जिल्हाधिकारी कार्यालयात

आज पेन्शन अदालत

नांदेड, दि. 12 :- जिल्हाधिकारी कार्यालयात मंगळवारी 13 जून 2017 रोजी पेन्‍शन अदालत आयोजीत करण्‍यात आली आहे. जिल्‍ह्यातील महसूल विभागातून सेवानिवृत्‍त झालेले अधिकारी, कर्मचारी यांच्‍या अडचणी निवारण्‍यासाठी या दिवशी सकाळी 11 ते दुपारी 1.30 वाजेपर्यंत उपस्थित राहुन तक्रारीचे निवेदने दयावीत, असे आवाहन नांदेड जिल्हाधिकारी कार्यालयाच्यावतीने करण्‍यात आले आहे.

000000

जिल्ह्यात गत 24 तासात

 एकूण 64.26 मि.मी. पाऊस

          नांदेड, दि. 12 - जिल्ह्यात सोमवार 12 जून 2017 रोजी  सकाळी 8 वा. संपलेल्या गत 24 तासात एकुण 64.26 मिलीमीटर  पावसाची  नोंद  झाली  असून  जिल्‍ह्यात  दिवसभरात सरासरी 4.02  मिलीमीटर पाऊस झाला आहे.  तर जिल्ह्यात आतापर्यंत सरासरी 70.36 मि.मी. पावसाची  नोंद झाली आहे.

जिल्ह्यात 12 जून 2017 रोजी सकाळी 8 वा. संपलेल्या 24 तासात झालेला पाऊस मिलीमीटरमध्ये  तालुका निहाय पुढील  प्रमाणे  कंसात  एकूण  पाऊस : नांदेड- 0.13 (46.52), मुदखेड- 4.50 (56.95), अर्धापूर- 7.33 (66.32) , भोकर- 12.50  (111.25) , उमरी- निरंक (27.00), कंधार-2.00 (55.50), लोहा-2.00 (72.66), किनवट-3.86 (139.28), माहूर-0.50 (36.50), हदगाव-0.57 (218.32), हिमायतनगर-1.33 (63.49), देगलूर- निरंक  (43.47), बिलोली- 4.60 (32.60), धर्माबाद- निरंक (53.00), नायगाव-5.80  (34.00), मुखेड-19.14 (68.88) आज  अखेर  पावसाची सरासरी 70.36 (चालू वर्षाचा एकूण पाऊस 1125.74) मिलीमीटर आहे.

00000000

कौशल्य वृद्धी योजनांद्वारे युवकांनी

विकासाची संधी साधावी - जिल्हाधिकारी डोंगरे

तीन दिवसीय "मोदी फेस्ट"ला मल्टी पर्पज मैदानावर प्रारंभ

नांदेड दि. 10 :- केंद्र सरकारच्यावतीने युवकांच्या कौशल्य वृद्धी आणि स्वयंरोजगाराच्या संधीबाबत जास्तीतजास्त योजनांमधून भर देण्यात येत आहे. या कौशल्य विकास योजनांद्वारे संधीचा युवकांनी लाभ घ्यावा, असे आवाहन जिल्हाधिकारी अरुण डोंगरे यांनी आज येथे केले.

केंद्र सरकारच्या तीन वर्षे यशस्वी वाटचाली निमित्त आयोजित करण्यात आलेल्या मोदी फेस्ट (MODI Fest Making of Devloped India) "मोदी महोत्सव" या कार्यक्रमाचे आज जिल्हाधिकारी श्री. डोंगरे यांच्या हस्ते उद्घाटन करण्यात आले याप्रसंगी ते बोलत होते. वजिराबाद येथील मल्टी पर्पज मैदानावर या तीन दिवसीय "मोदी फेस्ट"चे आयोजन करण्यात आले आहे.

