जुन्या पोलीस पाटील किंवा त्यांच्या वारसांकडे जन्म मृत्यू नोंदवह्या असल्यास तहसिल कार्यालयात जमा करण्याचे आवाहन

 जुन्या पोलीस पाटील किंवा त्यांच्या वारसांकडे जन्म मृत्यू

नोंदवह्या असल्यास तहसिल कार्यालयात जमा करण्याचे आवाहन

 

नांदेड, (जिमाका) दि.10 :-  मराठा समाजातील व्यक्तींना मराठा-कुणबी, कुणबी-मराठा, कुणबी प्रमाणपत्र देण्याबाबत गावातील जुन्या पोलीस पाटील किंवा त्यांच्या वारसांकडे गाव नमुना क्रमांक 14 (जन्म मृत्यू नोंदवह्या) उपलब्ध असतील तर त्यांनी अशा नोंदवह्या संबंधित तालुक्याचे तहसिल कार्यालयात रितसर जमा कराव्यात, असे आवाहन जिल्हाधिकारी अभिजीत राऊत यांनी केले आहेत.

 

मराठा समाजातील व्यक्तींना, मराठा-कुणबी, कुणबी-मराठा जातीचे प्रमाणपत्र देण्याबाबत शासन निर्णयातील तरतुदी विचारात घेवून कार्यवाही करण्याचे निर्देश आहेत. त्यानुसार मराठा-कुणबी, कुणबी-मराठा जातीचे प्रमाणपत्राच्या अनुषंगाने 1967 पूर्वी कार्यरत पोलीस पाटील यांचेकडील गाव नमुना क्रमांक 14 (जन्म मृत्यू नोंदवह्या) मध्ये कुणबी, कुणबी-मराठा, मराठा-कुणबी अशा जात नोंदी आढळण्याची शक्यता आहे. त्यामुळे जुने पोलीस पाटील किंवा त्यांच्या वारसांनी अशा नोंदवह्या उपलब्ध असल्यास तहसिल कार्यालयास जमा कराव्यात असे जिल्हा प्रशासनाने प्रसिध्दीपत्रकाद्वारे कळविले आहे.

0000

रब्बी हंगामात गहु, ज्वारी, हरभरा या पिकांसाठी 1 रुपयात पिक विमा

 रब्बी हंगामात गहु, ज्वारी, हरभरा

या  पिकांसाठी 1 रुपयात पिक विमा

 

नांदेड, (जिमाका) दि.10 :- प्रधानमंत्री पिक विमा योजना रब्बी हंगाम 2023-24 मध्ये एक रुपयामध्ये पिक विमा योजना राबविण्याचा निर्णय घेण्यात आला आहे. कर्जदार व बिगर कर्जदार शेतकऱ्यांना पिक विमा उतरविण्याची अंतिम मुदत ज्वारी  जि. पिकासाठी 30 नोव्हेंबर 2023 असून गहू बा. व हरभरा पिकासाठी 15 डिसेंबर आहे. अधिक माहितीसाठी शेतकऱ्यांनी तालुका कृषि अधिकारी किंवा जवळच्या बँकेशी संपर्क साधावा, असे आवाहन जिल्हा अधिक्षक कृषि अधिकारी भाऊसाहेब बऱ्हाटे यांनी केले आहे.

 

प्रधानमंत्री पिक विमा योजना कर्जदार व बिगर कर्जदार शेतकऱ्यांसाठी ऐच्छिक आहे. पिक पेरणीतून काढणीपर्यतचा कालावधी नैसर्गिक आग, वीज, कोसळणे, गारपीट, वादळ, चक्रीवादळ, पूर, क्षेत्र जलमय होणे, भुस्खलन, दुष्काळ, पावसातील खंड इ. बाबीमुळे पिकांच्या उत्पादनात येणारी घट काढणीपश्चात नुकसान इ. जोखीम यामध्ये समाविष्ट करण्यात आले आहे. नांदेड जिल्ह्यातील गहु बा, ज्वारी (जि), हरभरा या पिकांसाठी ही योजना लागू आहे.

