जप्त रेतीसाठ्याचा नांदेड तहसिल

कार्यालयात आज लिलाव

 नांदेड दि. 21 -  नांदेड तालुक्यातील विनापरवानगी अनाधिकृत रेतीसाठा केल्याचे निदर्शनास आले असून रहाटी, सोमेश्वर, नाळेश्वर, वाघी येथील अंदाजे 11 हजार 680 ब्रास रेतीसाठा जप्त करण्यात आला आहे. या साठ्याचा जाहीर लिलावाची दुसरी फेरी व गंगाबेट, वाहेगाव, म्हाळजा, वांगी, नागापूर येथील 3 हजार 115 ब्रास रेतीसाठ्याचा जाहीर लिलावाची तीसरी फेरी गुरुवार 22 जुन 2017 रोजी दुपारी 12 वा. उपविभागीय अधिकारी नांदेड यांच्या अधिपत्याखाली तहसिल कार्यालय नांदेड येथे घेण्यात येणार आहे.  

जनतेनी या रेती साठ्याचे ठिकाणी रेती (वाळू) साठा पाहून, तपासून लिलावात, बोलीत भाग घ्यावा. अटी, शर्ती व माहितीबाबत तहसिल कार्यालय नांदेड येथे गौण खनीज विभागात कार्यालयीन वेळेत पहावयास मिळेल, असे  तहसिलदार नांदेड यांनी प्रसिद्धी पत्रकाद्वारे कळविले आहे.

00000

        मोटार वाहन नियम सुधारणा प्रारुप अधिसुचना प्रसिद्ध

सुचना व हरकती दाखल करण्याचे आवाहन

            नांदेड दि. 21  :-   मा. उच्च न्यायालय मुंबई यांच्या निर्णयानुसार शासनाकडून महाराष्ट्र मोटार वाहन नियम 1989 मध्ये सुधारणा करण्यासाठी दि. 31 मे 2017 नुसार प्रारुप अधिसुचना प्रसिद्ध करण्यात आली आहे. या अधिसुचनेची प्रत जनतेच्या माहितीसाठी नांदेड प्रादेशिक परिवहन कार्यालयाच्या सूचना फलकावर लावण्यात आली आहे. जनतेनी हरकती व सूचना असल्यास शुक्रवार 30 जुन 2017 पर्यंत नांदेड प्रादेशिक परिवहन कार्यालयास दाखल कराव्यात , असे आवाहन प्रादेशिक परिवहन अधिकारी नांदेड यांनी केले आहे.

000000

वसतिगृह प्रवेशासाठी विद्यार्थ्यांना  

अर्ज करण्याचे समाज कल्याणचे आवाहन

नांदेड दि. 21  :-  वसतिगृहातील रिक्त जागांसाठी माध्यमिक व उच्च माध्यमिक तसेच  पदवी व पदव्युतर प्रथम वर्ष व व्यावसायिक अभ्यासक्रम प्रथम वर्षामध्ये शिक्षण घेत असलेल्या पात्र विद्यार्थ्यांकडून ऑफलाईन अर्ज मंगळवार 20 जुन 2017 पासून मागविण्यात येत आहेत.

सामाजिक न्याय व विशेष सहाय्य विभागामार्फत नांदेड जिल्ह्यामध्ये  मागासवर्गीय मुलांचे वसतिगृह नांदेड , गुणवंत मुलांचे नांदेड, अर्धापूर, हदगाव, भोकर, उमरी, नायगाव, बिलोली, धर्माबाद तसेच मुलींचे शासकीय वसतिगृह विद्युतनगर नांदेड व  गांधीनगर नांदेड, हदगाव, भोकर, उमरी, देगलूर, मुखेड, भोकर असे एकूण 16 वसतिगृह कार्यरत आहेत. सन 2017-18 या शैक्षणिक वर्षातील वसतिगृहातील 601 रिक्त जागांसाठी हे अर्ज  मागविण्यात येत आहे.