या उद्घाटन प्रसंगी अप्पर जिल्हाधिकारी संतोष पाटील, प्रदर्शनाचे संयोजक तथा एनएफडीसी-मुंबईचे समन्वय अधिकारी अंकुश अग्रवाल, भाजपाचे महानगर जिल्हाध्यक्ष डॉ संतुकराव हंबर्डे, नगरसेविका गुरप्रीतकौर सोडी, भाजपाचे युवा मोर्चा जिल्हाध्यक्ष दिलीपसिंघ सोडी, विनायकराव नांदेडकर, रामराव केंद्रे, विजय गंभीरे, शीतल खांडील, दिलीपसिंह ठाकूर, डॉ शीतल भालके, प्रमोद टेहरे, उभानलाल यादव, धीरज स्वामी, कोषाध्यक्ष बालाजी गिरगावकर, जिल्हा परिषद हायस्कुलचे मुख्याध्यापक श्री. कच्छवे आदींची उपस्थिती होती.

केंद्र शासनाच्या तीन वर्षेपुर्तीच्या अनुषंगाने शासनाच्या विविध योजनांची माहिती तळागाळपर्यंत पोहचविण्यासाठी माहिती व प्रसारण मंत्रालयाच्यावतीने देशातील तीनशे जिल्ह्यांची या वैशिष्ट्यपुर्ण कार्यक्रमासाठी निवड करण्यात आली आहे. त्यामध्ये नांदेड जिल्ह्याचा समावेश आहे. विविध योजनांची माहिती या प्रदर्शनात दृकश्राव्य माध्यमांद्वारे व प्रदर्शनाद्वारे देण्यात येणार आहे. सकाळी 10 ते दुपारी 3.30 यावेळेत हे प्रदर्शन सर्वांसाठी खुले राहणार आहे. प्रदर्शनात भारतीय स्टेट बँकेच्यावतीने विविध योजनांची माहिती देणारे सहा दालने उभारण्यात आली आहे. दिवसभरात या प्रदर्शनात केंद्र सरकारच्या कृषि कल्याण, आवास, विकास, पीक विमा, सुकन्या समृद्धी योजना, उज्ज्वल अशा अनेकविध योजनांची माहिती दृकश्राव्य स्वरुपात देण्यात येत आहे. यामुळे योजनांसाठी पात्र लाभार्थी, अर्ज करण्याची पद्धती, आदींची तपशीलवार माहिती मिळणार आहे.

प्रदर्शनाच्या उद्घाटन प्रसंगी जिल्हाधिकारी श्री. डोंगरे म्हणाले की, केंद्र सरकारने लोकाभिमुख आणि विकासाभिमुख विविध योजना कार्यांन्वीत केल्या आहेत. या योजनांची तपशीलवार माहिती सामान्य नागरिकांपर्यंत पोहचविण्यासाठी अशाप्रकारचे प्रदर्शन उपयुक्त ठरेल. विशेषत: कौशल्य विकासाच्या योजनांची युवकांनी माहिती घ्यावी, आणि त्यातील संधींचा पुरेपुर वापर करुन स्वत:चा विकास साधावा.

प्रदर्शनाचे सुरुवातीला फीत कापून उद्घाटन करण्यात आले. मान्यवरांच्या हस्ते दीपप्रज्वलन झाले. तसेच एनएफडीसीच्यावतीने तयार करण्यात आलेल्या माहिती पुस्तिकेचेही प्रकाशन करण्यात आले. मुख्याध्यापक कच्छवे यांनी प्रास्ताविक केले. जी. एम. कुलकर्णी यांनी सुत्रसंचलन केले व आभार मानले.  

000000

डॉ. भालचंद्र स्मृती दृष्टी दिन सप्ताहाचे उद्घाटन संपन्न

नांदेड दि. 10 :- डॉ. भालचंद्र स्मृती दृष्टी दिन सप्ताहाचे उद्घाटन जिल्हा शल्य चिकित्सक डॉ. बी. पी. कदम यांच्या हस्ते श्री गुरु गोबिंदसिंघजी स्मारक रुग्णालयात आज करण्यात आले.  हा सप्ताह 10 ते 16 जून 2017 या कालावधीत आयोजित करण्यात आला आहे.