 

या योजनेअंतर्गत पिक, विमा संरक्षित रक्कम व विमा हप्ता, विमा लागू असलेले तालुके, पिक विमा भरण्याचा अंतिम दिनांक पुढीलप्रमाणे आहे. गहू बा. पिकासाठी हेक्टरी 42 हजार 500 विमा संरक्षित रक्कम रुपये असून विमा हप्ता रु. 1 आहे. नांदेड, अर्धापूर, मुदखेड, बिलोली, लोहा, कंधार, नायगाव, धर्माबाद, किनवट, हिमायतनगर, भोकर, हदगाव या तालुक्यासाठी लागू असून विमा भरण्याची अंतिम मुदत 15 डिसेंबर आहे. ज्वारी जि. पिकासाठी 33 हजार 750 विमा संरक्षण असून 1 रुपयात नांदेड, देगलूर, नायगाव, बिलोली, मुखेड, धर्माबाद, किनवट, हदगाव या तालुक्यातील शेतकऱ्यांना 30 नोव्हेंबर 2023 पर्यत विमा भरता येणार आहे. हरभरा पिकासाठी 37 हजार 500 विमा संरक्षित रक्कम असून नांदेड, अर्धापूर, मुदखेड, बिलोली, लोहा, कंधार, नायगाव, धर्माबाद, मुखेड, किनवट, माहूर, हिमायतनगर, भोकर, हदगाव, उमरी या तालुक्यातील शेतकऱ्यांना 15 डिसेंबर 2023 पर्यत 1 रुपयात विमा भरता येणार आहे, असे कृषी अधीक्षक कृषी कार्यालयाने कळविले आहे.

0000

विकसित भारत संकल्प यात्रा मोहिमेद्वारे पात्र लाभार्थ्यांपर्यंत अधिकाधिक योजना पोहोचवा - जिल्हाधिकारी अभिजीत राऊत

 विकसित भारत संकल्प यात्रा मोहिमेद्वारे

 

पात्र लाभार्थ्यांपर्यंत अधिकाधिक योजना पोहोचवा

 

-         जिल्हाधिकारी अभिजीत राऊत

 

·         15 नोव्हेंबर रोजी किनवट येथे मोहीमेचा शुभारंभ

 

नांदेड, (जिमाका) दि.10 :-  शासनाच्या योजनांचा लाभ पात्र लाभार्थ्यांपर्यंत पोहोचविण्याच्या उद्देशाने विकसित भारत संकल्प यात्रा ही देशव्यापी मोहीम राबविण्यात येत आहे. सुरुवातीला अनुसूचित जमाती असलेल्या 110 जिल्ह्यांना ही यात्रा भेट देणार आहे. यात किनवट तालुक्याचा समावेश आहे.  किनवट येथे 15 नोंव्हेंबर रोजी या यात्रेच्या रथाचे स्वागत व मोहीमेचा शुभारंभ होणार आहे. या मोहीमेच्या यशस्वी अंमलबजावणीसाठी विभाग प्रमुखांनी त्या-त्या विभागाच्या योजना वंचित लाभार्थ्यांपर्यत पोहचविण्याच्या दृष्टीने योग्य नियोजन करावे, असे निर्देश जिल्हाधिकारी अभिजीत राऊत यांनी दिले.

 

जिल्हाधिकारी कार्यालयात आयोजित बैठकीत ते बोलत होते. यावेळी जिल्हा परिषदेच्य मुख्य कार्यकारी अधिकारी मीनल करनवाल, सहायक जिल्हाधिकारी तथा प्रकल्प अधिकारी कार्तीकेएन एस, जिल्हा आरोग्य अधिकारी डॉ. बालाजी शिंदे, जिल्हा नियोजन अधिकारी सुधाकर आडे, जिल्हा अधिक्षक कृषि अधिकारी भाऊसाहेब बऱ्हाटे, आत्मा प्रकल्प उपसंचालक माधुरी सोनवणे, जिल्हा पुरवठा अधिकारी रुपाली चौगुले, जिल्हा सूचना-विज्ञान अधिकारी प्रफुल्ल कर्णेवार आदीची तर सर्व तालुक्याचे मुख्याधिकारी, गटविकास अधिकारी, तालुका आरोग्य अधिकारी, शिक्षण विस्तार अधिकारी यांची दूरदृश्यप्रणालीद्वारे उपस्थिती होती.

