जिल्हास्तरीय निवडणूक

ज्ञान स्पर्धेचे आज आयोजन

नांदेड, दि. 9 :- भविष्यातील नवमतदारांना निवडणूक विषयक विविध बाबीचे ज्ञान व्हावे या उद्देशाने निवडणूक ज्ञान स्पर्धेचे आयोजन करण्यात आले आहे. तालुका स्तरावरील स्पर्धेतून पात्र ठरलेल्या प्रत्येक शाळेच्या प्रथम व द्वितीय परिक्षार्थीची जिल्हापातळीवर परिक्षा रविवार 10 डिसेंबर 2017 रोजी केंब्रीज हायस्कूल शिवाजीनगर नांदेड येथे दुपारी 1 ते 1.30 या कालावधीत आयोजित केली आहे. विद्यार्थ्यांनी या परिक्षेस उपस्थित रहावे, असे आवाहन जिल्हाधिकारी तथा जिल्हा निवडणूक अधिकारी नांदेड यांनी केले आहे.

या परिक्षेत एकूण 30 वस्तुनिष्ठ स्वरुपातील प्रश्न असून त्यासाठी 20 मिनिटे इतका वेळ परिक्षार्थीना देण्यात येणार आहे. या परिक्षेत प्रथम व द्वितीय येणाऱ्या परिक्षार्थ्यांची राज्य स्तरावरील परिक्षा औरंगाबाद येथे होणार आहे. भारत निवडणूक आयोगाने अखिल भारतीय स्तरावर 14 ते 17 या वयोगटातील इयत्‍ता 9 वी ते 12 वीतील विद्यार्थ्यांसाठी निवडणूक ज्ञान स्पर्धा सन 2017-18 आयोजित करण्याचे निर्देश दिले आहेत. त्याअनुषंगाने नांदेड जिल्हयातील सर्व शाळा, महाविद्यालयातील इयत्ता 9 वी ते 12 वीच्या विद्यार्थ्यांची शालेय स्तरावरील परीक्षा 9 नोव्हेंबर रोजी घेण्यात आली होती, असेही प्रसिद्धी पत्रकात नमुद केले आहे.

000000

सधन कुक्कुट विकास गटासाठी

अर्ज करण्याची 30 डिसेंबर मुदत

नांदेड दि. 9 :- जिल्ह्यातील अर्धापूर तालुका वगळुन उर्वरीत 15 तालुक्यात प्रत्येकी एक याप्रमाणे सार्वजनीक खाजगी भागीदारी तत्वावर सधन कुक्कुट विकास गट 50 टक्के अनुदानावर स्थापन करण्यासाठी सर्वसाधारण, अनुसुचित जाती व जनजाती क्षेत्रातील लाभधारकाकडून अर्ज शनिवार 30 डिसेंबर 2017 पर्यंत मागविण्यात आले आहेत. इच्छुक लाभार्थ्यांनी नजीकचा पशुवैद्यकीय दवाखाना किंवा पंचायत समितीचे पशुधन विकास अधिकारी (विस्तार) यांचेशी संपर्क साधावा, असे आवाहन जिल्हा पशुसंवर्धन उपआयुक्त नांदेड यांनी केले आहे.

अर्ज भरण्यासाठी नियम व अटी पुढीलप्रमाणे राहतील. सन 2017-18 पासून या योजनेंतर्गत सधन कुक्कुट विकास गटाची स्थान निश्चिती व लाभार्थ्यांची निवड प्रक्रिया पुर्ण करण्यात येणार आहे. योजनेची प्रत्यक्ष अंमलबजावणी सन 2018-19 पासून सन 2020-21 पर्यंत टप्प्याटप्याने करण्यात येणार आहे. प्रती तालुका एक लाभधारक निवडला जाईल. लाभार्थीकडे 2 हजार 500 चौ. फुट जागा स्वत:च्या मालकीची तसेच त्याठिकाणी दळणवळण, पाणी, विद्युतीकरणाची सुविधा उपलब्ध असावी. प्रकल्प कार्यान्वित करताना अनुदान एकदाच देय असून त्यानंतर प्रकल्पाचा पुढील खर्च संपुर्ण लाभार्थ्यांना करावयाचा आहे. लाभधारकाने विहित नमुन्यात अर्ज भरुन अर्जासोबत आवश्यक कागदपत्रे जोडून पशुधन विकास अधिकारी (विस्तार) पंचायत समिती यांचेकडे शनिवार 30 डिसेंबर पर्यंत सादर करावेत, असेही आवाहन जिल्हा पशुसंवर्धन उपआयुक्त नांदेड यांनी केले आहे.