भारतात अंधत्व दूर करण्यासाठी स्वतंत्रपणे राष्ट्रीय अंधत्व नियंत्रण कार्यक्रम सन 1976 पासून राबविण्यात येत आहे. राष्ट्रीय अंधत्व नियंत्रण कार्यक्रमांतर्गत दरवर्षी 10 जून हा दिवस डॉ. भालचंद्र स्मृती दृष्टी दिन म्हणून साजरा केला जातो. डॉ. रामचंद्र लक्ष्मण भालचंद्र यांचा जन्म 10 जून 1926 रोजी झाला. ते प्रख्यात नेत्र शल्य विशारद होते. त्यांनी त्यांच्या कालावधीत दहा हजार यशस्वी मोतीबिंदू शत्रक्रिया केल्या. त्यांचा मृत्यू 10 जून 1979 रोजी झाला. त्यांनी केलेल्या कार्याचा सन्मान म्हणून 10 जून हा दिवस डॉ. भालचंद्र स्मृती दृष्टी दिन म्हणून साजरा करण्यात येतो. यावेळी जिल्हा शल्य चिकित्सक डॉ.  कदम, अति.जिल्हा शल्यचिकित्सक डॉ. एच. आर.गुंटूरकर यांनी मार्गदर्शन केले.

यावेळी डॉ. भोसीकर, डॉ. साखरे, डॉ. लोकडे, डॉ. हजारी, डॉ. सोनकांबळे, डॉ. चिखलीकर, डॉ. बंडेवार यांची उपस्थिती होती. श्रीमती ज्योती पिंपळे यांनी नेत्रदान  करण्याविषयी आवाहन केले. प्रास्ताविक जिल्हा कार्यक्रम व्यवस्थापक (रा.अं.नि.का.) डॉ. एस. बी. सिरसीकर यांनी केले तर आभार नेत्र चिकित्सा अधिकारी व्ही. डी. दिक्षित यांनी मानले.

0000000

गोदावरीचे प्रदुषण रोखण्यासाठी युद्धपातळीवर

उपाय योजना कराव्यात - पर्यावरण मंत्री कदम

नांदेड दि. 9 :- गोदावरी नदीचे प्रदुषण होऊ नये यासाठी नांदेड वाघाळा शहर महानगरपालिकेने काटेकोर नियोजन करणे आवश्यक आहे. शहरातील सांडपाणी नाल्यांद्वारे नदीत मिसळू नये यासाठी योग्य त्या उपाय योजना युद्धपातळीवर कराव्यात, असे निर्देश राज्याचे पर्यावरण मंत्री रामदास कदम यांनी आज येथे दिले.

गोदावरी प्रदुषीत केल्याबद्दल प्रसंगी महापालिकेवर कठोर कारवाईचे संकेतही श्री. कदम यांनी दिले. जिल्हास्तरीय पर्यावरण आघात मुल्यांकन प्राधिकरण तसेच जिल्हास्तरीय पर्यावरण समितीच्या कामकाजाबाबत मंत्री श्री. कदम यांनी आज आढावा घेतला. या बैठकीत ते बोलत होते. जिल्हाधिकारी कार्यालय प्रांगणातील डॉ. शंकरराव चव्हाण नियोजन भवन येथे बैठक झाली.   

बैठकीस आ. सुभाष साबणे, आ. हेमंत पाटील, अप्पर जिल्हाधिकारी संतोष पाटील, प्रभारी अतिरिक्त मुख्य कार्यकारी अधिकारी सुधीर भातलंवडे, निवासी उपजिल्हाधिकारी जयराज कारभारी, उपविभागीय अधिकारी प्रदीप कुलकर्णी, मनपाचे उपायुक्त रत्नाकर वाघमारे, पर्यावरण समितीचे सदस्य डॉ. अर्जुन भोसले, सुरेश जोंधळे तसेच महाराष्ट्र प्रदुषण नियंत्रण मंडळाचे प्रादेशिक अधिकारी नामदेव दारसेवाड आदींची उपस्थिती होती.

