डिजीटल मिडीया ठरेल चौथ्या स्तंभाचे सामर्थ्य - सुनिल ढेपे
एमजीएम पत्रकारिता महाविद्यालयात दर्पण दिनानिमित्त कार्यशाळा

नांदेड दि. 7 :- येणाऱ्या काळामध्ये वृत्तपत्राचे महत्व अनन्य साधारण होणार असल्याने वृत्तपत्रांसाठी डिजीटल मिडीया चौथ्या स्तंभाचे सामर्थ्य असणार आहे. त्यामुळे वृत्तपत्रांनी डिजीटल मिडीया सारख्या साधणांकडे वळावे, असे प्रतिपादन पुणे येथील ज्येष्ठ पत्रकार सुनिल ढेपे यांनी केले.

एमजीएम पत्रकारिता महाविद्यालय आणि जिल्हा माहिती कार्यालय नांदेड यांच्या संयुक्त विद्यमाने दर्पण दिनानिमित्त एमजीएम येथे आज “वर्तमानकाळातील पत्रकारितेसमोरील आव्हाने आणि डिजीटल मिडीयाचा प्रभाव” या विषयावर एकदिवशीय कार्यशाळा आयोजित केली होती. यावेळी प्रमुख व्याख्याते म्हणून श्री. ढेपे बोलत होते.

यावेळी कार्यक्रमाच्या अध्यक्षस्थानी प्रा. डॉ. गोविंद हंबर्डे तर प्रमुख पाहूणे म्हणून दै.लोकपत्रचे कार्यकारी संपादक रविंद्र तहकिक, दै.लोकमतचे जिल्हा प्रतिनिधी विशाल सोनटक्के, ज्येष्ठ पत्रकार पंढरीनाथ बोकारे, पत्रकार बजरंग शुक्ला, गोपाळ देशपांडे, पत्रकारिता महाविद्यालयाचे प्राचार्य डॉ.गणेश जोशी, जिल्हा माहिती अधिकारी अनिल आलुरकर यांची प्रमुख उपस्थिती होती.

यावेळी पुढे बोलतांना ढेपे म्हणाले की, डिजीटल मिडीयाच्या माध्यमातून वृत्तपत्र क्षेत्रामध्ये मोठ्या प्रमाणात बदल होत आहे. छापिल वृत्तपत्रांची जागा ई-पेपरने बऱ्यापैकी घेतलेली आहे. सन 2008 पर्यंत प्रिंट मिडीयाचा एक वेगळा दबाव समाज मनावरती होता. सद्य स्थितीमध्ये वाढत्या डिजीटल मिडीयाच्या साधणांमुळे वृत्तपत्र क्षेत्राला अनन्य साधारण महत्व येणार आहे. त्यामुळे वृत्तपत्रांनी स्वतःचे ॲप विकसीत करावे. प्रिंट मिडीयापेक्षा अधिक वाचक ई-पेपरला जोडला गेलेला आहे. ॲपच्या माध्यमातून मोठ्या प्रमाणात वृत्तपत्रांना उत्पन्न मिळते. वृत्तपत्र क्षेत्रात येऊ शकणाऱ्या विद्यार्थ्यांना बातमी टाईप करता येणे, तिला सोशल मिडीयावर हाताळता येणे या सर्व बाबी येणे आवश्यक आहे. त्यामुळे विद्यार्थ्यांनी डिजीटल मिडीयाचे ज्ञान मिळविणे गरजेचे आहे, असेही ते म्हणाले.

तर यावेळी दै. लोकमतचे पत्रकार श्री. सोनटक्के म्हणाले की, लेखणीमध्ये ताकद असेल तर प्रभावीपणे पत्रकारीता करता येऊ शकते. पत्रकारांनी समाज सेवेचे वृत्त अंगिकारुन या क्षेत्रात यावे. बाळशास्त्री जांभेकर, डॉ. बाबासाहेब आंबेडकर यांनी ज्या पध्दतीने पत्रकारिता केली तशी ध्येयवादी पत्रकारिता करावी अशी अपेक्षा देखील त्यांनी व्यक्त केली.

