वृत्त क्र. 534

नांदेड शहरातील दहा व्यक्तींना कोरोनाची बाधा 
सहा महिन्याच्या बालकाचा समावेश

तीन बाधित बरे झाल्याने सुट्टी ; दोन व्यक्तींचा मृत्यू

नांदेड (जिमाका) दि. 10 :- नांदेड शहरात आज सायं. 5 वाजेपर्यंत प्राप्त झालेल्या अहवालात 10 व्यक्तींना कोरानाची बाधा झाल्याने जिल्ह्यातील ही संख्या 203 वर पोहचली आहे. आज या दहा बाधितांपैकी 8 पुरुष असून त्यांचे वय अनुक्रमे 12, 43, 45, 47, 48, 54, 55 व सहा महिन्याच्या बालकाचा समावेश आहे. 5 व्यक्ती या इतवारा नांदेड या बाधित क्षेत्रातील असून 1 व्यक्ती मालेगाव रोड तर 2 व्यक्ती सिडको नांदेड  परिसरातील आणि 2 महिला वय वर्षे 50 व 10 असून त्यापैकी एक चौफाळा तर एक इतवारा नांदेड येथील आहे. यातील 9 व्यक्तींची सद्यस्थितीत प्रकृती स्थिर आहे. यातील 3 रुग्ण बरे झाल्याने त्यांना सुट्टी देण्यात आली. या 3 व्यक्तीसह एकुण 137 व्यक्ती हे कोरोनाच्या आजारातून बरे झाले आहेत.

डॉ. शंकरराव चव्हाण शासकीय वैद्यकीय रुग्णालय येथे उपचारा दरम्यान दोन बाधित व्यक्तींचा मृत्यू झाला असून त्यात 65 वर्षाचा एक व्यक्ती इतवारा नांदेड व 45 वर्षाचा एक पुरुष हिंगोली जिल्ह्यातील वसमत येथील आहे. या रुग्णास उच्च रक्तदाब, श्वसनाचा त्रास आणि मधुमेह इत्यादी आजार होते. औषधोपचार सुरु असलेल्या 55 बाधितांपैकी 3 व्यक्ती 65 वर्षे वयाची 1 स्त्री आणि दोन पुरुष अनुक्रमे 38 व 74 वर्षे वयाचे असून त्यांची प्रकृती गंभीर स्वरुपाची आहे.

आतापर्यंत कोरोनामुळे मृत्यूमुखी पडणाऱ्यांची संख्या 11 झाली आहे. जिल्ह्यात बाधित व्यक्तींपैकी डॉ. शंकरराव चव्हाण शासकीय वैद्यकीय महाविद्यालय विष्णुपुरी नांदेड येथे 14 बाधित व्यक्तींवर, एनआरआय यात्री निवास कोविड केअर सेंटर येथे 39, माहूर ग्रामीण रुग्णालय कोविड केअर सेंटर 1 बाधित व्यक्तीवर तज्ज्ञ डॉक्टरांच्या निरीक्षणाखाली उपचार सुरु आहेत. एक बाधित व्यक्ती औरंगाबाद येथे संदर्भीत करण्यात आला आहे. बुधवार 10 जून रोजी 79 व्यक्तींचे स्वॅब तपासणीसाठी पाठविण्यात आले असून त्यांचा अहवाल उद्या सायंकाळी पर्यंत प्राप्त होतील.

जिल्ह्याची कोरोना विषयी संक्षीप्त माहिती पुढील प्रमाणे आहे.

सर्वेक्षण- 1 लाख 44 हजार 13, 
घेतलेले स्वॅब 4 हजार 658, 
निगेटिव्ह स्वॅब 4 हजार 92, 
आज पॉझिटिव्ह स्वॅब संख्या 10, 
एकुण पॉझिटिव्ह बाधित व्यक्ती 203, 
स्वॅब तपासणी अनिर्णीत संख्या 177, 
स्वॅब नाकारण्यात आलेली संख्या-81, 
मृत्यू संख्या- 11, 
रुग्णालयातून सुट्टी दिलेली संख्या- 137, 
रुग्णालयात उपचार घेत असलेले बाधित व्यक्ती 55, 
स्वॅब तपासणी चालू व्यक्तींची 79 एवढी संख्या आहे.