शालेय विद्यार्थ्यांनी 20 जुन ते 1 जुलै 2017 पर्यंत. इयत्ता दहावी व  अकरावी नंतरच्या अभ्यासक्रमात प्रवेश घेतलेल्या विद्यार्थ्यांनी 20 जुन ते 6 जुलै 2017 पर्यंत. बीए, बीकॉम, बीएसस्सी अशा बारावीनंतरच्या पदविका, पदवी आणि एमए, एमकॉम, एमएसस्सी असे पदवीनंतरचे पदवीत्तर अभ्यासक्रमाच्या विद्यार्थ्यांनी 20 जून ते 20 जुलै 2017 पर्यंत. व्यावसायिक अभ्यासक्रमामध्ये प्रवेश घेतलेल्या विद्यार्थ्यांनी 15 जुलै ते 14 ऑगस्ट 2017 पर्यंत संबंधित शासकीय वसतिगृहातील गृहपालाकडे अर्ज सादर करावेत.

            प्रवेश हे गुणवत्ता व आरक्षणावर आधारित असून प्रवेशित विद्यार्थ्यांना निवास व भोजन तसेच शैक्षणिक साहित्य, बेडिंग साहित्य, निर्वाह भत्ता आदी सुविधा मोफत पुरविण्यात येतात. विद्यार्थ्यांनी मुदतीत ऑफलाईन अर्ज संबंधित शासकीय वसतिगृहातील गृहपालाकडे सादर करावेत तसेच अधिक माहितीसाठी संबंधित वसतिगृहाचे गृहपाल यांच्याशी संपर्क साधावा असे आवाहन सहाय्यक आयुक्त, समाज कल्याण नांदेड यांच्या कडून करण्यात येत आहे.

000000

"उन्नत शेती समृध्द शेतकरी" मोहिमेंतर्गत

लाभार्थी निवडीसाठी तालुकानिहाय सोडतीचे आयोजन ;

अर्जदार शेतकऱ्यांना उपस्थित राहण्याचे आवाहन

नांदेड दि. 21 :- "उन्नत शेती समृध्द शेतकरी" मोहिमेंतर्गत  जिल्ह्यातील शेतकऱ्यांनी औजारासाठी कृषि विभागाकडे अर्ज केली आहेत अशा पात्र लाभार्थ्यांची निवड लॉटरी  पध्दतीने करण्यात येणार आहे. संबंधीत उपविभागीय कृषि अधिकारी, तालुका कृषि अधिकारी व अर्जदार शेतकऱ्यांच्या उपस्थितीत ही सोडत काढण्यात येणार आहे. अर्जदार शेतकऱ्यांनी संबंधीत तालुक्यात सोडतीच्या ठिकाणी उपस्थित राहावे, असे आवाहन कृषि विभागामार्फत  करण्यात आले आहे.

पात्र अर्जदारांची सोडतीद्वारे ज्येष्ठता क्रमवार निश्चित केला जाणार आहे. ट्रॅक्टर व इतर औजारासाठी अर्जाप्रमाणे वेगळी यादी करण्यात येणार आहे. त्या यादीतून सोडत काढली जाणार आहे. सोडतीचा कार्यक्रम स्थळ व वेळ पुढील प्रमाणे राहील.    

गुरुवार 22 जुन 2017 रोजी कंधार तालुका- तहसिल कार्यालय कंधार येथे सकाळी 11 वा. लोहा- कृषि अधिकारी कार्यालय पारडी दुपारी 3 वा. धर्माबाद- तालुका  तालुका कृषि अधिकारी कार्यालय दुपारी 2 वा. बिलोली-  तालुका  बीज गुणन केंद्र  कासराळी सकाळी 11 वा.  किनवट- कृषि अधिकारी कार्यालय किनवट सकाळी 11 वा. माहूर- पंचायत समिती सभागृह दुपारी 3 वा.

