वृत्त क्र. 744   

92 व्यक्तींना आज कोरोनातून बरे झाल्याने रुग्णालयातून सुट्टी

जिल्ह्यात 114 बाधितांची भर तर दोघांचा मृत्यू 

 

नांदेड (जिमाका) दि. 8 :-  जिल्ह्यात आज  8 ऑगस्ट रोजी सायं. 5  वाजेपर्यंतच्या कोरोना अहवालानुसार 92  कोरोना बाधित व्यक्तींमध्ये सुधारणा झाल्यामुळे त्यांना रुग्णालयातून सुट्टी देण्यात आली आहे. याचबरोबर 114 व्यक्तींचे अहवाल बाधित आले आहेत. आजच्या एकूण 456 अहवालापैकी  293 अहवाल निगेटिव्ह आले.  जिल्ह्यात एकुण  बाधितांची संख्या आता 3 हजार 156 एवढी झाली असून यातील 1 हजार 415 एवढे बाधित बरे झाले आहेत. एकुण 1 हजार 608 बाधितांवर औषधोपचार सुरु असून त्यातील 85 बाधितांची प्रकृती गंभीर स्वरुपाची आहे.  

 

शुक्रवार 7 ऑगस्ट रोजी सिडको नांदेड येथील 72 वर्षाची एक महिला, अर्धापूर तालुक्यातील कासरखेड येथील 72 वर्षाच्या एका पुरुषाचा शासकिय वैद्यकिय महाविद्यालय विष्णुपूरी नांदेड येथे उपचारादरम्यान मृत्यू झाला. आत्तापर्यंत जिल्ह्यात कोरोनामुळे बाधित मृत व्यक्तींची संख्या 116 एवढी झाली आहे.  

  

आज बरे झालेल्या 92 कोरोना बाधितांमध्ये शासकिय वैद्यकिय महाविद्यालय विष्णूपूरी नांदेड येथील 13, नायगाव कोविड केअर सेंटर येथील  15, जिल्हा रुग्णालय कोविड हॉस्पीटल 4, देगलूर कोविड केअर सेंटर 10, खाजगी रुग्णायातील 11, बिलोली कोविड सेंटर 4, गोकुंदा कोविड केअर सेंटर 5, धर्माबाद कोविड केअर सेंटर 10, पंजाब भवन कोविड केअर सेंटर येथील 20 असे एकूण 92 कोरोना बाधित व्यक्तींना औषधोपचारानंतर सुट्टी देण्यात आली आहे.  

 आरटीपीसीआर तपासणीद्वारे नवीन बाधितांमध्ये नांदेड मनपाक्षेत्र 28, अर्धापूर तालुक्यात 2, बिलोली तालुक्यात 1, भोकर तालुक्यात 4, कंधार तालुक्यात 1, नायगाव तालुक्यात 1, लोहा तालुक्यात 1, हिंगोली 1, यवतमाळ 1, नांदेड ग्रामीण 2, देगलूर तालुक्यात 14, हदगाव तालुक्यात 8, किनवट तालुक्यात 1, मुखेड तालुक्यात 22, उमरी तालुक्यात 1, परभणी 3, लातूर 1 असे एकूण 92 बाधित आढळले.

 अँटिजेन तपासणीद्वारे नांदेड मनपा क्षेत्र 2, अर्धापूर तालुक्यात 4, बिलोली तालुक्यात 3, धर्माबाद तालुक्यात 1, देगलूर तालुक्यात 3, किनवट तालुक्यात 2, नायगाव तालुक्यात 4, माहूर तालुक्यात 3 असे एकूण 22 बाधित आढळले.

 जिल्ह्यात 1 हजार 608 बाधितांवर औषधोपचार सुरु आहेत. यात शासकीय वैद्यकीय महाविद्यालय विष्णुपुरी नांदेड येथे 161, पंजाब भवन कोविड केअर सेंटर येथे 626, जिल्हा रुग्णालय कोविड हॉस्पिटल नांदेड येथे 53, नायगाव कोविड केअर सेंटर येथे 83, बिलोली कोविड केअर सेंटर येथे 38, मुखेड कोविड केअर सेंटर येथे 131, देगलूर कोविड केअर सेंटर येथे 95, लोहा कोविड केअर सेंटर येथे 13, हदगाव कोविड केअर सेंटर 64, भोकर कोविड केअर सेंटर 8, उमरी कोविड केअर सेंटर 14, कंधार कोविड केअर सेंटर येथे 17, धर्माबाद कोविड केअर सेंटर येथे 21, किनवट कोविड केअर सेंटर येथे 31, अर्धापूर कोविड केअर सेंटर येथे 20, मुदखेड कोविड केअर सेटर 17, हिमायतनगर कोविड केअर सेंटर 20,  माहूर कोविड केअर सेंटर येथे 18, आयुर्वेदिक शासकिय रुग्णालय कोविड रुग्णालय सेंटर येथे 28, बारड कोविड केअर सेंटर 5, खाजगी रुग्णालयात 137, औरंगाबाद येथे संदर्भित 5, निजामाबाद येथे 1 बाधित, हैदराबाद येथे 1 तर मुंबई येथे 1 बाधित संदर्भित झाले आहेत. 