कोरोना संदर्भात जनतेने अफवांवर विश्वास ठेवू नये तसेच मनात कुठल्याही प्रकारची भिती न बाळगता अत्यावश्यक कामाशिवाय घराबाहेर पडू नये असे आवाहन नांदेडचे जिल्हा शल्य चिकित्सक डॉ. निळकंठ भोसीकर यांनी केले आहे. तसेच सर्व जनतेने आपल्या मोबाईलवर “आरोग्य सेतू ॲप” डाऊनलोड करुन घ्यावे जेणे करुन आपल्या सभोवती कोरोना बाधित रुग्ण असल्यास आपणास हे ॲप सतर्क करेल असे डॉ. भोसीकर यांनी स्पष्ट करुन प्रशासनास जनतेने सहकार्य करण्याचे आवाहन केले आहे.

00000

वृत्त क्र. 535

जिल्हा परिषदेची सोमवारी सर्वसाधारण सभा

नांदेड (जिमाका) दि. 9 :-  नांदेड जिल्हा परिषदेची विशेष सर्वसाधारण सभा सोमवार 15 जून 2020 रोजी दुपारी 1 वा. व्हिडीओ कॉन्फरन्स गुगल मीट (Video Conference Google Meet) या ॲपद्वारे व जिल्हा परिषदेचे सदस्य यांच्या कार्यक्षेत्रातील पंचायत समितीमध्ये आयोजित करण्यात आली आहे. संबंधितांनी याची नोंद घ्यावी, असे आवाहन सचिव तथा जिल्हा परिषदेचे उपमुख्य कार्यकारी अधिकारी (सामान्य प्रशासन) यांनी केले आहे.

00000

वृत्त क्र. 524

महाराष्ट्र जमीन महसूल नियम 1971 च्या

नियम 11 मध्ये सुधारणा करणारी अधिसूचना प्रसिद्ध

सूचना, हरकती सादर करण्याचे आवाहन  

नांदेड (जिमाका) दि. 9 :- महाराष्ट्र शासन राजपत्र असाधारण भाग चार-ब दि. 14 फेब्रुवारी 2020 अन्वये महाराष्ट्र जमीन महसूल (सरकारी जमिनीची विल्हेवाट करणे) नियम, 1971 च्या नियम 11 मध्ये सुधारणा करणारी अधिसूचना पुढीलप्रमाणे प्रसिद्ध करण्यात आली आहे.

नियमांचा मसुदा

या नियमांना, “महाराष्ट्र जमीन महसूल (सरकारी जमिनीची विल्हेवाट करणे) (द्वितीय सुधारणा) नियम, 2020” असे म्हणावे. महाराष्ट्र जमीन महसूल (सरकारी जमिनीची विल्हेवाट करणे) नियम, 1971 मधील नियम, 11 च्या पोट-नियम (5) मध्ये शब्द आणि अंकात, “रुपये 35,000” या मजकुराऐवजी “रुपये 8,00,000” हा मजकूर दाखल करण्यात येईल.

या सुधारणेच्या अनुषंगाने नागरिकांच्या काही हरकती व सूचना असल्यास त्यांनी त्या, या कार्यालयास सादर कराव्यात, असे आवाहन निवासी उपजिल्हाधिकारी नांदेड यांनी केले आहे.  

00000

वृत्त क्र. 523   

प्राणी संरक्षण कायद्याच्या प्रभावी अंमलबजावणीसाठी

सदस्यांचा पुढाकार आवश्यक - जिल्हाधिकारी डॉ. विपीन  

नांदेड (जिमाका) दि. 8 :- प्राणी संरक्षण कायदाचे जिल्ह्यामध्ये प्रभावीपणे अंमलबजावणी करण्याकरीता जिल्हास्तरीय प्राणी क्लेश प्रतिबंधक समितीच्या सदस्यांनी योग्य ती खबरदारी घ्यावी अशी सूचना जिल्हाधिकारी डॉ. विपीन इटनकर यांनी आज दिली. जिल्हास्तरीय प्राणी क्लेश प्रतिबंधक समितीची बैठक जिल्हाधिकारी यांच्या निजी कक्षात आज संपन्न झाली. यावेळी जिल्हाधिकारी डॉ. विपीन बोलत होते.   