बैठकीत बोलतांना श्री. कदम म्हणाले की, जिल्हा पर्यावरण समितीच्या बैठका नियमित होणे आवश्यक आहेत. या समितीच्या अध्यक्षांना दिलेल्या अधिकारांचा पुरेपुर वापर करण्यात यावा. गोदावरी नदी प्रदुषणाबाबत यापुर्वी मंत्रालयात घेण्यात आलेल्या बैठकीतील निर्देशांवर महापालिकेकडून कार्यवाही झाली नसल्याचे दिसते. गोदावरीत शहराचे सांडपाणी मिसळू नये यासाठी महापालिकेने शासन धोरणानुसार स्व:निधीतून उपाय योजना करणे आवश्यक आहे. त्यासाठी वेगळ्या तरतुदीची गरज नाही. हा खर्च पर्यावरण धोरणानुसार बंधनकारक आहे. घनकचरा विल्हेवाट लावण्याचा प्रकल्पही पुन्हा कार्यान्वीत करण्यात यावा.

यावेळी श्री. कदम यांनी महापालिकेकडून सांडपाणी तसेच घनकचरा प्रक्रियेबाबत करण्यात येणाऱ्या उपाय योजनांची माहिती घेतली. जिल्ह्यात सुरु असलेल्या स्टोन क्रशर, तसेच विविध उद्योगांकडून पर्यावरण रक्षणांच्या मानकांची काटेकोर अंमलबजावणी केली जावी यासाठी यंत्रणांनी दक्ष रहावे, असेही निर्देशीत केले. बैठकीत जिल्ह्यातील वृक्ष लागवड, तसेच पर्यावरण संवर्धनाच्या विविध बाबींचा आढावाही घेण्यात आला. यावेळी झालेल्या चर्चेत आमदार सर्वश्री पाटील, साबणे आदींनी सहभाग घेतला.  

त्यानंतर श्री. कदम यांनी गोवर्धनघाट, उर्वशीघाट येथे प्रत्यक्ष भेट देवून गोदावरी नदीत जाणाऱ्या सांडपाण्याच्या ठिकाणाची पाहणी केली. सांडपाणी नदी मिसळू नये यासाठी काटेकोर प्रयत्न करण्यात यावेत, यासाठी प्रसंगी कार्यवाहीत कुचराई करणाऱ्या यंत्रणांवर कारवाई करण्यात यावी, असे निर्देशही दिले. तुप्पा येथील घनकचरा प्रक्रिया प्रकल्पासही त्यांनी भेट दिली. तेथून उस्माननगर-शिराढोण-गळेगाव शिवारात वन विभागाच्यावतीने वृक्ष लागवड मोहिमेत करण्यात आलेल्या वृक्ष लागवडीची पाहणी करण्यासाठी श्री. कदम यांनी भेट दिली.

0000000

आंतरराष्ट्रीय योग दिनात मोठया संख्येने सहभाग व्हावे

-  जिल्हा क्रीडा अधिकारी गंगालाल यादव

नांदेड दि. 9 :- योग हा जीवनाचा आवश्यक भाग असून निरोगी जीवनासाठी नियमीत योगा करावा व जिल्ह्यात आयोजित कार्यक्रमाच्या ठिकाणी खेळाडू, विद्यार्थी, शासकीय अधिकारी-कर्मचारी, शिक्षक, क्रीडाप्रेमी, नागरीक, महिला आदींनी मोठया संख्येने सहभागी व्हावे, असे आवाहन जिल्हा क्रीडा अधिकारी गंगालाल यादव यांनी केले आहे.  

राज्य क्रीडा व युवक सेवा संचालनालय व नांदेड जिल्हा क्रीडा कार्यालयाच्यावतीने जिल्ह्यात  विविध ठिकाणी बुधवार 21 जून 2017 रोजी सकाळी 6.30 वा. आंतरराष्ट्रीय योग दिवस साजरा करण्यात येणार आहे. जिल्हयातील योग प्रशिक्षक, योगशिक्षक व तालुका क्रीडा संयोजक यांच्या सहकार्याने या कार्यक्रमाचे आयोजन करण्यात आले आहे.

