जिल्ह्यातील पर्यटनस्थळांना चालना देण्यासह

स्थानिक कलाकारांना प्रोत्साहन देण्याचा होट्टल महोत्सवाचा हेतू

- जिल्हाधिकारी डॉ. विपीन इटनकर   

·         28 मार्च पर्यंत स्थानिक कलाकारांना अर्ज करण्याची संधी 

नांदेड, (जिमाका) दि. 23  :- जो समृद्ध वारसा नांदेड जिल्ह्याला मिळाला आहे त्याच्या जपणुकीसाठी, पिढ्यानपिढ्या ज्या कला येथे विकसीत होत आल्या आहेत त्याला व्यासपीठ मिळावे, स्थानिक प्रतिभावान कलाकारांना संधी उपलब्ध व्हावी, त्यांच्या कलेला चालना मिळावी यादृष्टिने जिल्हा प्रशासन होट्टल महोत्सवाकडे पाहते आहे. बहुप्रतिक्षेत असलेल्या होट्टल सांस्कृतिक महोत्सवाचा मूळ हेतूच जिल्ह्यातील सांस्कृतीक वैभवाला अधोरेखीत करण्याचा असल्याचे प्रतिपादन जिल्हाधिकारी डॉ. विपीन इटनकर यांनी केले. 

जिल्हा प्रशासन  व महाराष्ट्र पर्यटन संचालनालय औरंगाबाद यांच्या संयुक्त विद्यमाने होट्टल सांस्कृतिक महोत्सव 2022 चे आयोजन केले जात आहे. दिनांक 9 ते 11 एप्रिल या तीन दिवसीय कालावधीत देगलूर जवळील होट्टल येथील मंदिर परिसरात हे आयोजन होणार आहे. स्थानिक कलाकारांना अधिकाधिक संधी मिळावी व महोत्सवाची पुढील रुपरेषा ठरावी याबाबत जिल्हाधिकारी डॉ. विपीन इटनकर यांनी संबंधितांना निर्देश दिले. याचबरोबर महोत्सव काळात स्थानिक कलाकारांच्या सादरीकरणासाठी राखीव वेळही ठेवण्यात आली आहे.   

ज्या स्थानिक कलाकारांना, कलाकारवृंद यांना त्यांच्याकडील अनुभव, वैशिष्ट्य व सादर करावयाच्या कार्यक्रमांच्या रूपरेषेसह दिनांक 28 मार्च 2022 पर्यंत लेखी अर्ज करावेत, असे आवाहन जिल्हा प्रशासनाच्यावतीने करण्यात आले आहे. हे अर्ज जिल्हाधिकारी कार्यालयाच्या दंडाधिकारी शाखेत कार्यालयीन वेळेत स्विकारले जातील. या अर्जावर होट्टल सांस्कृतिक महोत्सव 2022 अंतर्गत अर्ज असे स्पष्ट नमूद केलेले व विहित कालावधीत अलेले अर्जच स्विकारले जातील, असेही जिल्हा प्रशासनाच्यावतीने स्पष्ट केले आहे.

00000 

 स्वामित्व योजनेच्या पूर्तीसाठी गावातील नमुना 8 अद्ययावत आवश्यक

- जिल्हाधिकारी डॉ.‍ विपीन इटनकर      

नांदेड, (जिमाका) दि. 23  :- जिल्ह्यातील सर्व गावांचे गावठाण भुमापन व गावठाणातील मालमत्तांचे जीआयएस आधारित रेखांकन व मूल्यांकन करून गावठाणातील प्रत्येक घरांचा, खुल्या जागेचा, रस्त्याचा परिपूर्ण नकाशा तयार व्हावा या उद्देशाने स्वामित्व योजना शासनाने हाती घेतली आहे.याचबरोबर असंख्य कुटुंबाजवळ जी मिळकत आहे त्याची महाराष्ट्र जमीन महसूल अधिनियम1966 तरतुदीनुसार मिळकत पत्रिका अर्थात आपल्या जागेची कायदेशीर प्रतिपूर्ती करणारीसनद नागरिकांना उपलब्ध होत आहे. ड्रोन द्वारे सर्व्हे ऑफ इंडियामार्फत गावठाणातील मिळकतीचेहे सर्वेक्षण असल्याने याला अधिक महत्त्व आहे. याचबरोबर सदर इमेज जीओ संदर्भ असल्याने ती पडताळून गावठाणातील मिळकतीचा डिजिटल नकाशा असल्याने या सनदीला कायदेशीर आधार आहे.ग्रामीण भागातील नागरिकांनी सनदी साठी पुढाकार घेऊन जिल्ह्यातील स्वामित्व योजनाप्रभावीपणे राबविण्यासाठी सहकार्य करावे, असे आवाहन जिल्हाधिकारी डॉ. विपीन इटनकर यांनी केले.  