00000

प्रलंबीत शिष्यवृत्तीचे प्रस्ताव

सादर करण्याचे आवाहन

नांदेड दि. 9 :- मुख्याध्यापकांनी प्रलंबीत शिष्यवृत्तीचे ऑनलाईन केलेल्या प्रस्तावाची हार्ड कॉपी व विद्यार्थ्याचे आधार कार्ड बँक खात्याशी लिंक केल्याची पोच पावती जिल्हा परिषदेच्या समाज कल्याण कार्यालयास त्वरीत सादर करावी, असे आवाहन जिल्हा परिषदेचे जिल्हा समाज कल्याण अधिकारी यांनी केले आहे.

राज्य शासनाने सन 2017-18 पासून सर्व शिष्यवृत्त्या महाडीबीटी पोर्टलद्वारे देण्याचा निर्णय घेतला असल्याने सामाजिक न्याय विभागाचे ई-स्कॉलरशीप संकेतस्थळ बंद केले आहे. काही लाभार्थ्यांनी आधार क्रमांक बँक खात्याशी संलग्न न केल्यामुळे सावित्रीबाई फुले शिष्यवृत्ती 8 ते 10, अनुसुचित जाती, विजाभज, विमाप्रव प्रवर्गातील सन 2016-17 कालावधीत शिष्यवृत्ती प्रलंबीत ठेवण्यात आली होती. प्रलंबीत शिष्यवृत्ती देण्यासाठी मर्यादीत कालावधीसाठी mhaeschol हे पोर्टल सुरु करण्यात आले आहे, असेही प्रसिद्धी पत्रकात नमुद केले आहे.

000000

जिल्हाधिकारी कार्यालयात

मंगळवारी पेन्शन अदालत

नांदेड, दि. 9 :- जिल्हाधिकारी कार्यालयात मंगळवार 12 डिसेंबर 2017 रोजी पेन्शन अदालत आयोजीत करण्यात आली आहे. जिल्ह्यातील महसूल विभागातून सेवानिवृत्त झालेले अधिकारी, कर्मचारी यांच्या अडचणी निवारण्यासाठी या दिवशी सकाळी 11 ते दुपारी 1.30 यावेळेत उपस्थित राहुन तक्रारीचे निवेदन दयावीत, असे आवाहन जिल्हाधिकारी कार्यालयाच्यावतीने केले आहे.

000000

अध्यापक महाविद्यालयात

महापरिनिर्वाण दिन संपन्न

नांदेड, दि. 9 :- डॉ. बाबासाहेब आंबेडकर यांचे तत्वज्ञान हे मानवी जीवनाच्या कल्याणासाठी सदैव उपयोगी राहील, असे प्रतिपादन शासकीय अध्यापक महाविद्यालयाच्या प्राचार्या डॉ. सुनंदा रोडगे यांनी केले. येथील शासकीय अध्यापक महाविद्यालयात डॉ. बाबासाहेब आंबेडकर यांचा 61 व्या महापरिनिर्वाण दिनानिमीत्त कार्यक्रमाच्या अध्यक्षस्थानावरुन त्या बोलत होत्या.