बैठकीस जिल्हा परिषदेचे मुख्य कार्यकारी अधिकारी डॉ. शरद कुलकर्णी, निवासी उपजिल्हाधिकारी डॉ. सचिन खल्लाळ, उप्रादेशिक परिवहन अधिकारी अविनाश राऊत, सहाय्यक आयुक्त पशुसंवर्धन डॉ. सखाराम खुणे, जिल्हा पशुसंवर्धन अधिकारी डॉ. शिवाजी पवार, पशुधन विकास अधिकारी डॉ. अरविंद गायकवाड, अशासकीय सदस्य डॉ. विजय लाड, शंकर कट्टी यांच्यासह शासकीय, अशासकीय सदस्यांची उपस्थिती होती.

मुक्या प्राणीमात्रांच्या अमानवीय पद्धतीने वाहतूकीचे प्रकार आजही सर्रास होतांना आढळतात. मानवतेच्या दृष्टिकोणातून विचार करता तसे पाहिले तर यासाठी कायदाच्या बडग्याची आवश्यकता नाही. तथापि असे प्रकार नियंत्रणात रहावे व मुक्या प्राण्यांना त्रास होऊ नये, प्राणीमात्रांचे संरक्षण व्हावे यासाठी भारतीय संविधानातील परिच्छेद क्र. 51 अ नुसार प्राणी संरक्षण कायदा अस्तित्वात आला आहे.  

00000

वृत्त क्र. 521

महाराष्ट्र जमीन महसूल नियम 1971 च्या

नियम 11 मध्ये सुधारणा करण्यासाठी अधिसूचना

नांदेड (जिमाका) दि. 8 :- महाराष्ट्र जमीन महसूल संहिता, 1966 (1966 चा महाराष्ट्र अधिनियम 41) याच्या कलम 328, च्या पोट-कलम (1) व पोट-कलम (2) चे खंड (चार), (दहा), (चौदा) आणि (त्रेसष्ठ) अन्वये प्रदान करण्यात आलेल्या अधिकारांचा व त्याबाबत महाराष्ट्र शासनास समर्थ करणाऱ्या इतर सर्व अधिकारांचा वापर करुन महाराष्ट्र जमीन महसूल (सरकारी जमिनीची विल्हेवाट करणे) नियम 1971 मध्ये सुधारणा करण्यासाठी पुढील नियम करीत आहेत.

या नियमाचा पुढील मसुदा उक्त संहितेच्या कलम 329, च्या पोट-कलम (1) द्वारे आवश्यक असल्याप्रमाणे, त्याद्वारे बाधा पोहचण्याचा संभव असलेल्या सर्व व्यक्तीच्या माहितीसाठी याद्वारे प्रसिद्ध करण्यात येत आहे आणि अशी नोटीस देण्यात येत आहे की, उक्त मसुदा दिनांक 31 मार्च 2020 किंवा त्यानंतर महाराष्ट्र शासन विचारात घेईल.

महाराष्ट्र शासनाचे अपर मुख्य सचिव (महसूल) महसूल व वन विभाग मादाम कामा मार्ग, हुतात्मा राजगुरु चौक मंत्रालय मुंबई 400032 यांचेकडे वरील दिनांकास अथवा त्यापूर्वी मसुद्याच्या संबंधात कोणत्याही व्यक्तीकडून प्राप्त होणाऱ्या हरकती व सूचना शासनाकडून विचारात घेण्यात येतील.