आज 23 मार्च रोजी जिल्हाधिकारी कार्यालयात स्वामित्व योजनेच्या आढावा बैठकीत ते बोलत होते. यावेळी जिल्हा अधीक्षक  भूमि अभिलेख श्रीमती सुरेखा सेठिया, पंचायत समितीचे गटविकास अधिकारी व इतर मान्यवर उपस्थित होते.  

स्वामित्व योजनेसाठी गावठाणातील जागांचे ड्रोनद्वारे चित्रीकरण करून जागेबाबत परिपूर्ण अशी माहिती संकलितकेली जात आहे. ती भूमी अभिलेख कार्यालयामार्फत प्रत्यक्ष जागेवर पडताळूनही पाहिल्या जाते. या सर्व प्रक्रिया झाल्यानंतर प्रत्येक गावठाण / ग्रामपंचायत निहाय नमूना 8 नुसारपडताळणी केली जाते. असंख्य गावात अद्यापही नमूना 8 अपडेट नसून त्याबाबत योग्‍य तीदक्षता घेण्याच्या सूचना जिल्हाधिकारी डॉ. विपीन इटनकर यांनी दिल्या. 

सदर सनद साठी शासनाने नाममात्र शूल्क दिले असून लोकांनी यासाठी पुढाकार घ्यावा, असेही त्यांनीस्पष्ट केले. भूमिअभिलेख कार्यालयाच्या अधिक्षक श्रीमती सेठिया यांनी या बैठकीत सविस्तर विवेचन केले.

00000

 

सांस्कृतिक वैभवाची ओळख ठरलेल्या

होट्टल महोत्सवाचे 9 ते 11 एप्रिल कालावधीत आयोजन

नांदेड (जिमाका) दि. 22 :- मराठवाड्याच्या सांस्कृतिक वैभवाची ओळख ठरलेल्या “ होट्टल सांस्कृतिक व पर्यटन महोत्सवाचे ” आयोजन 9 ते 11 एप्रिल या कालावधीत होणार असल्याची माहिती जिल्हाधिकारी डॉ. विपीन इटनकर यांनी दिली. त्यांच्या अध्यक्षतेखाली आज जिल्हाधिकारी कार्यालयात प्राथमिक बैठक संपन्न झाली. राज्याचे सार्वजनिक बांधकाम मंत्री व जिल्ह्याचे पालकमंत्री अशोक चव्हाण यांनी महोत्सवाच्या यशस्वी आयोजनाबाबत जिल्ह्यातील सर्व यंत्रणाना सकारात्मक सहभाग घेवून हा महोत्सव अधिक चांगला होण्याबाबतचे निर्देश जिल्हा प्रशासनाला दिले आहेत. या निर्देशानुसार बैठकीत विविध नियोजनाचा जिल्हाधिकारी डॉ. विपीन इटनकर यांनी आढावा घेतला.

या बैठकीस निवासी उपजिल्हाधिकारी प्रदीप कुलकर्णी, देगलूरचे उपविभागीय दंडाधिकारी शक्ती कदम, जिल्हा नियोजन अधिकारी सुधाकर आडे व संबंधित विभागाचे वरिष्ठ अधिकारी उपस्थित होते. या बैठकीत महोत्सवाच्या पुर्व तयारीबाबत आढावा घेवून विविध समित्या स्थापन करण्यात येत आहेत. या महोत्सवाला अधिकाधिक पर्यटक, सांस्कृतिक क्षेत्रात कार्य करणारे व्यक्ती-रसिक मोठया संख्येने सहभागी होतील असा विश्वास डॉ. विपीन इटनकर यांनी व्यक्त केला.  

या तीन दिवशीय महोत्सवामध्ये स्थानिक कलाकारासह राष्ट्रीय पातळीवरील कलाकारांनाही ऐकण्याची संधी मिळणार आहे. होट्टल येथील पर्यटनाला चालना मिळावी यादृष्टीने या महोत्सवाचे आयोजन केले जात आहे. सांस्कृतिक कार्यक्रमाचे नियोजन राज्याच्या पर्यटन विभागामार्फत केले जात आहे.