यावेळी महाविद्यालयातील प्रशिक्षणार्थ्यांनी डॉ. बाबासाहेब आंबेडकर यांचे जीवन, शैक्षणिक, आर्थिक व सामाजिक विचारावर प्रकाश टाकला. तसेच भित्तीपत्रकाचे विमोचन करण्यात आले. कार्यक्रमाचे प्रास्ताविक प्रा. एस. एस. सोळुंके यांनी तर आभार संगमेश्वर देवशटवार यांनी मानले. कार्यक्रमास महाविद्यालयातील बीएड, एमएडचे प्रशिक्षणार्थी, प्राध्यापक, शिक्ष्‍ाक, कर्मचारी उपस्थित होते.

000000

मानवी हक्क दिनानिमित्त आज

विविध उपक्रमांच्या आयोजनाचे निर्देश

नांदेड दि. 9 :-  जिल्ह्यात रविवार 10 डिसेंबर 2017 रोजी मानवी हक्क दिन साजरा करावा, असे निर्देश जिल्हाधिकारी कार्यालयाच्यावतीने देण्यात आले आहेत. 

जिल्ह्यातील शासकीय, निमशासकीय कार्यालये तसेच शिक्षण, कारागृह, निरीक्षकगृह आदी विभागांनी मानवी हक्क संरक्षण कायदा 1993 मधील कलम 21 अन्वये मानवी हक्काबाबत जनजागृती करावी असे राज्य मानवी हक्क आयोगाने जिल्हा प्रशासनाकडे पत्राद्वारे सूचित केले आहे. या कायदाअंतर्गत समाजातील तळागाळापर्यंत जनतेला मानवी हक्काचे ज्ञान व्हावे त्यासाठी जनजागृती कार्यक्रमाचे आयोजन करावे, असे पत्रात नमूद केले आहे. त्यानुसार न्यायालय, जिल्हा परिषद, महानगरपालिका, पोलीस विभाग, पंचायत, ग्रामीण विकास यंत्रणा, सामाजिक न्याय विभाग, महसूल विभागाची सर्व कार्यालये शिक्षणाधिकारी, कारागृह अधीक्षक, बालगृह मुलांचे यांना जिल्हाधिकारी नांदेड यांनी मानवी हक्क दिनानिमित्त जनजागृती करावी याविषयी पत्राद्वारे निर्देशीत केले आहे.

00000

नागरिकांना माफक दरात आरोग्य सेवा

देण्यासाठी सहकारी संस्थांनी योगदान दयावे

- सहकार मंत्री सुभाष देशमुख

नांदेड दि. 8 :- सामान्य नागरिकांना माफक दरात आरोग्य सेवा देण्यासाठी श्रीगुरुजी रुग्णालयाची सहकारी तत्वावर उभारणी होत असल्याबद्दल कौतूक करुन जिल्ह्यातील सहकारी संस्थांनी यासाठी योगदान दयावे, असे आवाहन राज्याचे सहकार, पणन व वस्त्रोद्योग मंत्री सुभाष देशमुख यांनी केले.

नांदेड येथील नंदीग्राम वैद्यकीय सहकारी संस्थेच्या नियोजीत श्रीगुरुजी सहकार रुग्णालयाच्या भागधारक नोंदणीचा शुभारंभ ना. देशमुख यांच्या हस्ते डॉ. शंकरराव चव्हाण सभागृह येथे करण्यात आला. यावेळी ते बोलत होते. अध्यक्षस्थानी बाबु गंजेवार होते तर आ. हेमंत पाटील, जिल्हाधिकारी संतोष पाटील, विभागीय सहनिबंधक श्रीकांत देशमुख, सहकार विभागाचे विशेष कार्य अधिकारी संतोष पाटील, जिल्हा उपनिबंधक प्रवीण फडणीस,  किशोर भवरे आदी मान्यवर उपस्थित होते.  