दै.लोकपत्रचे कार्यकारी संपादक रविंद्र तहकिक म्हणाले की, आद्य पत्रकार महर्षी बाळशास्त्री जांभेकर, लोकमान्य टिळक, प्र.के.अत्रे, बाळासाहेब ठाकरे, आनंतराव भालेराव यांची ध्येयनिष्ठ असलेली पत्रकारिता होती. त्यामुळे त्यांनी त्यांच्या लेखणीतून समाजप्रबोधनाचे काम प्रभावीपणे केले. भावी पत्रकारांनी लिहिण्याची आवड ठेवावी. बातमीतला वेगळा सेन्स ओळखावा. आपण जे काम करीत आहोत आत्मियता आणि तळमळीने केले पाहिजे. पत्रकारांनी पत्रकारितेकडे पाहताना उपजीविकेचे साधन न पाहता सामाजिक बांधिलकी म्हणून प्रभावीपणे समाजहितासाठी लिखान करावे असेही ते म्हणाले.

ज्येष्ठ पत्रकार माधव अटकोरे यांनी अवयवदानाचे महत्त्व सांगितले. प्राचार्य डॉ.गणेश जोशी यांनी प्रास्ताविकामध्ये दर्पण दिनाचे महत्त्व सांगून बाळशास्त्री जांभेकर यांच्या कार्याचा आढावा घेतला. तर जिल्हा माहिती अधिकारी अनिल आलुरकर यांनी पहिले वृत्तपत्र दर्पण 6 जानेवारी 1832 मध्ये सुरू झाले. वीस वर्षापर्यंत दर्पण हे वृत्तपत्र चालले. इंग्रजी आणि मराठी भाषेमध्ये हे वृत्तपत्र प्रकाशित होत होते, असे म्हणत त्यांनी दर्पण बद्दल विस्तृत माहिती सांगितली. कार्यक्रमाचे अध्यक्ष डॉ. गोविंद हंबर्डे यांनी पत्रकारांनी वाचन अधिक करणे आवश्यक असून अधिकच्या वाचनामधून प्रभावीपणे लिखान होते. समाजमन परिवर्तन करण्याचे सामर्थ्य पत्रकारितेत आहे असेही ते म्हणाले.

यावेळी प्रशांत गवळे, सूर्यकुमार यन्नावार, सुरेश आंबटवार, शिवाजी शिंदे, तुकाराम भालेराव, विनोद कदम यांच्यासह कार्यक्रमाच्या यशस्वीतेसाठी जिल्हा माहिती कार्यालयाचे विजय होकर्णे, विवेक डावरे, काशिनाथ आरेवार, महम्मद युसूफ, प्रवीण बिदरकर, एमजीएमचे प्रा.प्रवीणकुमार सेलूकर, प्रा.राजपाल गायकवाड, प्रा.विनायक सितापराव, दिशा कांबळे, हणमंत यनवळगे यांनी परिश्रम घेतले. यावेळी कार्यक्रमाचे सुत्रसंचालन ऋषीकेश कोंडेकर यांनी केले. आभार प्रा. राज गायकवाड यांनी मानले. प्रारंभी एमजीएम पत्रकारिता महाविद्यालयाच्या विद्यार्थ्यांनी दर्पण दिनाचे औचित्य साधून स्पंदन भित्ती पत्रकाचे विमोचन करण्यात आले.

000000

जागतिक शौचालय दिनानिमित्त

राष्ट्रीय स्पर्धेत महाराष्ट्राचे भरीव यश

सांगली, कोल्हापूर, नांदेड व वर्धा जिल्ह्यांचा सन्मान

मुंबई दि. 6 : केंद्र सरकारच्या पेयजल व स्वच्छता मंत्रालयाने जागतिक शौचालय दिनानिमित्त राष्ट्रीय स्तरावरील स्पर्धा आयोजित केली होती. या स्पर्धेतील विजेत्या 12 जिल्ह्यांमध्ये सांगली जिल्ह्याने 11 वा क्रमांक पटकावला आहे; तर विशेष सहभागाबद्दल पहिल्या 30 जिल्ह्यांमध्ये कोल्हापूर, नांदेड आणि वर्धा या तीन  जिल्ह्यांचा सन्मान करण्यात आला आहे.