 जिल्ह्याची कोरोना संशयित व कोविड बाधितांची संक्षिप्त माहिती

 सर्वेक्षण- 1 लाख 49 हजार 861,

घेतलेले स्वॅब- 20 हजार 754,

निगेटिव्ह स्वॅब- 15 हजार 847,

आज पॉझिटिव्ह स्वॅब संख्या- 114,

एकुण पॉझिटिव्ह बाधित व्यक्ती- 3 हजार 156,

आज स्वॅब तपासणी अनिर्णीत संख्या- 17,

आज स्वॅब नाकारण्यात आलेली संख्या- 27,

मृत्यू संख्या- 116,

रुग्णालयातून सुट्टी दिलेली संख्या- 1 हजार 415,

रुग्णालयात उपचार घेत असलेले बाधित व्यक्ती- 1 हजार 608,

आज प्रलंबित स्वॅब तपासणी संख्या- 326, 

आज रोजी गंभीर प्रकृती असलेले बाधित- 85

 प्रलंबित स्वॅब तपासणीसाठी पाठविण्यात आलेले अहवाल उद्या सायंकाळ पर्यंत प्राप्त होतील. कोरोना संदर्भात जनतेने अफवांवर विश्वास ठेवू नये तसेच मनात कुठल्याही प्रकारची भिती न बाळगता अत्यावश्यक कामाशिवाय घराबाहेर पडू नये. आपल्या मोबाईलवर आरोग्य सेतू ॲप डाऊनलोड करुन घ्यावा जेणे करुन आपल्या सभोवती कोरोना बाधित रुग्ण असल्यास आपणास हे ॲप सतर्क करेल, असे आवाहन जिल्हा शल्यचिकित्सक डॉ. निळकंठ भोसीकर यांनी केले आहे.   

00000

जेंव्हा कोविड केअर सेंटरमध्ये

“माणसाने माणसाशी माणसासम...” प्रार्थना निनादते !

 

नांदेड (जिमाका) दि. 8 :- नांदेड आणि लातूर जिल्ह्याच्या काठावर असलेला मुखेड तालुक्यातील शंभर बेडचे कोविड केअर सेंटर. रोज नित्य-नियमाप्रमाणे सकाळी इथे उपचार घेणारे बाधित उठतात. सकाळच्या प्रातक्रिया आटोपून ही मंडळी एका वेगळ्या गोष्टीसाठी अतुरतेने वाट पाहत असतात. मुखेड उपजिल्हा रुग्णालयाचे वैद्यकिय अधिक्षक डॉ. आनंद पाटील यांच्या नेतृत्त्वाखाली डॉ. संतोष टांकसाळे व त्यांची टिम कार्यरत असलेल्या या सेंटरचे समुपदेशक शौकतअली मदार बेग बरोबर 9 वाजता या सर्वांमध्ये दाखल होतात. सुरुवातीचा एक तास योगा आणि प्रार्थनेच्या रुपात तो सुरु करतो. दिर्घ श्वासाच्या काही क्रिया तो घेतो. एरवी योगाच्या साध्या छोट्या क्रियेपासून जे बहुसंख्य लोक दूर असतात त्यांच्यासाठी थोडे बहुत कुतुहल जागे होते. जे थोडे बहुत शिकलेले आहेत ते लोकं काही प्रश्न उपस्थित करतात. अशांना समजवत व्यायामाचा हा तास पूर्ण होतो. यात सारे बाधित ज्याची वाट पाहत असतात ती प्रार्थना जवळ येते. या बाधितात आठव्या वर्गात शिकत असलेली कु. संजीवनी काशिनाथ बोडके ही  मुलगी प्रार्थनेला सुरुवात करते. नकळत सगळ्यांचे हात जोडले जातात, डोळ मिटतात आणि शब्द सुरु होतात “हीच अमुची प्रार्थना अन् हेच अमुचे मागणे, माणसाने माणसाशी माणसासम वागणे..!”

