समता पर्व अंतर्गत ज्येष्ठ नागरिक, दिव्यांग,

तृतीयपंथीयांसाठी कार्यशाळा संपन्न

 

नांदेड, दि. 3  :-सामाजिक न्याय व विशेष सहाय्य विभागामार्फत 26 नोव्हेंबर संविधान दिन ते डॉ. बाबासाहेब आंबेडकर महापरिनिर्वाण दिन  6 डिसेंबर 2022 हा कालावधी सामाजिक समता पर्व म्हणून साजरा केला जात आहे. त्याअनुषंगाने ज्येष्ठ नागरिक, दिव्यांग, तृतीयपंथी यांच्यासाठी विविध योजनेबाबत माहिती देण्यासाठी कार्यशाळेचे आयोजन समाज कल्याण सहाय्यक आयुक्त कार्यालयात आज करण्यात आले होते.   या कार्यशाळेच्या अध्यक्षस्थानी ज्येष्ठ नागरिक संघ उत्तर मराठवाडाचे अध्यक्ष अशोक तेरकर हे होते. ज्येष्ठ नागरिक संघ उत्तर मराठवाडाचे सचिव जयवंत सोमवाड, तृतीयपंथी गुरु गौरी बकस, दिव्यांग उद्धव त्र्यंबकराव शेळके, समाज कल्याण अधिकारी बापू दासरी, समाजकल्याण निरिक्षक श्रीमती माधवी राठोड, समतादूत प्रकल्पाचे प्रकल्पधिकारी सुजाता पोहरे यांची उपस्थिती होती.  

 

ज्येष्ठ नागरिक, दिव्यांग, तृतीयपंथी यांना सार्वजनिक ठिकाणी तसेच घरामध्ये आदरयुक्त वागणुक दिली पाहिजे. सामुहिक ठिकाणी त्यांचा आदर केला पाहिजे. शासनाच्या विविध योजनेचा त्यांनी लाभ घ्यावा व स्वत:चे जीवनमान समृद्ध करावे, असे आवाहन यावेळी करण्यात आले. विविध योजनेबाबत सविस्तर मार्गदर्शन याप्रसंगी करण्यात आले. ज्येष्ठ नागरिकांना कार्यालयात स्वतंत्र हॉल, हेल्पलाईन नंबरची सुविधा देण्यात आली आहे. बसमध्ये सर्व नागरिकांनी आपले प्रामाणिक कर्तव्य म्हणुन त्यांना बसण्यासाठी प्रथम प्राधान्य दिले पाहिजे. तृतीयपंथी  यांना समाजामध्ये संविधानातंर्गत मानाचा व समानतेचा हक्क म्हणुन त्यांना त्यांचे ओळखपत्र तसेच आधारकार्ड देण्यात आले. समाजातील प्रत्येक घटकांने त्यांना समान वागणुक द्यावी, असे आवाहन समाज कल्याण अधिकारी बापु दासरी यांनी केले. तृतियंपथी यांच्या कार्यशाळेत 16  तृतीयंपथीयांना ओळखपत्र देण्यात आले.

 

प्रास्ताविक तालूका समन्वयक श्रीमती अंजली नरवाडे यांनी केले तर सूत्रसंचालन गजानन पांपटवार यांनी केले. शेवटी आभार सहाय्यक ग्रंथपाल श्रीमती ममता गंगातीर यांनी केले. यावेळी ज्येष्ठ नागरिक, दिव्यांग, तृतीयपंथी यांची उपस्थिती होती. कार्यक्रम यशस्वी करण्यासाठी समाजकल्याण निरिक्षक श्रीमती माधवी राठोड, आर. डी. सुर्यवंशी, खानसोळे, नागुलवार, दवणे, गायकवाड, राठोड, ममता गंगातीर, पेंडकर, इंगेवाड अंजली नरवाडे यांनी परिश्रम घेतले.

0000

 धर्माबाद येथे 17 तंबाखू विक्रेत्यांवर कारवाई 

नांदेड (जिमाका) दि. 2 :-  धर्माबाद शहरात तंबाखू व तंबाखूजन्य पदार्थाची मोठ्या प्रमाणात विक्री तसेच कोटपा 2003  कायद्याचे उल्लंघन होत असल्याची  माहिती मिळताच जिल्हास्तरीय तंबाखू नियंत्रण पथकाने धर्माबाद शहरात अचानक धाड टाकून 17 तंबाखू विक्रेत्यांवर कारवाई केली. या कार्यवाहीत तंबाखू विक्रेत्यांना 18 हजार 300 रुपयाचा दंड आकारला.  