नियमांचा मसुदा

या नियमांना, “महाराष्ट्र जमीन महसूल (सरकारी जमिनीची विल्हेवाट करणे) (द्वितीय सुधारणा) नियम, 2020” असे म्हणावे. महाराष्ट्र जमीन महसूल (सरकारी जमिनीची विल्हेवाट करणे) नियम, 1971 मधील नियम, 11 च्या पोट-नियम (5) मध्ये शब्द आणि अंकात, “रुपये 35,000” या मजकुराऐवजी “रुपये 8,00,000” हा मजकूर दाखल करण्यात येईल, अशी अधिसूचना महाराष्ट्र शासनाचे सह सचिव रमेश चव्हाण यांनी महाराष्ट्र शासन राजपत्र असाधारण भाग चार-ब दि. 14 फेब्रुवारी 2020 रोजी प्रसिद्ध केली आहे, अशी माहिती जिल्हाधिकारी नांदेड यांनी दिली आहे.

00000

वृत्त क्र. 520

नांदेड शहरातील 2 व्यक्ती पॉझिटिव्ह

एका महिलेचा मृत्यू

नांदेड (जिमाका) दि. 8 :- कोरोना बाधितामध्ये उपचार सुरु असलेल्या गुलजार बाग देगलूर नाका येथील महिलेचा आज उच्च रक्तदाब, श्वासनास त्रास आणि मधुमेह इत्यादी आजार असल्याने मृत्यू झाला. आतापर्यंत कोरोनामुळे मृत्यूमुखी पडणाऱ्यांची संख्या 9 झाली आहे. आज सायं. 5 वाजेपर्यंत प्राप्त झालेल्या एकुण 76 अहवालापैकी 72 अहवाल निगेटिव्ह प्राप्त झाले. दोन नवीन रुग्णांचा स्वॅब पॉझिटिव्ह आल्यामुळे जिल्ह्यातील कोरोना बाधितांची संख्या 192 एवढी झाली आहे. या दोन पॉझिटिव्ह व्यक्तींपैकी एक बाधित 54 वर्षे वयाचा पुरुष असून तो उमर कॉलनी येथील तर एक 55 वर्षे वयाची स्त्री आहे.

आतापर्यंत 192 बाधितांपैकी 131 बाधितांना रुग्णालयातून सुट्टी देण्यात आली असून उर्वरीत 52 बाधितांवर रुग्णालयात औषधोपचार चालू आहेत. यातील 3 बाधितांपैकी 65 वर्षे वयाची 1 स्त्री, अनुक्रमे 65 व 74 वर्षे वयाच्या दोन बाधितांची प्रकृती गंभीर स्वरुपाची आहे.

जिल्ह्यात बाधित व्यक्तींपैकी डॉ. शंकरराव चव्हाण शासकीय वैद्यकीय महाविद्यालय विष्णुपुरी नांदेड येथे 11 बाधित व्यक्तींवर, एनआरआय यात्री निवास कोविड केअर सेंटर येथे 38, मुखेड उपजिल्हा रुग्णालय येथे 2 तसेच माहूर ग्रामीण रुग्णालय कोविड केअर सेंटर 1 बाधित व्यक्तीवर तज्ज्ञ डॉक्टरांच्या निरीक्षणाखाली उपचार सुरु आहेत. सोमवार 8 जून रोजी 17 व्यक्तींचे स्वॅब तपासणीसाठी पाठविण्यात आले असून त्यांचा अहवाल उद्या सायंकाळी पर्यंत प्राप्त होतील.

जिल्ह्याची कोरोना विषयी संक्षीप्त माहिती पुढील प्रमाणे आहे. सर्वेक्षण- 1 लाख 43 हजार 392, घेतलेले स्वॅब 4 हजार 487, निगेटिव्ह स्वॅब 4 हजार 14, आज पॉझिटिव्ह स्वॅब संख्या 2, एकुण पॉझिटिव्ह बाधित व्यक्ती 192, स्वॅब तपासणी अनिर्णीत संख्या 176, स्वॅब नाकारण्यात आलेली संख्या-81, मृत्यू संख्या- 9, रुग्णालयातून सुट्टी दिलेली संख्या- 131, रुग्णालयात उपचार घेत असलेले बाधित व्यक्ती 52, स्वॅब तपासणी चालू व्यक्तींची 17 एवढी संख्या आहे.