प्रार्थना संपल्यावर समुपदेशात प्रश्न-उत्तराच्या माध्यमातून वेगळा तास सुरु होतो. असंख्य खूप साधेसाधे प्रश्न इथे दाखल झालेले बाधित बेगला विचारत राहतात. “माझं काही दूखत नसतांना मला इथे कशाला आणलं आहे..., घरी गेल्यानंतर मला असेच राहवे लागेल का..., मला भावासोबत जवळ राहून बोलता येईल का..., पुन्हा लोकात मला मिसळता येईल का...असे कितीतरी प्रश्न” या सर्व प्रश्नांचे निरसन करुन बाधितांच्या चेहऱ्यांवर हसू आणण्यासाठी समुपदेशक बेग पुढच्या तयारी लागतो. त्याला तिथल्या व्यवस्थापनाबाबत जेंव्हा आपण विचारतो तेंव्हा तो सांगून जातो “साहेब या आजाराला ग्रामीण भागात वेळेवर अषोधोपचार सुरु करण्यासमवेत समुपदेशनच खूप लाख मोलाचे आहे.” मागील पाच महिन्यांपासून बेग हा दररोज नित्यनियमाने या कोविड बाधितांच्या वार्डात जाऊन समुपदेशनाचे काम करीत आहेत. याबाबत काळजी घ्यायची कशी हा प्रश्न त्याला जेंव्हा आपण विचारतो तेंव्हा तो सांगतो “हाताला सतत सॅनिटाइज करणे, पाच फुट अंतर ठेवून बोलणे, सतत मास्क लाऊन राहणे एवढी काळजी मी जबाबदारीने घेतो. त्यांच्या शंकांचे समाधान ही माझ्यासाठी मोठी ऊर्जा आहे. पॉझिटिव्ह सोच ठेवली की सारे काही सोपे होते.” हे सांगायलाही तो विसरत नाही. 

 “देगलूर विभागात असलेल्या ग्रामीण भागात अजूनही लोक कोविड-19 ला गंभीरतेने घेत नाही. खेड्यांमध्ये हे प्रमाण अधिक आहे. इथले बहुसंख्य लोक मास्क खिशात ठेवतील पण वापरणार नाहीत. या लोकांनी आता स्वत:हूनच वर्तनात बदल आणून योग्यती सुरक्षा घेतली पाहिजे” अशी अपेक्षा इथले उपविभागीय दंडाधिकारी शक्ती कदम यांनी सांगितले. ग्रामीण भागाच्या तुलनेत शासनाला जे काही शक्य होत आहे त्यापरिने आम्ही वैद्यकिय सेवा सुविधा इथे उपलब्ध केल्या आहेत. वेळप्रसंग पडल्यास आव्हानात्मक स्थितीतही आम्ही पूर्ण क्षमतेने कार्य करु, असा विश्वास त्यांनी दिला. मुखेडमध्ये सद्यस्थितीत 100 बेडचे कोरोना केअर सेंटर, ऑक्सीजनची सुविधा असलेले 40 बेड, आयसीयूमध्ये 10 बेड उपलब्ध आहेत. शिवाय आयटीआयची इमारत आम्ही ताब्यात घेतली असून यात 500 बेडची क्षमता आम्ही तयार करत असल्याचे त्यांनी सांगितले.  

******

 वृत्त क्र. 741           

ताळेबंदी (लॉकडाऊन) कालावधीत जिल्‍हयातील

सायबर कॅफे शनिवार, रविवार चालू ठेवण्यास मुभा 

नांदेड (जिमाका) दि. 8  :- इयत्‍ता दहावी व बारावीचा निकाल नुकताच जाहीर झाला असून विद्यार्थ्‍यांना पुढील शिक्षणासाठी ऑनलाईन प्रक्रियेद्वारे प्रवेश प्रक्रियेतील आपली माहिती देणे आवश्यक आहे. या प्रक्रियेत विद्यार्थ्यांना आपल्या गुणवत्तेनुसार पुढील आवडीच्या क्षेत्रात प्रवेश निश्चित करता यावेत यासाठी त्यांना सायबर, इंटनरनेट कॅफेवर येऊन ऑनलाईन अर्ज केल्याशिवाय गत्यंतर राहिलेले नाही. विद्यार्थ्‍यांची गैरसोय होऊ नये यासाठी सायबर कॅफे चालू असणे गरजेचे असल्‍याने जिल्हादंडाधिकारी डॉ. विपीन इटनकर यांनी नांदेड जिल्‍हयातील सर्व सायबर कॅफे यांना शनिवारी व रविवारी सुद्धा सकाळी 7 ते सायं 5 वाजेपर्यंत अटी व शर्तीच्‍या अधीन राहून चालू ठेवण्यास मुभा देण्यात आली आहे.    

जिल्हादंडाधिकारी कार्यालयाचे संदर्भ क्र. 1 अन्‍वये नमूद आदेशान्‍वये नियमावलीसह दिनांक 31 जुलै 2020 पर्यंत नांदेड जिल्‍हयात नागरी, ग्रामीण व औद्योगिक क्षेत्रासाठी विविध अटी व शर्तीच्‍या अधिन राहून आस्‍थापना व दुकाने सकाळी 7 ते सायंकाळी 5 पर्यत चालू ठेवण्‍यास मुभा देण्‍यात आली होती.