ही कार्यवाही जिल्हा शल्यचिकित्सक डॉ. नीलकंठ भोसीकर यांच्या मार्गदर्शनाखाली करण्यात आली. या पथकात जिल्हा सल्लागार डॉ. साईप्रसाद शिंदे,  कार्यक्रम व्यवस्थापक डॉ. उमेश मुंडे, मानसशास्त्रज्ञ प्रकाश आहेर, सामाजिक कार्यकर्ता बालाजी गायकवाड तसेच ग्रामीण रुग्णालय धर्माबाद येथील वैद्यकीय अधीक्षक वेणुगोपाल पंडित यांच्या मार्गदर्शनाखाली नितीन आडे तसेच स्थानिक पोलीस  निरीक्षक संजय हिबारे यांच्या मार्गदर्शनाखाली पो.ना.जयराम चुकेवाड व पी.सी. एस.आर.घोसले आदी होते. 

सार्वजनिक ठिकाणी तसेच शैक्षणिक अथवा शासकीय, निमशासकीय कार्यालयाच्या परिसरात तंबाखू व तंबाखूजन्य पदार्थाची विक्री अथवा सेवन किंवा साठवण होत असल्यास जिल्हा तंबाखू नियंत्रण कक्ष, जिल्हा रुग्णालयात तक्रार नोंदवून नांदेड जिल्हा तंबाखू मुक्त करण्याच्या या अभियानास सहकार्य करावे असे, आवाहन जिल्हा शल्य चिकित्सक डॉ. निळकंठ भोसीकर यांनी केले आहे.

00000

 

 समता पर्व अंतर्गत 16 तालुक्यात

अनुसूचित जाती व नवबौध्द घटकांच्या वस्तींना भेटी 

नांदेड (जिमाका) दि. 2 :- सामाजिक न्याय व विशेष सहाय्य विभागामार्फत 26 नोव्हेंबर ते      महापरिनिर्वाण दिन  6 डिसेंबर 2022 या कालावधीत समता पर्व साजरा करण्यात येत आहे. समता पर्व निमित्त आज समाज कल्याण कार्यालयातील कर्मचाऱ्यांनी जिल्ह्यातील 16 तालुक्यातील अनुसूचित जाती व नवबौध्द घटकांच्या वस्त्यांना भेटी देवून समाज कल्याण विभागाच्या विविध योजनांची माहिती दिली. 

या भेटी दरम्यान तळागाळातील लोकांना समाज कल्याण विभागाच्या योजनाची माहिती होण्यासाठी प्रत्येक लाभार्थ्यांना भेटून मिनी ट्रॅक्टर योजना, कर्मवीर दादासाहेब गायकवाड सबळीकरण व स्वाभिमान  योजना, विशेष घटक योजना, भारत सरकार शिष्यवृत्ती योजना, रमाई आवास घरकुल योजना, मुला-मुलीसाठी शासकीय वसतिगृह व निवासी शाळा, भारतरत्न डॉ. बाबासाहेब आंबेडकर स्वाधार योजना, गटई कामगारांना पत्र्याचे स्टॉल पुरविणे या योजनांची माहिती दिली. तसेच यावेळी समाज कल्याण विभागाच्या विविध योजनाबाबत  माहिती व घडीपत्रिका देवून प्रचार व प्रसिध्दी करण्यात आली. एल.ई.डी व्हॉनद्वारे प्रत्येक तालुक्यात योजनाची प्रचार व प्रसिध्दी करण्यात आली आहे.

00000

 जागतिक दिव्यांग दिनानिमित्त परिसंवादाचे आयोजन 

नांदेड, दि. 2 (जिमाका) :- जागतिक दिव्यांग दिनाचे औचित्य साधून समाज कल्याण विभाग, जिल्हा परिषद नांदेड,  महात्मा गांधी सेवा संघ संचालित जिल्हा दिव्यांग पुनर्वसन केंद्र व जिल्हा विधी सेवा प्राधिकरण यांच्या संयुक्त विद्यमाने शनिवार 3 डिसेंबर 2022 रोजी सकाळी 11 वा. यशवंतराव चव्हाण सभागृह येथे परिसंवादाचे आयोजन करण्यात आले आहे. 

या कार्यक्रमाला जिल्हा परिषदेच्या मुख्य कार्यकारी अधिकारी वर्षा ठाकूर-घुगे, अतिरिक्त मुख्य कार्यकारी अधिकारी संदीप माळोदे, उपमुख्य कार्यकारी अधिकारी सुधीर ठोंबरे, लॉयन्स क्लब मिडटाऊनचे अध्यक्ष प्रेमकुमार फेरवानी, जिल्हा विधी सेवा प्राधिकरणाच्या सचिव दलजीत कौर जज, बालरोग तज्ञ डॉ. लक्ष्मीकांत बजाज यांची प्रमुख उपस्थिती राहणार आहे. 