जनतेने घाबरुन न जाता गर्दीच्या ठिकाणी जाणे टाळून सतत हात धुणे व मास्कचा वापर करणे आवश्यक आहे. हा आजार संसर्गजन्य असल्यामुळे प्रत्येक व्यक्तींने आपल्या वर्तनात बदल करुन स्वत: सुरक्षितेची अधिक काळजी घेतली पाहिजे. रोजच्या जीवनात आपण ज्या काही वस्तू बाहेरुन आणतो त्याची योग्य ती स्वच्छता केली पाहिजे. भाजीपाला घेतल्यास तो स्वच्छ करुन किमान 12 तास न वापरता स्वच्छ जागी ठेवून आपल्या आहाराप्रतीही अधिक सजग राहून नागरिकांनी दक्षाता घेण्याचे आवाहन जिल्हा शल्य चिकित्सक डॉ. निळकंठ भोसीकर यांनी केले आहे.

00000

वृत्त क्र. 519

उगवण क्षमतेची खात्री करुन

शेतकऱ्यांनी बियांणाची निवड करावी  

-         कृषि सभापती बाळासाहेब रावणगावकर 

नांदेड (जिमाका) दि. 8 :- शेतकऱ्यांनी उपलब्ध सोयाबीन बियाण्याची उगवण क्षमता तपासून पेरणी योग्य पाऊस झाल्यावर पेरणी करावी, असे आवाहन जिल्हा परिषदेचे कृषि व पशुसंवर्धन सभापती बाळासाहेब रावणगावकर  यांनी केले आहे.

खरीप हंगामासाठी  सर्व बियाणे, रासायनिक खते, औषधी अधिकृत कृषि सेवा केंद्रधारकाकडूनच शेतकऱ्यांनी घ्यावीत. तसेच बियाण्याची अंतिम मुदत बघुन घ्यावीत असेही त्यांनी प्रसिध्दीस दिलेल्या पत्रकात सांगून खालील खबरदारी घेण्याचे सूचित केले आहे.

सोयाबीन आणि कापूस बियाण्याच्या कुठल्याही एकाच कंपनीच्या वाणाची मागणी शेतकऱ्यांनी जास्त करु नये. कुठल्याही अनाधिकृत व्यक्तीकडून बियाणे, रासायनिक खते व औषधी खरेदी करणे शक्यतो टाळले पाहिजे. नांदेड जिल्हयात खरीप हंगाम सुरु असून 8 लाख 2 हजार 190 हेक्टर क्षेत्र सर्व खरीप पिकांसाठी प्रस्तावित करण्यात आले आहे. यात मुख्य सोयाबीन पिकाकरीता 3 लाख 95 हजार हेक्टर क्षेत्र प्रस्तावित आहे. त्यासाठी शासन स्तरावरुन सुचित केलेल्या बियाणे दरानुसार 1 लाख 5 हजार  क्विंटल बियाण्यांची मागणी करण्यात आली आहे. मागणीपेक्षा जास्त 1 लाख 20 हजार  क्विंटल सोयाबीन पुरवठा झालेल्या तसेच कापूस पिकाकरीता जिल्हयाचे 2 लाख 3 हजार  हेक्टर क्षेत्र प्रस्तावित आहे. त्या करीता 9 लाख 65 हजार पॉकीटची मागणी करण्यात आली आहे. जिल्हयात कापूस पिकाचे बियाणे सुध्दा मागणी पेक्षा जास्त 10 लाख 50 हजार  पॉकीटे उपलब्ध झाले आहेत.

खरेदी केलेल्या बियाण्याचे वेस्टन किंवा पिशवी, टॅग, खरेदीची पावती व त्यातील थोडे बियाणे पिकाची कापणी होईपर्यंत जपून ठेवावे. जिल्हयात बियाणे, रासायनिक खते व औषधी यांच्या विषयी काही तक्रार असल्यास तालुकास्तरावर कृषि विभाग व पंचायत समिती कृषि विभाग यांचेकडे तसेच जिल्हा स्तरावर कृषि विभाग जिल्हा परिषद नांदेड व जिल्हा अधिक्षक कृषि अधिकारी कार्यालयास संपर्क करावा.

                                                       0000