आगामी सण, उत्सव शांततेत, सलोख्याने

साजरे व्हावेत - जिल्हाधिकारी काकाणी

जिल्हा शांतता समितीची बैठक संपन्न

        

  नांदेड दि. 3 :-  शहरासह, जिल्ह्यात आगामी काळातील सण, उत्सव शांतता व सलोख्याने साजरे व्हावेत. त्यासाठी सर्वच यंत्रणांनी काटेकोर नियोजन करावे. नागरिकांनीही याकाळात आरोग्य, स्वच्छता यांची काळजी घ्यावी. अफवांवर विश्वास ठेवू  नये. प्रसंगी नियंत्रण कक्षांशी संपर्क साधून माहिती द्यावी, असे आवाहन जिल्हाधिकारी सुरेश काकाणी यांनी आज येथे केले. आगामी सण, उत्सव, जयंती यांच्या अनुषंगाने आयोजित जिल्हा शांतता समिती बैठकीच्या अध्यक्षस्थानावरून ते बोलत होते. जिल्हाधिकारी कार्यालय प्रांगणातील बचत भवन येथे बैठक संपन्न झाली.

        बैठकीस महापौर शैलजा स्वामीही विशेष उपस्थित होत्या, तसेच मनपा आयुक्त समीर उन्हाळे, जिल्हा पोलीस अधीक्षक संदिप कर्णीक, अप्पर जिल्हाधिकारी संतोष पाटील, अप्पर पोलीस अधीक्षक संदिप डोईफोडे, मनपा उपायुक्त रत्नाकर वाघमारे, जिल्हा शल्यचिकीत्सक डॅा. बी. पी. कदम, डॅा. शंकरराव चव्हाण वैद्यकीय महाविद्यालयाचे प्रशासकीय अधिकारी डॅा. वाय. एच. चव्हाण, तहसीलदार किरण अंबेकर तसेच महावितरण, सार्वजनिक बांधकाम आदी विभागांच्या अधिकाऱ्यांची उपस्थिती होती.

          जिल्हाधिकारी श्री. काकाणी यांनी आगामी सण, उत्सव यासाठीच्या विविध विभागांच्या तयारीचाही सर्वंकष आढावा घेतला. ते म्हणाले की,  सण, उत्सव मोठ्या प्रमाणात आणि उत्साहात साजरे केले जातात. पण दिवस तीव्र उन्हाळ्याचे आहेत. त्यामुळे उत्साहाच्या भरात आरोग्याकडे दुर्लक्ष, त्यातून शरीरातील पाण्याचे प्रमाण कमी होणे असे प्रकार होऊ शकतात. त्यामुळे याकाळात वेगवेगळ्या ठिकाणी पिण्याचे पाणी उपलब्ध व्हावे, त्यासाठी काही घटकांनी स्वयंस्फुर्तीने पुढे यावे, असे प्रयत्न व्हावेत. मिरवणुकांच्या मार्गावरील मोकाट जनावरांचा बंदोबस्त करावा. मिरवणूक मार्गांसह, शहरातील महत्त्वाच्या ठिकाणचा वीज पुरवठा अखंडीत राहील याकडे लक्ष दिले जावे. मिरवणूक मार्गावरील राडा-रोडा हटविण्यात यावा, खड्डे बुजविण्यात यावेत, साफ-सफाई करण्यात यावी. आरोग्य विभागाने रुग्णवाहिका, आवश्यक औषधे यांच्या उपलब्धतेबाबत दक्षता घ्यावी. या काळात पोलीस बंदोबस्तही चोख ठेवण्याचे नियोजन करण्यात आले आहे. तरीही स्वयंशिस्त ही बाब महत्त्वाची आहे. त्याची सुरवात प्रत्येकांने स्वतःपासून सुरवात करावी.

         उत्सव, सण या काळात अप्रिय घटना टाळण्यासाठी अफवांवर विश्वास ठेवू नये, असे आवाहनही त्यांनी केले. तसेच या काळात जिल्हाधिकारी कार्यालय, पोलीस, महानगरपालिका, अग्नीशमनदल यांचे नियंत्रण कक्ष सदैव सतर्क राहतील, असेही सांगितले.

         महापौर श्रीमती स्वामी यांनीही पवित्र सण, उत्सव साजरे करताना नागरिक नेहमीच प्रशासनाला सहकार्य करीत असतात, ही परंपरा याहीवर्षी अखंडीत राहील. सण-उत्सव शांततेत साजरे होतील, असा विश्र्वास व्यक्त केला.