या परिसंवादामध्ये दिव्यांगांसाठी न्यायालयीन तरतुदी, दिव्यांगत्व निर्मुलनासाठी शिघ्र निदान व उपचाराचे महत्व या विषयांवर तज्ज्ञ मार्गदर्शन करणार आहेत. या कार्यक्रमाला जास्तीत जास्त दिव्यांगांनी उपस्थित राहुन कार्यक्रमाचा लाभ घ्यावा, असे आवाहन जिल्हा समाज कल्याण अधिकारी सतेंद्र आऊलवार यांनी केले आहे.

00000

 वृत्त क्र. 1131

 समता पर्व निमित्त समाज कल्याण कार्यालयात

युवा गटाची कार्यशाळा संपन्न 

नांदेड (जिमाका) दि. 1 :- सामाजिक न्याय व विशेष सहाय्य विभागामार्फत 26 नोव्हेंबर ते महापरिनिर्वाण दिन 6 डिसेंबर 2022 हा कालावधीत समता पर्व म्हणून साजरा केला जात आहे. समता पर्व च्या निमित्ताने आज स्टँड अप इंडिया योजनेत अनुसूचित जाती नवबौध्द घटकातील नवउद्योजकांसाठी मार्जिन मनी उपलब्ध करुन देणे याबाबत समाज कल्याण कार्यालयात युवागटांची कार्यशाळा संपन्न झाली. 

यावेळी जिल्हा अग्रणी बँकेचे मुख्य व्यवस्थापक अनिल गचके, एमसीईडीचे प्रकल्प अधिकारी शंकर पवार, समाज कल्याण अधिकारी बापू दासरी व प्रकल्पधिकारी सुजाता पोहरे, समतादूत प्रकल्प आणि नांदेड जिल्हयातील अनु.जाती बचत गटाचे प्रतिनिधी व अनु. जातीचे उद्योजक बनु इच्छिणारे युवक युवती हजर होते. 

यावेळी स्टँड अप योजनेअंतर्गत अनु.जातीच्या नवउद्योजकांना विविध उद्योग सुरु करण्यासाठी प्रस्ताव कसे सादर करावेत. अचूक प्रस्ताव सादर करण्यासाठी नेमकी कोणकोणत्या बाबींची दक्षता घ्यावी याबाबत सविस्तर मार्गदर्शन करण्यात आले. जिल्हा उद्योग केंद्राच्यावतीने एमसी ईडीकडून सुमारे 32 योजना युवा उद्योजकांसाठी राबविल्या जातात असे एमसीईडीचे प्रकल्प अधिकारी शंकर पवार यांनी विशद केले. अनिल गचके यांनी नवउद्योजकांनी फक्त सबसीडी हे उद्दिष्ठ न ठेवता कल्पक नवउद्योजकांनी त्यांच्या जीवनात यशस्वी होणाच्या उद्देशाने शासन योजनांचा लाभ घ्यावा व स्वत:चे जीवनमान समृध्द करावे असे आवाहन केले. 

प्रास्ताविकात समाज कल्याण अधिकारी बापू दासरी यांनी युवकांनी आपल्या जीवनाचे नेमके उद्दीष्ट आणि ध्येय निश्चित करावे. उद्योजक बनायचे असेल तर प्रामाणिकपणे चिकाटीने ध्येय पथावर वाटचाल करावी. तसेच युवकांनी आपले व्यक्तीमत्व प्रामाणिक व प्रयत्नवादी ठेवावे, असे त्यांनी यावेळी सांगितले. 

स्टँडअप योजनेच्या ऑनलाईन प्रणालीतील जाचक अटी सोप्या करण्याची अपेक्षा श्रीमती सुजाता पोहरे यांनी व्यक्त केली. कार्यक्रमांचे सूत्र संचालन गजानन पांपटवार तालुका समन्वयक तर आभारप्रदर्शन अधिक्षक राजेश सुरकूटलावार यांनी केले. या कार्यक्रमांस अनेक युवक / युवती बचतगटांचे प्रतिनिधी उपस्थित होते. हा कार्यक्रम यशस्वीतेसाठी समाज कल्याण निरीक्षक पी.जी.खानसोळे, वरिष्ठ लिपीक रविकुमार जाधव, कनिष्ठ लिपीक व्ही.एस. पकाने, डी.आर. दवणे, तालुका समन्वयक आर.एम शेख, सहाय्यक ग्रंथपाल एन.पी.मस्के यांनी परिश्रम घेतले.