 

जिल्ह्यात विकसित भारत संकल्प यात्रा मोहीमेचा पहिला टप्पा 15 ते 23 नोंव्हेंबर या कालावधीत किनवट येथे प्रस्तावित आहे. या कालावधीत ही यात्रा मोहीम 16 ग्रामपंचायतीना भेट देणार आहे. या मोहीमेच्या अंमलबजावणीसाठी नोडल अधिकारी नेमणूक, ग्रामपंचायतीचा रस्त्याचा नकाशा, कार्यक्रमाच्या दिवशी नेमलेल्या नोडल अधिकाऱ्यांची माहिती पोर्टलवर अपलोड करणे, कार्यक्रमाच्या दिवशी कार्यक्रमाचे फोटो व व्हीडीओ अपलोड करणे याबाबत माहिती जिल्हाधिकारी अभिजीत राऊत यांनी किनवट तालुक्याच्या मुख्याधिकारी व गटविकास अधिकारी यांना सांगितली. तसेच या मोहीमेसाठी तालुका व ग्रामपंचायत स्तरावर समित्या गठीत करुन प्रत्येक कामासाठी समन्वय अधिकारी नियुक्त करावेत. स्थानिक पातळीवर लोकप्रतिनिधी, लाभार्थी, व्यापक जनसहभाग व जिल्हा समन्वयक यांच्या सहकार्याने ही मोहिम यशस्वी राबविण्याच्या सूचना जिल्हाधिकारी अभिजीत राऊत यांनी संबंधित विभागाला दिल्या.

 

विकसित भारत संकल्प यात्रा या मोहीमेचा शुभारंभ 15 नोव्हेंबर रोजी किनवट येथे होणार आहे. त्या अनुषंगाने तालुका व ग्रामपंचायत स्तरावर समित्या तात्काळ गठीत कराव्यात. या यात्रेच्या माध्यमातून आपल्याला वंचित लाभार्थ्यांपर्यत पोहोचायचे आहे. त्यासाठी संबंधित विभागाने लाभार्थ्यांच्या याद्या तयार करण्याच्या कामावर प्राधान्याने भर द्यावा, असे जिल्हा परिषदेच्या मुख्य कार्यकारी अधिकारी मीनल करनवाल यांनी स्पष्ट केले. या मोहीमेत आरोग्य, कृषी, आवास, आयुष्यमान भारत, पीएम गरीब कल्याण अन्न योजना, पीएम विश्वकर्मा, जन धन योजना, अटल पेन्शन योजना, बीमा योजना, पीएम पोषण अभियान, दिनदयाल अंत्योदय योजना आदीचा समावेश आहे. तसेच आदीवासी विभागासाठी विशेष योजना, स्कॉलरशिप योजना, वंदन योजना, उज्वला योजना, उजाला योजना अशा विविध विभागाच्या योजनाचा यात समावेश असणार आहे. या योजनाचा लाभ, अर्ज भरुन घेणे याबाबीचा यात समावेश असणार आहे. या मोहीमेच्या अनुषंगाने केलेली कार्यवाही तसेच फोटो, व्हीडीओ संबंधित अधिकाऱ्यांनी पोर्टलवर अपलोड करण्याबाबत त्यांनी सूचना दिल्या.

0000

 दुध व दुग्धजन्य पदार्थात भेसळ केल्यास होणार कारवाई

·         जिल्हा प्रशासनावतीने धडक तपासणी मोहिम सुरु

नांदेड (जिमाका) दि. 9 :- दिवाळी सणामुळे दुग्धजन्य पदार्थाची खरेदी, विक्री मोठया प्रमाणात होते. या कालावधीत दुध व दुग्धजन्य पदार्थात भेसळ होण्याची शक्यता नाकारता येत नाही. भेसळ रोखण्यासाठी जिल्हा प्रशासनाच्यावतीने अचानक धाड टाकून दुग्धजन्य पदार्थाची तपासणी करण्यात येत आहे. या तपासणीत दोषी आढळून येणाऱ्या विरुध्द कायदेशिर कार्यवाही करण्यात येईल, असे आवाहन अपर जिल्हाधिकारी तथा समितीचे अध्यक्ष पी.एस. बोरगावकर यांनी केले आहे.

 

जिल्ह्यात दुध व दुधजन्य पदार्थातील होणारी भेसळ रोखण्यासाठी जिल्हा प्रशासनाच्यावतीने जिल्हास्तरीय समिती गठीत करण्यात आलेली आहे. जिल्हास्तरीय समिती मार्फत जिल्ह्यातील दूध व दुग्धजन्य पदार्थातील भेसळ रोखण्यासाठी धडक मोहीम राबविण्यात येत आहे. या मोहिमेत 31 ऑक्टोबर रोजी शहरातील वजिराबाद भागातील जनप्रिया मिष्ठान भांडार, नांदेड येथे धाड टाकून दुध व दुग्धजन्य पदार्थाची तपासणी केली. या तपासणीत दोन दुग्धजन्य पदार्थ बासुंदी व खवा असे दोन पदार्थाचे नमुने घेवून शासकीय प्रयोग शाळेत पाठविण्यात आले आहेत असे जिल्हा दुग्धव्यवसाय विकास अधिकारी यांनी प्रसिध्दीपत्रकाद्वारे कळविले आहे.