 मा.मुख्‍य सचिव, महाराष्‍ट्र शासन यांचे आदेश दिनांक 29 जुलै 2020 नुसार राज्‍यात मिशन बिगीन अगेन अंतर्गत काही निर्बध सुकर करण्‍यासह नियम व अटीच्‍या अधिन ताळेबंदीचा कालावधी दिनांक 31 ऑगस्ट 2020 पर्यंत वाढवून मार्गदर्शक सूचना, निर्देश निर्गमित केले आहे. त्‍यानुसार या कार्यालयाचे संदर्भात नमूद आदेश दिनांक 30 जुलै 2020 अन्‍वये  संदर्भात नमूद या कार्यालयाचे आदेश दिनांक 19 जुलै 2020 मधील अटी व शर्ती जशास तसे लागू करून संपूर्ण नांदेड जिल्‍हयात दिनांक 31 जुलै 2020 नंतर ताळेबंदीचा कालावधी पुढील आदेशापर्यंत वाढविण्‍यात आला आहे.

 इयत्‍ता दहावी व बारावीचा निकाल जाहीर झाला असून विद्यार्थ्‍यांना पुढील शिक्षणासाठी ऑनलाईन प्रक्रीयेव्‍दारे प्रवेश घेण्‍यासाठी प्रवेश प्रक्रीया सुरु झालेली आहे. तथापि जिल्हादंडाधिकारी कार्यालयाचे संदर्भीय आदेशान्‍वये नांदेड जिल्‍हयात सोमवार ते शुक्रवार विहीत वेळेत दिलेल्‍या अटी व शर्ती नुसारच दुकाने व खाजगी आस्‍थापना सुरु ठेवण्‍यास मुभा आहे. परंतू विद्यार्थ्‍यांची गैरसोय होऊ नये यासाठी सायबर कॅफे चालू असणे गरजेचे असल्‍याने नांदेड जिल्‍हयातील सर्व सायबर कॅफे यांना शनिवार व रविवारी सुध्‍दा चालू ठेवण्‍यासाठी परवानगी देणे आवश्‍यक होते, असेही आदेशात नमूद केले आहे.

0000

सुधारीत वृत्त

गणेशोत्सवात स्वयंशिस्तीला देवू अधिक प्राधान्य 

- जिल्हाधिकारी डॉ. विपीन इटनकर   

नांदेड (जिमाका) दि. 8 :-  आध्यात्मिक उत्साहाला प्रतिबिंबीत करणारा उत्सव म्हणून गणेशोत्वाकडे आपण पाहत जरी असलो, तरी यावर्षी कोविड -19 या संसर्गजन्य प्रादुर्भावामुळे यावर्षी प्रत्येक नागरिकांनी स्वयंशिस्तीला अधिक प्राधान्य देण्यावर भर द्यावा, असे आवाहन जिल्हाधिकारी डॉ. विपीन इटनकर यांनी केले आहे. शुक्रवार 7 ऑगस्ट रोजी जिल्हाधिकारी कार्यालयात त्यांच्या अध्यक्षतेखाली सार्वजनिक गणेश मंडळ पुर्वनियोजन आढावा बैठक संपन्न झाली. या बैठकीस जिल्हा पोलीस अधीक्षक विजयकुमार मगर व संबंधित विभागांचे प्रमुख उपस्थित होते.  

 जिल्ह्यातील कोरोनाची परिस्थिती सुधारण्यासाठी प्रत्येक नागरिकांचे जबाबदार वर्तन अपेक्षित आहे. सार्वजनिक पातळीवर लोकसहभागातून लोकांच्या इच्छेनुसार जी कांही वर्गणी गोळा होईल त्यातील वर्गणीचा कांही भाग हा वैद्यकीय उपकरणांसाठी रुग्णालयांना दिल्यास ती खऱ्या अर्थाने विवेकाचे प्रतिक ठरेल असे जिल्हाधिकारी डॉ. विपीन यांनी सांगितले आहे. जिल्ह्यातील गणेश मंडळे परिस्थितीचे गांभीर्य लक्षात घेत साधेपणावर भर देवून शासनाने आखून दिलेल्या नियम व अटीच्या चौकटीत हा उत्सव साजरा करतील असा विश्वासही  त्यांनी व्यक्त केला. महाराष्ट्र शासनाच्या गृह विभागाचे प्रधान सचिव अमिताभ गुप्ता यांनी या गणेशोत्वासाठी खालील अटी व शर्ती निश्चित केल्या आहेत.