0000

 वृत्त क्र. 1130

 आधारभूत किंमत खरेदी योजनेच्या

ऑनलाईन नोंदणीसाठी मुदतवाढ 

नांदेड (जिमाका) दि. 1 :-आधारभूत किंमत खरेदी योजना खरीप हंगाम 2022-23 मध्ये धान/भरडधान्य खरेदी करण्यासाठी धान भरडधान्य उत्पादक शेतकऱ्यांची ऑनलाईन नोंदणी बिलोली  (कासराळी) येथील केंद्रवर सुरू आहे. ही ऑनलाईन नोंदणी करण्यासाठी 7 डिसेंबर 2022 पर्यंत मुदतवाढ देण्यात आली आहे. 

नोंदणीसाठी चालु हंगामातील पीकपेरा, ऑनलाईन नोंद असलेला सातबारा, बँक खात्याची साक्षंकीत प्रत, आधार कार्ड प्रत तसेच शेतकऱ्यांचा मोबाईल नंबर इत्यादी कागदपत्रासह शेतकरऱ्यांनी स्वत: उपस्थित राहून पोर्टलवर ऑनलाईन नोंदणी दरम्यान फोटो अपलोड करायचा आहे. या योजनेचा शेतकरी बांधवांनी लाभ घेण्यासाठी मुदतीत नोंदणी करावी, असे आवाहन जिल्हा पणन अधिकारी नांदेड यांनी केले आहे. 

00000

 वृत्त क्र. 1129 

नवउद्योजकांपर्यंत शासकीय योजना

सुलभ पोहचविण्याची आवश्यकता  

-         जिल्हाधिकारी अभिजित राऊत

 

·         उद्योजक मित्राच्या बैठकीत निर्देश

 नांदेड (जिमाका) दि. 1 :- नांदेड जिल्ह्यात उद्योजकांना उभारी देण्यासाठी आणि नवीन उद्योग निर्मितीसाठी शासनाच्या विविध योजना नवउद्योजकांपर्यंत पोहचल्या पाहिजेत. याचबरोबर या योजनासंदर्भात उद्योजकांच्या मनात असलेल्या शंकांचेही तात्काळ निरसन करून त्यांच्या प्रस्तावाला शासनाशी निगडीत प्रक्रिया गतीमान करण्याचे प्रतिपादन जिल्हाधिकारी अभिजित राऊत यांनी केले. जिल्हाधिकारी कार्यालयात त्यांच्या अध्यक्षतेखाली आयोजित जिल्हा सल्लागार समितीच्या बैठकीत ते बोलत होते.

या बैठकीस जिल्हा उद्योग केंद्राचे महाव्यवस्थापक अमोल इंगळे, प्रवीण खडके, औद्योगिक संघटनेचे शैलेश कराळे, आनंदे बिडवई, महेश देशपांडे, हर्षद शहा, एकनाथ जाधव तसेच इतर विभागातील अधिकारी व कर्मचारी मोठ्या प्रमाणात उपस्थित होते. 

जिल्ह्यातील अनेक पदवीधर युवक-युवती आपल्या उद्योग व्यवसायाबाबत संधीच्या प्रतिक्षेत आहेत. नवीन स्टार्टअपच्या दृष्टिने अनेकांनी प्राथमिक माहिती व आवश्यक ती तयारीही करून ठेवलेली आहे. अशा गटांना शासनस्तराशी निगडीत जर काही अडचणी असतील तर त्या त्वरीत दूर करून त्यांना प्रोत्साहन देण्यासह योजनांचे बळ उपलब्ध करून दिले पाहिजे, अशी अपेक्षा जिल्हाधिकारी अभिजीत राऊत यांनी व्यक्त केली. यादृष्टीने जिल्हास्तरावर परिसंवादाचे आयोजन करण्याबाबत जिल्हा उद्योग केंद्राला त्यांनी निर्देश दिले. 

आपला नांदेड जिल्हा हा कृषिप्रधान जिल्हा आहे. इतर जिल्ह्याच्या तुलनेत सिंचनाच्या सुविधा अनेक भागात आहेत. अनेक प्रगतीशील शेतकऱ्यांनी फलोत्पादनापासून इतर दर्जेदार कृषि उत्पादन घेतले आहे. कृषिपुरक उद्योगाच्या निर्मितीसाठी जे काही तांत्रिक कौशल्य व त्याबाबतची माहिती देण्यासाठी विद्यापीठ पातळीवर व कौशल्य विकास विभागातर्फे केंद्र असून याचा लाभ युवकांनी घ्यावा, असे आवाहन त्यांनी केले. उद्योगासंबंधी ज्या काही अडचणी असतील त्या सोडविण्यासाठी दर तीन महिन्याला उद्योजक मित्रांची  बैठक घेण्याचे त्यांनी उद्योग विभागाला सांगितले.

00000