            जिल्हयात बुधवार 21 जून रोजी आंतरराष्ट्रीय योग दिनाचे आयोजन पुढील प्रमाणे करण्यात आले आहे. नांदेड जिल्हा मुख्य कार्यक्रम- नांदेड जिल्हा क्रीडा संकुल बास्केटबॉल मैदान स्टेडीयम परीसर येथे क्रीडा अधिकारी एम. जे. सोनकांबळे हे कार्यक्रम प्रमुख म्हणून आहेत. लोहा तालुका- कै. विश्वनाथराव नळगे विद्यालय लोहा येथे व्ही. एल. नागेश्वर. नांदेड तालुका - तालुका क्रीडा संकुल मैदान सिडको नांदेड येथे प्रा. रमेश नांदेडकर. किनवट- बळीराम पाटील विद्यालय किनवट येथे प्रा. सय्यद फय्याज. माहूर- डॉ. शंकरराव चव्हाण विद्यालय आष्टा येथे डी. डी. चव्हाण. हदगाव- मुलींचे हायस्कुल हदगाव येथे बी. डी. काळे. हिमायतनगर- राजा भगीरथ विद्यालय हिमायतनगर येथे के. बी. शेनेवाड. कंधार- तालुका क्रीडा संकुल नवरंगपूरा कंधार येथे एम. जे. सोनकांबळे तर श्री शिवाजी कॉलेज कंधार येथे एस. एन चिवडे. नायगाव- मा. आ. शाळा कुंटूरतांडा ता. नायगाव येथे एम. जे. सोनकांबळे व जे. आर. पवार. धर्माबाद- तालुका क्रीडा संकुल धर्माबाद येथे कृष्णा परीवाले. अर्धापूर- तालुका क्रीडा संकुल अर्धापूर व भाऊराव चव्हाण विद्यालय येळेगाव येथे जी. बी. मदने. देगलूर- साधाना हायस्कुल देगलूर- सय्यद मुख्तार. बिलोली- श्री छत्रपती शिवाजी हायस्कुल शारदानगर सगरोळी येथे नंदु जाधव. मुखेड- क्रांतीसुर्य म. ज्यो. फुले विद्यालय राजूर बु. येथे एन. आर. पोटफोडे. उमरी- कृष्ण विद्यालय सिंदी ता. उमरी येथे श्री. पवळे. भोकर- जिल्हा परिषद हायस्कुल भोकर येथे प्रकाश खोकले. मुदखेड- तालुका क्रीडा संकुल मुदखेड येथे अमृत जाधव हे कार्यक्रम प्रमुख म्हणून राहतील.

या कार्यक्रमाचे क्रीडा अधिकारी सय्यद साजीद, एम. जे. सोनकांबळे, प्रवीण कोंडेकर, क्रीडा मार्गदर्शक श्रीमती शिवकांता देशमुख, अनिल बंदेल, आनंद गायकवाड, आनंद सुरेकर, संजय चव्हाण संयोजन करीत आहेत.

0000000

"उन्नत शेती-समृद्ध शेतकरी" उपक्रमासह विविध कामांना

जिल्हा अधीक्षक कृषि अधिकारी डॉ. मोटे यांनी दिल्या भेटी

नांदेड दि. 9 :- भोकर तालुक्यातील विविध गावांना जिल्हा अधीक्षक कृषि अधिकारी डॉ. तुकाराम मोटे यांनी भेटी देवून कृषि विभागामार्फत सुरु असलेल्या कामांची पाहणी केली व समाधान व्यक्त केले.  