 सार्वजनिक गणेश मंडळे

·      सार्वजनिक गणेश मंडळांना प्रतीवर्षी प्रमाणे स्‍थानिक प्रशासनाची पुर्व परवानगी घेणे आवश्‍यक राहिल. (महानगरपालिका, पोलिस प्रशासन)

·      मोठे मंडप टाळुन मर्यादित स्‍वरुपाचे मंडप उभारावेत. श्री गणेशाची मूर्ती 4 फुट उंचीच्‍या मर्यादेतच असावी.

·      सजावट साधी असावी त्‍यात भपकेबाजी नसावी. तसेच बंदी असलेले प्‍लास्‍टीक व थर्माकोलचा वापर करु नये

·      आरोग्‍य विषयक व सामाजिक हिताच्‍या जाहिराती प्रदर्शित करण्‍यास पसंती द्यावी.

·      उत्‍सवाकरीता वर्गणी / देणगी स्‍वच्‍छेने दिल्‍यास स्विकार करावा.

·      सांस्‍कृतीक कार्यक्रमाऐवजी आरोग्‍यविषयक उपक्रम उदा. रक्‍तदान शिबिरे, कोरोना, डेंग्‍यु, मलेरिया इ. आजार व त्‍यांचे प्रतिबंधात्‍मक उपाय तसेच स्‍वच्‍छतेबाबत जनजागृती करण्‍यात यावी.

·      आरती, भजन, किर्तन वा अन्‍य धार्मिक कार्यक्रम करताना गर्दी होणार नाही याची दक्षता घ्‍यावी. तसेच ध्‍वनी प्रदुषणासंबंधिचे नियमांचे पालन करावे.

·      श्री गणेशाच्‍या दर्शनाची सुविधा ऑनलाईन, केबलनेटवर्क, वेबसाईट व फेसबुक इ. व्‍दारे उपलब्‍ध करुन देण्‍यावर भर दयावा.

·      मंडपामध्‍ये निर्जंतुकीकरणाची तसेच थर्मल स्‍क्रीनिंगची पर्याप्‍त व्‍यवस्‍था करण्‍यात यावी.

·      दर्शनार्थी भाविक मास्‍क, सॅनिटायझर वापरतील तसेच पुरेसे शारीरिक अंतर राखतील यावर विशेष लक्ष दयावे.

·      श्रीं चे आगमन व विसर्जनाच्‍या मिरवणुका काढण्‍यास शासनाची परवानगी नाही.

·      विसर्जन स्‍थळी होणारी आरती मंडपातच करुन विसर्जन स्‍थळी कमीत कमी वेळ थांबावे. शक्‍य झाल्‍यास यावर्षी श्रींच्‍या मूर्तींचे विसर्जन न करता पुढील वर्षी करावे. लहान मुले व ज्‍येष्‍ठ नागरीकांनी विसर्जन स्‍थळी जाणे टाळावे.

·      मंडळांनी प्रतिवर्षी वापरता येतील अशा धातुच्‍या मूर्ती वापरण्‍यावर भर दयावा.

·      सांस्‍कृतिक कार्यक्रमांना गर्दी होते त्‍यामुळे कोव्‍हीड-19 साथरोगाचा प्रसार होण्‍यास मदत होते त्‍यामुळे असे कार्यक्रम टाळून वाचणा-या निधीतुन कोव्‍हीड-19 प्रति‍बंधासाठी (व्‍हेंटिलेटर, ऑक्सिजन सिलेंडर, बेड्स) इ. वस्‍तु स्‍वरुपात महानगरपालिका / शासकीय रुग्‍णालयास दयावे.

·      मंडळांनी त्‍यांचे परिसरातील खुल्‍या जागांवर मियावाकी पदधतीने घनवन निर्मीती करण्‍यासाठी वृक्षारोपण करावे.

·      चालु वर्षी कोरोनाचे संकट लक्षात घेता सार्वजनिक मंडळांनी यावर्षी उत्‍सव शक्‍यतो टाळावा अथवा एक गाव एक गणपती किंवा चार पाच शेजारच्‍या कॉलनी/नगरे यांनी मिळुन एके ठिकाणी गणेश उत्‍सव साजरा करावा.

·      मूर्ती विसर्जनाकरीता महानगरपालिकेतर्फे विविध ठिकाणी कृत्रिम तलाव निर्माण करण्‍यात येतील त्‍यांचा वापर करावा.

घरगुती गणेशोत्‍सव

·      घरगुती श्री गणेशाची मूर्ती  2 फुट उंचीच्‍या मर्यादेतच असावी.

·      शक्‍यतो धातु अथवा संगमरवर अशा मुर्तींचे पुजन करावे.

·      मूर्ती शाडु मातीची पर्यावरण पुरक असल्‍यास तिचे विसर्जन घरच्‍या घरी करावे.