सहकारी तत्वावरील रुग्णालयाच्या उपक्रमाला शुभेच्छा देवून ना. देशमुख म्हणाले की , वाढती महागाई व आरोग्याचे भेडसावणारे प्रश्न यामध्ये सामान्य माणसाला होणारा त्रास लक्षात घेवून हा उपक्रम नांदेडकरांना फायदाचा ठरणार आहे. या सहकारी रुग्णालयासाठी सर्वसामान्य नागरीकांसोबतच मान्यवर, पदाधिकारी व सहकार क्षेत्रातील संस्थांनी आपल्या नफ्याचा वाटा यासाठी दयावा, अशी सूचनाही त्यांनी केली. भागधारकासाठी संस्थेने विशेष योजना केली असून नागरिकांनी या योजनेंचा फायदा घ्यावा व संस्थेने आरोग्य सेवेसाठी नियोजीत केलेल्या सवलतीचा लाभ घ्यावा. सहकारी तत्वावर अलीकडे राज्यात काही प्रमाणात रुग्णालयाची उभारणी होत आहे. कमी खर्चात उत्तम आरोग्य सेवा देण्याचा हा प्रयत्न असून या प्रयत्नांना सर्व स्तरातील नागरिकांनी पाठबळ दिले पाहिजे. या उपक्रमात वैद्यकीय क्षेत्रातील तज्ज्ञ मंडळी सहभागी होत असल्याने हा उपक्रम यशस्वी ठरेल आणि सहकार्यातून सहकार समृद्ध होईल अशी अपेक्षा त्यांनी यावेळी व्यक्त केली.

आ. हेमंत पाटील यांनी उपक्रमाला शुभेच्छा देवून स्वत: भाग खरेदी केल्याची व बँकेच्या माध्यमातून एक लाख रुपयांचे योगदान देण्याची घोषणा केली. याबाबत आ. पाटील यांच्यासह योगदान देणाऱ्या माजी आमदार ओमप्रकाश पोकर्णा, राम लोहिया व मान्यवरांचा भागधारक झाल्याबद्दल भाग प्रमाणपत्र देवून सत्कार करण्यात आला. तसेच सहकार मंत्री ना. देशमुख यांनीही एक लाख रुपयाचे योगदान घोषीत केल्याबद्दल यावेळी त्यांचाही सत्कार करण्यात आला. प्रास्ताविकात रुग्णालयाचे अध्यक्ष सुधीर कोकरे यांनी रुग्णालयाच्या उभारणी मागील भुमिका स्पष्ट केली.

अध्यक्षीय समारंभात बाबुराव गंजेवार यांनी सर्वांच्या सहकार्यातून या सहकारी तत्वावरील रुग्णालयाची उभारणी होत असून यासाठी सर्वांनी सामाजिक भावनेतून योगदान दयावे, असे आवाहन केले. कार्यक्रमाचे सुत्रसंचालन श्री. पुराणीक यांनी केले तर आभार डॉ. मुकुल जोशी यांनी मानले. यावेळी नागरिकांनी भागधारक नोंदणी मोठ्या प्रमाणात केली.

भाग्यलक्ष्मी सहकारी बँकेस भेट

नांदेड येथील भाग्यलक्ष्मी नागरी सहकारी बँकेस राज्याचे सहकार, पणन व वस्त्रोद्योग मंत्री सुभाष देशमुख यांनी आज सदिच्छा भेट दिली. यावेळी बँकेच्यावतीने त्यांचा सत्कार करण्यात आला.

यावेळी आमदार हेमंत पाटील, सहकार विभागाचे विशेष कार्य अधिकारी संतोष पाटील, सहकारी संस्थचे जिल्हा उपनिबंधक पी. आर. फडणीस, राम पाटील रातोळीकर, बँकेचे अध्यक्ष शैलाताई मदनुरकर, उपाध्यक्ष प्रभाकर महाजन, मुख्य कार्यकारी अधिकारी मधुकर कुलकर्णी, संचालक डॉ. श्रीकांत लव्हेकर, दत्तोपंत देबडवार, श्रावण पाटील, गंगाधर जोशी, बालाजीराव देशपांडे, लक्ष्मणराव ठक्करवाड, व्यंकटेश साठे आदींची उपस्थिती होती.

00000