         पोलीस अधीक्षक कर्णीक म्हणाले की, जिल्ह्यात आणि शहरात सण, उत्सव शांततेत साजरे करण्याची चांगली परंपरा आहे. तरीही पोलीस प्रशासनाने बंदोबस्ताच्या दृष्टीने सर्वोतोपरी तयारी केली आहे. अधिकचे पोलीस बळ आणि विविध साधनसामुग्री, उपाय योजना याद्वारे सज्जता ठेवण्यात आली आहे. आतापर्यंतच्या तयारीला नागिराकांनी सकारात्मक प्रतिसाद दिला आहे. यापुढेही त्यांचे सहकार्य राहील. मनपा उपायुक्त वाघमारे यांनी स्वच्छता, वीज, पिण्याचे पाणी, मोकाट जनावरांना प्रतिबंध या उपाययोजनांबाबत माहिती दिली. तहसिलदार अंबेकर यांनीही उत्सव काळात पोलीसांशी सातत्यपुर्ण समन्वय राहील. पोलीस स्थानक निहाय संपर्क अधिकारी, कार्यकारी दंडाधिकारी यांची नियुक्ती केल्याची माहिती दिली. यावेळी शांतता समितीच्या सदस्यांनीही आपले मनोगत व्यक्त केले. निवासी उपजिल्हाधिकारी कारभारी यांनी बैठकीचे संयोजन केले. अप्पर पोलीस अधीक्षक डोईफोडे यांनी आभार मानले.

000000

केंद्रीय मंत्री नितीन गडकरी यांचा दौरा

 नांदेड दि. 1 :-  केंद्रीय रस्ते वाहतूक, महामार्ग आणि नौकानयन मंत्री नितीन गडकरी हे सोमवार 10 एप्रिल 2017 रोजी नांदेड जिल्ह्याच्या दौऱ्यावर येत आहेत. त्यांचा दौरा कार्यक्रम पुढील प्रमाणे राहील.

सोमवार 10 एप्रिल 2017 रोजी गोवा येथून खास विमानाने सकाळी 10.15 वा. नांदेड विमानतळावर आगमन. सकाळी 10.30 वा. हेलिकॉप्टरने माहूरकडे प्रयाण करतील. सकाळी 11 वा. माहूरगड येथे आगमन व श्री रेणुकादेवी दर्शन व राखीव. दुपारी 12.30 वा. माहूर येथील वळणरस्ता विकास कामाच्या उद्घाटन समारंभास उपस्थिती. दुपारी 1.45 वा. माहूर येथून हेलिकॉप्टरने औसा जि. लातूरकडे प्रयाण करतील.   

0000000

व्यवसाय परीक्षेचा अर्ज भरण्याबाबत

बुधवारी आयटीआयमध्ये प्रशिक्षण  

नांदेड दि. 1 :- शिकाऊ उमेदवारी योजनेअंतर्गत एप्रिल 2017 मध्ये होणाऱ्या 105 व्या अखिल भारतीय व्यवसाय परीक्षेशी संबंधीत ऑनलाईन अर्ज भरणे व प्रवेशपत्र प्राप्त करण्यासाठी एक दिवसीय प्रशिक्षणाचे आयोजन औद्योगिक प्रशिक्षण संस्था नांदेड येथे बुधवार 5 एप्रिल 2017 रोजी सकाळी 10.30 वा. केले आहे.

परीक्षेसाठी बसलेल्या शिकाउ उमेदवार व संबंधीत आस्थापनेचे प्रतिनिधी यांनी युजर आयडी व पासवर्डच्या माहितीसह औद्योगिक प्रशिक्षण संस्था नांदेड येथे उपस्थित रहावे. अधिक माहितीसाठीसाठी दूरध्वनी 02462-250045 वर संपर्क साधावा, असे आवाहन संस्थेचे सहाय्यक प्रशिक्षणार्थी सल्लागार आर. बी. गणविर यांनी केले आहे.

0000000

न्या. बोरा यांचा दौरा

नांदेड दि. 1 - मुंबई उच्च न्यायालयाच्या औरंगाबाद खंडपिठाचे न्यायमुर्ती पी. आर. बोरा हे रविवार 2 एप्रिल 2017 रोजी नांदेड दौऱ्यावर येत असून त्यांचा दौरा कार्यक्रम पुढील प्रमाणे राहील.