00000

 तेलंगणा राज्याच्या सिमेलगत गावातील

मद्यविक्री अनुज्ञप्त्या बंद ठेवण्याचे आदेश

 

नांदेड, (जिमाका) दि. 9 :- तेलंगणा राज्य सार्वत्रिक विधानसभा निवडणूक-2023 ची निवडणूक प्रक्रिया सुरु आहे. या निवडणुकीच्या अनुषंगाने तेलंगणा राज्याच्या सीमेपासून 5 कि.मी. परिसरातील नांदेड जिल्ह्याच्या हद्दीतील सर्व किरकोळ देशी, विदेशी व ताडी मद्यविक्री अनुज्ञप्त्या बंद ठेवण्याचे आदेश जिल्हाधिकारी अभिजीत राऊत यांनी निर्गमीत केले आहेत. हा आदेश दिनांक 28.11.2023 रोजी सायं 5 वाजेपासून ते दिनांक 30.11.2023 रोजी मतदान संपेपर्यंत लागू राहिल. याचबरोबर मतमोजणीच्या दिवशी 3 डिसेंबर 2023 रोजी संपूर्ण दिवस मद्यविक्री अनुज्ञप्त्या बंद ठेवण्याचे आदेश लागू राहिल. जिल्हाधिकारी अभिजीत राऊत यांनी लोकप्रतिनिधीत्व अधिनियम 1951 चे कलम 135 (सी) मधील तरतुदीनुसार हा आदेश निर्गमित केला आहे.  

 

या निवडणुकीचे मतदान 30 नोव्हेंबर 2023 रोजी तर मतमोजणी 3 डिसेंबर 2023 रोजी संबंधित निवडणूक निर्णय अधिकारी यांनी निश्चित केलेल्या स्थळी होणार आहे. या आदेशाचे उल्लंघन करून मद्यविक्री करीत असल्याचे आढळून आल्यास संबंधितावर गुन्हा दाखल करून अनुज्ञप्ती रद्द करण्याची कारवाई करण्यात येईल, असेही आदेशात नमूद केले आहे.  

000000

मराठा-कुणबी, कुणबी-मराठा प्रमाणपत्र देण्यासाठी

जिल्हाधिकारी व उपविभागीय कार्यालयात स्वतंत्र कक्ष

नांदेड, (जिमाका) दि. 9 :- मराठा समाजातील व्‍यक्‍तींना, मराठा-कुणबी, कुणबी-मराठा जातीचे प्रमाणपत्र देण्‍यासाठी नांदेड जिल्हाधिकारी कार्यालय व उपविभागीय कार्यालयात स्वतंत्र कक्ष तयार करण्यात आले आहेत. कुणबी नोंदी असलेल्या कागदपत्रांची पडताळणी नागरिकांनाही करता यावी यासाठी  www.nannded.gov.in हे विशेष संकेतस्थळ तयार करण्यात आले आहे. जिल्‍ह्यातील विविध विभागाकडील सन 1967 पुर्वीच्‍या अभिलेखांची तपासणी करून, ज्‍या अभिलेखात कुणबी नोंदी आढळून आल्‍या आहेत ते अभिलेख या संकेतस्थळावर पाहता येतील. मराठा समाजातील नागरिकांनी या संकेतस्थळावरील नोंदी तपासून आपल्या वंशावळीची पाहणी करावी. तसेच त्या अभिलेखाचा संदर्भ देवून आपल्या तालुक्याचे उपविभागीय अधिकारी कार्यालयाकडे कुणबी दाखला प्रमाणपत्रासाठी रितसर अर्ज करावा, असे आवाहन जिल्हाधिकारी अभिजीत राऊत यांनी केले आहे.  

