

 

नांदेड जिल्ह्यातील ग्रामीण भागातील मराठा, कुणबी, कुणबी-मराठा व मराठा-कुणबी समाजाच्या विद्यार्थ्यांनी आज या उपक्रमात आपल्या पालकांसह सहभाग नोंदवला होता. मुला मुलींच्या पहिल्या कमाईतील पैशातून आपल्याच आई-वडिलांना भेटवस्तू देण्याचा हा कार्यक्रम एक भावनिक सोहळा झाला.

 

छत्रपती शाहू महाराज संशोधन प्रशिक्षण व मानव विकास संस्था सारथी पुणे मार्फत एमकेसीएलच्या माध्यमातून संगणक प्रशिक्षण केंद्रद्वारे दिनांक 1 फेब्रुवारीपासून छत्रपती संभाजी महाराज सारथी युवा व्यक्तिमत्व व संगणक कौशल्य कार्यक्रम सहा महिन्याचा डिप्लोमा कोर्स नांदेड जिल्ह्यातील सर्व 16 तालुक्यात राबविला जात आहे.

 

यामाध्यमातून आतापर्यंत 2100 विद्यार्थ्यांना प्रशिक्षण देण्यात आले आहे. या संगणक प्रशिक्षणाच्या माध्यमातून ग्रामीण भागातील मराठा, कुणबी, कुणबी-मराठा व मराठा-कुणबी समाजाच्या विद्यार्थ्यांना संगणकाचे प्रशिक्षण देऊन त्यांना आधुनिक जगात रोजगारक्षम करण्यासाठी सारथी संस्था प्रयत्नशील आहे. नांदेड शहरातील सारथी संस्थेमार्फत छत्रपती संभाजी महाराज सारथी युवा व्यक्तिमत्व व संगणक कौशल्य कार्यक्रम प्रशिक्षण घेत असलेले विद्यार्थ्यांनी वीर बाजी पासलकर “शिकता शिकता कमवा” या योजने अंतर्गत आत्मसात केलेल्या संगणक कौशल्याचा वापर करून स्थानिक स्तरावर पदवीधर विद्यार्थ्यांचा बायोडाटा तयार केला. एक्सलचा वापर करून लेखा माहिती तयार केली ,डीटीपीचा वापर करून काही बॅनर तयार केले.इत्यादी संगणकीय कामकाज करून त्यांना जो मोबदला मिळाला आहे,या पैशातून सदर कार्यक्रमात सहभागी विद्यार्थ्यांनी आपल्या आई-वडिलांना भेटवस्तू घेतली होती.

 

त्यांना सदर विद्यार्थ्यांनी आपल्या पहिल्या कमाईतून घेतलेली भेट वस्तू निवासी जिल्हाधिकारी महेश वडदकर, एमकेसीएलचे नांदेड जिल्हा समन्वयक पंढरीनाथ आघाव तसेच संबंधित प्रशिक्षण केंद्र प्रमुखांच्या उपस्थितीत भेट वस्तू देण्यात आल्या. सारथी संस्थेच्या प्रशिक्षणाबाबत उपजिल्हाधिकारी श्री.वडदकर यांनी विद्यार्थ्यांचे कौतुक केले व अभिनंदन केले. यावेळी प्रशिक्षण देणारे जिल्ह्यातील बहुतांश संस्थाचालक ही उपस्थित होते. त्यांचाही निवासी उपजिल्हाधिकाऱ्यांनी सत्कार केला.

   

तत्पूर्वी, विद्यार्थ्यांना पत्रकारितेचे क्षेत्र व त्यातील करियर यासंदर्भात जिल्हा माहिती अधिकारी प्रवीण टाके यांनी मार्गदर्शन केले. कार्यक्रमाचे सूत्रसंचालन राजश्री मिरजकर यांनी केले. या कार्यक्रमाला मोठ्या संख्येने विद्यार्थ्यांचे पालक सहभागी झाले होते अनेकांनी पहिल्यांदाच जिल्हाधिकारी कार्यालयात पाऊल ठेवले होते. आपल्या पाल्याकडून आयुष्यात पहिल्यांदाच भेट वस्तू घेणारे पालक या कार्यक्रमाच्या आयोजनाने व आपल्या मुलांच्या उपलब्धीने भारावून गेले होते.

   

गरीबी श्रीमंती यापेक्षा

सिद्ध करणे महत्त्वाचे

अपयशासाठी आपण गरीब आहोत. श्रीमंत आहोत. अमूक आहोत. तमूक आहोत, ही सर्व कारणे देता येतात. मात्र सिद्ध करण्यासाठी त्याची गरज नसते. सिद्ध करणारा सर्व अडथळे पार करतो. त्यामुळे स्वतःला सिद्ध करा कोणताही अडथळा तुम्हाला यशापासून परावृत्त करू शकत नाही.त्यामुळे आता बेस बनला आहे. उंच भरारी घ्या, असा संदेश निवासी उपजिल्हाधिकारी महेश वडदकर यांनी आपल्या संक्षिप्त संबोधनात यावेळी विद्यार्थ्यांना दिला.

000000