·      ते शक्‍य नसल्‍यास महानगरपालिकेतर्फे झोन निहाय निर्माण केल्‍या जाणा-या ‘मूर्ती स्विकार केंद्रांवर’ मूर्ती नेऊन देण्‍यात यावी.  त्‍यांचे विसर्जन महानगरपालिका व सेवाभावी संस्‍थेमार्फत करण्‍यात येईल.

·      मूर्ती खरेदी करीता होणा-या गर्दी मुळे कोव्‍हीड-19 साथरोगाचा प्रसार होण्‍यास मदत होते हे लक्षात घेता योग्‍य शारिरीक अंतर राखुन खरेदी करावी.

·      या वर्षी हरीत गणेश संकल्पनेवर भर द्यावा. घरच्‍या घरी पर्यावरण पुरक मूर्ती बनवून पूजन करावे. यातुन  पालकांच्‍या व मुलांच्‍या  कलात्‍मकतेला देखिल वाव मिळेल.

·      अशा प्रकारे ‘मूर्ती स्विकार केंद्रात’ मूर्ती आणून देणा-या नागरीकांना जिल्‍हाधिकारी, पोलीस अधिक्षक व महानगरपालिका आयुक्‍त यांच्‍या स्‍वाक्षरीने ‘पर्यावरण मित्र’ प्रमाणपत्र दिले जाईल.

·      विसर्जन स्‍थळी होणारी आरती घरीच करुन विसर्जन स्‍थळी कमीत कमी वेळ थांबावे.

·      मूर्ती विसर्जनाकरीता महानगरपालिकेतर्फे विविध ठिकाणी कृत्रिम तलाव निर्माण करण्‍यात येतील त्‍यांचा वापर करावा.

000000

 

विशेष वृत्त क्र. 738

                                             सोयाबिन,मुग,उडीदच शेतकऱ्यांना देईल संजिवनी

खरीप पिकांचे उत्पन्न विक्रमी मार्गावर

नांदेड (जिमाका) दि. 7  :- गत दहा वर्षात खरीप पिकांसाठी वेळेवर आवश्यक असलेला असा मोजका पाऊस कधी झाला नाही. जिल्ह्यातील मुग, उडीद, सोयाबिन, कापूस आदि खरिपातील पिकांना वेळेवर पावसाचे पाणी मिळाल्यामुळे पिके शेतात डौलाने डुलत आहेत. निसर्गाने अजून दोन आठवडे साथ दिल्यास मुग, सोयाबिन आणि उडीद या पिकांचे विक्रमी उत्पादन जिल्हाभरात होईल, अशा विश्वास जिल्हा अधिक्षक कृषि अधिकारी रविशंकर चलवदे यांनी व्यक्त केला. या पिकांसाठी आठवडाभरात दोन पाऊस झाले तरी पुरेसे ठरतील असे त्यांनी स्पष्ट केले.

 

जिल्ह्यातील 16 तालुक्यात एकुण 7 लाख 42 हजार 861 हेक्टर सर्वसाधारण क्षेत्र असून या क्षेत्रापेक्षा अधिक म्हणजेच 7 लाख 55 हजार 18 हेक्टर क्षेत्रावर यावर्षी खरीप हंगामात पेरणी झाली आहे. पेरणीची ही टक्केवारी 101.64 एवढी झाली. जिल्ह्यात सर्वात जास्त देगलूर तालुक्यात सर्वसाधारण खरीप पिकाच्या क्षेत्रापेक्षा 15.39 टक्क्यांनी अधिक प्रमाणात पेरणी झाली आहे. या खरीप हंगामात जिल्ह्यात 920 हेक्टर क्षेत्रावर भाताची पेरणी, ज्वारी 31 हजार 481, बाजरी 21, मका 691 असे एकुण तृणधान्य 33 हजार 113 हेक्टरवर लागवडी खाली आहे. तर तूर 72 हजार 510, मुग 25 हजार 859, उडीद पिकाची 26 हजार 942 क्षेत्रावर पेरणी झाली आहे. एकुण कडधान्य हे 1 लाख 25 हजार 311 हेक्टर क्षेत्रावर झाले आहे. याची वार्षिक सरासरी 107.61 टक्के एवढी आहे. तीळ 455 हेक्टर, कारळ 282 हेक्टर, सोयाबिन 3 लाख 81 हजार 373 हेक्टर, इतर गळीत धान्य 74 हेक्टर क्षेत्रावर पेरणीखाली आहे.