रविवार 2 एप्रिल 2017 रोजी औरंगाबाद येथून देवगिरी एक्सप्रेसने सकाळी 8.40 वा. नांदेड येथे आगमन. त्यानंतर शासकीय विश्रामगृह नांदेड येथे आगमन व राखीव. त्यानंतर सोईनुसार श्री हुजूर साहिब सचखंड गुरुद्वारा येथे भेट, देगलूर तालुक्यातील लछन येथे भेट व राखीव. सायंकाळी नांदेड येथून देवगिरी एक्सप्रेसने औरंगाबादकडे प्रयाण करतील.

000000

राज्यसेवा पूर्व परिक्षा केंद्र परिसरात प्रतिबंधात्मक आदेश

नांदेड दि. 1 - महाराष्ट्र लोकसेवा आयोग राज्यसेवा (पूर्व) परीक्षा-2017 परीक्षा रविवार 2 एप्रिल 2017 रोजी नांदेड शहरातील 24 परीक्षा केंद्रावर घेण्यात येणार आहे. या परीक्षा केंद्र परिसरात प्रतिबंधात्मक आदेश लागू केल्याचे जिल्हादंडाधिकारी नांदेड यांनी कळवले आहे.

नांदेड शहरातील विविध 24 विद्यालय, महाविद्यालयातील केंद्रावर सकाळी 10.30 ते सायंकाळी 5 या कालावधीत परीक्षा होणार असून त्यासाठी 6 हजार 984 उमेदवारांनी नोंदणी केली आहे. परीक्षेचे कामकाज सुरळीत व शांततेत पार पडावे यासाठी परीक्षा केंद्रांच्या 100 मीटर परिसरातील फौजदारी प्रक्रीया संहिता 1973 च्या कलम 144 अन्वये प्रतिबंधात्मक आदेश लागू करण्यात आले आहेत. त्यानुसार परीक्षेच्या दिवशी सकाळी 8 ते सायंकाळी 6 वाजेपर्यंतच्या कालावधीत परीक्षार्थी व परीक्षेच्या कामाशी संबंधित असलेले अधिकारी, कर्मचारी यांच्या व्यतिरिक्त इतर कोणत्याही व्यक्तीस प्रवेश करता येणार नाही. तसेच यावेळेत केंद्राच्या परिसरातील 100 मीटर पर्यंतची सर्व सार्वजनिक टेलिफोन्स, एसटीडी, आयएसडी, भ्रमणध्वनी, फॅक्स, झेरॉक्स आणि ध्वनिक्षेपक चालू ठेवण्यास प्रतिबंध करण्यात येत आहे, असे जिल्हादंडाधिकारी नांदेड यांनी आदेशात नमूद केले आहे.

00000000

  राज्य सेवा पूर्व परिक्षेविषयी उमेदवारांना सूचना 

नांदेड, दि. 1 :-  महाराष्ट्र लोकसेवा आयोगामार्फत राज्यसेवा (पूर्व) परीक्षा रविवार 2 एप्रिल 2017 रोजी सकाळी 10.30 ते सायंकाळी 5 वाजेपर्यंत नांदेड जिल्ह्यातील 24 शाळा, महाविद्यालयात घेण्यात येणार आहे. आयोगामार्फत दिलेल्या सूचनांचे उमेदवारांनी पालन करावे , असे आवाहन जिल्हा प्रशासनाच्यावतीने करण्यात आले आहे.  

या सूचना अशा, उमेदवारांनी परीक्षेला येतांना प्रवेशपत्र, ओळखपत्राची छायांकित प्रत सोबत आणावी. उमेदवारांनी परीक्षा कक्षात भ्रमणध्वनी, कॅल्पुलेटर, ब्ल्युटूथ इत्यादी इलेक्ट्रॉनिक साहित्याचा वापर करु नये. परीक्षेत कॉपी, गैरप्रकाराचा प्रयत्न करणाऱ्या उमेदवारांवर फौजदारी स्वरुपाचे गुन्हे दाखल करण्याच्या आयोगाच्या सूचना आहेत. परीक्षा  उपकेंद्रावर उमेदवारांची पोलीस कर्मचारी यांचेकडून तपासणी करण्यात येणार आहे. आयोगाकडून परीक्षेच्या पर्यवेक्षणासाठी विशेष निरीक्षक, भरारी पथकाची नियुक्ती करण्यात आली आहे. परीक्षेच्या पर्यवेक्षणाकरीता आयोगाचे अधिकारी उपस्थित राहणार आहेत. जिल्हा प्रशासनाकडून परिक्षा केंद्र परिसरात पोलीस बंदोबस्त व कलम 144 प्रतिबंधात्मक आदेश लागू करण्यात आले आहेत. या सूचनांचे उमेदवारांनी पालन करावे, असेही आवाहन करण्यात आले आहे.