मराठा समाजातील व्‍यक्‍तींना, मराठा-कुणबी, कुणबी-मराठा जातीचे प्रमाणपत्र देण्‍यासंदर्भात शासनाच्‍या सामान्‍य प्रशासन विभागाने 31 ऑक्टोंबर 2023 रोजी जारी केलेल्‍या शासन निर्णयातील तरतूदीं विचारात घेवून कार्यवाही करण्‍याबाबतचे निर्देश सक्षम प्राधिकारी / संबंधीत तालुक्‍याचे उपविभागीय अधिकारी यांना देण्‍यात आले आहेत. त्‍याअनुषंगाने मराठा समाजातील नागरिकांना कुणबी दाखले देण्‍याची प्रक्रिया सुलभ होण्‍यासाठी जिल्‍ह्यात जिल्‍हाधिकारी कार्यालयात स्‍वतंत्र विभाग सुरू केला आहे.

00000

प्रधानमंत्री पिक विमा योजेनेअंतर्गत

जिल्ह्यास 311 कोटी रुपयांचा अग्रीम पिक विमा मंजूर

 

·  जिल्हा प्रशासनाच्या समाधानकारक उत्तरांमुळे पिक विमा कंपनीने विमा केला मान्य

 

नांदेड, (जिमाका) दि. 9 :- जिल्ह्यात 93 महसूल मंडळामध्ये हंगामातील प्रतिकूल परिस्थितीमुळे शेतकऱ्यांना आर्थिक नुकसानीला सामोरे जावे लागले. यातून शेतकऱ्यांना सावरण्यासाठी कृषि विभाग व जिल्हा प्रशासनातर्फे शेतकऱ्यांच्या हक्काचा अग्रीम पिक विमा त्यांच्या पर्यंत पोहोचावा यासाठी आग्रही भूमिका घेतली होती. सुरुवातीला पिक विमा कंपनीने यावर घेतलेले अक्षेप जिल्हा प्रशासनाच्या समाधानकारक उत्तरामुळे मागे घेतले असून जिल्ह्यातील सोयाबिन उत्पादक शेतकऱ्यांना आता 311 कोटी रुपयांचा अग्रीम पिक विमा मंजूर झाल्याचे जिल्हाधिकारी अभिजीत राऊत यांनी सांगितले.  

 

प्रधानमंत्री पिक विमा योजने अंतर्गत नांदेड जिल्ह्यामध्ये सोयाबीन पिकासाठी सर्व 93 महसूल मंडळामध्ये हंगामातील प्रतिकूल परिस्थिती (मिड सिझन अँडव्हर्सिटी) मंजूर करण्यात आली. यावर्षी खरीप हंगामामध्ये माहे जुलै मध्ये मोठ्या प्रमाणात अतिवृष्टी झाली व त्यानंतर माहे ऑगस्ट मध्ये मोठ्या प्रमाणात पावसामध्ये खंड पडला होता. परिणामी सोयबीन पिकाचे मोठ्या प्रमाणात नुकसान झाले होते. त्या अनुषंगाने जिल्ह्यातील शेतकऱ्यांना 25 टक्के अग्रीम नुकसान भरपाई म्हणून 311 कोटी रुपये मंजूर झाल्याने दिवाळीपूर्वी शेतकऱ्यांना मोठा दिलासा मिळाला आहे.     

 

नांदेड जिल्ह्यासाठी प्रधानमंत्री पिक विमा योजना ही युनायटेड इंडिया इन्शुरन्स कंपनीमार्फत उपलब्ध करून दिली आहे. जिल्ह्यातील पिक विमाधारक शेतकऱ्यांना 25 टक्के अग्रीम नुकसान भरपाई मिळावी यासाठी जिल्हाधिकारी अभिजित राऊत यांनी 28 सप्टेंबर 2023 रोजी अधिसूचना लागू केली होती. विमा कंपनीने त्यावर जिल्हास्तरीय समितीकडे आक्षेप नोंदविले. नोंदविलेल्या आक्षेपावर जिल्हास्तरीय सुनावणी घेण्यात आली. कृषी विभागाने आक्षेपांचे योग्य खंडन केले. याचबरोबर जिल्हाधिकारी अभिजीत राऊत, जिल्हास्तरीय समिती व सन्माननिय लोकप्रतिनिधी यांनी सातत्याने पाठपुरावा केला. यामुळे विमा कंपनीने सोयाबीन पिकासाठी जिल्ह्यातील सर्व तालुक्यातील सर्व महसूल मंडळांना अधिसूचना लागू करण्याचे मान्य केले.

00000