पेयजल व स्वच्छता मंत्रालयाने जागतिक शौचालय दिनानिमित्त 9 ते 19 नोव्हेंबर 2018 दरम्यान स्वच्छ भारत अभियानाची जनजागृती करण्यासाठी स्पर्धा आयोजित केली होती. या स्पर्धेत देशातील 25 राज्य आणि केंद्रशासित प्रदेशातील 412 जिल्ह्यांनी सहभाग घेतला होता. महाराष्ट्रातील सर्व ग्रामीण जिल्ह्यांनी या स्पर्धेत सहभाग घेतला. या स्पर्धेचा निकाल केंद्र सरकारने नुकताच जाहीर केला आहे. यामध्ये सांगली तसेच कोल्हापूर, नांदेड आणि वर्धा या जिल्ह्यांनी यश मिळविले आहे. या जिल्ह्यांचे जिल्हाधिकारी, मुख्य कार्यकारी अधिकारी आणि पाणी पुरवठा व स्वच्छता विभागाचे अधिकारी आणि कर्मचाऱ्यांचे पाणी पुरवठा व स्वच्छता मंत्री बबनराव लोणीकर आणि राज्यमंत्री सदाभाऊ खोत यांनी अभिनंदन केले आहे. 

केंद्र सरकारने मागील काही वर्षात सातत्याने आयोजित केलेल्या विविध उपक्रम आणि स्पर्धेमध्ये महाराष्ट्राने घवघवीत यश मिळविलेले आहे. यात ‘स्वच्छ सर्वेक्षण ग्रामीण 2018’ मध्ये राज्यातील सातारा जिल्हा देशात प्रथम क्रमांकावर राहिला. याशिवाय नाशिक आणि सोलापूर हे जिल्हे पुरस्कृत झाले. ‘स्वच्छता ही सेवा’ उपक्रमातही महाराष्ट्र सर्वोच्च स्थानी राहिला आहे. राज्याच्या ग्रामीण स्वच्छतेमध्ये शाश्वतता राहावी यासाठी सर्व जिल्हा परिषदांकडून भरीव प्रयत्न सुरू आहेत.

केंद्र सरकारने दिनांक 1 जानेवारी 2019 पासून ‘स्वच्छ सुंदर शौचालय’ या स्पर्धेची सुरूवात केली आहे. यामध्ये शौचालय रंगकाम आणि त्यांची स्वच्छता या बाबींचा समावेश आहे. या स्पर्धेतही राज्यातील सर्व जिल्ह्यात जनतेचा सक्रिय सहभाग राहील व  राज्याचे नाव राष्ट्रीय स्तरावर उज्ज्वल होईल, असा विश्वास श्री. लोणीकर आणि श्री. खोत यांनी व्यक्त केला आहे.

००००

सण, उत्सवात ध्वनी वापराची

अधिसूचना निर्गमीत 

नांदेड, दि. 6 :-  ध्वनी प्रदूषण (नियमन व नियंत्रण) नियम 2000 च्या नियम 5 (3) नुसार ध्वनीक्षेपक व ध्वनीवर्धक आदीच्या वापराबाबत श्रोतेगृहे, सभागृहे, सामुहिक सभागृहे आणि मेजवाणी कक्ष यासारख्या बंद जागा खेरीज इतर ठिकाणी जिल्ह्याच्या निकडीनुसार सन 2019 साठी पुढील सण, उत्सव काळात 15 दिवस ध्वनीची विहित मर्यादा राखून सकाळी 6 ते रात्री 12 वाजेपर्यंत करता येईल, अशी अधिसूचना जिल्हाधिकारी अरुण डोंगरे यांनी निर्गमीत केली आहे.

या अधिसूचनेत म्हटले आहे की, मा. उच्च न्यायालयाने याचिका क्र. 173 / 2010 दि. 16 ऑगस्ट 2016 रोजी दिलेला आदेश / निकालपत्रामध्ये दिलेल्या सुचनांचे पालन करणे बंधनकारक आहे. यामध्ये शिवजयंती, डॉ. आंबेडकर जयंती, महाराष्ट्र दिन 1 मे, दिवाळी, ईद-ए-मिलाद, ख्रिसमस, 31 डिसेंबरसाठी एक दिवस. गणपती उत्सव दोन दिवस (पहिला दिवस व अनंत चर्तुदशी), नवरात्री उत्सव तीन दिवस ( पहिला दिवस, अष्टमी व नवमी ) तर  उर्वरित तीन दिवस ध्वनी प्राधिकरण तथा जिल्हा पोलीस अधीक्षक नांदेड यांच्या शिफारशी नुसार जिल्ह्यातील महत्वाच्या कार्यक्रमासाठी गरजेनुसार जिल्हाधिकारी यांच्या परवानगीने दिले जाईल.