शुक्रवार 23 जुन रोजी नांदेड तालुका- जिल्हा फळ रोपवाटीका धनेगाव येथे सकाळी 11 वा.  मुदखेड- जिल्हा फळ रोपवाटीका धनेगाव दुपारी 12.30 वा. अर्धापूर- जिल्हा फळ रोपवाटीका धनेगाव  दुपारी 3 वा. मुखेड- तालुका बीज गुणन केंद्र मुखेड सकाळी 11 वा. नायगाव- तालुका कृषि अधिकारी नायगाव दुपारी 3 वा. हदगाव- पंचायत समिती सभागृह  सकाळी 11 वा. हिमायतनगर- तालुका कृषि अधिकारी कार्यालय हिमायतनगर  दुपारी 3 वा. याप्रमाणे सोडतीचा कार्यक्रम आयोजित करण्यात आला आहे. संबंधीत तालुक्यातील शेतकऱ्यांनी सोडतीच्या ठिकाणी उपस्थित राहावे, असेही आवाहन उपविभागीय कृषि अधिकारी नांदेड यांनी केले आहे.        

000000

निरोगी जीवनासाठी योग उपयोगी

- जिल्हाधिकारी अरुण डोंगरे

            नांदेड दि. 21  :- निरोगी जीवनासाठी योग उपयोगी असून योग दिनामुळे नागरिकांमध्ये आरोग्याबद्दलची जागरुकता वाढली आहे, असे प्रतिपादन जिल्हाधिकारी अरुण डोंगरे यांनी केले. तिसऱ्या आंतरराष्ट्रीय योग दिनाचे औचित्य साधून नांदेड शहरातील मध्यवर्ती योग शिबिराचे उद्घाटन जिल्हाधिकारी अरुण डोंगरे यांच्या हस्ते दीप प्रज्वलन करुन करण्यात आले. या शिबिराचे आयोजन श्री गुरु ग्रंथ साहिबजी भवन यात्री निवास नांदेड येथे करण्यात आले होते.

            यावेळी अपर जिल्हधिकारी संतोष पाटील, निवासी उपजिल्हाधिकारी जयराज कारभारी, गुरुद्वारा बोर्डाचे अधीक्षक डी. पी. सिंग, शासकीय आयुर्वेद महाविद्यालयाचे अधिष्ठाता डॉ. बी. एच. श्यामकुवर, योग समन्वय समितीचे समन्वयक डॉ. वाय. आर. पाटील, गुरुद्वारा लंगर साहिबचे बाबा अमरजित सिंग यांची प्रमुख उपस्थिती होती.

            जिल्हाधिकारी श्री डोंगरे म्हणाले की , आरोग्यासाठी योग आणि प्राणायाम करणाऱ्या नागरीकांची संख्या दिवसेंदिवस वाढत आहे. दिर्घ आरोग्याच्यादृष्टिने योग करणे आवश्यक आहे, असे सांगुन त्यांनी योगाचे महत्व विशद केले.  

            या आंतरराष्ट्रीय योग दिनानिमीत्त योग शिक्षक अनिल अमृतवार यांनी विविध प्रकारच्या योग साधनासह प्राणायमही करुन घेतला. वैद्यकीय, दंत, आयुर्वेद, होमियोपॅथिक महाविद्यालये, आरोग्य विज्ञान संस्था, योग व सामाजिक संस्था यांचे संयुक्तरित्या योग प्रात्यक्षिक वर्ग घेवून हा दिन उत्साहात साजरा करण्यात आला. या शिबिरात जिल्ह्यातील योगसाधक, महिला, वैद्यकीय, शिक्षण, सामाजिक क्षेत्रातील व्यक्ती, महाविद्यालयीन युवक, नागरिक आदींनी मोठ्या संख्येने सहभाग घेतला होता.