0000000

सर्वोच्च न्यायालयाच्या निर्देशानुसार यापुढे

केवळ बीएस-IV मानकांच्या वाहनांचीच नोंदणी

परिवहन आयुक्तांकडून परिपत्रक निर्गमित

          नांदेड दि. 1 :- सर्वोच्च न्यायालयाच्या आदेशानुसार यापुढे बीएस-IV या वायुप्रदूषण मानकांची पुर्तता न करणाऱ्या कोणत्याही प्रकारच्या वाहनांची विक्री वाहन उत्पादक किंवा विक्रेत्यांना करता येणार नाही. तसेच वाहन नोंदणी प्राधिकारी यांनाही एक एप्रिल 2017 पासून बीएस-IV मानकांची पुर्तता न करणाऱ्या कोणत्याही वाहनांची नोंदणी करता येणार नाही. तथापि, वाहनाची विक्री 31 मार्च 2017 ला अथवा त्यापुर्वी केली असेल, तर वाहन विक्रीचा पुरावा सादर केल्यावर मात्र अशी नोंदणी करता येईल, असे परिपत्रक राज्याच्या परिवहन आयुक्तालयाने निर्गमित केले आहे.

           या परिपत्रकात म्हटले आहे की, केंद्रीय मोटार वाहन नियम 1989 मधील नियम 115 मध्ये वाहनांच्या वायुप्रदुषण विषयक मानकांबाबत तरतूदी विहित केल्या आहेत. सर्वोच्च न्यायालयाने रिट पिटिशन (सिविल) मध्ये 29 मार्च 2017 रोजी बीएस-III वाहनांच्या नोंदणीबाबतही आदेश पारित केले आहेत.

         सर्वोच्च न्यायालयाचे आदेश विचारात घेता सर्व नोंदणी प्राधिकारी यांनी  शनिवार 1 एप्रिल 2017 पासून बीएस-IV या वायुप्रदुषणाची मानकांची पुर्तता न करणाऱ्या कोणत्याही प्रकारच्या वाहनांची नोंदणी करू नये. तथापि जर 31 मार्च 2017 ला अथवा त्यापुर्वी बीएस-III मानकांची वाहने विकण्यात आली असतील तर वाहन विक्रेत्याने त्याबाबतचा पुरावा सादर केल्यास अशी वाहने नोंदणी करीता स्वीकारण्यात यावीत.

            वाहन विक्रीच्या पुरावा म्हणून फॉर्म 21, इन्व्हाईस बील, विमा प्रमाणपत्र, तात्पुरते नोंदणी प्रमाणपत्र इत्यादी बाबींचा विक्रीचा पुरावा म्हणून ग्राह्य धरण्यात येणार आहे. शुक्रवार 31 मार्च 2017 ला अथवा त्यापुर्वी बीएस-III वाहनांची तात्पुरते नोंदणी केलेली असेल तर अशी वाहने नोंदणीसाठी स्विकारता येतील. वाहनाचे उत्पादन महिना व वर्ष हे सदर वाहनास केंद्रीय मोटार वाहन नियम, 1989 च्या नियम 126 अन्वये मान्यताप्राप्त तपासणी संस्थेद्वारे जारी केलेल्या मान्यता प्रमाणपत्रामध्ये उत्पादकाने घोषीत केलेल्या चेसीस कोडीफिकेशनवरुन पडताळणी करावी. सर्वोच्च न्यायालयाचे आदेशास अनुसरून संबंधित नोंदणी प्राधिकारी यांनी वरील निर्देशांचे काटेकोरपणे पालन करावे, असे आवाहनही राज्याचे अपर परिवहन आयुक्त स. बा. सहस्त्रबुद्धे यांनी केले आहे.  

0000000