0000 

 

नांदेड जिल्ह्यात आज एकही कोरोना बाधित नाही

 

नांदेड (जिमाका) दि. 22 :- जिल्ह्यात आज प्राप्त झालेल्या 540 अहवालापैकी निरंक अहवाल कोरोना बाधित आले आहे. जिल्ह्यात आजवर एकुण बाधितांची संख्या 1 लाख 2 हजार 795 एवढी झाली असून यातील 1 लाख 96 रुग्णांना रुग्णालयातून सुट्टी देण्यात आलेली आहे. आजच्या घडीला 7 रुग्ण उपचार घेत आहे.

 

जिल्ह्यात आतापर्यंत बाधित मृत रुग्णांची संख्या 2 हजार 692 एवढी आहे. आज नांदेड जिल्ह्यातील तालुक्यांतर्गत गृह विलगीकरण 1 असे एकुण 1 कोरोना बाधितांना औषध उपचारानंतर बरे झाल्याने सुट्टी देण्यात आली.

 

उपचार घेत असलेल्या बाधितांमध्ये नांदेड जिल्ह्यातील तालुक्यातर्गत गृह विलगीकरण 5, नांदेड मनपा अंतर्गत गृह विलगीकरण 2 असे एकुण 7  व्यक्ती उपचार घेत आहेत.

 

जिल्ह्याची कोरोना संशयित व कोविड बाधितांची संक्षिप्त माहिती.

एकुण घेतलेले स्वॅब- 8 लाख 91 हजार 715

एकुण निगेटिव्ह स्वॅब- 7 लाख 71  हजार 803

एकुण पॉझिटिव्ह बाधित व्यक्ती- 1 लाख 2 हजार 795

एकूण रुग्णालयातून सुट्टी दिलेली संख्या- 1 लाख 96

एकुण मृत्यू संख्या-2 हजार 692

उपचारानंतर बाधित रुग्ण बरे होण्याचे प्रमाण 97.37 टक्के

आज स्वॅब तपासणी अनिर्णीत संख्या-00

आज स्वॅब नाकारण्यात आलेली संख्या-01

आज प्रलंबित स्वॅब तपासणी संख्या-निरंक

रुग्णालयात उपचार घेत असलेले बाधित व्यक्ती-7

आज रोजी अतिगंभीर प्रकृती असलेले-निरंक

 

कोरोना विषाणुची लस सुरक्षित असून कोरोनाची लाट पुन: येण्यापासून प्रतिबंध करण्यासाठी कोविड-19 लसीकरण दिर्घकाळ आणि प्रभावी उपाय आहे. इतरांनाही लस घेण्यासाठी प्रोत्साहित करावे. ज्या नागरिकांनी कोविडच्या पहिल्या लसीचा डोस घेतला आहे त्यांनी ठराविक कालावधीनंतर दुसऱ्या लसीचा डोस अवश्य घ्यावा, असे आवाहन जिल्हाधिकारी डॉ. विपीन इटनकर यांनी केले आहे.

000000

 

प्रधानमंत्री किसान सन्मान निधी योजनेतर्गंत

प्रलंबित डाटा दुरुस्तीसाठी गावपातळीवर विशेष कॅम्पचे आयोजन

 

नांदेड (जिमाका) दि. 22 :- प्रधानमंत्री किसान सन्मान योजनेतर्गत प्रलंबित डाटा दुरुस्तीचे काम 25 मार्च 2022 पर्यंत पूर्ण करण्यात येणार आहे. यासाठी गाव पातळीवर कॅम्पचे आयोजन करण्यात येत आहे. ज्या पात्र लाभार्थ्यांचे लाभ थांबलेले आहेत अशा अर्जदारांनी  या कॅम्पमध्ये सातबारा उतारा, आधारकार्ड, बँकेचे पासबुक इत्यादी आवश्यक कागदपत्रे घेऊन डाटा दुरुस्ती करुन घेण्याचे आवाहन जिल्हाधिकारी डॉ. विपीन इटनकर यांनी केले आहे.