000000

महाविद्यालयात प्रवेशाच्‍या वेळीच मतदार यादीत नोंदणीस सुरुवात

जास्तीत जास्त तरुणांच्‍या सहभागाचे जिल्हाधिकारी डोंगरे यांचे आवाहन

                नांदेड दि. 20 :- भारत निवडणूक आयोगाच्या निर्देशानुसार तरूण व पात्र प्रथम मतदारांची (वयोगट 18 ते 21) नोंदणी करण्‍याकरीता जिल्‍हयात प्रत्‍येक महाविद्यालयात मतदार यादीत नाव नोंदणीसाठी सुविधा उपलब्‍ध करुन देण्‍यात आलेली आहे. या मोहिमेत जिल्‍हयातील जास्‍तीत जास्‍त तरूण व पात्र प्रथम मतदारांनी नोंदणी करावी, असे आवाहन नांदेडचे जिल्‍हा निवडणूक अधिकारी तथा जिल्‍हाधिकारी अरूण डोंगरे यांनी केले आहे. 

महाविद्यालयीन प्रवेशाच्‍या वेळी नोंदणी

                दिनांक 1  जानेवारी 2017 रोजी वयाची 18 वर्ष पूर्ण झालेल्‍या नवीन पात्र मतदारांना महाविद्यालयात प्रवेशाच्‍या वेळीच मतदार यादीत नाव नोंदणीसाठी अर्ज करता येतील. अर्जासोबत बोनाफाईड व वास्‍तव्‍याच्‍या ठिकाणासाठी जोडपत्रात माहिती दयावी लागेल. नोंदणीसाठी लागणारे कोरे अर्ज व जोडपत्र जिल्‍ह्यातील सर्व महाविद्यालयात पुरेशा प्रमाणात उपलब्‍ध करुन देण्‍यात आलेले आहेत.  सर्व विद्यार्थ्‍यांनी प्रवेशाचे वेळी कोरे अर्ज मागून घेवून ते परिपूर्ण भरून महाविद्यालयातच जमा करावेत.

शाळा / महाविद्यालयात विविध स्‍पर्धांचे आयोजन

                मतदार नोंदणीबाबत तरुणांमध्‍ये जागृती व्‍हावी या दृष्‍टीने प्रत्‍येक तालुक्‍यात चित्रकला स्‍पर्धा, रांगोळी स्‍पर्धांचे आयोजन करण्‍यात आलेले आहे.

8 जुलै व 22 जुलै रोजी विशेष मोहिम

                या मोहिमे अंतर्गत 8 जुलै व 22 जुलै या दिवशी जिल्‍हयातील सर्व मतदान केंद्रांवर विशेष शिबिर आयोजित करण्‍यात येणार आहेत. या दिवशी जिल्‍हयातील सर्व  बीएलओ हे त्‍यांच्‍या केंद्रावर हजर राहून अर्ज स्‍वीकारतील.

 वय 21 पेक्षा जास्‍त असल्‍यास नोंदणीचे वेळी प्रतिज्ञापत्र आवश्‍यक

                मतदाराची दुबार नोंदणी होवू नये यादृष्‍टीने ज्‍या व्‍यक्‍तीचे वय 21 पेक्षा जास्‍त असेल त्‍यांना अर्ज करतांना अर्जासोबत प्रतिज्ञापत्र दयावे लागेल. एखादया मतदाराची नोंदणी पुर्वीच झालेली असेल व नवीन वास्‍तव्‍याच्‍या ठिकाणी नोंदणी करावयाची असल्‍यास पूर्वीच्‍या ठिकाणी नाव वगळण्‍यासाठी अर्ज सादर केल्‍याचा पुरावा सादर करावा लागेल. मतदारांना नोंदणीसाठी अडचण होवू नये यादृष्‍टीने सर्व अर्जाचे नमूने सुटसुटीत व सोपे करण्‍यात आलेले आहेत.