या सण उत्सवासाठी ध्वनीवर्धक व ध्वनीक्षेपक वापरण्याबाबतची सूट जिल्ह्यातील शांतता क्षेत्रासाठी लागू नसून त्यांची अंमलबजावणी करण्याची जबाबदारी संबंधीत महानगरपालिका आयुक्त, स्थानिक स्वराज्य संस्था व ध्वनी प्रदूषण नियंत्रण प्राधिकरण यांची राहील. ध्वनी प्रदूषण नियंत्रण प्राधिकरण यांनी ध्वनी प्रदूषण नियम 2000 अंतर्गत प्राप्त तक्रारीवर उच्च न्यायालयाने दिलेल्या आदेशात विहित पद्धतीने कार्यवाही करुन केलेल्या कार्यवाहीचा अहवाल सदर सण उत्सव समाप्तीनंतर लगेच जिल्हाधिकारी कार्यालयास सादर करावा. ही अधिसूचना आदेश 3 जानेवारी 2019 रोजीपासून नांदेड जिल्ह्यात लागू करण्यात आली आहे, असेही अधिसूचनेत नमुद केले आहे.

000000

एमजीएम महाविद्यालयात दर्पण दिनाचे आयोजन

नांदेड दि. 6 :- एमजीएम पत्रकारिता महाविद्यालय व जिल्हा माहिती कार्यालय यांच्या संयुक्त विद्यमाने सोमवार 7 जानेवारी रोजी सकाळी 11 वा. एमजीएम महाविद्यालय नांदेड येथे दर्पण दिनाचे आयोजन करण्यात आले आहे.

या कार्यक्रमास प्रमुख पाहुणे म्हणून ज्येष्ठ पत्रकार सुनिल ढेपे, दै. लोकपत्रचे कार्यकारी संपादक रवींद्र तहकीक, लोकमतचे नांदेड जिल्हा प्रतिनिधी विशाल सोनटक्के यांची उपस्थिती राहणार असून वर्तमान काळातील पत्रकारितेसमोरील आव्हाने आणि डिजिटल मीडियाचा प्रभाव या विषयावर ते मार्गदर्शन करणार आहेत. या कार्यक्रमास उपस्थित रहावे, असे आवाहन एमजीएम पत्रकारिता महाविद्यालयाचे प्राचार्य डॉ. गणेश जोशी, जिल्हा माहिती अधिकारी अनिल आलुरकर यांनी केले आहे.

00000

शासनस्तरावरुन जयंती साजरी करण्याचा निर्णय 2013 चा…

पुण्यतिथीचा उल्लेख न करण्याची प्रथा यावर्षी देखील कायम

- माहिती व जनसंपर्क महासंचालनालयाचे स्पष्टीकरण

मुंबई, दि. 5 : माहिती व जनसंपर्क महासंचालनालयाच्यावतीने प्रकाशित करण्यात आलेल्या यावर्षीच्या दिनदर्शिकेत महापुरुषांच्या पुण्यतिथीचा उल्लेख करण्यात आलेला नाही यावरून विविध माध्यमांमधून शासनाच्या या दिनदर्शिकेबद्दल वस्तुस्थिती जाणून न घेता विनाकारण टीका केली जात आहे. मात्र, 2013 मध्ये शासकीय स्तरावरुन फक्त जयंतीच साजरी करावी असा निर्णय झाल्याने आणि तसा जयंती कार्यक्रमांचा शासन निर्णय निर्गमित होत असल्याने त्यांचाच उल्लेख यावर्षीच्या दिनदर्शिकेत केला आहे. दरवर्षीच्या शासकीय दिनदर्शिकेमध्ये ज्याप्रमाणे पुण्यतिथींचा उल्लेख करण्यात येत नाही, तीच पद्धत यावर्षी देखील अनुसरण्यात आली आहे, असे स्पष्टीकरण माहिती व जनसंपर्क महासंचालनालयाने केले आहे.