रोहीणी नक्षत्राचा मुहूर्तावर "उन्नत शेती-समृद्ध शेतकरी" अभियानाद्वारे दिवशी बु येथे आयोजित शेतकरी प्रशिक्षणास मार्गदर्शन करताना शेतकऱ्यांशी संवाद साधून कृषि विभागामार्फत राबविण्यात येत असलेल्या विविध योजनांची माहिती, खरीप हंगामातील प्रमुख पिकांच्या पीक उत्पादन वाढीचे तंत्रज्ञान याबाबत सविस्तर मार्गदर्शन केले. मौजे दिवशी येथील सोयाबीन पिकाची उत्पादकता वाढविण्यासाठी माती परिक्षणासह नवीन जातीची लागवड, बीज प्रक्रिया, योग्य खत व्यवस्थापन, एकात्मिक किड व रोग व्यवस्थापन, दोन ओळी व रोपातील योग्य अंतरासह बीबीएफ यंत्राद्वारे लागवड करण्याबाबत तसेच सोयाबीनमध्ये तुरीचे आंतरपीक 4 :2 या प्रमाणात लागवड करण्याबाबत मार्गदर्शन केले.  

डॉ. मोटे पुढे म्हणाले की, तालुक्यात खरीप हंगामात लागवड होत असलेल्या पिकांबाबत तसेच उत्पादीत शेतमालाच्या बाजारातील दरांबाबत माहिती देतांना जागतीक उत्पादकता व त्याचा दरावर होणारा परिणाम याबाबत शेतकऱ्यांशी संवाद साधून सविस्तर चर्चा केली. तसेच यातून मार्ग काढण्यासाठी येत्या खरीप हंगामात लागवड करताना एकाच पिकाकडे न वळता कापूस, सोयाबीन, तुर, मुग, उडीद, ज्वारी इत्यादी विविध पिकांची लागवड करावी. जेणेकरुन उत्पादीत शेतीमालाला योग्य बाजारभाव मिळतील. त्यामुळे एकाच पिकाची लागवड न करता विविध खरीप पिकांची लागवड करण्याबाबत आवाहन करुन जलयुक्त शिवार अभियानांतर्गत प्रस्तावीत कामे सर्व यंत्रणानी वेळेत पूर्ण करण्याच्या सूचना दिल्या.  

"उन्नत शेती-समृद्ध शेतकरी" अभियानांतर्गत भोकर तालुक्यातील दिवशी गावातील कृषि वार्ताफलकाचे फीत कापून उद्घाटन डॉ. मोटे यांच्या हस्ते करण्यात आले.

जलयुक्त शिवार अभियानांतर्गत झालेल्या कामांची तसेच मागेल त्याला शेततळे कामांची पाहणी केली. मातुळ व बल्लाळ गावातील दाळीचे बांध, मागेल त्याला शेततळे, तसेच पिंपळढव, लामकणी, कुमणगाव, धारजणी, डौर, सायाळ येथील दाळीचे बांध तर सावरगाव गेट येथील वनविभागामार्फत  केलेल्या खोल सलग समतल चराची पाहणी केली. पोमनाळा येथील शेततळे कामाची पाहणी करुन कामाबद्दल समाधान व्यक्त केले.

धारजणी येथे ठिबकवरील कापूस, तुर पिकाच्या लागवडीची तर भोकर येथील केळी पिकाची पाहणी करुन तुरीच्या विरळणीबाबत मार्गदर्शन केले. भोकर तालुक्यातील विविध गावांना भेटी देवून शेतकऱ्यांशी संवाद साधला. कृषि विभागामार्फत चालू असलेल्या कामांची पाहणी केली.

तालुका कृषि अधिकारी आर. एम. देशमुख, मंडळ कृषि अधिकारी सदाशीव पाटील, कृषि पर्यवेक्षक सुनील चव्हाण, बी. डी. पुरी, रहिम यांच्यासह कृषि सहाय्यक सौ. कुलमुले, श्री. बल्लुरकर, लोसरवार, शिंदे, व्ही. डी. पाटील, वसमते, पवार, बारसे यांच्यासह तालुका तंत्रज्ञान व्यवस्थापक बोईनवाड उपस्थित होते.

00000