 

कापसात मुग, उडिदाचे अंतरपिक झाले फायदाचे - ज्ञानेश्वर चपाट

“ज्या सोयाबिनने सुरुवातीला काही शेतकऱ्यांच्या डोळ्यात पाणी आणले तेच सोयाबिन आता कोरडवाहू शेतकऱ्यांच्या मदतीला धावून आले आहे. निसर्गाची वेळेवर कृपा आजवर खरीप पिकांना मिळाल्यामुळे सर्वच पिके आता दाटून उभी आहेत. माझ्यासारख्या काही शेतकऱ्यांनी कापसात अंतरपिक म्हणून 70 दिवसात येणारे मुग व उडिदाचे पिक घेऊन बघितले आहे. या अंतरपिकामुळे एरवी कापसात वाढणाऱ्या तणाला चांगला अटकाव बसला असून निंदणीचा खर्च वाचण्याबरोबर उडीद, मुगाच्या पिकातून दोन अधिकचे पैसे आता आमच्या हाती पडतील” असा विश्वास शेतकरी चपाट यांनी बोलून दाखविला.

 

बिबिएफ पद्धतीच्या पेरणीने सोयाबिनला तारले - रंगनाथ लोकेवार

“सोयाबिन पिकासंदर्भात पेरणीच्या काळात काही मोजक्या शेतकऱ्यांना वेगळा अनुभव जरी आला असला तरी आमच्या या ढोकी शिवारात इथल्या पेरणीच्या पद्धतीमुळे आम्हाला तारल्याची भावना” ढोकीचे शेतकरी रंगनाथ लोकेवार यांनी बोलून दाखविली. बिबिएफ (रुंद सरीवरंबा) पद्धतीने सोयाबिनची लागवड करण्याचा सल्ला आम्हाला आमचे कृषि अधिकारी प्रकाश पाटील यांनी दिला. त्यानुसार ही लागवड झाल्यामुळे सोयाबिनचे हे पिक हेक्टरी 25 क्विंटल पर्यंत उत्पन्न देईल, असेही त्यांनी स्पष्ट केले. मागील अनेक वर्षात खरीपाचे असे पिक पाहिल्याचे आठवत नाही, असे त्यांनी सांगितले.   

000000

108 व्यक्तींना आज कोरोनातून बरे झाल्याने रुग्णालयातून सुट्टी

जिल्ह्यात 182 बाधितांची भर तर पाच जणांचा मृत्यू 

 नांदेड (जिमाका) दि. 7 :-  जिल्ह्यात आज  7 ऑगस्ट रोजी सायं. 6  वाजेपर्यंतच्या अहवालानुसार 108  व्यक्तींमध्ये सुधारणा झाल्यामुळे त्यांना रुग्णालयातून सुट्टी देण्यात आली आहे. याचबरोबर 182 व्यक्तींचे अहवाल बाधित आले आहेत. आजच्या एकूण  1 हजार 459 अहवालापैकी 1 हजार 234 अहवाल निगेटिव्ह आले.  जिल्ह्यात एकुण  बाधितांची संख्या आता 3 हजार 42 एवढी झाली असून यातील 1 हजार 323 एवढे बाधित बरे झाले आहेत. एकुण 1 हजार 590 बाधितांवर औषधोपचार सुरु असून त्यातील 85 बाधितांची प्रकृती गंभीर स्वरुपाची आहे.  

 गुरुवार 6 ऑगस्ट रोजी हदगाव तालुक्यातील तामसा येथील 75 वर्षाचा एक पुरुष, भावसार चौक नांदेड येथील 60 वर्षाचा एक पुरुष, कंधार तालुक्यातील कांझी मोहल्ला येथील 42 वर्षाची महिला, शासकिय वैद्यकिय महाविद्यालय विष्णुपूरी नांदेड येथे तर मोमीन गल्ली मुखेड येथील 86 वर्षाचा एक पुरुष मुखेड कोविड केअर सेंटर येथे,  एसव्हीएम कॉलनी 52 वर्षाची एक महिला गोकुंदा कोविड केअर सेंटर येथे  उपचारादरम्यान मृत्यू झाला. आत्तापर्यंत जिल्ह्यात कोरोनामुळे बाधित मृत व्यक्तींची संख्या 114 एवढी झाली आहे.   

आज बरे झालेल्या 108 कोरोना बाधितांमध्ये शासकिय वैद्यकिय महाविद्यालय विष्णूपूरी नांदेड येथील 6, हदगाव कोविड केअर सेंटर 14, जिल्हा रुग्णालय कोविड हॉस्पीटल 6, देगलूर कोविड केअर सेंटर 11, मुंबई येथे संदर्भित 1, खाजगी रुग्णालय 25, मुखेड कोविड सेंटर 25, गोकुंदा कोविड केअर सेंटर 2, अर्धापूर कोविड केअर सेंटर 1, पंजाब भवन कोविड केअर सेंटर येथील 15, औरंगाबाद येथील संदर्भित 2 असे एकूण 108 कोरोना बाधित व्यक्तींना औषधोपचारानंतर सुट्टी देण्यात आली आहे.   