 

सदर डाटा दुरुस्तीचे काम पूर्ण करुन पात्र लाभार्थ्यांना तात्काळ लाभ देण्यासाठी गावपातळीवर तलाठी, ग्रामसेवक, कृषी सहाय्यक यांच्या उपस्थितीत कॅम्पचे आयोजन केले जाणार आहे. शासन, कृषी, पशुसंवर्धन, दुग्धव्यवसाय विकास व मत्स्य व्यवसाय विभाग यांचे परिपत्रक दि. 4.2.2019 नुसार केंद्र पुरस्कृत प्रधानमंत्री किसान सन्मान निधी योजना सुरु करण्यात आली आहे. या योजनेतर्गत अल्प व अत्यल्प भूधारक शेतकऱ्यांना कुटूंबनिहाय प्रति वर्ष रुपये सहा हजार इतके आर्थिक सहाय्य 3 टप्प्यामध्ये उपलब्ध करुन देण्यात येत आहे. प्रधानमंत्री किसान सन्मान निधी योजनेतर्गंत विविध प्रकारची डाटा दुरुस्ती असून त्याचा तालुकानिहाय तपशील याप्रमाणे आहे. मुखेड-2 हजार 537, देगलूर- 2 हजार 87, किनवट-2 हजार 56, लोहा-2 हजार 56, लोहा- 2 हजार 26, नायगाव- 1 हजार 910, भोकर-1 हजार 782, कंधार- 1 हजार 688, उमरी- 1 हजार 584, हिमायतनगर -1 हजार 443, नांदेड-1 हजार 437, हदगाव- 1 हजार 253, बिलोली-1 हजार 223, मुदखेड-1 हजार 34, माहूर-985, अर्धापूर-873, धर्माबाद-846 असे एकूण जिल्ह्यात तालुकानिहाय 24 हजार 764 डाटा दुरुस्ती आहेत. तरी या कॅम्पमध्ये प्रधानमंत्री किसान सन्मान निधी योजनेतील लाभार्थ्यांनी आपल्या प्रलंबित अर्जाचा डाटा दुरुस्तीचे काम करुन सुरळीत लाभ घ्यावा, असे जिल्हा प्रशासनाच्यावतीने कळविले आहे.

0000

 

 

धान्य महोत्सवात शेती पुरक उद्योगातून

महिलाही घेत आहेत भरारी

 

नांदेड, (जिमाका) दि. 21  :- विकेल ते पिकेल अभियानातर्गंत येथील जिल्हाधिकारी परिसरात आयोजित करण्यात आलेल्या धान्य महोत्सवात शेतीपुरक उद्योगातून बचतगट आणि स्वव्यवसायातून महिलांचा सहभाग लक्षणीय आहे. जिल्हाधिकारी डॉ. विपीन इटनकर यांनी प्रत्येक स्टॉलला आज भेट देवून महिलांना प्रोत्साहन दिले.

गोपाल चावडी येथील बालाजी महिला बचत गट व कांताबाई संग्राम इंगळे या महिला शेतकऱ्यांनी जात्यावर तयार केलेली मुगडाळ, उडीद डाळ, हिरवे मुग हे ग्राहकांच्या पसंतीस उतरत आहेत. दालमिल मधील दाळीची चव व दगडी जात्यावर हाताने भरडलेल्या दाळीची चव यात कमालीचा फरक लक्षात येतो. पुर्णत: नैसर्गिक पध्दतीने केलेली ही डाळ व इतर उत्पादने मागील पाच वर्षापासून विक्री करत आहेत.

 

बोरगाव जि.नांदेड येथील भाग्यश्री महिला बचत गटातील संगीता गंगाराम कंदारे यांनी अगरबत्ती व्यवसाय गेल्या 1 वर्षापासून सुरू केला आहे. या बचतगटामध्ये काम करण्यासाठी महिलांची संख्या मोठी आहे.अगरबत्तीसाठी लागणारा कच्चामाल हे बचत गट  नागपूर येथुन आणतात. सुवासिक लाकूड, मुळ्या, साली, पाने, चंदन, अगरू, कोळसा, लवंग, दालचिनी, निलगिरी, गुलाब, मोगरा, चमेली, रातराणी अर्क, धूप, कापूर, केवडा, कंकोळ, तुळस, अटामसी, मारवा, नागरमोथा, बुक्का, भाताचे तूस, व्हाईट ऑईल, ग्रीस, लुबिकेटिंग ऑईल, सोरा डिंक, गोंद-खळ, स्टार्च बांबू किंवा वेळूच्या कामट्या आदी कच्चा माल आता या महिलांच्या रोजच्या सरावातील झाला आहे.  