            या मोहिमेत जिल्ह्यातील तरुणांनी स्वयंस्फुर्तीने सहभाग नोंदवावा. अधिक माहिती व तपशीलासाठी संबंधीत महाविद्यालयाचे प्राचार्य किंवा तहसिल कार्यालय किंवा मतदार नोंदणी अधिकारी यांच्याशी संपर्क साधावा, असे आवाहनही जिल्हा निवडणूक कार्यालयाचे उपजिल्हा निवडणूक अधिकारी अंकुश पिनाटे यांनी केले आहे. मोहिमेबाबत अधिक माहिती व तपशील आवश्यक असल्यास उपजिल्हा निवडणूक कार्यालय, नांदेड- दूरध्वनी क्र. 02462-235762 येथेही संपर्क साधता येईल.

0000000

बँकांनी शेतकऱ्यांना कर्ज पुरवठा

करण्यासाठी प्रयत्नशील रहावे - पालकमंत्री खोतकर

नांदेड दि. 20 :-  बँकांनी शेतकऱ्यांना कर्ज पुरवठा करण्यासाठी प्रयत्नशील राहणे आवश्यक आहे. त्यानुसार राज्य बँकेने शेतकऱ्यांना मदत करण्याची भुमिका घ्यावी , असे प्रतिपादन राज्याचे पशुसंवर्धन, दुग्धव्यवसाय विकास, मत्सव्यवसाय व वस्त्रोद्योग राज्यमंत्री तथा नांदेड जिल्ह्याचे पालकमंत्री अर्जुन खोतकर यांनी केले. वसंतनगर नांदेड येथील दि. महाराष्ट्र स्टेट को-ऑपरेटिव्ह बँकेच्या नांदेड शाखेचे  उद्घाटन श्री. खोतकर यांच्या हस्ते आज झाले त्याप्रसंगी ते बोलत होते.

 यावेळी आमदार हेमंत पाटील, आमदार नागेश पाटील आष्टीकर, माजी आमदार बापुराव पाटील आष्टीकर, ओमप्रकाश पोकर्णा, अहमदपुरचे माजी आमदार बाळासाहेब पाटील, बॅकेचे प्रशासकीय मंडळाचे अध्यक्ष डॉ. एम. एल. सुखदेवे, व्यवस्थापकीय संचालक प्रमोद कर्नाड, जिल्हा मध्यवर्ती बँकेचे उपाध्यक्ष सुनिल कदम, भाऊराव चव्हाण सहकारी साखर कारखान्याचे अध्यक्ष गणपतराव तिडके, प्रशासकीय मंडळाचे सदस्य के. एन. तांबे, अशोक मगदूम यांची प्रमुख उपस्थिती होती.  

पालकमंत्री खोतकर पुढे म्हणाले की, बँकेने स्वत:बरोबर  ठेवीदार, कर्जदार, लाभार्थीचे हित जपले पाहिजे. प्रक्रिया उद्योगाला पुढे आणण्यासाठी बँकांनी आर्थिक मदत करुन शेतीपुरक उद्योगाला चांगली गती दयावी. शेतकऱ्यांची मुले उद्योग उभारणीत पुढे येतील त्यासाठी बँकांद्वारे प्रयत्न करावेत.  त्याद्वारे  राज्य बँकेचे चांगले काम यातून घडू शकते. राज्य बॅंकेतील ठेवीदारांच्या ठेवीत वाढ होत आहे हे बँकेच्यादृष्टिने चांगले आहे. बँकेसाठी तारण महत्वाचे असून ज्या जिल्हा बँका बंद आहेत त्याबाबत राज्य शासनाने जिल्हा मध्यवर्तीच्या बाजुने भुमिका घेतली आहे. सहकारी बँकेला राज्य बँक ही जवळची असून राज्य बँकेला पुन्हा गतवैभव प्राप्त होत आहे, ही आनंदाची बाब असल्याचे श्री. खोतकर यांनी सांगितले.   