आरटीपीसीआर तपासणीद्वारे नवीन बाधितांमध्ये नांदेड मनपाक्षेत्र 19, अर्धापूर तालुक्यात 5,बिलोली तालुक्यात 1, धर्माबाद तालुक्यात 1, कंधार तालुक्यात 3, माहूर तालुक्यात 3, नायगाव तालुक्यात 1, लोहा तालुक्यात 7, हिंगोली 4, नांदेड ग्रामीण 4, भोकर तालुक्यात 1, देगलूर तालुक्यात 3, हदगाव तालुक्यात 7, किनवट तालुक्यात 6, मुखेड तालुक्यात 13, उमरी तालुक्यात 1, परभणी 1, असे एकूण 80 बाधित आढळले. 

अँटिजेन तपासणीद्वारे नांदेड मनपा क्षेत्र 38, अर्धापूर तालुक्यात 5, बारड 3, बिलोली तालुक्यात  1, धर्माबाद तालुक्यात 2, कंधार तालुक्यात 6 , मुखेड तालुक्यात 3, हिंगोली 1, नांदेड ग्रामीण 6, मुदखेड तालुक्यात 5, भोकर तालुक्यात 1, देगलूर तालुक्यात 6, हदगाव तालुक्यात 1, लोहा तालुक्यात 3, नायगाव तालुक्यात 21 असे एकूण 102 बाधित आढळले. 

जिल्ह्यात 1 हजार 590 बाधितांवर औषधोपचार सुरु आहेत. यात शासकीय वैद्यकीय महाविद्यालय विष्णुपुरी नांदेड येथे 152, पंजाब भवन कोविड केअर सेंटर येथे 596, जिल्हा रुग्णालय कोविड हॉस्पिटल नांदेड येथे 40, नायगाव कोविड केअर सेंटर येथे 98, बिलोली कोविड केअर सेंटर येथे 36, मुखेड कोविड केअर सेंटर येथे 121, देगलूर कोविड केअर सेंटर येथे 93, लोहा कोविड केअर सेंटर येथे 15, हदगाव कोविड केअर सेंटर 60, भोकर कोविड केअर सेंटर 8, उमरी कोविड केअर सेंटर 14, कंधार कोविड केअर सेंटर येथे 17, धर्माबाद कोविड केअर सेंटर येथे 30, किनवट कोविड केअर सेंटर येथे 35, अर्धापूर कोविड केअर सेंटर येथे 22, मुदखेड कोविड केअर सेटर 17, हिमायतनगर कोविड केअर सेंटर 20,  माहूर कोविड केअर सेंटर येथे 10, आयुर्वेदिक शासकिय रुग्णालय कोविड रुग्णालय सेंटर येथे 28, बारड कोविड केअर सेंटर 5, महसूल भवन कोविड केअर सेंटर 47, खाजगी रुग्णालयात 118, औरंगाबाद येथे संदर्भित 5, निजामाबाद येथे 1 बाधित, हैदराबाद येथे 1 तर मुंबई येथे 1 बाधित संदर्भित झाले आहेत.  

जिल्ह्याची कोरोना संशयित व कोविड बाधितांची संक्षिप्त माहिती

 

सर्वेक्षण- 1 लाख 49 हजार 753,

घेतलेले स्वॅब- 20 हजार 76,

निगेटिव्ह स्वॅब- 15 हजार 554,

आज पॉझिटिव्ह स्वॅब संख्या- 182,

एकुण पॉझिटिव्ह बाधित व्यक्ती- 3 हजार 42,

आज स्वॅब तपासणी अनिर्णीत संख्या- 18,

आज स्वॅब नाकारण्यात आलेली संख्या- 14,

मृत्यू संख्या- 114,

रुग्णालयातून सुट्टी दिलेली संख्या- 1 हजार 323,

रुग्णालयात उपचार घेत असलेले बाधित व्यक्ती- 1 हजार 590,

आज प्रलंबित स्वॅब तपासणी संख्या- 100. 

आज रोजी गंभीर प्रकृती असलेले बाधित- 85

 प्रलंबित स्वॅब तपासणीसाठी पाठविण्यात आलेले अहवाल उद्या सायंकाळ पर्यंत प्राप्त होतील. कोरोना संदर्भात जनतेने अफवांवर विश्वास ठेवू नये तसेच मनात कुठल्याही प्रकारची भिती न बाळगता अत्यावश्यक कामाशिवाय घराबाहेर पडू नये. आपल्या मोबाईलवर आरोग्य सेतू ॲप डाऊनलोड करुन घ्यावा जेणे करुन आपल्या सभोवती कोरोना बाधित रुग्ण असल्यास आपणास हे ॲप सतर्क करेल, असे आवाहन जिल्हा शल्यचिकित्सक डॉ. निळकंठ भोसीकर यांनी केले आहे.   

00000