 

माधवनगर पूर्णारोड येथील सविता पावडे या मागील पाच वर्षापासून नैसर्गिक शेती करतात. पाच एकर शेतामध्ये विविध प्रकारचे भाजीपाला विक्रीसह चिकू, मोसबी , पेरू या फळाचे उत्पादन त्या घेतात.त्यांनी एक एकरमध्ये काळ्या गव्हाचे पिक घेतले आहे.  कुठल्याही रासायनिक खताचा वापर न करता एक एकर जागेमध्ये त्यांनी काळा गहु पिकविला आहे. काळा गहू मधुमेह आणि कोलेस्ट्रॉल नियंत्रणासाठी उपयुक्त आहे. या गव्हामध्ये व्हिटॅमिन, खनिज, प्रोटीन व फायबरयुक्त असून शरीरासाठी उत्तम आहे.शरीरात ॲटीऑक्सीडेंटची मात्रा वाढविण्यास प्रभावी आहे.सामान्य गव्हापेक्षा अधिक पोषक तत्वे यामध्ये असल्याचे त्यांनी सांगितले.

00000

 

 

 

नांदेड जिल्ह्यात आज एकही कोरोना बाधित नाही

 

नांदेड (जिमाका) दि. 21 :- जिल्ह्यात आज प्राप्त झालेल्या 575 अहवालापैकी निरंक अहवाल कोरोना बाधित आले आहे. जिल्ह्यात आजवर एकुण बाधितांची संख्या 1 लाख 2 हजार 795 एवढी झाली असून यातील 1 लाख 95 रुग्णांना रुग्णालयातून सुट्टी देण्यात आलेली आहे. आजच्या घडीला 8 रुग्ण उपचार घेत आहे.

 

जिल्ह्यात आतापर्यंत बाधित मृत रुग्णांची संख्या 2 हजार 692 एवढी आहे. आज नांदेड मनपा अंतर्गत विलगीकरण 1, नांदेड जिल्ह्यातील तालुक्यांतर्गत गृह विलगीकरण 1 असे एकुण 2 कोरोना बाधितांना औषध उपचारानंतर बरे झाल्याने सुट्टी देण्यात आली.

 

उपचार घेत असलेल्या बाधितांमध्ये नांदेड जिल्ह्यातील तालुक्यातर्गत गृह विलगीकरण 6, नांदेड मनपा अंतर्गत गृह विलगीकरण 2 असे एकुण 8  व्यक्ती उपचार घेत आहेत.

 

जिल्ह्याची कोरोना संशयित व कोविड बाधितांची संक्षिप्त माहिती.

एकुण घेतलेले स्वॅब- 8 लाख 91 हजार 175

एकुण निगेटिव्ह स्वॅब- 7 लाख 71  हजार 264

एकुण पॉझिटिव्ह बाधित व्यक्ती- 1 लाख 2 हजार 795

एकूण रुग्णालयातून सुट्टी दिलेली संख्या- 1 लाख 95

एकुण मृत्यू संख्या-2 हजार 692

उपचारानंतर बाधित रुग्ण बरे होण्याचे प्रमाण 97.37 टक्के

आज स्वॅब तपासणी अनिर्णीत संख्या-00

आज स्वॅब नाकारण्यात आलेली संख्या-05

आज प्रलंबित स्वॅब तपासणी संख्या-निरंक

रुग्णालयात उपचार घेत असलेले बाधित व्यक्ती-8

आज रोजी अतिगंभीर प्रकृती असलेले-निरंक

 

कोरोना विषाणुची लस सुरक्षित असून कोरोनाची लाट पुन: येण्यापासून प्रतिबंध करण्यासाठी कोविड-19 लसीकरण दिर्घकाळ आणि प्रभावी उपाय आहे. इतरांनाही लस घेण्यासाठी प्रोत्साहित करावे. ज्या नागरिकांनी कोविडच्या पहिल्या लसीचा डोस घेतला आहे त्यांनी ठराविक कालावधीनंतर दुसऱ्या लसीचा डोस अवश्य घ्यावा, असे आवाहन जिल्हाधिकारी डॉ. विपीन इटनकर यांनी केले आहे.

000000