यापूर्वी ज्या जयंतींना शासकीय सुट्टी आहे, त्याचाच उल्लेख दिनदर्शिकेत करण्यात येत असे, मात्र यंदा शासनस्तरावरुन साजऱ्या केल्या जाणाऱ्या सर्व जयंतींचा उल्लेख (छपाईला जाण्याच्या दिवसापर्यंत) दिनदर्शिकेत करण्यात आला आहे. महात्मा बसवेश्वर, महाराणा प्रतापसिंह, महर्षी वाल्मिकी या जयंती तिथीनुसार साजऱ्या केल्या जात असल्याने इंग्रजी तारखेनुसार दरवर्षी हे दिवस वेगळ्या तारखांना जयंती म्हणून साजरे केले जातात.

महात्मा फुले आणि भारतरत्न डॉ बाबासाहेब आंबेडकर यांची जयंती या दिनदर्शिकेत नमूद केली आहे, फार पूर्वीपासून पुण्यतिथीचे उल्लेख दिनदर्शिकेत केले जात नाहीत. 2013 मध्ये शासकीयस्तरावरुन फक्त जयंतीच साजरी करावी, असा निर्णय झाल्याने आणि तसा जयंती कार्यक्रमांचा शासन निर्णय निर्गमित होत असल्याने त्याचाच उल्लेख यावर्षीच्या दिनदर्शिकेत केला आहे. महासंचालनालयाच्या दिनदर्शिकेमध्ये तारखांचे सर्व उल्लेख शासन निर्णयानुसार करण्यात आलेले आहेत. मात्र, केंद्र शासनाच्या परिपत्रकानुसार इंदिरा गांधी यांचा स्मृतीदिन ‘राष्ट्रीय संकल्प दिवस’ म्हणून साजरा करण्याचे निर्देश असल्याने दिनदर्शिकेत तसा उल्लेख करण्यात आला आहे.

केवळ माहितीच्या अभावातून बातम्या दिल्या जाणे उचित नाही, किंवा बातमी देण्यापूर्वी एकदा माहिती व जनसंपर्क महासंचालनालयाकडे विचारणा केली असती, तर गैरसमजुतीतून बातम्या देण्याची वेळ आली नसती, असेही महासंचालनालयाने स्पष्ट केले आहे.

००००

ग्रंथप्रदर्शनाचे उद्घाटन संपन्न

             

 नांदेड दि. 5 :-  जिल्हा ग्रंथालय अधिकारी कार्यालयाच्यावतीने 1 ते 15 जानेवारी या कालावधीत मराठी भाषा पंधरवाडा निमीत्त ग्रंथप्रदर्शन आयोजित करण्यात आले आहे. या ग्रंथप्रदर्शनाचे उदघाटन नुकतेच नांदेड वाघाळा महानगरपालिकेच्या सहाय्यक आयुक्त श्रीमती माधवी मारकड यांच्या हस्ते करण्यात आले. हे ग्रं‍थप्रदर्शन 15 दिवस चालणार असून या ग्रंथप्रदर्शनाचा लाभ नागरिकांनी घ्यावा, असे आवाहन जिल्हा ग्रंथालय अधिकारी आशिष ढोक यांनी केले आहे.

000000

जिल्हाधिकारी कार्यालयात

मंगळवारी पेन्शन अदालत

नांदेड, दि. 5 :- जिल्हाधिकारी कार्यालयात मंगळवार 8 जानेवारी 2019 रोजी पेन्शन अदालत आयोजीत करण्यात आली आहे. जिल्ह्यातील महसूल विभागातून सेवानिवृत्त झालेले अधिकारी, कर्मचारी यांच्या अडचणी निवारण्यासाठी या दिवशी सकाळी 11 ते दुपारी 1.30 यावेळेत उपस्थित राहुन तक्रारीचे निवेदन दयावीत, असे आवाहन जिल्हाधिकारी कार्यालय नांदेड यांनी केले आहे.

00000