आमदार हेमंत पाटील म्हणाले की, शेती उद्योगांना आर्थिक आधार देण्याचे बँकेने काम केले आहे. प्रशासकीय मंडळ आल्यानंतर ठेवीदारांची खूप मोठी विश्वासर्हता वाढली आहे. त्यामुळे बँकेला नावलौकीक मिळला आहे. काळानुसार अत्याधुनिक सुविधा महत्वाच्या असल्याचे त्यांनी सांगितले.

 आमदार नागेश पाटील आष्टीकर म्हणाले, जिल्ह्यात बँकेची मोठी ओळख पद्मश्री शामराव कदम यांनी दिली आहे. बँकेनी शेतकऱ्यांशी संलग्न राहून शेतकऱ्यांना मदत करावी.

माजी आमदार बाळासाहेब पाटील म्हणाले, बँकेचे सेवांबाबत वेळोवेळी मार्गदर्शन असून ठेवीदारांना चांगला व्याजदर दिला जातो. बँकेच्या पुढील प्रगतीसाठी त्यांनी शुभेच्छा दिल्या.  

अध्यक्षीय भाषणात डॉ. सुखदेवे म्हणाले की , सन 2017 मधील या पाचव्या बँकेचे उद्घाटन झाले आहे. या बँकेने प्रगती केली असून सहकार चळवळीत मोठे योगदान दिले आहे. शेती, साखर, दुग्ध उत्पादनातून आर्थिक विकासात राज्य सहकारी बँक जिल्हा बँकेबरोबर राहून मदत करणार आहे. ग्राहकाला चांगली सुविधा मिळण्यासाठी अत्याधुनिक सुविधा बँकेद्वारे दिल्या जाणार आहेत. बँकींग सेवेद्वारे सहकार क्षेत्राला पुर्वीचे वैभव मिळवून देण्यासाठी प्रयत्न केला जाईल, असे त्यांनी सांगितले.  

प्रास्ताविकात श्री. कर्नाड म्हणाले की,  नांदेड येथील बँकेची 46 वी शाखा आहे. ही बँक राज्याची शिखर बँक म्हणून ओळखली जाते. शेती, सहकारी संस्थांना राज्य बँकेने प्रकल्प उभारण्यासाठी कर्ज पुरवठा केला आहे. बँकेकडील ठेवीत एका वर्षात 45 टक्के वाढ झाली आहे. ही विश्वासर्हता ठेवीदारांनी बँकेवर ठेवली आहे. या ठेवी परत कर्ज रुपात वाटप केली जाणार आहे. बँकेची सेवा चांगली असून इतर बँकेशी स्पर्धा केली जात नाही. जिल्हा बँकेला मदत करण्यासाठी प्रयत्न केला जाईल. बँकेतील अत्याधुनिक विविध सेवांचा लाभ घ्यावा, असेही त्यांनी सांगितले.   

सुरवातील मान्यवरांच्या हस्ते वसंतनगर येथील या शाखेचे फित कापून, दीप प्रज्वलन करुन उद्घाटन करण्यात आले. हॉटेल सिटी प्राईड येथे संपन्न झालेल्या समारंभात आमदार हेमंत पाटील यांनी गोदावरी अर्बन मल्टिस्टेट क्रेडिट को-ऑप. सोसायटीच्यावतीने 50 लाख रुपये ठेवीचा पहिला धनादेश दि महाराष्ट्र स्टेट को-ऑपरेटिव्ह बँकेच्या नांदेड शाखेत जमा केला. नांदेड शाखेच्यावतीने पहिला गृह कर्ज धनादेशाचे वितरण मान्यवरांच्या हस्ते करण्यात आले. सुत्रसंचालन पंढीरानाथ बोकारे यांनी केले तर आभार नांदेड शाखेचे व्यवस्थापक गुरुनाथ देशमुख यांनी मानले. यावेळी विविध संस्थेचे पदाधिकारी, प्रतिनिधी, नागरीक उपस्थित होते.

000000